Ezekiel 10

Ilonggo (Ang Biblia (1982))

← Chapter 9 Jump to: Chapter 11 →

1Niyan nagtolok ako, kag yari karon, sa kahawaan nga yara sa ibabaw sang olo sang mga querubin may nagpahayag sa ibabaw nila nga daw bato nga zafiro, subong sang dagway sang kaangay sang trono.

2Kag nagpamolong sia sa lalaki nga napanaptan sing lino, “Sulud ka sa ulut sang mga aliling nga nagatiyog sa idalum sang querubin; pun-a ang imo duha ka kamut sang mga baga sang kalayo gikan sa ulut sang mga querubin, kag isabwag sila sa banwa.” Kag nagsulud sia sa akon panolok.

3Karon ang mga querubin nagtindug sa too nga higad sang balay, sang nagsulud ang lalaki; kag ang gal-um nagpuno sang luwang nga nasulud.

4Kag ang himaya sang Ginoo naghayaw gikan sa querubin kag nagdolog sa ibabaw sang atangan sang balay; kag ang balay napuno sang gal-um, kag ang luwang napuno sang kasilaw sang himaya sang Ginoo.

5Kag ang kagahud sang mga pakpak sang mga querubin nabatian bisan tubtub sa luwang nga nagowa, subong sang tingug sang Dios nga Makaako sang nagapamolong sia.

6Kag sang ginsogo niya ang lalaki nga napanaptan sing lino, “Kuha ka sing kalayo sa ulut sang mga aliling nga nagatiyog, gikan sa ulut sang mga querubin,” nagsulud sia kag nagtindug sa luyo sang isa ka aliling.

7Kag ang querubin nag-untay sang iya kamut gikan sa ulut sang mga querubin nayon sa kalayo nga yara sa ulut sang mga querubin, kag nagkuha didto, kag ginbutang ini sa mga kamut sang tawo nga napanaptan sing lino, nga nagbaton sini kag naggowa.

8Nagpahayag didto sa mga querubin ang dagway sang kamut sang tawo sa idalum sang ila mga pakpak.

9Kag nagtolok ako, kag yari karon, apat ka aliling sa luyo sang mga querubin, isa ka aliling sa luyo sang isa ka querubin; kag isa ka aliling sa luyo sang isa ka querubin; kag ang dagway sang mga aliling kaangay sa bato nga crisolito.

10Kag nahanungud sang ila dagway, sila nga apat alangay, subong nga ang isa ka aliling yara sa sulud sang isa ka aliling.

11Sang naglakat sila, naglakat sila sa ila apat ka kilid nga wala sila nagaliso sang naglakat sila, kondi sa duug diin nagtolok ang olo nagsonod sila sini nga wala nagliso sang naglakat sila.

12Kag ang bug-os nila nga lawas, ang ila mga likod, kag ang ila mga kamut, kag ang ila mga pakpak, kag ang mga aliling hil-ob sing mga mata palibut —ang mga aliling nila nga apat.

13Nahanungud sang mga aliling, gintawag sila sa akon palamatin-an nga nagatiyog nga mga aliling.

14Kag ang tagsatagsa may apat ka nawung: ang nahauna nga nawung amo ang nawung sang querubin, ang nawung nga ikaduha amo ang nawung sang tawo, kag ang ikatlo nawung sang leon, kag ang ikap-at nawung sang aguila.

15Kag nagtimbook ang mga querubin. Ini amo ang sapat nga buhi nga nakita ko sa ubay sang suba nga Kebar.

16Kag sang naglakat ang mga querubin, naglakat ang mga aliling sa luyo nila; kag sang ginbayaw sang mga querubin ang ila mga pakpak sa pagtimbook gikan sa duta, ang mga aliling man wala magliso sa luyo nila.

17Sang pagdolog nila, ini sila nagdolog, kag sang sila nagtimbook, ini sila nagtimbook upud sa ila; kay ang espiritu sang sapat nga buhi yara sa ila.

18Niyan ang himaya sang Ginoo naggowa gikan sa ibabaw sang atangan sang balay, kag nagdolog sa ibabaw sang mga querubin.

19Kag ang mga querubin nagbayaw sang ila mga pakpak kag nagtimbook gikan sa duta sa akon panolok sang paggowa nila, kag ang mga aliling sa luyo nila; kag nagdolog sila sa ganhaan sang gawang nga nasidlangan sang balay sang Ginoo; kag ang himaya sang Dios sang Israel yara sa ibabaw nila.

20Ini amo ang sapat nga buhi nga nakita ko sa idalum sang Dios sang Israel sa ubay sang suba nga Kebar; kag nakilala ko nga sila mga querubin.

21Ang tagsatagsa may apat ka nawung, kag ang tagsatagsa may apat ka pakpak, kag ang kaangay sa mga kamut sang tawo yara sa idalum sang ila mga pakpak.

22Kag nahanungud sa kaangay sang ila mga nawung, amo sila ang mga nawung nga ang ila dagway nakita ko sa ubay sang suba nga Kebar. Naglakat sila ang tagsatagsa sing tadlong paatubang.

← Chapter 9 Jump to: Chapter 11 →