Ezekiel 8

Ilonggo (Ang Biblia (1982))

← Chapter 7 Jump to: Chapter 9 →

1Sa ikan-um nga tuig, sa ikan-um nga bulan, sa ikalima nga adlaw sang bulan, sa nagalingkod ako sa akon balay, kag ang mga tigulang sang Juda nagalingkod sa atubangan nakon, ang kamut sang Ginoong Dios nagtupa sa akon didto.

2Niyan nakita ko, kag, yari karon, ang kaangay sa dagway sang kalayo; kutub sa dagway sang iya mga hawak kag paidalum kalayo, kag kutub sa iya mga hawak kag paibabaw subong sang dagway sang kasilaw, nga daw metal nga nagabaga.

3Gin-untay niya ang dagway sang kamut, kag gin-uyatan niya ako sa nagabunghay nga bohok sang akon olo; kag ang Espiritu nagbayaw sa akon sa ulut sang duta kag langit, kag gindala ako sa mga palanan-awon sang Dios sa Jerusalem, sa ganhaan sang gawang sang nasulud nga luwang nga nagaatubang sa aminhan, diin ang lingkoran sang larawan sang kaimon, nga nagapaimon.

4Kag yari karon, didto ang himaya sang Dios sang Israel, sono sa dagway nga nakita ko sa kapatagan.

5Niyan nagsiling sia sa akon, “Anak sang tawo, bayawa ang imo mga mata karon sa dalanon pa aminhan.” Gani ginbayaw nakon ang akon mga mata sa dalanon pa aminhan, kag yari karon, nayon sa aminhan sang gawang sang halaran yari ining larawan sang kaimon sa salamputan.

6Kag nagsiling sia sa akon, “Anak sang tawo, nakita mo bala ang ginahimo nila, ang dalagku nga mga kalangil-aran nga ginahimo diri sang panimalay sang Israel, nga magpapalyo ako sa akon santuario? Apang makita mo pa liwat ang iban nga dalagku nga mga kalangil-aran.”

7Kag gindala niya ako sa ganhaan sang luwang; kag sang nagtolok ako, yari karon, may boho sa kuta.

8Niyan nagsiling sia sa akon, “Anak sang tawo, kutkut ka karon sa kuta”; kag sang nakakutkut ako sa kuta, yari karon, isa ka ganhaan.

9Kag nagsiling sia sa akon, “Sulud, kag tan-awa ang malaut nga mga kalangil-aran nga ginahimo nila diri.”

10Gani nagsulud ako kag nakakita; kag yari karon, ang tagsa ka dagway sang nagasaug nga mga butang, kag mga sapat nga kalangil-aran, kag tanan nga diosdios sang panimalay sang Israel ginkurit sa kuta palibut.

11Kag didto nagtindug sa atubangan nila ang kapitoan ka lalaki sang mga tigulang sang panimalay sang Israel, kag sa tunga nila nagtindug si Jaazanias nga anak ni Safan. Ang tagsa ka tawo may iya nga incensario sa iya kamut, kag ang kahumut sang gal-um sang incienso nagtub-ok.

12Niyan nagsiling sia sa akon, “Anak sang tawo, nakita mo bala ang ginhimo sang mga tigulang sang panimalay sang Israel sa kadudulman, ang tagsa ka tawo sa iya mga hulut sang larawan? Kay nagasiling sila, ‘Wala makakita sa amon ang Ginoo, ginbayaan sang Ginoo ang duta.’”

13Nagsiling man sia sa akon, “Makakita ka pa liwat sing iban pa nga dalagku nga mga kalangil-aran nga ginahimo nila.”

14Niyan gindala niya ako sa ganhaan sang naaminhan nga gawang sang balay sang Ginoo; kag yari karon, didto nagalingkod ang mga babayi nga nagahibi kay Tamuz.

15Niyan nagsiling sia sa akon, “Nakita mo bala ini, O anak sang tawo? Makakita ka pa liwat sing dalagku nga mga kalangil-aran sang sa sini.”

16Kag gindala niya ako sa nasulud nga luwang sang balay sang Ginoo; kag yari karon, sa ganhaan sang templo sang Ginoo, sa ulut sang portico kag sang halaran, may mga duha ka pulo kag lima ka lalaki, nga ang ila mga likod nayon sa templo sang Ginoo, kag ang ila mga nawung nayon sa sidlangan, nga nagasimba sila sang adlaw nayon sa sidlangan.

17Niyan nagsiling sia sa akon, “Nakita mo bala ini, O anak sang tawo? Mamag-an nga butang bala sa panimalay ni Juda nga nagahimo sila sang mga kalangil-aran nga ginahimo nila diri, kay ginpuno nila ang duta sing panlugus, kag nagbalik sa pagpaakig sa akon? Yari karon, ginbutang nila ang sanga sa ila ilong.

18Busa magahisayo man ako sa kasingkal; indi magpasaylo ang akon mata, ukon magakaawa ako; kag bisan magasinggit sila sa akon mga idulungug sa mabaskug nga tingug, apang indi ko sila pagpamatian.”

← Chapter 7 Jump to: Chapter 9 →