Ezekiel 32

Ilonggo (Ang Biblia (1982))

← Chapter 31 Jump to: Chapter 33 →

1Sa ikapulog duha nga tuig, sa ikapulog duha nga bulan, sa nahaunang adlaw sang bulan, nag-abut sa akon ang polong sang Ginoo:

2“Anak sang tawo, gamit ka sing panalabiton tungud kay Faraon nga hari sang Egipto, kag isiling sa iya: “Nanginkaangay ka sa leon nga bataon sang mga pungsud, apang subong ka sang dragon sa kadagatan; naggowa ka sa imo mga suba, nagtublag sang mga tubig sa imo mga tiil, kag nagpalang-og sang ila mga suba.

3Amo ini ang ginasiling sang Ginoong Dios: Iladlad ko ang akon chinchorro sa imo upud sang kabon sang madamung katawohan; kag ipatakas ka nila sa akon chinchorro.

4Kag bayaan ko ikaw sa duta, ipilak ko ikaw sa wayang, kag pahaponon ko sa imo ang tanan nga kapispisan sang kalangitan, kag busgon ko sa imo ang kasapatan sang bug-os nga duta.

5Ibutang ko ang imo unud sa ibabaw sang mga bukid, kag hil-ubon ang mga nalupyakan sang imo bangkay.

6Tubigan ko man sang imo dugo ang duta diin ka nagalangoy tubtub sa mga bukid; kag ang mga iligan sang tubig mapuno sa imo.

7Kon palongon ko ikaw, tabonan ko ang mga langit, kag padulmon ang ila kabitoonan; lipnan ko ang adlaw sang gal-um, kag ang bulan indi na maghatag sang iya kapawa.

8Ang tanan nga masiga nga kapawa sang langit padulmon ko sa imo, kag magabutang sing kadudulman sa imo duta, nagasiling ang Ginoong Dios.

9“Tublagon ko man ang mga tagiposoon sang madamung mga katawohan, kon dalhon ko ang imo kalaglagan sa mga pungsud, sa mga duta nga wala mo makilala.

10Himoon ko nga maorongan sa imo ang madamung mga katawohan, kag ang ila mga hari mahadluk nga may kakugmat sa imo, kon ibalabad ko ang akon espada sa atubangan nila; magakurug sila sa tagsa ka tion, ang tagsa ka tawo tungud sa iya kaugalingon nga kabuhi, sa adlaw sang imo pagkapukan.

11Kay amo ini ang ginasiling sang Ginoong Dios: Ang espada sang hari sang Babilonia magaabut sa imo.

12Paagi sa mga espada sang mga gamhanan pukanon ko ang imo kadam-an, sila tanan nga makakulugmat sa mga pungsud. “Walaon nila ang bugal sang Egipto, kag ang bug-os niyang kadam-an laglagon.

13Laglagon ko man ang tanan niya nga kahayupan sa luyo sang madamung tubig; kag indi na magtublag sa ila ang tiil sang tawo, ukon ang mga koko sang kasapatan magtublag sa ila.

14Niyan patin-awon ko ang ila mga tubig, kag pailigon ko ang ila mga suba subong sang lana, nagasiling ang Ginoong Dios.

15Kon pamingawon kag laglagon ko ang duta sang Egipto, duta nga nawad-an sang nagpuno sa iya, kon samaron ko ang tanan nga nagapuyo sa iya, niyan makilala nila nga Ako amo ang Ginoo.

16Amo ini ang panalabiton nga ipanalabiton nila; ang babaying mga anak sang mga pungsud magapanalabiton sini; sa Egipto, kag sa bug-os niyang kadam-an, ipanalabiton nila ini, nagasiling ang Ginoong Dios.”

17Sa ikapulog duha nga tuig, sa nahaunang bulan, sa ikapulog limang adlaw sang bulan, nag-abut sa akon ang polong sang Ginoo:

18“Anak sang tawo, haya ka tungud sa kadam-an sang Egipto, kag itagbong sila, sia kag ang babaying mga anak sang mga pungsud nga bantug, sa naidalum nga mga bahin sang duta, upud sa ila nga nagapanaug sa Boho:

19‘Sin-o bala ang nalabawan mo sa katahum? Panaug ka, kag higda ka upud sa mga dicircuncidado.’

20Mapukan sila sa tunga sang mga pinatay paagi sa espada, kag upud sa iya magahamyang ang tanan niyang kadam-an.

21Ang makusug sa tunga sang mga gamhanan magapamolong sa iya, gikan sa tunga sang Sheol, upud sa ila nga nagbulig sa iya: ‘Nagapanaug sila, nagahamyang sila sing malinong, ang mga dicircuncidado, nga ginpatay paagi sa espada.’

22“Didto ang Asur, kag ang bug-os niya nga kabon, ang iya mga lulubngan yara sa palibut niya, sila tanan pinatay, napukan sa espada;

23nga ang ila mga lulubngan ginapahamtang sa kadadalman gid nga mga bahin sang Boho, kag ang iya kabon yara sa palibut sang iya lulubngan; sila tanan pinatay, napukan sa espada, nga nagpakugmat sa duta sang mga buhi.

24“Didto ang Elam, kag ang bug-os niyang kadam-an sa palibut sang iya lulubngan; sila tanan pinatay, napukan sa espada, nga nagpanaug nga dicircuncidado sa naidalum nga mga bahin sang duta, nga nagpakugmat sa ila sa duta sang mga buhi, kag nag-antus sang ila kahuluy-an upud sa mga nagapanaug sa Boho.

25Nagpahamtang sila sang iya higdaan sa tunga sang mga pinatay upud sa iya bug-os nga kadam-an, ang iya mga lulubngan yara sa palibut niya, sila tanan dicircuncidado, pinatay sa espada; kay ang ila kakugmat nagikan sa duta sang mga buhi, kag gin-antus nila ang ila kahuluy-an upud sa mga nagapanaug sa Boho; ginabutang sia sa tunga nila nga mga pinatay.

26“Didto ang Mesec kag ang Tubal, kag ang bug-os nilang kadam-an, ang ila mga lulubngan yara sa palibut nila, sila tanan dicircuncidado, pinatay paagi sa espada; kay sila nagpakugmat sa ila sa duta sang mga buhi.

27Kag indi sila maghamyang upud sa mga gamhanan nga napukan gikan sa mga dicircuncidado, nga nagpanaug sa Sheol upud ang ila mga hinganiban sa inaway, nga nagbutang sang ila mga espada sa idalum sang ila mga olo, kag ang ila mga kalautan yara sa ila mga tul-an; kay sila nagpakugmat sang mga gamhanan sa duta sang mga buhi.

28Apang mabali ka sa tunga sang mga dicircuncidado, nga nagahamyang upud sa mga pinatay sa espada.

29“Didto ang Edom, ang iya mga hari kag ang tanan niyang principe, nga sa ila gahum ginpahamyang upud sa mga pinatay sa espada; magahamyang sila upud sa mga dicircuncidado nga upud sa mga nagapanaug sa Boho.

30“Didto ang mga principe sang aminhan, sila tanan, kag ang tanan nga Sidonhon, nga nagpanaug upud sa mga pinatay, sa kakugmat nga ginhimo nila paagi sang ila kusug, ginapakahuy-an sila; nagahamyang sila nga dicircuncidado upud sa mga pinatay sa espada, kag nagadala sang ila kahuluy-an upud sa mga nagapanaug sa Boho.

31“Si Faraon makakita sa ila, kag malipay sa iya bug-os nga kadam-an, si Faraon kag ang bug-os niyang hangaway, nga pinatay sa espada, nagasiling sang Ginoong Dios.

32Kay ginbutang ko ang iya kakugmat sa duta sang mga buhi; busa pahamyangon sia sa tunga sang mga dicircuncidado, upud sa ila nga pinatay sa espada, si Faraon kag ang bug-os niyang kadam-an, nagasiling ang Ginoong Dios.”

← Chapter 31 Jump to: Chapter 33 →