Ezekiel 30

Ilonggo (Ang Biblia (1982))

← Chapter 29 Jump to: Chapter 31 →

1Ang polong sang Ginoo nag-abut liwat sa akon:

2“Anak sang tawo, itagna, kag isiling, Amo ini ang ginasiling sang Ginoong Dios: “Haya kamo, ‘Ay tungud sa adlaw!’

3Kay malapit na ang adlaw, ang adlaw sang Ginoo malapit na; mangin-adlaw ini sang mga gal-um, ang tion sang mga pungsud.

4Ang espada magaabut sa Egipto, kag ang pagkagha manginsa Etiopia, kon mapukan sa Egipto ang mga pinatay, kag dalhon nila ang kadam-an niya, kag gub-on ang iya mga sadsaran.

5Ang Etiopia, kag ang Put, kag ang Lud, kag ang tanan nga katawohan nga nagsalakut, kag ang Cub, kag ang katawohan sang duta nga nagkasugut, mapukan upud sa ila sa espada.

6“Amo ini ang ginasiling sang Ginoo: Mapukan man ang mga nagasakdag sa Egipto, kag ang bugal sang iya gahum magapaidalum; kutub sa torre sang Sevene mapukan sila sa iya sa espada, nagasiling ang Ginoong Dios.

7Kag manginmamingaw sila sa tunga sang mamingaw nga mga duta kag ang iya kabanwaanan manginsa tunga sang kabanwaanan nga nawagwag.

8Niyan makilala nila nga Ako amo ang Ginoo, kon matutdan ko ang Egipto, kag ang tanan niya nga kabulig malaglag.

9“Sa sadto nga adlaw magagowa gikan sa akon atubangan ang mga manugbalita sa mga sakayan sa pagpahadluk sang mapatumbayaon nga mga Etiopiahanon; kag may pagkagha sa ila subong sang sa adlaw sang Egipto; kay, yari karon, nagaabut ini!

10“Amo ini ang ginasiling sang Ginoong Dios: Walaon ko man ang kadam-an sang Egipto, paagi sa kamut ni Nabucodonosor nga hari sang Babilonia.

11Sia kag ang iya katawohan upud sa iya, ang mga makakulugmat sang mga pungsud, pasudlon sa paglaglag sang duta; kag gabuton nila ang ila mga espada batok sa Egipto, kag hil-ubon nila ang duta sing mga pinatay.

12Kag pamalahon ko ang Nilo, kag ibaligya ang duta sa kamut sang mga tawo nga malaut: pamingawon ko ang duta kag ang tanan nga yara sa iya, paagi sa kamut sang mga dumoloong; Ako, ang Ginoo, nagpamolong sini.

13“Amo ini ang ginasiling sang Ginoong Dios: Laglagon ko man ang mga diosdios, kag walaon ko ang mga larawan, gikan sa Memphis; manginwala na sing principe gikan sa duta sang Egipto; kag butangan ko sing kahadluk sa duta sang Egipto.

14Pamingawon ko ang Patros, kag tutdan ko sing kalayo ang Zoan, kag magahikot sing mga paghukom sa No.

15Kag iula ko ang akon kasingkal sa Sin, ang pamakud sang Egipto, kag utdon ko ang kadam-an sang No.

16Kag tutdan ko sing kalayo ang Egipto; ang Sin manginsa daku nga pagkagha; ang No bungkagon, kag ang Memphis manginmay mga kasumpung sa adlawon.

17Ang mga pamatan-on nga lalaki sang Aven kag sang Pi-beset mapukan sa espada; kag ini sila magakadto sa kabihagan.

18Sa Tafnes man ang adlaw magadulum, kon balion ko didto ang gota sang Egipto, kag ang bugal sang iya gahum matapus sa iya; ang gal-um magatabon sa iya, kag ang iya mga anak nga babayi magakadto sa kabihagan.

19Sa sini hikoton ko ang mga paghukom sa Egipto. Niyan makilala nila nga Ako amo ang Ginoo.”

20Sa ikapulo kag isa nga tuig, sa nahauna nga bulan, sa ikapito nga adlaw sang bulan, nag-abut sa akon ang polong sang Ginoo:

21“Anak sang tawo, ginbali ko ang butkon ni Faraon nga hari sang Egipto; kag yari karon, wala mabugkosi ini, sa pagbutang sing mga bolong sa pagbugkos sini, agud magbakud sia sa pag-uyat sang espada.

22Busa amo ini ang ginasiling sang Ginoong Dios: Yari karon, ako batok kay Faraon nga hari sang Egipto, kag magabali sang iya mga butkon, ang mabakud nga butkon kag ang nabali; kag pahologon ko ang espada gikan sa iya kamut.

23Paaplaagon ko ang mga Egiptohanon sa tunga sang mga pungsud, kag laptahon ko sila sa kadutaan.

24Kag pabakuron ko ang mga butkon sang hari sang Babilonia, kag ibutang ang akon espada sa iya kamut: apang balion ko ang mga butkon ni Faraon, kag magaugayong sia sa atubangan niya sa mga pag-ugayong sang tawo nga napilasan sing ikamatay.

25Bayawon ko ang mga butkon sang hari sang Babilonia, apang maholog ang mga butkon ni Faraon; kag makilala nila nga Ako amo ang Ginoo. Kon ibutang ko ang akon espada sa kamut sang hari sang Babilonia, untayon niya ini sa duta sang Egipto;

26kag paaplaagon ko ang mga Egiptohanon sa tunga sang mga pungsud kag laptahon sila sa kadutaan. Niyan makilala nila nga Ako amo ang Ginoo.”

← Chapter 29 Jump to: Chapter 31 →