Ezekiel 27

Ilonggo (Ang Biblia (1982))

← Chapter 26 Jump to: Chapter 28 →

1Nag-abut liwat sa akon ang polong sang Ginoo:

2“Karon ikaw anak sang tawo, gamit ka sing panalabiton sa Tiro,

3kag isiling sa Tiro, nga nagapuyo sa salamputan sang dagat, nga manugbaligya sang mga katawohan sa madamung kapuloan, amo ini ang ginasiling sang Ginoong Dios: “Ikaw, O Tiro, nagsiling, ‘Himpit ako sa katahum.’

4Ang imo mga dulunan yara sa alibutud sang kadagatan; ang imo mga manugpatindug naghimpit sang imo katahum.

5Ginhimo nila ang tanan mong tapi gikan sa abeto nga mga kahoy sang Senir; nagkuha sila sing cedro gikan sa Libano sa paghimo nga sa imo sing palo.

6Gikan sa mga roble sang Basan naghimo sila sang imo mga gaud; ginhimo nila ang mga banko nga tiposo nga nahalup sa boj, gikan sa kapuloan sang Kitim.

7Gikan sa manipis nga lino nga binordahan gikan sa Egipto ang imo layag, agud nga mangintanda ini sa imo; asul kag purpura gikan sa kapuloan sang Elisa amo ang imo kayang.

8Ang mga pumuluyo sang Sidon kag Arvad amo ang imo mga manuggaud; ang imo mga tawo nga maalam, O Tiro, nga yara sa imo, sila amo ang imo mga manug-ulin.

9Ang mga tigulang sang Gebal kag ang iya maalam nga mga tawo yara sa imo, mga manugkalapati nimo; ang tanan nga sakayan sang dagat upud sang ila mga sakayanon yara sa imo, sa pagpatikang sang imo inugbaligya.

10“Ang Persia kag ang Lud kag ang Put yara sa imo hangaway subong nga imo mga tawo sa inaway; nagbitay sila sang taming kag pandong sa imo; ginpakita nila ang imo pagkaayoayo.

11Ang mga tawo sang Arvad upud sang imo hangaway yara sa ibabaw sang imo mga kuta palibut, kag ang isganan nga mga tawo yara sa imo mga torre; nabitay nila ang ila mga taming sa imo mga kuta palibut; ginhimpit nila ang imo katahum.

12“Ang Tarsis amo ang imo manugbaligya bangud sang kadamuon sang tanan nga sari sang mga manggad; sa pilak, sa salsalon, sa istanyo, kag sa tingga ginbaylo nila ang imo mga inugbaligya.

13Ang Javan, ang Tubal, kag ang Mesec sila ang imo mga manugpatikang; ginbaylo nila ang lawas sang mga tawo kag ang mga gamit nga saway sa imo inugbaligya.

14Sila nga gikan sa panimalay ni Togarma nagbaylo sa imo mga inugbaligya sa mga kabayo, mga kabayo sa inaway, kag sa mga mula.

15Ang mga tawo sang Dedan imo manugpatikang; ang madamu nga kapuloan palangitan-an sang imo kamut, nagdala sila sa imo sa baylo sing mga bangkil nga tiposo kag bantolinaw.

16Ang Siria manugbaligya mo bangud sang madamu nga binuhatan sang imo kamut; nagbaylo sila sa imo mga inugbaligya sing esmeralda, sing purpura, mga binordahan, manipis nga lino, banawug, kag mga rubi.

17Ang Juda kag ang duta sang Israel sila imo mga manugpatikang; nagbaylo sila sang imo inugbaligya sing trigo sang Minit, panag, dugus, lana, kag balsamo.

18Ang Damasco imo manugbaligya tungud sang kadamuon sang binuhatan sang imo kamut, bangud sang kadamuon sang tanan nga sari sang manggad; ang alak sang Helbon, kag sang bulbul nga maputi,

19ang Vedan kag ang Javan nagbaylo sing binolong sa imo mga inugbaligya; ang salsalon nga sinalsal, ang casia, kag ang calamo nalakip sa imo inugbaligya.

20Ang Dedan imo manugpatikang sa bilidhon nga mga panapton nga hampilo.

21Ang Arabia kag ang tanan nga principe sang Cedar, sila amo ang mga manugbaligya nga imo pangamut sa mga cordero, sa mga carnero nga lalaki, kag sa mga kanding; sa sini imo sila nga mga manugbaligya.

22Ang mga manugpatikang sang Saba kag Raama sila imo mga manugpatikang; nagbaylo sila sa imo mga inugbaligya sing ali sang tanan nga pahumut, kag tanan nga bilidhon nga bato, kag bulawan.

23Ang Haran, ang Cane, ang Eden, nga mga manugpatikang sang Saba, ang Asur, kag ang Kilmad imo mga manugpatikang.

24Ini sila imo mga manugpatikang sa pili nga mga inugbaligya, sa mga inugkunup nga asul kag mga binordahan, kag sa mga kaban sang mga panapton sa nagakalainlain nga duag, nga nahigtan sing mga lubid kag nahimo sa cedro; sa sini imo sila mga manugpatikang.

25Ang mga sakayan sang Tarsis amo ang imo mga lulanan sang imo inugbaligya. “Gani ikaw napuno kag nabug-atan sa tunga sang kadagatan.

26Ang mga manuggaud nagdala sa imo sa dalagkung mga tubig. Ang salatan nagguba sa imo sa tunga sang kadagatan.

27Ang imo mga manggad, ang imo mga kasangkapan, ang imo inugbaligya, ang imo mga sakayanon kag ang imo mga manug-ulin, ang mga manugkalapati, ang mga manugbaligya sang imo inugbaligya, kag ang tanan mong tawo sa inaway nga yara sa imo, pati ang bug-os mong kabon nga yara sa tunga nimo, mapukan sa tunga sang kadagatan sa adlaw sang imo kalaglagan.

28Sa kagahud sang singgit sang imo mga manug-ulin ang mga kaingud magatay-ug,

29kag magapanaug sa ila sakayan ang tanan nga nagauyat sang gaud. Ang mga sakayanon kag ang tanan nga manug-ulin sang dagat magatindug sila sa duta

30kag magapabati sang ila tingug sa imo, kag magahibi sing mapait. Magasabwag sing yab-ok sa ila mga olo kag magatubog sila sa mga abo;

31magapangiskis sila sang ila kaugalingon tungud sa imo, kag magatampion sila sing panapton nga sako, kag tungud sa imo magahibi sila nga may kapait sa kalag, sa paglalaw nga mapait.

32Sa ila paghaya magagamit sila sing panalabiton tungud sa imo, kag magapanalabiton sa imo: ‘Sin-o bala ang ginlaglag kaangay sa Tiro nga ginpahipus sa tunga sang dagat?

33Sang naggowa sa kadagatan ang imo mga kasangkapan, ginpuno mo ang madamung katawohan; ginpamanggad mo ang mga hari sang duta sa kadam-an sang imo mga manggad kag inugbaligya.

34Karon naguba ka sang kadagatan, sa mga kadadalman sang mga tubig; ang imo inugbaligya kag ang bug-os mong kabon napukan sa tunga nimo.

35Ang tanan nga pumuluyo sang kapuloan nabulong sa imo; kag ang ila mga hari nahadluk sing makakulugmat, naligban sila sa ila nawung.

36Ang mga manugbaligya sa mga katawohan nagapanagutsut sa imo; nanginkakugmat ka kag mawala ka sing dayon.’”

← Chapter 26 Jump to: Chapter 28 →