Numbers 19

Luganda (BIBU1) (BIBULIYA ENTUKUVU)

← Chapter 18 Jump to: Chapter 20 →

1Omukama yagamba Musa ne Aroni nti:

2“Eno ye ntereeza y'etteeka ly'Omukama gy'alagidde: Lagira Abayisirayeli baleete gy'oli ennyana eya kawemba etaliiko kamogo, etayambazibwanga ku kikoligo,

3ogiwe kabona Eleyazari; ya kutwalibwa ebweru w'olusiisira ettirwe mu maaso ge.

4Eleyazari kabona anannyika olunwe mu musaayi gwayo n'agumansira emirundi musanvu mu maaso g'omulyango gwa Weema ey'Ensisinkano.

5Ejja kwokerebwa awo mu maaso ge, byonna: eddiba, ennyama yaayo, omusaayi n'obusa; abyokyanga.

6Kabona anaaddira akati k'entolookyo, yissopo n'ewuzi entwakaavu n'abikasuka ku nte eyokebwa mu muliro.

7Oluvannyuma anaayoza ebyambalo bye, n'anaaba omubiri, olwo n'alyoka ayingira mu lusiisira; kyokka ajja kusigala nga si mulongoofu okutuusa akawungeezi.

8N'oli anaagyokya, anaayoza ebyambalo bye n'anaaba n'omubiri n'amazzi, era naye ajja kusigala nga si mulongoofu okutuusa akawungeezi.

9Omusajja, nga mulongoofu, anaakuŋŋaanya evvu ly'ente n'aliyiwa ebweru w'olusiisira mu kifo ekirongoofu. Ekibiina ky'Abayisirayeli kikuumanga evvu eryo; lijja kweyambisibwanga mu mazzi ag'okutukuza; lya mukolo gwa kutukuzaako kibi.

10Anaatwala evvu ly'ente bw'anaamala okwoza ebyambalo bye, naye ajja kusigala nga si mulongoofu okutuusa akawungeezi. Lino tteeka lya lubeerera ku Bayisirayeli n'abagwira abali mu bo.

11“Buli akwatanga ku mulambo gw'omuntu, anaamalanga ennaku musanvu nga si mulongoofu.

12Ku lunaku olwokusatu n'olwomusanvu aneetukuzanga n'amazzi ago, olwo anaabanga mulongoofu. Bw'aba nga teyeetukuzza na mazzi ago ku lwokusatu ne ku lwomusanvu, anaasigalanga tali mulongoofu.

13Buli yenna akwatanga ku muntu omufu, n'ateetukuza, anaabanga ajaajaamizza Ekisulo ky'Omukama. Oyo akutulwanga ku bantu ba Yisirayeli, kubanga tamansiddwako mazzi gatukuza; taliba mulongoofu, era obutali bulongoofu bwe bulimusigalako.

14“Lino lye tteeka ku muntu afiiridde mu weema: bonna abayingiranga mu weema eyo, na bonna ababeerangamu, banaabanga si balongoofu okumala ennaku musanvu.

15Ekintu ekitalina kisaanikira, oba ekitasibiddwako ku mumwa, kinaabanga si kirongoofu.

16Omuntu ng'ali ebweru bw'anaakwatanga ku mulambo gw'omuntu attiddwa n'ekitala, oba afudde obufi, oba bw'akwatanga ku ggumba ly'omuntu, oba ku malaalo, anaamalanga ennaku musanvu nga si mulongoofu.

17“Okutukuza omuntu atali mulongoofu, otoolanga ku vvu ly'ekitambiro ekyokebwa olw'ekibi, n'olisssa mu nsumbi, n'ossaamu amazzi ag'oku luzzi.

18Mu mazzi ago omuntu, nga mulongoofu, annyikangamu yissopo n'amansira ku weema yonna na byonna ebirimu n'abantu ababangawo, ne ku oyo abanga akutte ku magumba g'omuntu, oba ku malaalo, oba ku muntu eyattibwa oba eyafa obufi.

19Omuntu omulongoofu amansiranga atali mulongoofu ku lwokusatu ne ku lwomusanvu; ku lwomusanvu n'amutukuza. Atukuzibwa anaabanga n'ayoza n'ebyambalo bye, akawungeezi anaabanga mulongoofu.

20Omuntu atali mulongoofu bw'ataatukuzibwenga, wa kukutulwanga ku kibiina, kubanga aliba ajaajaamizza Ekisulo ky'Omukama, amazzi agatukuza tegamumansiddwako, awo nno si mulongoofu.

21Lino tteeka lya lubeerera gye bali. N'oyo yennyini amansidde amazzi agatukuza, ayozanga ebyambalo bye; na buli yenna akwatanga ku mazzi agatukuza, anaabanga si mulongoofu okutuusa akawungeezi.

22Atali mulongoofu kyonna ky'akwatako nakyo tekiibenga kirongoofu; n'akikwatako naye taabenga mulongoofu okutuusa akawungeezi.”

← Chapter 18 Jump to: Chapter 20 →