Ezekiel 14

Ilonggo (Ang Biblia (1982))

← Chapter 13 Jump to: Chapter 15 →

1Niyan nag-abut sa akon ang pila sang mga tigulang sang Israel, kag naglingkod sa atubangan nakon.

2Kag nag-abut sa akon ang polong sang Ginoo nga nagasiling:

3“Anak sang tawo, ining mga tawo nagpasulud sang ila mga diosdios sa ila tagiposoon, kag nagbutang sang kasandaran sang ila kalautan sa atubangan sang ila nawung; magpakigsayud bala sila nga mas-a sa akon?

4Busa ipamolong sa ila, kag isiling sa ila, Amo ini ang ginasiling sang Ginoong Dios: Ang tagsa ka tawo sang panimalay sang Israel nga nagapasulud sa iya tagiposoon sang iya mga diosdios kag nagabutang sing kasandaran sa iya kalautan sa atubangan sang iya nawung, kag nagakadto sa manalagna, ako nga Ginoo magasabat sa iya sa sini sono sa kadamuon sang iya mga diosdios,

5agud nga madakup ko ang panimalay sang Israel sa ila kaugalingon nga tagiposoon, kay tanan sila nahamulag sa akon paagi sa ila mga diosdios.

6“Busa isiling sa panimalay sang Israel, Amo ini ang ginasiling sang Ginoong Dios: Balik kag talikod kamo sa inyo mga diosdios; kag italingi ang inyo mga nawung gikan sa tanan ninyong kalangil-aran.

7Kay ang tagsatagsa sang panimalay sang Israel, ukon sang mga dumoloong nga nagapanlugayaw sa Israel, nga nagabulag sa akon, kag nagapasulud sa iya tagiposoon sang mga diosdios kag nagabutang sing kasandaran sang iya kalautan sa atubangan sang iya nawung, kag nagakadto sa manalagna sa pagpakisayud nga sa iya kaugalingon gikan sa akon, ako gid nga Ginoo magasabat sa iya;

8kag ituhoy ko ang akon nawung batok sinang tawo, himoon sia nga kabulungan nga tanda kag hulubaton kag utdon ko sia gikan sa tunga sang akon katawohan; kag makilala ninyo nga Ako amo ang Ginoo.

9Kag kon limbongan ang manalagna, kag maghambal sing polong, ako, ang Ginoo, naglimbong sinang manalagna, kag untayon ko ang akon kamut sa iya, kag laglagon sia gikan sa tunga sang akon katawohan nga Israel.

10Kag sila magaantus sang ila kalautan—ang kalautan sang manalagna manginkasubong sang kalautan sang nagapakisayud sa iya—

11agud nga ang panimalay sang Israel indi na magtalang gikan sa akon, ukon magdagta pa sang ila kaugalingon sa tanan nilang paglalis, kondi nga sila mangin-akon katawohan, kag ako mangin-ila Dios, nagasiling ang Ginoong Dios.”

12Kag nag-abut sa akon ang polong sang Ginoo:

13“Anak sang tawo, kon ang duta makasala batok sa akon sa paghimo sing paglapas, kag untayon ko ang akon kamut sa sini, kag balion sa iya ang sakdag nga kalan-on kag magpadala sa iya sing tiggulutum, kag utdon sa iya ang tawo kag ang sapat,

14bisan ining tatlo ka lalaki, si Noe, si Daniel, kag si Job, yara sa iya, maluwas lamang nila ang ila kaugalingon nga mga kalag tungud sang ila pagkamatarung, nagasiling ang Ginoong Dios.

15Kon paagihon ko ang malaut nga mga sapat sa duta, kag laglagon nila ini, kag magmingaw ini, sa bagay nga wala sing makaagi bangud sang mga sapat;

16bisan ining tatlo ka lalaki yara sa iya, sa nagakabuhi ako, nagasiling ang Ginoong Dios, indi nila maluwas ang mga anak nga lalaki, kag ang mga anak nga babayi; sila lamang ang maluwas, apang ang duta manginmamingaw.

17Ukon kon dalhon ko ang espada sa duta, kag magsiling, Latason sang espada ang duta; sa bagay nga utdon ko sa iya ang tawo kag sapat;

18bisan ining tatlo ka lalaki yara sa iya, sa nagakabuhi ako, nagasiling ang Ginoong Dios, indi nila maluwas ang mga anak nga lalaki ukon ang mga anak nga babayi, kondi sila gid lamang ang maluwas.

19Ukon kon ipadala ko ang kamatay sa sinang duta, kag iula ang akon kasingkal sa iya sa dugo, sa pag-utud gikan sa iya sang tawo kag sapat;

20bisan yara sa iya si Noe, si Daniel, kag si Job, sa nagakabuhi ako, nagasiling ang Ginoong Dios, indi nila maluwas ang anak nga lalaki ukon ang anak nga babayi; maluwas lamang nila ang ila kaugalingon nga mga kalag tungud sang ila pagkamatarung.

21“Kay amo ini ang ginasiling sang Ginoong Dios: Daw ano pa kon ipadala ko ang akon apat ka mangitngit nga paghukom sa Jerusalem, ang espada, ang tiggulutum, ang malaut nga mga sapat, kag ang kamatay, sa pag-utud sa iya sang tawo kag sapat!

22Apang, kon may mabilin sa iya nga salin nga magdala pagowa sang mga anak nga lalaki kag mga anak nga babayi, kon magagowa sila pakadto sa inyo, kag makita ninyo ang ila dalanon kag ang ila mga hinimoan, lipayon kamo nahanungud sang malaut nga gindala ko sa Jerusalem, sang tanan nga gindala ko sa iya.

23Magalipay sila sa inyo, kon makita ninyo ang ila dalanon kag ang ila mga hinimoan; kag makilala ninyo nga wala ako maghimo sa walay kabangdanan sang tanan nga nahimo ko sa iya, nagasiling ang Ginoong Dios.”

← Chapter 13 Jump to: Chapter 15 →