Numbers 28

Luganda (BIBU1) (BIBULIYA ENTUKUVU)

← Chapter 27 Jump to: Chapter 29 →

1Omukama yagamba Musa nti:

2“Yogera eri Abayisirayeli obawe ekiragiro kino nti: ‘Ekitambiro kyange, ekyokulya kyange ekiwonge n'omuliro, akawoowo akansanyusa, mukiweerezanga mu budde bwakyo.’

3Bagambe nti: ‘Bino bye bitone ebiwonge n'omuliro bye munaawerezanga Omukama: “ ‘Buli lunaku muweerezanga obuliga bubiri obulume, obw'omwaka ogumu obutaliiko kamogo. Kino kye kitambiro ekyokye ekya bulijjo.

4Akaliga akamu mukaweerezanga ku makya akookubiri akawungeezi.

5Muweererezangako ekitone eky'obuwunga obukuŋŋunte obulungi obuweza ekyekkumi ekya efa, nga mutabuddwamu omuzigo ogukamuliddwa mu oliva oguweza ekyokuna ekya yini.

6Kye kitambiro ekyokye ekya bulijjo nga bwe kyalagirwa ku lusozi Sinayi, akawoowo akasanyusa, ekitone ekiwongere Omukama n'omuliro.

7Ku buli kaliga kunaagenderangako ekitone eky'okuyiwa eky'omwenge ekiweza ekyokuna ekya yini. Evviini ey'ekitone eky'okuyiwa mugiyiyiranga Omukama mu Kifo Ekitukuvu

8Akaliga akookubiri mukaweerezanga akawungeezi, nga bwe mwakoze ku makya, wamu n'ekitone eky'obuwunga ko n'ekitone kyakyo eky'okuyiwa. Kino kye kitambiro ekiwonge n'omuliro, akawoowo akasanyusa Omukama.

9“ ‘Ku lunaku olwa Sabbaato muweerezanga obuliga obulume bubiri obw'omwaka ogumu obutaliiko kamogo, ko n'ebyekkumi bibiri ebya efa eby'obuwunga obukuŋŋunte obulungi omutabuddwa omuzigo, ng'ekitone kyakyo eky'obuwunga n'ekitone kyakyo eky'okuyiwa.

10Kino kye kitambiro kya Sabbaato ekyokye ku buli Sabbaato. Kino kyongereza ku kitambiro ekyokye ekya bulijjo n'ekitone kyakyo eky'okuyiwa.

11“ ‘Ku lusooka mu mwezi muweerezanga Omukama ekitambiro ekyoke eky'ente ennume ento bbiri, endiga ennume emu, obuliga obulume musanvu, byonna nga tebiriiko kamogo.

12Ku buli nte nnume ento muweererezangako ekitone eky'obuwunga eky'ebyekkumi bisatu ebya efa ey'obuwunga obukuŋŋunte obulungi omutabuddwa omuzigo, ku buli ndiga ennume ekitone eky'obuwunga eky'ebyekkumi bibiri ebya efa ey'obuwunga obukuŋŋunte obulungi omutabuddwa omuzigo;

13ku buli kaliga akalume ekitone eky'obuwunga eky'ekyekkumi kimu ekya efa ey'obuwunga obukuŋŋunte obulungi omutabuddwa omuzigo. Kino kye kitambiro ekyokye, akawoowo akasanyusa, ekitone ekiwongere Omukama n'omuliro.

14Ku buli nte nnume ento muweererezangako ekitone eky'okuyiwa eky'evviini eweza ekyokubiri ekya yini; ku buli ndiga ennume ekyokusatu ekya yini, ne ku buli kaliga akalume ekyokuna ekya yini. Ekyo kye kinaabanga ekitambiro ekyokye, ekya buli mwezi, ku buli lusooka omwezi omwaka gwonna.

15Kuweererezebwangako Omukama embuzi ennume ng'ekitambiro olw'ekibi. Kino kyongereza ku kitambiro ekyokye ekya bulijjo wamu n'ekitone kyakyo eky'okuyiwa.

16“ ‘Mu mwezi ogusooka, ku lunaku olw'ekkumi n'ennya olw'omwezi, lwe lwa Pasika y'Omukama,

17ate olw'ekkumi n'ettaano mbaga. Okumala ennaku musanvu emigaati egitazimbulukuse gye ginaaliibwanga.

18Ku lunaku olusooka kunaabangako olukuŋŋaana olutukuvu; temukolerangako mulimu gwonna muzito.

19Muweererezangako ekitone ekiwongere Omukama n'omuliro, ekitambiro ekyokye eky'ente ennume ento bbiri, endiga ennume emu, obuliga obulume musanvu, byonna nga tebiriiko kamogo;

20muweererezangako ekitone eky'obuwunga obukuŋŋunte obulungi omutabuddwa omuzigo: ku buli nte nnume ento ebyekkumi bisatu ebya efa, ku buli ndiga nnume ebyekkumi bibiri ebya efa;

21ku buli kaliga, ku buli omusanvu, ekyekkumi kimu ekya efa.

22Muweererezangako embuzi ennume ey'ekitambiro olw'ekibi, eddaabirize ku lwammwe.

23Kino kyongereza ku kitambiro ekyokye ekya bulijjo eky'oku makya.

24“ ‘Muweerezanga bwe mutyo buli lunaku okumala ennaku musanvu ekyokulya ekiwonge n'omuliro, akawoowo akasanyusa Omukama. Kino mukiweerezanga okwongereza ku kitambiro ekyokye ekya bulijjo ne ku kitone kyakyo eky'okuyiwa.

25Ku lunaku olwomusanvu mukolanga olukuŋŋaana olutukuvu; temukolerangako mulimu gwonna muzito.

26“ ‘Ku lunaku olw'ebibala ebisookera ddala, bwe muweerezanga Omukama ebibala by'eŋŋano esooka, mu Wiiki enkulu, muyitanga olukuŋŋaana olutukuvu; temulukolerangako mulimu gwonna muzito.

27Muweerezanga ekitambiro ekyokye eky'ente ennume ento bbiri, endiga ennume emu, n'obuliga obulume musanvu obw'omwaka ogumu gumu, akawoowo akasanyusa Omukama.

28Ku buli nte nnume ento kubeerangako ekitone eky'obuwunga kya byakkumi bisatu ebya efa ey'obuwunga obukuŋŋunte obulungi omutabuddwa muzigo; ku buli ndiga ennume ebyekkumi bibiri ebya efa,

29ne ku buli kaliga, ku buli omusanvu, ekyekkumi kimu ekya efa.

30Muweererezangako embuzi ennume ey'ekitambiro olw'ekibi, eddaabirize ku lwammwe.

31Mubiweerezanga okwongereza ku kitambiro ekya bulijjo ekyokye eky'oku makya n'ekitone kyakyo eky'obuwunga. Ensolo wetegerezanga ne ziba nga teziriiko kamogo.

← Chapter 27 Jump to: Chapter 29 →