Ezekiel 46

Ilonggo (Ang Biblia (1982))

← Chapter 45 Jump to: Chapter 47 →

1“Amo ini ang ginasiling sang Ginoong Dios: Ang gawang sang nasulud nga luwang nga nagaatubang nayon sa sidlangan takpan sa anum ka adlaw nga inugpangabudlay; apang sa inugpahuway nga adlaw buksan ini kag buksan ini sa aldaw nga lati.

2Ang principe magasulud paagi sa alagyan sang portico sang gawang nga nagowa, kag magatindug sa luyo sang haligi sang gawang. Ang mga sacerdote magaaman sang iya halad-nga-sinonog kag sang iya mga halad-sa-paghidait, kag magasimba sia sa atangan sang gawang. Niyan magagowa sia, apang dili pagtakpan ang gawang tubtub sa kahaponon.

3Ang katawohan sang duta magasimba sa ganhaan sang gawang sa atubangan sang Ginoo sa mga inugpahuway kag sa mga lati.

4Ang halad-nga-sinonog nga idolot sang principe sa Ginoo manginsa adlaw nga inugpahuway anum ka cordero nga wala sing kasawayan kag isa ka carnero nga lalaki nga wala sing kasawayan;

5kag ang halad-nga-kalan-on mangin-isa ka efa nga sa carnero nga lalaki, kag ang halad-nga-kalan-on nga sa mga cordero sono sa iya ikasarang sa paghatag, kag isa ka hin nga lana sa isa ka efa.

6Sa adlaw sang lati isa ka tinday nga baka nga lalaki nga wala sing kasawayan, kag anum ka cordero kag isa ka carnero nga lalaki, manginwala sing kasawayan sila;

7magaaman sia sing halad-nga-kalan-on nga isa ka efa nga sa tinday nga baka nga lalaki kag isa ka efa sa carnero nga lalaki, kag sa mga cordero sono sa iya masarangan, kag isa ka hin nga lana sa isa ka efa.

8Kon magsulud ang principe, magsulud sia paagi sa alagyan sang portico sang gawang, kag magagowa sia paagi sa alagyan sini.

9“Apang kon ang katawohan sang duta magkari sa atubangan sang Ginoo sa pinat-ud nga mga piesta, ang nagasulud paagi sa alagyan sang gawang nga naaminhan magagowa paagi sa alagyan sang gawang nga nabagatnan; kag ang nagasulud paagi sa alagyan sang gawang nga nabagatnan magagowa sia paagi sa alagyan sang gawang nga naaminhan: dili sia magbalik paagi sa alagyan sang gawang diin sia nagsulud, kondi maggowa sa atubang niya.

10Kon sila magsulud, ang principe magsulud sa tunga nila; kag kon sila maggowa, maggowa sila sing tingub.

11“Sa mga piesta kag sa pinat-ud nga mga piesta ang halad-nga-kalan-on mangin-isa ka efa nga sa tinday nga baka nga lalaki, kag isa ka efa nga sa carnero nga lalaki, kag sa mga cordero sono sa iya masaranga sa paghatag, kag isa ka hin nga lana sa isa ka efa.

12Kon ang principe mag-aman sing halad-nga-kinabubut-on, sing halad-nga-sinonog ukon mga halad-sa-paghidait subong nga halad-nga-kinabubut-on sa Ginoo, ang isa magbukas sa iya sang gawang nga nagaatubang nayon sa sidlangan; kag amanon niya ang iya halad-nga-sinonog kag ang iya mga halad-sa-paghidait subong sa ginahimo niya sa adlaw nga inugpahuway. Niyan maggowa sia, kag sang nakagowa na sia ang isa magtakup sang gawang.

13“Mag-aman ka sing cordero nga isa ka tuig nga wala sing kasawayan nga halad-nga-sinonog sa Ginoo adlawadlaw; agaaga amanon mo ini.

14Kag mag-aman ka sing halad-nga-kalan-on upud sini agaaga, ang ikan-um nga bahin sang efa, kag ang ikatlo nga bahin sang hin nga lana sa paghumog sang harina nga mapino, subong nga isa ka halad-nga-kalan-on sa Ginoo; ini dalayon nga pagsolondan.

15Amo ini ang pag-aman nila sang cordero kag sang halad-nga-kalan-on kag sang lana, agaaga, nga sa dalayon nga halad-nga-sinonog.

16“Amo ini ang ginasiling sang Ginoong Dios: Kon ang principe maghatag sing dolot sa bisan kay sin-o sang iya mga anak gikan sa iya panublion, mangin-iya ini sang iya mga anak, kaugalingon nila ini paagi sa pagpanubli.

17Apang kon maghatag sia gikan sa iya panublion sing dolot sa isa sang iya mga alagad, mangin-iya ini tubtub sa tuig sang kahilwayan; niyan ibalik ini sa principe; apang ang iya panublion mangin-iya sang iya mga anak.

18Labut pa ang principe indi magkuha sang panublion sang katawohan, sa pagsubol sa ila gikan sa ila kaugalingon; maghatag sia sing panublion sa iya mga anak gikan sa iya kaugalingon, agud nga ang akon katawohan indi mag-aplaag ang tagsa ka tawo gikan sa iya kaugalingon.”

19Niyan ginpaagi niya ako sa salamputan, nga yara sa luyo sang gawang, pasulud sa mga hulut nga balaan sang mga sacerdote nga nag-atubang nayon sa aminhan; kag didto may duug sa likod nga bahin nayon sa katundan.

20Kag nagsiling sia sa akon, “Ini amo ang duug diin maglaga ang mga sacerdote sang halad-sa-paglapas kag halad-tungud-sa-sala, kag diin sila magabibingka sang halad-nga-kalan-on, agud nga indi nila sila madala sa gowa pakadto sa nagowa nga luwang sa pagpakabalaan sang katawohan.”

21Niyan ginpagowa niya ako sa nagowa nga luwang, kag ginpaagi niya ako sa apat ka pamusud sang luwang; kag sa tagsa ka pamusud sang luwang may luwang—

22sa apat ka pamusud sang luwang may luwang nga nalikupan, kap-atan ka maniko ang kalabaon kag katloan ang kasangkaron; ini sila nga apat sa mga pamusud isa ka takus.

23May kuta sa palibut sa ila, sa palibut sang apat, kag ang mga lagaan ginhimo sa idalum sang mga kuta palibut.

24Niyan nagsiling sia sa akon, “Ini sila amo ang balay nga lalagaan diin ang mga manug-alagad sang templo magalaga sang mga halad sang katawohan.”

← Chapter 45 Jump to: Chapter 47 →