Ezekiel 37

Ilonggo (Ang Biblia (1982))

← Chapter 36 Jump to: Chapter 38 →

1Ang kamut sang Ginoo sa ibabaw nakon, kag ginpagowa niya ako paagi sa Espiritu sang Ginoo, kag ginbutang ako sa tunga sang nalupyakan; puno ini sang mga tul-an.

2Kag ginpaagi niya ako sa ila palibut; kag yari karon, may madamu gid sa kadaygan sang nalupyakan; kag yari karon, mamala gid sila.

3Kag nagsiling sia sa akon, “Anak sang tawo, mabuhi bala ining mga tul-an?” Kag nagsabat ako, “O Ginoong Dios, ikaw nakahibalo.”

4Sa liwat nagsiling sia sa akon, “Tagna sa sini nga mga tul-an, kag isiling sa ila, O kamo nga mga tul-an nga mamala, pamatii ang polong sang Ginoo.

5Amo ini ang ginasiling sang Ginoong Dios sa sining mga tul-an: Yari karon, pasudlon ko ang ginhawa sa inyo, kag mabuhi kamo.

6Kag butangan ko kamo sing mga kusug, kag patuboon ang unud sa inyo, kag putson kamo sing panit, kag pasudlan kamo sing ginhawa, kag mabuhi kamo; kag makilala ninyo nga Ako amo ang Ginoo.”

7Gani nagtagna ako sono sa ginsogo sa akon; kag sang nagtagna ako, may kagahud, kag yari karon, isa ka linog; kag ang mga tul-an nag-alangut, ang tul-an sa tul-an.

8Kag sang gintan-aw ko, may mga kusug sa ila, kag ang unud nagtubo, kag ang panit nagputus sa ila sa ibabaw; apang wala sing ginhawa sa ila.

9Niyan nagsiling sia sa akon, “Tagna sa hangin, tagna, anak sang tawo, kag isiling sa hangin, Amo ini ang ginasiling sang Ginoong Dios: Kari gikan sa apat ka hangin, O ginhawa, kag magginhawa sa sining mga pinatay, agud nga mabuhi sila.”

10Gani nagtagna ako sono sa ginsogo sa akon, kag nagsulud ang ginhawa sa ila, kag nabuhi sila, kag nagtindug sa ila mga tiil, lakas ka daku nga hangaway.

11Niyan nagsiling sia sa akon, “Anak sang tawo, ining mga tul-an amo ang bug-os nga panimalay sang Israel. Yari karon, nagasiling sila, ‘Ang amon mga tul-an mamala, kag ang amon paglaum nadula; nautas gid kami.’

12Busa tagna, kag isiling sa ila, Amo ini ang ginasiling sang Ginoong Dios: “Yari karon, buksan ko ang inyo mga lulubngan, kag pagowaon kamo sa inyo mga lulubngan, O akon katawohan; kag pasudlon ko kamo sa duta sang Israel.

13Kag makilala ninyo nga Ako amo ang Ginoo, kon mabuksan ko ang inyo mga lulubngan, kag mapagowa kamo sa inyo mga lulubngan, O akon katawohan.

14Kag pasudlon ko ang akon Espiritu sa inyo, kag mabuhi kamo, kag ibutang ko kamo sa inyo kaugalingon nga duta; niyan makilala ninyo nga ako, ang Ginoo, nagpamolong sini kag naghimo sini, nagasiling ang Ginoo.”

15Ang polong sang Ginoo nag-abut sa akon liwat:

16“Anak sang tawo, kuha ka sing isa ka lipak kag isulat sa sini, ‘Tungud kay Juda, kag tungud sa mga anak sang Israel nga iya mga kaupdanan’; niyan kuha sing isa pa ka lipak kag isulat sa sini, ‘Tungud kay Jose (ang lipak sang Efraim) kag sa bug-os nga panimalay sang Israel nga iya mga kaupdanan’;

17kag sugpona sila nga isa ka lipak, agud nga mangin-isa sila sa imo kamut.

18Kag kon ang imo katawohan magpamolong sa imo, ‘Indi ka bala magpahayag kon ano ang ipahangup mo tungud sini sa ila?’

19Isiling sa ila, Amo ini ang ginasiling sang Ginoong Dios: Yari karon, kuhaon ko ang lipak ni Jose (nga yara sa kamut sang Efraim) kag sang mga kabikahan sang Israel nga iya mga kaupdanan; kag ibutang ko sila upud sa lipak sang Juda, kag himoon sila nga isa ka lipak, agud nga mangin-isa sila sa akon kamut.

20Kon ang mga lipak nga ginsulatan mo yara sa imo kamut sa atubangan sang ila mga mata,

21niyan isiling sa ila, Amo ini ang ginasiling sang Ginoong Dios: Yari karon, kuhaon ko ang katawohan sang Israel gikan sa tunga sang mga pungsud diin nagkadto sila, kag tiponon ko sila sa tagsa ka luyo, kag pasudlon sila sa ila kaugalingon nga duta;

22kag himoon ko sila nga isa ka pungsud sa duta, sa kabukiran sang Israel; kag isa ka hari manginhari sa ila tanan; kag indi na sila manginduha ka pungsud, ukon bahinbahinon pa sila sa duha ka ginharian.

23Indi na sila magdagta pa sang ila kaugalingon sa ila mga diosdios ukon sa ila makangilil-ad nga mga butang, ukon sa bisan ano sang ila mga paglalis; kondi luwason ko sila sa tanan nilang puluy-an diin sila nagpakasala, kag tinloan sila; sa amo sila mangin-akon katawohan, kag ako mangin-ila Dios.

24“Ang akon alagad nga si David manginhari sa ila; kag sila tanan manginmay isa ka manugpahalab. Magalakat man sila sa akon mga pagsolondan kag magatuman sang akon mga palatukuran sa paghimo sa ila.

25Magapuyo sila sa duta nga ginhatag ko sa akon alagad nga si Jacob diin nagpuyo ang inyo mga ginikanan; magapuyo didto sila kag ang ila mga anak kag ang mga anak sang ila mga anak sa gihapon; kag ang akon alagad nga si David mangin-ila principe sa gihapon.

26Magahimo ako sing katipan sang paghidait sa ila; ini mangindayon nga katipan sa ila; kag ipahamtang ko sila kag pabuaron sila, kag ipahamtang ko ang akon santuario sa tunga nila sa gihapon.

27Ang akon kayangkayang man magaupud sa ila; kag ako mangin-ila Dios, kag sila mangin-akon katawohan.

28Niyan ang mga pungsud makakilala nga ako nga Ginoo nagapakabalaan sang Israel, kon ang akon santuario yara sa tunga nila sa gihapon.”

← Chapter 36 Jump to: Chapter 38 →