Ezekiel 42

Ilonggo (Ang Biblia (1982))

← Chapter 41 Jump to: Chapter 43 →

1Niyan ginpagowa niya ako pakadto sa nagowa nga luwang, sa alagyan nayon sa aminhan, kag ginpasulud niya ako sa hulut nga yara sa tampad sang duug nga napain kag yara sa tampad sang tinukud nayon sa aminhan.

2Sa atubangan sang kalabaon nga isa ka gatus ka maniko yara ang ganhaan nga naaminhan, kag ang kasangkaron kalim-an ka maniko.

3Sa tampad sang duha ka pulo ka maniko nga iya sang nasulud nga luwang, kag sa tampad sang salog nga nabatohan nga iya sang nagowa nga luwang, yara ang galeria nga nagaatubang sa galeria sa ikatlong panalgan.

4Kag sa atubangan sang mga hulut yara ang alagyan, napulo ka maniko ang kasangkaron pasulud, may dalan nga isa ka maniko, kag ang ila mga ganhaan nayon sa aminhan.

5Karon ang mga hulut nga naibabaw makitid, kay ang mga galeria nabuhin sa ila labi pa sang sa naidalum kag sang sa natunga sa tinukud.

6Kay sila tatlo ka panalgan, kag wala sila sing mga haligi subong sang mga haligi sang mga luwang; busa ang naibabaw gid ginpakitid pa sang sa naidalum kag sa natunga gid gikan sa duta.

7Kag ang kuta sa gowa sa luyo sang kilid sang mga hulut, nayon sa nagowa nga luwang sa atubangan sang mga hulut, kalim-an ka maniko ang iya kalabaon.

8Kay ang kalabaon sang mga hulut nga yara sa nagowa nga luwang kalim-an ka maniko, kag ang yara sa atubangan sang templo isa ka gatus ka maniko.

9Sa idalum sining mga hulut yara ang salamputan sa sidlangan nga kilid, sa nagasulud ka sa ila sa nagowa nga luwang,

10sa kadamul sang kuta sang luwang. Nayon sa sidlangan, sa atubangan sang duug nga napain kag sa atubangan sang tinukud, may mga hulut

11nga may alagyan sa atubangan nila; sila kaangay sang mga hulut nga yara nayon sa aminhan, sono sa ila kalabaon amo ang ila kasangkaron, kag ang tanan nilang golowaan alangay sa ila mga pagpahamtang kag alangay sa ila mga ganhaan.

12Kag kaangay sa mga ganhaan sang mga hulut nga yara nayon sa bagatnan may ganhaan sa olohan sang alagyan, ang alagyan sa atubangan gid sang kuta nayon sa sidlangan, sa nagasulud ka sa ila.

13Niyan nagsiling sia sa akon, “Ang mga hulut nga naaminhan kag ang mga hulut nga nabagatnan nga yara sa atubangan sang duug nga napain mga hulut sila nga balaan, diin ang mga sacerdote nga malapit sa Ginoo magakaon sang balaan gid nga mga butang; didto ibutang nila ang mga butang nga balaan gid—ang halad-nga-kalan-on, ang halad-tungud-sa-sala, kag ang halad-tungud-sa-paglapas, kay ang duug balaan.

14Kon magsulud ang mga sacerdote, niyan dili sila maggowa sa duug nga balaan pasulud sa nagowa nga luwang, kondi didto ibutang nila ang ila mga panapton nga ila ginagamit sa pag-alagad, kay balaan sila; magasuklub sila sing iban nga mga panapton sa wala pa magpalapit sila sa ila sang katawohan.”

15Karon sang natapus niya ang pagtakus sang templo nga nasulud, ginpagowa niya ako paagi sa alagyan sang gawang nga nagaatubang nayon sa sidlangan, kag gintakus ini palibut.

16Gintakus niya ang kilid nga nasidlangan sang inugtakus nga tabon-ak, lima ka gatus ka tabon-ak sang inugtakus nga tabon-ak palibut.

17Gintakus niya ang kilid nga naaminhan, lima ka gatus ka tabon-ak sang inugtakus nga tabon-ak palibut.

18Gintakus niya ang kilid nga nabagatnan, lima ka gatus ka tabon-ak sang inugtakus nga tabon-ak palibut.

19Nagliso sia pa katundan nga kilid, kag nagtakus sing lima ka gatus ka tabon-ak sang inugtakus nga tabon-ak.

20Gintakus niya ini sa apat ka kilid. May kuta ini palibut, ang kalabaon lima ka gatus kag ang kasangkaron lima ka gatus, sa pagpain sang balaan kag sang dibalaan.

← Chapter 41 Jump to: Chapter 43 →