Ezekiel 41

Ilonggo (Ang Biblia (1982))

← Chapter 40 Jump to: Chapter 42 →

1Niyan gindala niya ako sa templo, kag gintakus ang mga haligi; anum ka maniko ang kasangkaron sa isa ka kilid kag anum ka maniko ang kasangkaron sa pihak nga kilid nga amo ang kasangkaron sang kayangkayang.

2Kag ang kasangkaron sang salamputan napulo ka maniko; kag ang mga kilid sang salamputan lima ka maniko sa isa ka kilid kag lima ka maniko sa pihak nga kilid; kag gintakus niya ang iya kalabaon kap-atan ka maniko, kag ang kasangkaron, duha ka pulo ka maniko.

3Niyan nagsulud sia kag gintakus ang tagsa ka haligi sang salamputan, duha ka maniko; kag ang salamputan, anum ka maniko; kag ang kasangkaron sang salamputan, pito ka maniko.

4Kag gintakus niya ang iya kalabaon, duha ka pulo ka maniko, kag ang kasangkaron, duha ka pulo ka maniko, sa atubangan sang templo. Kag nagsiling sia sa akon, Ini amo ang labi gid ka balaan nga duug.

5Niyan gintakus niya ang kuta sang templo, anum ka maniko; kag ang kasangkaron sang tagsa ka hulut sa kilid, apat ka maniko, sa palibut sang templo sa tagsa ka kilid.

6Kag ang mga hulut sa kilid tatlo ka panalgan, ang isa sa ibabaw sang isa, kag katloan sa pasonod. Nagadulut sila sa kuta nga iya sang templo nga sa mga hulut sa kilid palibut, agud nga mag-angut sila sa sini kag indi mag-angut sa kuta sang templo.

7Kag ang mga hulut sa kilid nagaamat sangkad sang naglibut sila pataas kag pataas, kay ang palibut sang templo nagtaas kag nagtaas palibut sang templo; busa ang kasangkaron sang templo nagpadayon paibabaw, kag gani ang isa nagsaka kutub sa naubus gid nga hulut tubtub sa mataas gid paagi sa natunga nga hulut.

8Nakita ko man nga ang templo may nabayaw nga salog palibut; ang mga sadsaran sang mga hulut sa kilid isa ka layon nga tabon-ak nga anum ka maniko nga malaba.

9Ang kadamul sang kuta nga sa mga hulut sa kilid sa gowa lima ka maniko; kag ang nabilin amo ang duug nga sa mga hulut sa kilid nga iya sang templo.

10Sa ulut sang mga hulut may kasangkaron nga duha ka pulo ka maniko sa palibut sang templo sa tagsa ka kilid.

11Kag ang mga ganhaan sang mga hulut sa kilid yara nayon sa duug nga nabilin, ang isa ka ganhaan nayon sa aminhan, kag ang isa pa ka ganhaan nayon sa bagatnan; kag ang kasangkaron sang duug nga nabilin lima ka maniko palibut.

12Ang tinukud nga yara sa atubangan sang duug nga napain sa kilid nayon sa katundan kapitoan ka maniko ang kasangkaron; kag ang kuta sang tinukud lima ka maniko ang kadamulon palibut, kag ang iya kalabaon kasiaman ka maniko.

13Gani gintakus niya ang templo, isa ka gatus ka maniko ang kalabaon; kag ang duug nga napain kag ang tinukud pati ang iya mga kuta, isa ka gatus ka maniko ang kalabaon;

14ang kasangkaron man sang atubangan sang templo kag sang duug nga napain nayon sa sidlangan, isa ka gatus ka maniko.

15Niyan gintakus niya ang kalabaon sang tinukud sa atubangan sang duug nga napain nga yara sa likod niya kag ang iya mga galeria sa isa ka kilid kag sa pihak nga kilid, isa ka gatus ka maniko. Ang nasulud nga templo kag ang mga portico sang luwang,

16ang mga atangan, kag ang mga talambuan nga natakpan, kag ang mga galeria sa palibut sa ila tatlo ka panalgan, sa atubangan sang atangan, nga nakisamihan sing kahoy palibut, kutub sa duta tubtub sa mga talambuan (karon ang mga talambuan natakpan),

17tubtub sa ibabaw sang ganhaan, bisan tubtub sa templo nga nasulud, kag nagowa. Kag sa bug-os nga kuta palibut sa sulud kag sa gowa, sono sa takus

18kag nahimo ini nga may mga querubin kag mga palma, nga ang palma yara sa ulut sang duha ka querubin. Ang tagsa ka querubin may duha ka nawung:

19ang nawung sang tawo nayon sa palma sa sining kilid, kag ang nawung sang bataon nga leon nayon sa palma sa pihak nga kilid. Amo ini ang paggutib sa ila sa bug-os nga templo palibut;

20kutub sa duta tubtub sa ibabaw sang ganhaan ginhimoan sing mga querubin kag mga palma sa kuta sang templo.

21Ang mga bakalan sang ganhaan sang templo pasagi; kag sa atubangan sang santuario may dagway kaangay

22sang halaran nga kahoy, tatlo ka maniko ang kataason, ang iya kalabaon duha ka maniko, kag ang iya mga pamusud, ang iya kalabaon, kag ang iya mga kuta kahoy. Nagsiling sia sa akon, “Ini amo ang latok nga yara sa atubangan sang Ginoo.”

23Ang templo kag ang santuario may duha ka ganhaan.

24Ang mga ganhaan may tagduha ka panid nga takup, duha ka panid nga matakup, duha ka panid sa isa ka ganhaan kag duha ka panid sa isa pa ka ganhaan.

25Kag may ginhimo sa mga ganhaan sang templo nga mga querubin kag mga palma, kaangay sang mga ginhimo sa mga kuta; kag may atangan nga kahoy sa atubangan sang portico sa gowa.

26Kag may mga talambuan nga natakpan kag mga palma sa isa ka kilid kag sa pihak nga kilid, sa mga kilid sang portico; amo ini ang mga hulut sa kilid sang templo, kag sang mga atangan.

← Chapter 40 Jump to: Chapter 42 →