Ezekiel 39

Ilonggo (Ang Biblia (1982))

← Chapter 38 Jump to: Chapter 40 →

1“Kag ikaw, anak sang tawo, itagna batok kay Gog, kag isiling, Amo ini ang ginasiling sang Ginoong Dios: Yari karon, batok ako sa imo, O Gog, principe sang Ros, sang Mesec, kag sang Tubal;

2kag palisoon ko ikaw kag tuytuyan ko ikaw, kag pataklaron ko ikaw gikan sa naukbung gid nga mga bahin sang aminhan, kag dalhon ko ikaw sa mga bukid sang Israel;

3niyan hampakon ko ang imo pana sa imo kamut nga wala, kag pahologon ang imo mga baslay gikan sa imo kamut nga too.

4Sa ibabaw sang mga bukid sang Israel mapukan ka, ikaw kag ang tanan mo nga mga guban kag ang mga katawohan nga nagaupud sa imo; ihatag ko ikaw sa tagsa ka sari sang mga pispis nga mananagit kag sa kasapatan sang latagon nga halunhonon.

5Mapukan ka sa wayang; kay napamolong ko ini, nagasiling ang Ginoong Dios.

6Padal-an ko sing kalayo ang Magog kag ang mga nagapuyo sing malig-on sa kapuloan; kag makilala nila nga Ako amo ang Ginoo.

7“Kag ipakilala ko ang akon balaan nga ngalan sa tunga sang akon katawohan nga Israel; kag indi ko na pag-itugut nga pasipalahan ang akon balaan nga ngalan; kag makilala sang mga pungsud nga Ako amo ang Ginoo, ang Balaan sa Israel.

8Yari karon, nagaabut kag himoon ini, nagasiling ang Ginoong Dios. Ini amo ang adlaw nga ginpamolong ko.

9“Niyan ang mga nagapuyo sa kabanwaanan sang Israel magagowa kag magadabok sing mga kalayo sang mga hinganiban kag sonogon sila, ang mga taming kag ang mga kalasag, ang mga pana kag ang mga baslay, ang mga bakulo kag ang mga bangkaw, kag idabok nila sila sing mga kalayo sing pito ka tuig;

10sa bagay nga indi sila magpangahoy gikan sa latagon ukon magpamulud gikan sa mga talon, kay idabok nila sing kalayo nga mga hinganiban; atihon nila ang mga nag-ati sa ila, kag kawatan nila ang mga nagpangawat sa ila, nagasiling ang Ginoong Dios.

11“Sa sadto nga adlaw ako magahatag kay Gog sing lulubngan sa Israel, ang nalupyakan sang mga nagaagi sa sidlangan sang dagat; magapadolog ini sa mga nagaagi, kay didto nila ilubung si Gog kag ang bug-os niya nga kadam-an; kag hingadlan nila ini Ang Nalupyakan ni Hamon-gog.

12Ang panimalay sang Israel magalubung sa ila sing pito ka bulan, agud nga matinloan nila ang duta.

13Ang bug-os nga katawohan sang duta magalubung sa ila; kag ini manginkabantugan sa ila sa adlaw nga himayaon ako, nagasiling ang Ginoong Dios.

14Magapain sila sing mga tawo nga may dalayon nga buluhaton nga magalatas sang duta kag upud sa ila nga nagalatas ang mga nagalubung sang mga nabilin sa kadaygan sang duta, sa pagtinlo sini; sa tapus sang pito ka bulan magausisa sila.

15Kag ang mga nagalatas sa duta magalatas kag kon ang bisan sin-o nga makakita sing tul-an sang tawo, niyan magapatindug sia sing tanda sa luyo sini, tubtub nga malubung ini sang mga manuglubung sa Nalupyakan ni Hamon-gog.

16(Ang ngalan sang banwa mangin-Hamona man.) Amo ini ang pagtinlo nila sang duta.

17“Kag ikaw, anak sang tawo, amo ini ang ginasiling sang Ginoong Dios: Ipamolong sa tagsa ka sari sang kapispisan kag sa tagsa ka sapat sang latagon, ‘Magtingub kamo kag magkari, tilipon kamo sa tagsa ka luyo sa akon halad nga ginahalad ko tungud sa inyo, ang daku nga halad sa mga bukid sang Israel, agud nga makakaon kamo sing unud kag makainum sing dugo.

18Magakaon kamo sing unud sang mga gamhanan, kag magainum sang dugo sang mga principe sang duta—sang mga carnero nga lalaki, sang mga cordero, sang mga kanding, sang mga tinday nga baka nga lalaki, tanan sila pinatambok sang Basan.

19Kag magakaon kamo sing tambok tubtub nga mabusug kamo, magainum sing dugo tubtub nga mahobog kamo, sang akon halad nga gin-ihaw ko tungud sa inyo.

20Kag sa akon latok mabusug kamo sang mga kabayo kag kangga, sang mga tawo nga gamhanan kag sang tanan nga tawo sang inaway,’ nagasiling ang Ginoong Dios.

21“Kag ibutang ko ang akon himaya sa tunga sang mga pungsud; kag ang tanan nga pungsud makakita sang akon paghukom nga ginhikot ko, kag sang akon kamut nga ginpahamtang ko sa ibabaw nila.

22Gani ang panimalay sang Israel magakilala nga Ako amo ang Ginoo nga iya Dios, kutub sadto nga adlaw kag padayon.

23Kag makilala sang mga pungsud nga ang panimalay sang Israel gindala sa kabihagan tungud sang ila kalautan, bangud nga naglapas sila sa akon kag ginlipdan ko sa ila ang akon nawung kag gintugyan ko sila sa kamut sang ila mga kasumpung, kag napukan sila tanan sa espada.

24Sono sa ila pagkadimatinlo kag sono sa ila mga paglalis ginhimo ko sa ila, kag ginlipdan ko ang akon nawung gikan sa ila.

25“Busa amo ini ang ginasiling sang Ginoong Dios: Karon pahaulian ko ang kabihagan ni Jacob, kag magakalooy ako sa bug-os nga panimalay sang Israel; kag magakaimon ako tungud sa akon balaan nga ngalan.

26Antuson nila ang ila kahuluy-an, kag ang tanan nila nga paglapas nga ginhimo nila batok sa akon, kon sila magapuyo sing malig-on sa ila duta nga wala gid sing magapahadluk sa ila,

27kon mapabalik ko sila gikan sa mga katawohan kag matipon sila gikan sa mga duta sang ila mga kaaway, kag mapakabalaan ako sa ila sa itololok sang madamu nga pungsud.

28Niyan makilala nila nga Ako amo ang Ginoo nga ila Dios bangud nga ginpabihag ko sila sa tunga sang mga pungsud, kag gintipon nila sa ila kaugalingon nga duta. Wala na gid ako sing ibilin sa ila didto;

29kag indi ko na paglipdan sa ila ang akon nawung, kay naula ko ang akon Espiritu sa panimalay sang Israel, nagasiling ang Ginoong Dios.”

← Chapter 38 Jump to: Chapter 40 →