Ezekiel 6

Ilonggo (Ang Biblia (1982))

← Chapter 5 Jump to: Chapter 7 →

1Nag-abut sa akon ang polong sang Ginoo:

2“Anak sang tawo, ituhoy ang imo nawung nayon sa mga bukid sang Israel, kag itagna sa ila,

3kag isiling, Kamo nga mga bukid sang Israel, pamatii ang polong sang Ginoong Dios! Amo ining ginasiling sang Ginoong Dios sa mga bukid kag sa kabakoloran, sa mga iligan sang tubig kag sa mga nalupyakan: Yari karon, ako, ako gid, magadala sa inyo sing espada, kag laglagon ko ang inyo mataas nga mga duug.

4Ang inyo mga halaran magamingaw, kag ang inyo mga larawan sang adlaw maboong; kag ihaboy ko ang inyo pinatay nga mga tawo sa atubangan sang inyo mga diosdios.

5Kag ihal-id ko ang mga bangkay sang katawohan sang Israel sa atubangan sang ila mga diosdios; kag iwas-ag ko ang inyo mga tul-an sa palibut sang inyo mga halaran.

6Sa tanan ninyo nga puluy-an ang kabanwaanan wagwagon kag ang mataas nga mga duug pamingawon, agud nga mawagwag kag mapamingaw ang inyo mga halaran, ang inyo mga diosdios maboong kag mag-untat, ang inyo mga larawan sang adlaw mapulud, kag ang inyo mga binuhatan mapanas.

7Kag ang mga pinatay mapukan sa tunga ninyo, kag makilala ninyo nga Ako amo ang Ginoo.

8“Apang bilinan ko sing salin, nga may inyo kamo nga nakapalagyo sa espada sa tunga sang mga pungsud, kon paaplaagon kamo sa mga duta.

9Kag ang mga sa inyo nga nakapalagyo magadumdum sa akon sa tunga sang mga pungsud diin dalhon sila nga bihag, paano nga ginboong ako sang ila tagiposoon nga makihilawason nga nagbiya sa akon, kag sang ila mga mata nga nagmakihilawason sa ila mga diosdios; kag kangil-aran nila sila sa ila kaugalingon nga itololok tungud sa mga malaut nga ila ginhimo, sa tanan nila nga mga kangil-aran.

10Kag magakilala sila nga Ako amo ang Ginoo; wala ako magsiling sa wala sing pulus nga himoon ko sa ila ini nga malaut.”

11Amo ini ang ginasiling sang Ginoong Dios: “Pangdagpi ka sang imo kamut, kag pusadpusad ka, kag magsiling, Ay! bangud sang tanan nga malaut nga mga kalangil-aran sang panimalay sang Israel; kay mapukan sila sa espada, sa tiggulutum, kag sa kamatay.

12Ang sa malayo mapatay sa kamatay; kag ang sa malapit mapukan sa espada; kag ang mabilin kag makibon mapatay sa tiggulutum. Sa sini tumanon ko sa ila ang akon kasingkal.

13Kag makilala ninyo nga Ako amo ang Ginoo, kon ang ila pinatay nga mga tawo manginsa tunga sang ila mga diosdios sa palibut sang ila mga halaran, sa tagsa ka bakolod nga mataas, sa tanan nga putokputokan sang mga bukid, sa idalum sang tagsa ka kahoy nga madabung, kag sa idalum sang tagsa ka terebinto nga madabung, ang mga duug diin naghalad sila sing kaamyon sa tanan nila nga mga diosdios.

14Kag untayon ko ang akon kamut sa ila, kag himoon ko nga mamingaw kag nawagwag ang duta, sa kamingawan nayon sa Diblat, sa bug-os sang tanan nila nga mga puluy-an. Niyan makilala nila nga Ako amo ang Ginoo.”

← Chapter 5 Jump to: Chapter 7 →