Ezekiel 20 — Ilonggo (Ang Biblia (1982))

1Sa ikapito nga tuig, sa ikalima nga bulan, sa ikapulo nga adlaw sang bulan, pila sang mga tigulang sang Israel nag-abut sa pagpamangkot sa Ginoo, kag naglingkod sa atubangan nakon.

2Kag nag-abut sa akon ang polong sang Ginoo:

3“Anak sang tawo, ipamolong sa mga tigulang sang Israel, kag isiling sa ila, Amo ini ang ginasiling sang Ginoong Dios, sa pagpamangkot sa akon bala nagakari kamo? Sa nagakabuhi ako, nagasiling ang Ginoong Dios, indi ako magtugut nga pamangkoton ninyo.

4Hukman mo bala sila, anak sang tawo, hukman mo bala sila? Pakilalaha sila sang mga kangil-aran sang ila mga ginikanan,

5kag isiling sa ila, Amo ini ang ginasiling sang Ginoong Dios: Sa adlaw nga ginpili ko ang Israel, nagsumpa ako sa kaliwat sang panimalay ni Jacob, nga nagpakilala sang akon kaugalingon sa ila sa duta sang Egipto, nagsumpa ako sa ila, nga nagasiling, Ako amo ang Ginoo nga inyo Dios.

6Sa sadtong adlaw nagsumpa ako sa ila sa pagpagowa sa ila sa duta sang Egipto pakadto sa duta nga gin-usisa ko tungud sa ila, nga nagailig sing gatas kag dugus, nga amo ang himaya sang tanan nga duta.

7Kag nagsiling ako sa ila, Ipilak sang tagsa ka tawo ang mga kangil-aran sang iya mga mata, kag dili pagdagtai ang inyo kaugalingon sa mga diosdios sang Egipto; Ako amo ang Ginoo nga inyo Dios.

8Apang nagbato sila sa akon kag indi sila magpamati sa akon; wala sila ang tagsa ka tawo magpilak sang mga kangil-aran sang ila mga mata, ukon magbiya sang mga diosdios sang Egipto. “Niyan nagsiling ako nga iula ko ang akon kasingkal sa ila sa pagtuman sang akon kaakig sa ila sa tunga sang duta sang Egipto.

9Apang ginhimo ko tungud sa akon ngalan, agud nga indi pagpasipalahan ini sa itololok sang mga pungsud nga sa tunga nila yara sila, nga sa ila itololok ginpakilala ko sa ila ang akon kaugalingon sa pagpagowa sa ila gikan sa duta sang Egipto.

10Gani ginpagowa ko sila sa duta sang Egipto kag gindala sila sa kamingawan.

11Ginhatag ko sa ila ang akon mga palatukuran, kag ginpahayag ko sa ila ang akon mga pagsolondan, nga kon himoon sang tawo magakabuhi sia sa ila.

12Labut pa ginhatag ko man sa ila ang akon mga inugpahuway, nga mangintanda sa tunga nakon kag nila, agud nga makilala nila nga ako nga Ginoo nagpakabalaan sa ila.

13Apang nagbato sa akon ang panimalay sang Israel sa kamingawan; wala sila maglakat sa akon mga palatukuran kag ginsikway nila ang akon mga pagsolondan, nga kon bantayan sang tawo magakabuhi sia sa ila; kag ginpasipalahan nila sing daku ang akon mga inugpahuway. “Niyan nagsiling ako nga iula ko sa ila ang akon kasingkal sa kamingawan, sa pagpapas sa ila.

14Apang ginhimo ko tungud sa akon ngalan, agud nga indi pagpasipalahan ini sa itololok sang mga pungsud, nga sa ila itololok ginpagowa ko sila.

15Labut pa nagsumpa man ako sa ila sa kamingawan nga indi ko sila pagpasudlon sa duta nga ginhatag ko sa ila, nga nagailig sing gatas kag dugus, nga amo ang himaya sang tanan nga duta,

16bangud nga ginsikway nila ang akon mga pagsolondan kag wala maglakat sa akon mga palatukuran, kag nagpasipala sang akon mga inugpahuway; kay ang ila mga tagiposoon nagsonod sa ila mga diosdios.

17Wala sing sapayan ang akon mata nagpasaylo sa ila, kag wala ko sila paglaglaga ukon gintapus ko sila sing bug-os sa kamingawan.

18“Kag nagsiling ako sa ila mga anak sa kamingawan, Dili kamo maglakat sa palatukuran sang inyo mga ginikanan, ukon magbantay sang ila mga pagsolondan, ukon magdagta sang inyo kaugalingon sa ila mga diosdios.

19Ako nga Ginoo amo ang inyo Dios; lakat sa akon mga palatukuran, kag bantayi ang akon mga pagsolondan kag himoa sila,

20kag pakabalaana ang akon mga inugpahuway, agud nga mangintanda sila sa tunga nakon kag ninyo, agud nga makilala ninyo nga ako nga Ginoo amo ang inyo Dios.

21Apang ang mga anak nagbato sa akon; wala sila maglakat sa akon mga palatukuran, ukon magbantay sang akon mga pagsolondan sa paghimo sa ila, nga kon himoon sang tawo magakabuhi sia sa ila; ginpasipalahan nila ang akon mga inugpahuway. “Niyan nagsiling ako nga iula ko ang akon kasingkal sa ila sa pagtuman sang akon kaakig batok sa ila sa kamingawan.

22Wala sing sapayan ginpunggan ko ang akon kamut, kag naghimo tungud sa akon ngalan, agud nga indi pagpasipalahan ini sa itololok sang mga pungsud, nga sa ila itololok ginpagowa ko sila.

23Labut pa nagsumpa ako sa ila sa kamingawan nga paaplaagon ko sila sa tunga sang mga pungsud kag palaptahon sila sa mga duta,

24bangud nga wala sila maghikot sang akon mga pagsolondan, kondi nagsikway sang akon mga palatukuran kag nagpasipala sang akon mga inugpahuway, kag ang ila mga mata nagsonod sa mga diosdios sang ila mga ginikanan.

25Labut pa naghatag ako sa ila sing mga palatukuran nga indi maayo kag mga pagsolondan nga tungud sa ila indi sila magkabuhi;

26kag gindagtaan ko sila sa ila mga dolot sa bagay nga ginapaagi nila sa kalayo ang tanan nga panganay, agud nga mapamingaw ko sila; sa katuyoan ini nga makilala nila nga Ako amo ang Ginoo.

27“Busa, anak sang tawo, ipamolong sa panimalay sang Israel kag isiling sa ila, Amo ini ang ginasiling sang Ginoong Dios: Liwat sa sini ginpasipalahan ako sang inyo mga ginikanan, sa bagay nga naglapas sila batok sa akon.

28Kay sang ginpasulud ko sila sa duta nga ginsumpa ko nga ihatag sa ila, niyan nakita nila ang tagsa ka mataas nga bakolod kag ang tagsa ka madabung nga kahoy, kag didto gindolot nila ang ila mga halad kag didto ginpaatubang nila ang pagpaakig sang ila halad; didto man ginhimo nila ang ila kaamyon, kag gin-ula nila didto ang ila mga halad-nga-ilimnon.

29(Nagsiling ako sa ila, Ano bala ang kahologan sang mataas nga duug diin nagakadto kamo? Gani ginhingalanan ini Bama tubtub sini nga adlaw.)

30Busa isiling sa panimalay sang Israel, Amo ini ang ginasiling sang Ginoong Dios: Nagadagta bala kamo sang inyo kaugalingon sono sa pagginawi sang inyo mga ginikanan kag nagamakihilawason kamo sono sa ila mga kangil-aran?

31Kon maghalad kamo sang inyo mga dolot kag magpaagi kamo sang inyo mga anak sa kalayo, nagapadagta kamo sa tanan ninyong diosdios tubtub sining adlaw. Kag magatugut bala ako nga pamangkoton ninyo, O panimalay sang Israel? Sa nagakabuhi ako, nagasiling ang Ginoong Dios, indi ako magtugut nga pamangkoton ninyo.

32“Ina nga nagasulud sa inyo painoino indi mahanabu—nagasiling kamo, ‘Manginsubong kami sang mga pungsud, subong sang mga panimalay sang mga duta, sa pag-alagad sa kahoy kag bato.’

33“Sa nagakabuhi ako, nagasiling ang Ginoong Dios, sa pagkamatuud sa kamut nga gamhanan kag sa butkon nga inuntay, kag sa kasingkal nga inula, magahari ako sa inyo.

34Pagowaon ko kamo gikan sa mga katawohan kag tiponon kamo gikan sa mga duta diin kamo ginpaaplaag, sa gamhanan nga kamut kag sa butkon nga inuntay, kag sa kasingkal nga inula;

35kag pasudlon ko kamo sa kamingawan sang mga katawohan, kag didto magasulud ako sa hukmanan upud sa inyo sa nawung kag nawung.

36Kaangay sa pagsulud ko sa hukmanan upud sa inyo mga ginikanan sa kamingawan sang duta sang Egipto, sa amo magasulud ako sa hukmanan upud sa inyo, nagasiling ang Ginoong Dios.

37Paagihon ko kamo sa idalum sang bilogon, kag pasudlon ko kamo sa higot sang katipan.

38Hugason ko gikan sa inyo ang mga mabinatoon, kag ang mga naglalis batok sa akon; pagowaon ko sila gikan sa duta diin sila nagapanlugayaw, apang indi sila makasulud sa duta sang Israel. Niyan makilala ninyo nga Ako amo ang Ginoo.

39“Nahanungud sa inyo, O panimalay sang Israel, amo ini ang ginasiling sang Ginoong Dios: Lakat kag alagdon sang tagsatagsa ang iya mga diosdios, karon kag sa olihi man, kon indi kamo magpamati sa akon; apang ang akon balaan nga ngalan indi na ninyo pagpasipalahan sa inyo mga dolot kag sa inyo mga diosdios.

40“Kay sa akon balaan nga bukid, sa bukid sang kataasan sang Israel, nagasiling ang Ginoong Dios, didto ang bug-os nga panimalay sang Israel, tanan sila, magaalagad sa akon sa duta; didto batonon ko sila, kag didto kinahanglanon ko ang inyo mga dolot kag ang nahaunang mga bunga sang inyo mga halad, upud sang tanan ninyong balaan nga butang.

41Subong nga kaamyon batonon ko kamo, kon pagowaon ko kamo gikan sa mga katawohan, kag tiponon kamo gikan sa mga duta diin ginpaaplaag kamo; kag pakabalaanon ako sa inyo sa itololok sang mga pungsud.

42Kag makilala ninyo nga Ako amo ang Ginoo, kon mapasulud ko kamo sa duta sang Israel, sa duta nga ginsumpa ko nga ihatag sa inyo mga ginikanan.

43Kag didto madumduman ninyo ang inyo mga dalanon kag ang tanan ninyong hinimoan diin gindagtaan ninyo ang inyo kaugalingon; kag kangil-aran ninyo ang inyo kaugalingon sa inyo gid itololok tungud sang tanan ninyong malaut nga inyo nahimo.

44Kag makilala ninyo nga Ako amo ang Ginoo, kon makahisayo ako sa inyo tungud sa akon ngalan, indi sono sa inyo malaut nga mga dalanon, ukon sono sa inyo dunut nga mga hinimoan, O kamo nga panimalay sang Israel, nagasiling ang Ginoong Dios.”

45“Kag nag-abut sa akon ang polong sang Ginoo:

46“Anak sang tawo, Iatubang ang imo nawung nayon sa bagatnan, magwali batok sa bagatnan, kag tagna batok sa talon sang latagon sa Bagatnan;

47isiling sa talon sang Bagatnan, Pamatii ang polong sang Ginoo: Amo ini ang ginasiling sang Ginoong Dios, Yari karon, magapadabdab ako sing kalayo sa imo, kag magahalunhon ini sang tagsa ka hilaw nga kahoy sa imo kag sang tagsa ka kahoy nga laya; indi mapalong ang dabdab nga nagadabadaba, kag ang tanan nga nawung kutub sa bagatnan pa aminhan masonog paagi sini.

48Ang tanan nga unud makakita nga ako nga Ginoo nagpadabdab sini; indi ini mapalong.”

49Niyan nagsiling ako, “Ay Ginoong Dios! nagasiling sila nahanungud sa akon, ‘Indi bala sia manugpamolong sang mga paanggid?’”