Ezekiel 25

Ilonggo (Ang Biblia (1982))

← Chapter 24 Jump to: Chapter 26 →

1Nag-abut sa akon ang polong sang Ginoo:

2“Anak sang tawo, iatubang ang imo nawung nayon sa mga anak ni Amon, kag tagna batok sa ila.

3Isiling sa mga anak ni Amon, Pamatii ang polong sang Ginoong Dios: Amo ini ang ginasiling sang Ginoong Dios, Bangud nga nagsiling ka, ‘Aha!’ batok sa akon santuario sang ginpasipalahan ini, kag batok sa duta sang Israel sang ginpamingaw ini, kag batok sa panimalay sang Juda sang nagkadto sila sa kabihagan;

4busa itugyan ko ikaw nga kaugalingon sa mga anak sang Sidlangan, kag magapahamtang sila sang ila mga dologan sa imo kag magahimo sa imo sang ila mga puluy-an; kaonon nila ang imo mga bunga, kag imnon nila ang imo gatas.

5Himoon ko ang Raba nga toril sang mga camelyo kag ang mga banwa sang mga Amonhon nga lulukhan sang mga panong. Niyan makilala ninyo nga Ako amo ang Ginoo.

6Kay amo ini ang ginasiling sang Ginoong Dios: Bangud nga nagpamalakpak ka sang imo mga kamut kag nagpudagpudag sang imo mga tiil kag nagkalipay sa bug-os nga pagtamay sang imo kalag batok sa duta sang Israel,

7busa, yari karon, gin-untay ko ang akon kamut sa imo, kag magatugyan sa imo nga inagaw sa mga pungsud; kag utdon ko ikaw gikan sa mga katawohan kag walaon ko ikaw sa kadutaan; laglagon ko ikaw. Niyan makilala mo nga Ako amo ang Ginoo.

8“Amo ini ang ginasiling sang Ginoong Dios: Bangud nga nagsiling ang Moab kag ang Seir, Yari karon, ang panimalay sang Juda kaangay sang tanan nga pungsud;

9busa buksan ko ang kilid sang Moab gikan sa kabanwaanan nga yara sa iya mga dulunan, ang himaya sang duta, ang Bet-jesimot, ang Baal-meon, kag ang Kiryataim.

10Ihatag ko ini sa mga anak sang sidlangan upud sa mga Amonhon nga kaugalingon, agud nga indi na ini madumduman sa tunga sang mga pungsud,

11kag magahikot ako sing paghukom sa Moab. Niyan makilala nila nga Ako amo ang Ginoo.

12“Amo ini ang ginasiling sang Ginoong Dios: Bangud nga ang Edom nagtimalus batok sa panimalay sang Juda kag nagpasandad sing daku kag nagpanimalus sa ila,

13busa amo ini ang ginasiling sang Ginoong Dios, Untayon ko ang akon kamut batok sa Edom, kag utdon sa iya ang tawo kag sapat; kag pamingawon ko ini; kutub sa Teman bisan tubtub sa Dedan mapukan sila sa espada.

14Kag ibutang ko ang akon pagtimalus sa Edom paagi sa kamut sang akon katawohan nga Israel; kag himoon nila sa Edom sono sa akon kaakig kag sono sa akon kasingkal; kag makilala nila ang akon pagtimalus, nagasiling ang Ginoong Dios.

15“Amo ini ang ginasiling sang Ginoong Dios: Bangud nga ang mga Filistinhon nagtimalus kag nagpanimalus nga may pagtamay sang kalag sa paglaglag sa dayon nga kasuayon;

16busa amo ini ang ginasiling sang Ginoong Dios, Yari karon, untayon ko ang akon kamut sa mga Filistinhon, kag utdon ko ang mga Ceretnon, kag laglagon ang nabilin sang baybayon.

17Magahikot ako sa ila sing daku nga pagtimalus nga may masingkal nga mga pagsabdong. Niyan makilala nila nga Ako amo ang Ginoo, kon ibutang ko ang akon pagtimalus sa ila.”

← Chapter 24 Jump to: Chapter 26 →