Numbers 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1Omukama yagamba Musa nti:

2“Lagira Abayisirayeli bagobe mu lusiisira buli mugenge yenna, n'alwadde obulwadde obw'okukulukuta amazzi, n'atali mulongoofu olw'okukwata ku mulambo.

3Abe musajja oba mukazi, mubagobe mu lusiisira baleme kulwonoona, nze mwene mwe nsula mu makkati galwo.”

4Abayisirayeli ne bakola bwe batyo, ne babagobera ebweru w'olusiisira ng'Omukama bwe yali alagidde Musa.

5Omukama yagamba Musa nti:

6“Gamba Abayisirayeli nti: ‘Omusajja oba omukazi bw'agwanga mu kimu ku bibi abantu bye batera okugwamu, n'ataba mwesigwa eri Omukama, omuntu oyo anaabanga azzizza omusango.

7Ayatulanga ensobi ye, n'azza kyonna ekimubanjibwa ng'agasseeko n'ekyokutaano kyakyo, n'abiwa oyo gw'azzizzaako omusango.

8Bwe wataabengawo wa luganda lwe wa kumpi gw'abiwa okutanga olw'ensobi ye, omutango gw'aliwa gunaafuukanga gwa Mukama, aguwanga kabona. Aleeterangako endiga ennume ey'omutango eriweerezebwa olw'okuddaabiriza ku lulwe.

9Anti ebintu byonna ebitone Abayisirayeli bye baleeta ewa kabona biba bya kabona;

10omuntu ky'awonga kiba kikye, naye bw'akiwa kabona kiba kya kabona.’ ”

11Omukama yagamba Musa nti:

12“Gamba Abayisirayeli nti: ‘Singa omukazi omufumbo awabanga n'amenya obwesigwa eri bba,

13omusajja omulala ne yeebaka naye, kyokka bba n'atakimanyaako, naye nga yeegwagwawaza mu nkiso, kubanga tewali bajulirwa, oba kubanga takwatiddwa lubona,

14naye bba olw'obuggya n'ajjirwa okubuusabuusa mu mukazi we, ate ddala nga yeegwagwawaza, ne bw'aba ateerera muteerere sso ng'omukazi tanneegwagwawaza,

15amuleetanga eri kabona. Aleetanga n'obuwunga obwa sayiri obuweza ekyekkumi kimu ekya efa ng'ekitone ku lwa mukazi we. Tayiwangako muzigo oba okussaako obubaani kubanga kino kitambiro olw'obuggya, kijjukizo ku lw'ensobi eyakolebwa.

16“ ‘Kabona amuleetanga n'amussa mu maaso g'Omukama;

17addiranga amazzi amatukuvu mu nsumbi, n'assaamu ku nfuufu evudde wansi mu Kisulo.

18Kabona ng'amaze okuteeka omukazi mu maaso g'Omukama, anaamusumululanga enviiri, n'assa mu mikono gye ekitone eky'obuwunga eky'ekijjukizo era ng'ekitambiro olw'obuggya; ye kabona asigalanga akutte amazzi agakaawa ag'ekikolimo.

19Olwo kabona amulayizanga ng'agamba nti: “Oba tewabanga musajja mulala yeebaka naawe, oba ggwe okuva ku balo, oba tobangako atali mulongoofu mu bbanga lino ng'ofumbiddwa balo, amazzi gano agakaawa ag'ekikolimo gakwejjeereze.

20Naye oba wava ku balo bw'otyo ne weegwagwawaza ng'omusajja omulala yeebaka naawe…”

21Wano kabona amugamba ebigambo eby'ekikolimo nti: “Omukama akuwe okukolimirwa n'okuvumirirwa mu bantu bo; ekisambi kyo kikenene n'olubuto lukwereege;

22amazzi gano ag'ekikolimo gakukkemu olubuto lukwereege n'ekisambi kikenene.” Omukazi ayanukulanga nti: “Amiina, amiina.”

23“ ‘Ekikolimo ekyo kabona akiwandiikanga mu kitabo, ate n'akisiimuulira mu mazzi agakaawa.

24Amuwanga n'anywa amazzi agakaawa mw'atadde ekikolimo; amazzi ag'ekikolimo bwe galimukkamu galimukaayirira.

25Kabona aggyanga mu mukono gwe ekitone eky'obuwunga olw'obuggya n'akiwuuba mu maaso g'Omukama n'akiteeka ku mwaliiro.

26Kabona aggyangako olubatu ku kitone eky'obuwunga n'abwokera ku mwaliiro ng'ekitundu kyakyo eky'ekijjukizo, olwo amazzi agakaawa n'agawa omukazi aganywe.

27Bw'aliba nga yeegwagwawaza, nga teyali mwesigwa eri bba, bw'alinywa amazzi ag'ekikolimo ne gamukkamu gamukaayirire, olubuto lumwereege n'ekisambi kikenene. Alivumirirwa mu bantu be.

28Bw'aliba nga teyeegwagwawaza, nga taliiko kko, aliba yejjeeredde, alisobola n'okuzaala abaana.

29“ ‘Eryo lye tteeka ku buggya, omukazi ng'avudde ku bba ne yeegwagwawaza,

30oba olw'obuggya omusajja n'abuusabuusa mu mukazi we. Kabona wa kumuleetanga mu maaso g'Omukama n'amukolako byonna ebiragiddwa mu tteeka lino.

31Ye omusajja taabenga na musango gwonna olw'ensobi eyakolebwa, naye omukazi aneetikkanga omusango gw'ekyonoono kye.’ ”

← Chapter 4 Jump to: Chapter 6 →