Ezekiel 4

Ilonggo (Ang Biblia (1982))

← Chapter 3 Jump to: Chapter 5 →

1“Ikaw man, anak sang tawo, kuha ka sing tisa kag ibutang ini sa atubangan mo, kag ikudlit sa ibabaw sini ang isa ka banwa, bisan ang Jerusalem;

2kag kibona ini, kag magpatindug sing mga pamakud batok sini, kag maghimo sing trinsira batok sini; magpahamtang sing mga dologan man batok sini, kag magbugsok sing mga bungkol batok sini sa palibut.

3Kag kuha ka nga sa imo sing isa ka panid nga salsalon, kag ibutang ini nga kuta nga salsalon sa tunga mo kag sang banwa; kag ipahamtang ang imo nawung nayon sini, kag manginkinibon ini, kag kibonon mo ini. Ini mangintanda sa panimalay sang Israel.

4“Niyan higda ka sa imo kilid nga wala, kag ipahamtang sa ibabaw sini ang kalautan sang panimalay sang Israel; sono sa kadamuon sang mga adlaw nga paghigda mo sa ibabaw sini, dalhon mo ang kalautan nila.

5Kay gintangdo ko ang mga tuig sang ila kalautan sono sa kadamuon sang mga adlaw sa imo, tatlo ka gatus kag kasiaman ka adlaw; sa sini dalhon mo ang kalautan sang panimalay sang Israel.

6Kag liwat kon matuman mo ini sila, maghigda ka sa imo kilid nga too, kag dalhon ang kalautan sang panimalay sang Juda; kap-atan ka adlaw gintangdo ko sa imo, ang tagsa ka adlaw sa isa ka tuig.

7Kag ipahamtang mo ang imo nawung nayon sa pagkibon sang Jerusalem, nga hublas ang imo butkon; kag magtagna ka batok sa iya.

8Kag, yari karon, ginabutang ko sa imo ang mga gapus, agud nga indi ka maglisoliso gikan sa isa ka kilid pa isa, tubtub nga matuman mo ang mga adlaw sang imo pagkibon.

9“Kag ikaw, kuha sing trigo kag sebada, mga kusiparon kag mga lentejas, dawa kag espelta, kag ibutang sila sa isa ka suludlan, kag maghimo ka sing tinapay gikan sa ila. Sono sa kadamuon sang mga adlaw nga maghigda ka sa imo kilid, tatlo ka gatus kag kasiaman ka adlaw, magkaon ka sini.

10Kag ang pagkaon nga kaonon mo manginsa timbang, duha ka pulo ka siclo sa isa ka adlaw; kaonon mo ini sa tion kag tion.

11Kag mag-inum ka sing tubig nga sinukub, ang ikan-um nga bahin sang isa ka hin; mag-inum ka sini sa tion kag tion.

12Kag kaonon mo ini subong sang kalan-onon nga sebada, bibingkahon mo ini sa ila itololok upud sang tai sang tawo.”

13Kag ang Ginoo nagsiling, “Subong gid sini ang katawohan sang Israel magakaon sing dimatinlo sang ila tinapay sa tunga sang mga pungsud diin sobolon ko sila.”

14Niyan nagsiling ako, ‘Ah Ginoong Dios! yari karon, ang akon kalag wala madagtai; kay kutub sa akon pagkapamatan-on tubtub karon wala ako makakaon sang napatay sa iya kaugalingon ukon kinusnit sang mga sapat, kag walay makangilil-ad nga unud nga nagsulud sa akon baba.”

15Niyan nagsiling sia sa akon, “Tan-awa, ginhatagan ko ikaw sing ipot sang baka sa baylo sang tai sang tawo, kag mag-aman ka sang imo tinapay sa sini.”

16Labut pa nagsiling sia sa akon, “Anak sang tawo, yari karon, balion ko ang sakdag nga tinapay sa Jerusalem; magakaon sila sing tinapay sa timbang kag may kahadluk; kag magainum sila sing tubig sa sinukub kag sa kahangawa.

17Himoon ko ini agud nga mawad-an sila sing tinapay kag tubig, kag mahangawa sa isa kag isa, kag magakag-as sa ila kalautan.

← Chapter 3 Jump to: Chapter 5 →