Ezekiel 43

Ilonggo (Ang Biblia (1982))

← Chapter 42 Jump to: Chapter 44 →

1Sang olihi gindala niya ako sa gawang, ang gawang nga nagaatubang nayon sa sidlangan.

2Kag yari karon, ang himaya sang Dios sang Israel nag-abut gikan sa alagyan sang sidlangan; kag ang iya tingug kaangay sang huganas sang madamung tubig; kag ang duta nagbanaag sang iya himaya.

3Kag ang palanan-awon nga nakita ko, kaangay sa palanan-awon nga nakita ko sang nag-abut sia sa paglaglag sang banwa, kag kaangay sang palanan-awon nga nakita ko sa ubay sang suba nga Kebar; kag naghapa ako.

4Sang ang himaya sang Ginoo nagsulud sa templo paagi sa alagyan sang gawang nga nagaatubang nayon sa sidlangan,

5ginbayaw ako sang Espiritu, kag ginpasulud ako sa luwang nga nasulud; kag yari karon, ang himaya sang Ginoo nagpuno sang templo.

6Nabatian ko ang isa nga nagapamolong sa akon gikan sa balay, samtang ang tawo nagtindug sa luyo nakon;

7kag nagsiling sia sa akon, “Anak sang tawo, ini duug sang akon trono, kag duug sang mga dapadapa sang akon mga tiil, diin nagapuyo ako sa tunga sang katawohan sang Israel sa gihapon. Kag indi na magdagta ang panimalay sang Israel sang akon balaan nga ngalan, bisan sila, ukon ang ila mga hari, paagi sa ila mga pagkamakihilawason, kag paagi sa mga bangkay sang ila mga hari sa ila mataas nga mga duug,

8sa pagpaiping nila sang ila atangan sa akon atangan kag sang ila bakalan sa iping sang akon bakalan, kag kuta lamang ang sa ulut nakon kag nila. Gindagtaan nila ang akon balaan nga ngalan paagi sa ila mga kangil-aran nga ginhimo nila, busa ginpapas ko sila sa akon kaakig.

9Karon ipasikway sa ila ang ila pagkamakihilawason kag ang mga bangkay sang ila mga hari sing malayo sa akon, kag magapuyo ako sa tunga nila sa gihapon.

10“Ikaw, anak sang tawo, ipahayag sa panimalay sang Israel ang templo kag ang dagway kag ang huwaran sini; agud mahuya sila sang ila mga kalautan.

11Kag kon mahuya sila sang tanan nga ila nahimo, ipakilala sa ila ang dagway sang templo, ang pagpahamtang sa iya, ang iya mga golowaan kag ang iya mga salamputan, kag ang tanan niyang dagway; kag ipakilala sa ila ang tanan niyang pagsolondan, kag tanan niyang kasogoan; kag isulat ini sa ila itololok, agud nga bantayan nila kag tumanon ang tanan niyang kasogoan kag ang tanan niyang pagsolondan.

12Ini amo ang kasogoan sang templo: sa putokputokan sang bukid ang bug-os niyang dulunan sa palibut manginbalaan gid. Yari karon, ini amo ang kasogoan sang templo.

13“Ini sila amo ang mga takus sang halaran sa mga maniko (ang maniko isa ka maniko kag isa ka dapal): ang sadsaran isa ka maniko, kag isa ka maniko ang kasangkad, kag ang iya sanipa sa iya kolod palibut mga isa ka dangaw. Kag amo ini ang palatungan sang halaran:

14Kutub sa sadsaran sa duta tubtub sa panalgan nga naubus, duha ka maniko, kag ang kasangkaron isa ka maniko; kag kutub sa diotay nga panalgan tubtub sa daku nga panalgan, apat ka maniko, kag ang kasangkaron isa ka maniko;

15kag ang naibabaw nga halaran, apat ka maniko; kag kutub sa dabokan sang halaran kag paibabaw, may apat ka sungay.

16Ang dabokan sang halaran napulog duha ka maniko ang kalabaon sa napulog duha ang kasangkaron, kasilo sa iya apat ka kilid.

17Ang panalgan napulo kag apat ka maniko ang kalabaon sa napulo kag apat ang kasangkaron, kasilo sa iya apat ka kilid, kag ang sanipa sa palibut sini tunga sa maniko, ang sadsaran sini isa ka maniko palibut. Ang iya mga alintaga nagaatubang sa sidlangan.”

18Kag nagsiling sia sa akon, “Anak sang tawo, amo ini ang ginasiling sang Ginoong Dios: Amo ini sila ang mga pagsolondan sang halaran: Sa adlaw nga himoon nila ini sa pagdolot sing mga halad-nga-sinonog sa sini kag sa pagwisik sing dugo sa sini,

19maghatag ka sing tinday nga baka nga lalaki nga halad-tungud-sa-sala sa mga sacerdote nga mga Levinhon nga sa kaliwat ni Sadoc, nga malapit sa akon sa pag-alagad sa akon, nagasiling ang Ginoong Dios.

20Kag maghuka ka sa iya dugo, kag ipalhit ini sa apat ka sungay sini, kag sa apat ka pusud sang panalgan, kag sa sanipa palibut; amo ini ang pagtinlo mo sini kag paghimo sing katumbasan tungud sini.

21Kuhaon mo man ang tinday nga baka nga lalaki sang halad-tungud-sa-sala, kag sonogon ini sa pinat-ud nga duug sang templo, sa gowa sang santuario.

22Kag sa ikaduha nga adlaw magdolot ka sing lalaki nga kanding nga wala sing kasawayan nga sa halad-tungud-sa-sala; kag tinloan nila ang halaran, subong sang pagtinlo nila sini sang tinday nga baka nga lalaki.

23Kon makatapus ka na sa pagtinlo sini, magdolot ka sing tinday nga baka nga lalaki nga wala sing kasawayan kag carnero nga lalaki nga wala sing kasawayan gikan sa panong.

24Papalapiton mo sila sa atubangan sang Ginoo, kag ang mga sacerdote magasabwag sing asin sa ila kag idolot nila sila nga sa halad-nga-sinonog sa Ginoo.

25Sa pito ka adlaw mag-aman ka adlawadlaw sing kanding nga halad-tungud-sa-sala; mag-aman man sila sing tinday nga baka nga lalaki kag carnero nga lalaki gikan sa panong, nga wala sing kasawayan.

26Sa pito ka adlaw maghimo sila sing katumbasan tungud sa halaran kag paputlion ini, sa amo ihalad nila ini.

27Kag kon matuman nila ang mga adlaw, niyan sa ikawalo nga adlaw kag padayon ang mga sacerdote magdolot sa halaran sang inyo mga halad-nga-sinonog kag sang inyo mga halad-sa-paghidait; kag batonon ko kamo, nagasiling ang Ginoong Dios.”

← Chapter 42 Jump to: Chapter 44 →