Ezekiel 17

Ilonggo (Ang Biblia (1982))

← Chapter 16 Jump to: Chapter 18 →

1Nag-abut sa akon ang polong sang Ginoo:

2“Anak sang tawo, himo ka sing paktakon, kag pamolong sing palaanggiran sa panimalay sang Israel;

3isiling, Amo ini ang ginasiling sang Ginoong Dios: Isa ka dakung aguila nga may dalagkung mga pakpak kag malaba sing mga kuyus, hil-ob sang mga bulbul nga may sarisaring mga duag, nag-abut sa Libano kag nagpuktul sang ukbung sang cedro;

4ginkutul niya ang ukbung gid sang iya linghud nga mga sanga kag gindala ini sa duta sang palatikangan, kag ginpahamtang ini sa banwa sang mga manugbaligya.

5Nagkuha man sia sang binhi sang duta kag gintanum ini sa mapatubason nga duta; ginbutang niya ini sa ubay sang madamung tubig. Ginpahamtang niya ini subong sang kahoy nga sauce,

6kag nagtubo ini kag nanginmadabong nga balagon nga magapa, nga ang iya mga sanga nagbalik sa iya, kag ang iya mga gamut yara sa idalum niya. Gani nangin-uvas ini, kag nagpananga kag nagpanalingsing.

7“May isa man ka daku nga aguila nga may dalagkung mga pakpak kag madamu sing mga bulbul; kag yari karon, ining uvas nagpatiko nayon sa iya sang iya mga gamut, kag nagpatubo sang iya mga sanga nayon sa iya gikan sa gintamnan sa iya agud nga mabunyagan niya ini.

8Gintanum ini sa maayong duta sa ubay sang madamung tubig, agud nga magpananga ini, kag magpamunga, kag magmagayon nga uvas.

9Isiling mo, Amo ini ang ginasiling sang Ginoong Dios: Magauswag bala ini? Indi bala niya paggabuton ang iya mga gamut kag kutlon ang iya bunga, agud nga ang tanan niyang lumbay malaya? Indi tungud sang makusug nga butkon ukon madamung tawo nga maggabut sini gikan sa iya mga gamut.

10Yari karon, subong nga gintanum, magauswag bala ini? Indi bala malaya sing bug-os kon tandugon ini sang salatan—malaya ini sa mga natamnan nga iya gintuboan?”

11Niyan nag-abut sa akon ang polong sang Ginoo:

12“Isiling karon sa mabinatoon nga panimalay, wala bala kamo makahibalo sang kahologan sining mga butang? Sugiri sila, Yari karon, ang hari sang Babilonia nagkadto sa Jerusalem, kag nagkuha sang iya hari kag sang mga principe niya kag gindala sila sa iya sa Babilonia.

13Kag nagkuha sia sang kaliwat nga harianon kag nagpakigkatipan sa iya, nga ginpasumpa niya sia. (Gindala niya ang puno nga mga tawo sang duta,

14agud nga ang ginharian magkubus kag indi makatibawas sa iya kaugalingon, kondi makatindug sa pagbantay sang iya katipan.)

15Apang nagbato sia sa iya paagi sa pagpadala sang iya mga embajador sa Egipto, agud nga mahatagan niya sia sing mga kabayo kag madamung tawo. Magauswag bala sia? Makalikaw bala ang nagahimo sang subong nga mga butang? Mabungkag bala niya ang katipan kag makalikaw pa?

16Sa nagakabuhi ako, nagasiling ang Ginoong Dios, sa pagkamatuud sa duug diin nagapuyo ang hari nga naghimo sa iya nga hari, nga ang iya sumpa gintamay niya, kag ang iya katipan ginbungkag niya, upud sa iya sa tunga sang Babilonia mapatay sia.

17Si Faraon upud sa iya gamhanan nga hangaway kag dakung kabon indi makatabang sa iya sa inaway, kon magpatindug sila sing mga trinsira kag magpatindug sing mga pamakud sa pagpapas sang madamung tawo.

18Kay gintamay niya ang sumpa kag ginbungkag ang katipan, bangud nga ginhatag niya ang iya kamut kag labut pa naghimo sia sini tanan nga butang, indi sia makalikaw.

19Busa amo ini ang ginasiling sang Ginoong Dios: Sa nagakabuhi ako, sa pagkamatuud ang akon sumpa nga gintamay niya, kag ang akon katipan nga ginbungkag niya, itungtung ko gid ini sa iya kaugalingon nga olo.

20Iladlad ko ang akon pukot sa iya, kag madakup sia sa akon siod, kag dalhon ko sia sa Babilonia kag magasulud sa hukmanan upud sa iya didto tungud sa iya paglapas nga ginlapas niya batok sa akon.

21Kag ang tanan niyang laaslaas sa tanan niyang guban mapukan sa espada, kag ang mabilin paaplaagon sa tagsa ka hangin; kag kamo makakilala nga ako, ang Ginoo, nagpamolong sini.”

22Amo ini ang ginasiling sang Ginoong Dios: “Ako man magapuktul sang mataas nga ukbung sang cedro, kag ipahamtang ini; magapuktul ako sa ugbus gid sang iya linghud nga mga sanga sing lagbus, kag itanum ko ini sa bukid nga mataas kag manayoknayok;

23sa bukid sang kataasan sang Israel itanum ko ini, kag magapananga ini kag magapamunga, kag manginmatahum nga cedro; kag sa idalum niya magapuyo ang tanan nga pispis sang tagsa ka pakpak; sa handong sang iya mga sanga magapuyo sila.

24Kag ang tanan nga kahoy sang latagon magakilala nga ako nga Ginoo nagpakubus sang kahoy nga mataas, nagpataas sang manubo nga kahoy, nagpalaya sang kahoy nga hilaw, kag nagpalambo sang kahoy nga laya. Ako nga Ginoo nagpamolong, kag naghimo sini.”

← Chapter 16 Jump to: Chapter 18 →