Ezekiel 47

Ilonggo (Ang Biblia (1982))

← Chapter 46 Jump to: Chapter 48 →

1Niyan ginpabalik niya ako sa ganhaan sang templo; kag yari karon, ang mga tubig nag-ilig gikan sa idalum sang atangan sang templo nayon sa sidlangan (kay ang atubangan sang templo nayon sa sidlangan); kag ang mga tubig nagagikan sa idalum gikan sa kilid nga too sang templo, sa bagatnan sang halaran.

2Niyan ginpagowa niya ako paagi sa alagyan sang gawang paaminhan, kag gin-ubayan niya ako palibut sa alagyan sa gowa pakadto sa gawang nga nagowa, paagi sa alagyan sang gawang nga nagaatubang nayon sa sidlangan; kag may mga tubig nga nagagowa sa kilid nga too.

3Sang naggowa ang lalaki pa sidlangan nga may latid sa iya kamut, nagtakus sia sing isa ka libo ka maniko, kag ginpaobog niya ako sa mga tubig; mga tubig nga tagabukobuko.

4Liwat nagtakus sia sing isa ka libo, kag ginpaobog niya ako sa mga tubig; mga tubig nga tagatuhud. Liwat nagtakus sia sing isa ka libo, kag ginpaobog niya ako sa mga tubig; mga tubig nga tagahawak.

5Ugaling nagtakus sia sing isa ka libo, kag ini suba nga indi ko maobog, kay ang mga tubig nagdalum; mga tubig nga lalangoyon, suba nga indi maobog.

6Kag nagsiling sia sa akon, “Anak sang tawo, nakita mo bala ini?” Niyan gindala niya ako pabalik sa pangpang sang suba.

7Karon sang nakabalik ako sa pangpang sang suba may tama kadamu nga kahoy sa pihak kag pihak.

8Niyan nagsiling sia sa akon, “Ini nga mga tubig nagailig nayon sa sidlangan nga bahin kag magailig pakadto sa Araba; kag kon magkadto ini sa malang-og nga mga tubig sang dagat, ang tubig magatab-ang.

9Kag ang tagsa ka buhi nga tinuga nga nagadagaya mabuhi sa tagsa ka duug nga malambutan sang mga suba, kag may tama gid kadamu nga isda; kay ini nga mga tubig nagalambut didto, agud nga ang mga tubig sang dagat magatab-ang; gani mabuhi ang tagsa ka butang nga malambutan sang suba.

10Magatindug sa ubay sini ang mga mangingisda; kutub sa En-gadi tubtub sa En-eglaim manginduug nga humlaran sang mga pukot; ang ila mga isda mangin-madamu gid nga sari, subong sang isda sang Daku nga Dagat.

11Apang ang iya mga duug nga malunang kag ang iya mga danawan indi magtab-ang; itugyan sila sa asin.

12Kag sa ubay sang suba sa iya mga pangpang, sa pihak kag pihak nga kilid, magatubo ang tagsa ka kahoy nga kalan-on. Ang ila dahon indi malayong ukon mag-untat ang ila bunga, kondi magapamunga ini sing bag-o sa tagsa ka bulan, bangud nga ang ila mga tubig nagagikan sa santuario. Ang ila bunga manginkalan-on, kag ang ila dahon inugbolong.”

13Amo ini ang ginasiling sang Ginoong Dios: “Ini amo ang dulunan nga bahinbahinon ninyo ang duta nga panublion sono sa napulo kag duha ka kabikahan ni Israel. Si Jose may duha ka bahin.

14Kag panublion ninyo ini ang isa subong sa isa; kay ginsumpa ko nga ihatag ini sa inyo mga ginikanan, kag ini nga duta maholog sa inyo nga panublion.

15“Amo ini ang dulunan sang duta: Nayon sa aminhan, kutub sa Daku nga Dagat sa dalanon sang Hetlon tubtub sa salamputan sang Sedad,

16ang Hamat, ang Berota, ang Sibraim (nga yara sa ulut sang dulunan sang Damasco kag sang Hamat), ang Haser-haticon, nga yara sa luyo sang dulunan sang Hauran.

17Gani ang dulunan magapadayon kutub sa dagat pa Hazer-enon, sa naaminhan nga dulunan sang Damasco, sa dulunan sang Hamat pa aminhan. Ini amo ang sa aminhan nga kilid.

18“Sa nasidlangan, magapadayon ang dulunan kutub sa Hazar-enon sa ulut sang Hauran kag Damasco; sa ubay sang Jordan sa ulut sang Galaad kag sang duta sang Israel; tubtub sa dagat nga nasidlangan kag tubtub sa Tamar. Ini amo ang nasidlangan.

19“Ang sa nabagatnan nayon, magapadayon ini kutub sa Tamar tubtub sa mga tubig sang Meribot Cades, tubtub sa Sapa sang Egipto padayon sa Dakung Dagat. Ini amo ang nabagatnan.

20“Ang sa nakatundan nayon, ang Dakung Dagat amo ang dulunan tubtub sa tampad sang salamputan sang Hamat. Ini amo ang nakatundan.

21“Sa sini bahinbahinon ninyo ining duta sa inyo sono sa mga kabikahan ni Israel.

22Bahinbahinon ninyo ini sa papalad nga panublion sa inyo kag sa mga dumoloong nga nagapanlugayaw sa tunga ninyo nga magapanganak sa tunga ninyo. Sila manginsubong sang tumanduk sa inyo sa tunga sang mga anak sang Israel; magaangkon sila sing panublion upud sa inyo sa tunga sang mga kabikahan ni Israel.

23Sa bisan anong kabikahan nagapanlugayaw ang dumoloong, didto hatagan ninyo sia sang iya panublion, nagasiling ang Ginoong Dios.

← Chapter 46 Jump to: Chapter 48 →