Ezekiel 45

Ilonggo (Ang Biblia (1982))

← Chapter 44 Jump to: Chapter 46 →

1“Kon magbahinbahin kamo sa papalad sang duta nga panublion, magdolot kamo sing halad sa Ginoo sing isa ka balaan nga bahin sang duta, ang kalabaon amo ang kalabaon sang duha ka pulo kag lima ka libo ka tabon-ak kag napulo ka libo ang kasangkaron; ini manginbalaan sa bug-os niya nga dulunan palibut.

2Sa sini manginmay sa balaan nga duug nga lima ka gatus ang kalabaon sa lima ka gatus ang kasangkaron kasilo palibut, kag kalim-an ka maniko sa iya halalban palibut.

3Kag sa sini nga takus magtakus ka sing kalabaon nga duha ka pulo kag lima ka libo kag kasangkaron nga napulo ka libo, kag sa sini manginyara ang santuario, nga amo ang labi gid ka balaan.

4Ini balaan nga bahin sang duta; mangin-iya ini sang mga sacerdote, ang mga alagad sang santuario nga nagapalapit sa pag-alagad sa Ginoo; kag manginduug ini nga sa ila mga balay kag balaan nga duug nga sa santuario.

5Duha ka pulo kag lima ka libo sa kalabaon kag napulo ka libo sa kasangkaron, mangin-iya sang mga Levinhon ang mga manug-alagad sa templo, nga kaugalingon nila nga duha ka pulo ka hulut.

6“Itangdo ninyo nga kaugalingon sang banwa ang lima ka libo ang kasangkaron, kag duha ka pulo kag lima ka libo ang kalabaon, nga iping sa halad sang balaan nga bahin; ini manginsa bug-os nga panimalay sang Israel.

7“Kag ang iya sang principe manginsa isa ka kilid diri kag sa pihak nga kilid sang balaan nga halad kag sang kaugalingon sang banwa, sa atubangan sang balaan nga halad kag sa atubangan sang kaugalingon sang banwa, sa kilid nga nakatundan nayon sa katundan kag sa kilid nga nasidlangan nayon sa sidlangan, kag sa kalabaon nga sibo sa isa sang mga bahin kutub sa dulunan sa katundan tubtub sa dulunan sa sidlangan.

8Sa duta mangin-iya ini kaugalingon sa Israel. Kag ang akon mga principe dili na magpigus sang akon katawohan; kondi ihatag nila ang duta sa panimalay sang Israel sono sa ila mga kabikahan.

9“Amo ini ang ginasiling sang Ginoong Dios: Tuman na kamo, O mga principe sang Israel! Kuhaa ang panglugus kag pang-agaw, kag hikota ang katarungan kag pagkamatarung; kuhaa ang inyo mga pagsukot sa akon katawohan, nagasiling ang Ginoong Dios.

10“Maghuput kamo sing mga timbangan nga matarung, efa nga matarung, kag bat nga matarung.

11Ang efa kag ang bat mangin-isa sing takus, agud nga ang bat makasulud sang ikapulo nga bahin sang homer, kag ang efa sang ikapulo nga bahin sang homer; ang ila takus manginsono sa homer.

12Ang siclo manginduha ka pulo ka gera; duha ka pulo ka siclo, duha ka pulo kag lima ka siclo, kag napulo kag lima ka siclo, mangin-inyo mina.

13“Ini amo ang halad nga idolot ninyo: ang ikan-um nga bahin sang efa sa isa ka homer nga trigo, kag ihatag ninyo ang ikan-um nga bahin sang efa gikan sa isa ka homer nga sebada,

14kag ang pat-ud nga bahin sang lana, gikan sa bat nga lana, ang ikapulo nga bahin sang bat gikan sa isa ka koro (ang koro, kaangay sa isa ka homer, nagasulud sing napulo ka bat);

15kag isa ka cordero gikan sa panong nga duha ka gatus, gikan sa hunubhunub nga halalban sang Israel. Ini nga sa halad-nga-kalan-on, sa halad-nga-sinonog, kag nga sa mga halad-sa-paghidait, sa paghimo sing katumbasan tungud sa ila, nagasiling ang Ginoong Dios.

16Ang bug-os nga katawohan sang duta maghatag sini nga halad tungud sa principe sa Israel.

17Manginbahin ini sang principe sa paghatag sang mga halad-nga-sinonog, sang mga halad-nga-kalan-on, kag sang mga halad-nga-ilimnon, sa mga piesta, sa mga lati, kag sa mga inugpahuway, sa tanan nga pinat-ud nga mga piesta sang panimalay sang Israel: sia magaaman sang halad-tungud-sa-sala, sang halad-nga-kalan-on, sang halad-nga-sinonog, kag sang mga halad-sa-paghidait, sa paghimo sing katumbasan tungud sa panimalay sang Israel.

18“Amo ini ang ginasiling sang Ginoong Dios: Sa nahauna nga bulan, sa nahauna nga adlaw sang bulan, magkuha ka sing tinday nga baka nga lalaki nga wala sing kasawayan, kag tinloan mo ang santuario.

19Ang sacerdote magkuha sa dugo sang halad-tungud-sa-sala kag ipalhit ini sa mga bakalan sang templo, sa apat ka pamusud sang panalgan sang halaran, kag sa mga haligi sang gawang sang nasulud nga luwang.

20Amo ini ang himoon mo sa ikapito nga adlaw sang bulan tungud sa tagsatagsa nga nakasayup kag sa bunayag; sa sini magahimo kamo sing katumbasan tungud sa templo.

21“Sa nahauna nga bulan, sa ikapulo kag apat nga adlaw sang bulan, hiwaton ninyo ang piesta sang pascua, kag sa pito ka adlaw ang tinapay nga wala sing tapay kaonon.

22Sa sadto nga adlaw ang principe mag-aman nga sa iya kaugalingon kag tungud sa bug-os nga katawohan sang duta sing tinday nga baka nga lalaki nga halad-tungud-sa-sala.

23Kag sa pito ka adlaw sang piesta magaaman sia sing halad-nga-sinonog sa Ginoo nga pito ka tinday nga baka nga lalaki kag pito ka carnero nga lalaki nga wala sing kasawayan, adlawadlaw sa pito ka adlaw; kag lalaki nga kanding adlawadlaw nga halad-tungud-sa-sala.

24Kag mag-aman sia sing halad-nga-kalan-on nga isa ka efa nga sa isa ka tinday nga baka nga lalaki, isa ka efa nga sa isa ka carnero nga lalaki, kag isa ka hin nga lana sa isa ka efa.

25Sa ikapito nga bulan, sa ikapulo kag lima nga adlaw sang bulannkag sa pito ka adlaw sang piesta, himoon niya ang kaangay sono sa halad-tungud sa-sala, sa halad-nga-sinonog, kag sono sa halad-nga-kalan-on, kag sono sa lana.

← Chapter 44 Jump to: Chapter 46 →