Ezekiel 18

Ilonggo (Ang Biblia (1982))

← Chapter 17 Jump to: Chapter 19 →

1Nag-abut liwat sa akon ang polong sang Ginoo:

2“Ano bala ang buut ninyo isiling nga nagagamit kamo sining hulubaton nahanungud sa duta sang Israel, ‘Ang mga ginikanan nakakaon sing maaslum nga mga uvas, kag ang mga ngipon sang mga anak nagangilo’?

3Sa nagakabuhi ako, nagasiling ang Ginoong Dios, wala na kamo sing kahigayonan sa paggamit sining hulubaton sa Israel.

4Yari karon, ang tanan nga kalag akon; subong sang kalag sang amay amo man ang kalag sang anak akon: ang kalag nga nagapakasala mapatay.

5“Apang kon ang tawo matarung kag nagahimo sang sono sa kasogoan kag katadlongan—

6kon wala sia makakaon sa mga bukid ukon makabayaw sang iya mga mata sa mga diosdios sang panimalay sang Israel, ukon makadagta sang asawa sang iya isigkatawo ukon makapalapit sa babayi sa iya pagkahigko,

7kon wala makasayup sa bisan kay sin-o, kondi nakauli sa nakautang sang iya inugpalig-on, nga wala makakuha paagi sa pangawat, nga nakahatag sang iya kalan-on sa mga gutum kag nakatabon sa hubo sing panapton,

8nga wala makahatag sing sakaan ukon makakuha sing bisan anong dugang, nga nagpugung sang iya kamut gikan sa kalautan, nga naghikut sing totoo nga katarungan sa tunga sang tawo kag tawo,

9nga naglakat sa akon mga palatukuran, kag nagbantay sa akon mga pagsolondan sa paghisayo sing minatuud—matarung sia, sa pagkamatuud magakabuhi sia, nagasiling ang Ginoong Dios.

10“Kon amay sia sang anak nga lalaki nga makawat, manugpatulo sang dugo, kag naghimo sing bisan isa sining mga butang,

11nga wala nagahimo sang bisan ano sadtong mga katungdanan, kondi nagkaon pa sa mga bukid, kag nagdagta sang asawa sang iya isigkatawo,

12nga nagpigus sang makalolooy kag nawad-an, nga nakakuha sa pangawat, nga wala makauli sang inugpalig-on, kag nakabayaw sang iya mga mata sa mga diosdios, nakahimo sing kangil-aran,

13nga nakahatag sing sakaan, kag nakabaton sing dugang; mabuhi bala niyan sia? Indi sia mabuhi. Nakahimo sia sini tanan nga kangil-aran; sa pagkamatuud mapatay sia; ang iya dugo manginsa iya.

14“Apang kon amay sia sang anak nga lalaki nga nakakita sang tanan nga sala nga nahimo sang iya amay, kag nagakahadluk, kag wala nagahimo sang kaangay,

15nga wala makakaon sa mga bukid ukon makabayaw sang iya mga mata sa mga diosdios sang panimalay sang Israel, nga wala makadagta sang asawa sang iya isigkatawo,

16ukon makasayup sa bisan kay sin-o, nga wala makakuha sang bisan ano nga inugpalig-on, ukon makakuha sa pangawat, kondi nakahatag sing kalan-on sa gutum kag nakatabon sing panapton sa hubo,

17nga nagpugung sang iya kamut gikan sa mga imol, nga wala magbaton sing saka ukon dugang, nga naghikut sang akon mga pagsolondan, kag naglakat sa akon mga palatukuran; indi sia mapatay tungud sang kalautan sang iya amay; sa pagkamatuud magakabuhi sia.

18Nahanungud sa iya amay, bangud nga nagpigus sia sing mapintas, nagpangawat sa iya utud, kag naghimo sang indi maayo sa tunga sang iya katawohan, yari karon, mapatay sia sa iya kalautan.

19“Apang nagasiling kamo, ‘Ngaa bala wala nagaantus ang anak sang kalautan sang amay?’ Kon ang anak nakahimo sang sono sa kasogoan kag katadlongan, kag nakabantay sang tanan kong palatukuran kag nahimo sila, sa pagkamatuud magakabuhi sia.

20Ang kalag nga nagapakasala mapatay. Ang anak indi mag-antus sang kalautan sang amay, kag ang amay indi mag-antus sang kalautan sang anak; ang pagkamatarung sang matarung manginsa iya, kag ang pagkamalaut sang malauton manginsa iya.

21“Apang kon ang malauton magtalikod sa tanan niyang sala nga nahimo kag magbantay sang tanan nakon nga palatukuran kag maghimo sang sono sa kasogoan kag katadlongan, sa pagkamatuud magakabuhi sia; indi sia mapatay.

22Wala gid sang iya mga paglalis nga nahimo nga dumdumon batok sa iya; sa pagkamatarung nga nahimo niya magakabuhi sia.

23May kahamuut bala ako sa kamatayon sang malauton, nagasiling ang Ginoong Dios, kag indi bala hinonoo nga magtalikod sia gikan sa iya dalanon kag magkabuhi?

24Apang kon ang matarung magtalikod sa iya pagkamatarung kag nagahimo sing kalautan kag nagahimo sono sa tanan nga kangil-aran nga ginahimo sang malauton nga tawo, magakabuhi bala sia? Wala gid sing dumdumon sang iya matarung nga mga buhat nga nahimo niya; sa iya paglapas nga ginlapas kag sa sala nga ginpakasal-an niya, sa ila mapatay sia.

25“Apang nagasiling kamo, ‘Ang dalanon sang Ginoo indi alangay.’ Pamatii karon, O panimalay sang Israel: Indi bala alangay ang akon dalanon? Indi bala nga ang inyo mga dalanon di-alangay?

26Kon ang matarung nga tawo nagatalikod sa iya pagkamatarung kag nagahimo sing kalautan, mapatay sia sa sini; sa kalautan nga ginhimo niya mapatay sia.

27Liwat, kon ang malauton nga tawo magtalikod sa iya pagkamalaut nga ginhimo kag maghimo sang sono sa kasogoan kag katadlongan, maluwas niya nga buhi ang iya kalag.

28Bangud nga nagapatugsiling sia kag nagatalikod sa tanan niyang paglalis nga ginhimo, sa pagkamatuud mabuhi sia, indi sia mapatay.

29Apang nagasiling ang panimalay sang Israel, ‘Ang dalanon sang Ginoo indi alangay.’ O panimalay sang Israel, indi bala alangay ang akon mga dalanon? Indi bala nga ang inyo mga dalanon di-alangay?

30“Busa hukman ko ikaw, O panimalay sang Israel, ang tagsatagsa sono sa iya mga dalanon, nagasiling ang Ginoong Dios. Balik kamo kag magtalikod kamo sa tanan ninyo nga paglalis, sa amo ang kalautan mangin-indi kalaglagan ninyo.

31Ipilak gikan sa inyo ang tanan ninyong paglalis diin kamo naglalis, kag maghimo nga sa inyo sing bag-ong tagiposoon kag bag-ong espiritu! Ngaa bala mapatay kamo, O panimalay sang Israel?

32Kay wala ako sing kalipay sa kamatayon ni bisan sin-o, nagasiling ang Ginoong Dios; busa liso kamo, kag magkabuhi.”

← Chapter 17 Jump to: Chapter 19 →