Exodus 24

Lao Bible 2012 (ພຣະຄຳພີສັກສິ)

← Chapter 23 Jump to: Chapter 25 →

1ແລ້ວພຣະເຈົ້າໄດ້ບອກໂມເຊວ່າ, “ເຈົ້າກັບອາໂຣນ, ນາດາບ, ອາບີຮູ, ພ້ອມທັງບັນດາຫົວໜ້າ 70 ຄົນຂອງຊາດອິດສະຣາເອນ ຈົ່ງຂຶ້ນມາຫາພຣະເຈົ້າຢາເວທີ່ເທິງພູເຂົາ; ເມື່ອຂຶ້ນມາແລ້ວໃຫ້ກົ້ມຂາບນະມັດສະການຢູ່ຫ່າງໆ.

2ໃຫ້ເຈົ້າຄົນດຽວເທົ່ານັ້ນເຂົ້າມາໃກ້ພຣະເຈົ້າຢາເວ. ຄົນອື່ນຢ່າໃຫ້ຫຍັບເຂົ້າມາໃກ້. ສ່ວນປະຊາຊົນນັ້ນ ຢ່າໃຫ້ຂຶ້ນມາເທິງພູເປັນເດັດຂາດ.”

3ໂມເຊຈຶ່ງໄດ້ນຳຂໍ້ຄຳສັ່ງ ແລະກົດຕ່າງໆຂອງພຣະເຈົ້າຢາເວໄປບອກປະຊາຊົນ ແລະປະຊາຊົນທຸກຄົນໄດ້ຕອບພ້ອມກັນວ່າ, “ພວກເຮົາຈະເຮັດທຸກໆສິ່ງຕາມທີ່ພຣະເຈົ້າຢາເວໄດ້ກ່າວ.”

4ໂມເຊໄດ້ບັນທຶກຂໍ້ຄຳສັ່ງຂອງພຣະເຈົ້າຢາເວໄວ້. ມື້ຕໍ່ມາແຕ່ເຊົ້າ ໂມເຊໄດ້ສ້າງແທ່ນບູຊາໜຶ່ງແທ່ນຂຶ້ນທີ່ຕີນພູ ແລະໄດ້ຕັ້ງຫີນສິບສອງກ້ອນໄວ້ເປັນອະນຸສອນຄື: ກ້ອນໜຶ່ງສຳລັບເຜົ່າໜຶ່ງຂອງຊາດອິດສະຣາເອນ.

5ຕໍ່ມາ ເພິ່ນໄດ້ໃຊ້ພວກຄົນໜຸ່ມອິດສະຣາເອນ ເຜົາເຄື່ອງບູຊາຖວາຍແລະເຜົາງົວທັງໂຕ ຖວາຍເພື່ອຄວາມສາມັກຄີທຳແກ່ພຣະເຈົ້າຢາເວ.

6ໂມເຊໄດ້ແບ່ງເລືອດສັດທີ່ຂ້ານັ້ນໃສ່ໄວ້ໃນຊາມເຄິ່ງໜຶ່ງ ແລະອີກເຄິ່ງໜຶ່ງເພິ່ນໄດ້ຊິດໃສ່ແທ່ນບູຊາ.

7ແລ້ວເພິ່ນກໍອ່ານໜັງສືພັນທະສັນຍາດ້ວຍສຽງດັງສູ່ປະຊາຊົນຟັງ. ພວກເຂົາຕ່າງກໍເວົ້າວ່າ, “ພວກຂ້ານ້ອຍທັງໝົດຈະເຊື່ອຟັງພຣະເຈົ້າຢາເວ ແລະຈະເຮັດທຸກໆສິ່ງຕາມທີ່ພຣະອົງໄດ້ສັ່ງໄວ້.”

8ແລ້ວໂມເຊກໍໄດ້ເອົາເລືອດໃນຊາມຊິດໃສ່ປະຊາຊົນ ແລະກ່າວວ່າ, “ອັນນີ້ແມ່ນເລືອດແຫ່ງພັນທະສັນຍາທີ່ພຣະເຈົ້າຢາເວຕັ້ງໄວ້ກັບພວກເຈົ້າ ເມື່ອພຣະອົງມອບພັນທະສັນຍານີ້ໃຫ້.”

9ໂມເຊ, ອາໂຣນ, ນາດາບ, ອາບີຮູ ແລະບັນດາຫົວໜ້າເຈັດສິບຄົນຂອງຊາດອິດສະຣາເອນ ຈຶ່ງພາກັນຂຶ້ນໄປເທິງພູ;

10ແລະພວກເຂົາໄດ້ເຫັນພຣະເຈົ້າຂອງຊາດອິດສະຣາເອນ. ລຸ່ມຕີນຂອງພຣະອົງມີສິ່ງໜຶ່ງປູໄວ້ ເປັນຄືແກ້ວໄພທູນສະຫງ່າແຈ່ມໃສດັ່ງທ້ອງຟ້າ.

11ພຣະອົງບໍ່ໄດ້ທຳລາຍບັນດາຫົວໜ້າຂອງຊາດອິດສະຣາເອນ; ພວກເຂົາໄດ້ເຫັນພຣະເຈົ້າ ແລ້ວພວກເຂົາກໍພາກັນກິນແລະດື່ມ.

12ພຣະເຈົ້າຢາເວໄດ້ກ່າວແກ່ໂມເຊວ່າ, “ຈົ່ງຂຶ້ນມາຫາເຮົາທີ່ເທິງພູເຂົາ; ເມື່ອເຈົ້າມາຮອດທີ່ນີ້ແລ້ວ ເຮົາຈະໃຫ້ແຜ່ນຫີນສອງແຜ່ນ ຊຶ່ງບັນຈຸກົດບັນຍັດທັງໝົດທີ່ເຮົາໄດ້ຂຽນໄວ້ສຳລັບແນະນຳປະຊາຊົນ.”

13ໂມເຊແລະໂຢຊວຍ ຜູ້ຊ່ວຍຂອງຕົນ ຈຶ່ງໄດ້ຕຽມຕົວ ແລະໂມເຊກໍເລີ່ມ ຂຶ້ນໄປທີ່ເທິງພູເຂົາຂອງພຣະເຈົ້າ.

14ໂມເຊໄດ້ກ່າວແກ່ພວກຜູ້ນຳຂອງຊາດອິດສະຣາເອນວ່າ, “ຈົ່ງຄອຍຖ້າພວກເຮົາຢູ່ທີ່ຄ້າຍພັກນີ້ ຈົນກວ່າພວກເຮົາກັບມາ. ອາໂຣນກັບຮູເຣຈະຢູ່ທີ່ນີ້ກັບພວກເຈົ້າ. ຖ້າມີເລື່ອງຫຍັງເກີດຂຶ້ນ ກໍໃຫ້ໄປຫາທ່ານທັງສອງນີ້ໄກ່ເກ່ຍໃຫ້.”

15ເວລາໂມເຊຂຶ້ນໄປທີ່ເທິງພູເຂົານັ້ນ ເມກໄດ້ປົກຄຸມໜ່ວຍພູໄວ້.

16ແສງສຸກໃສແຫ່ງສະຫງ່າຣາສີຂອງພຣະເຈົ້າຢາເວ ກໍລົງມາທີ່ເທິງພູເຂົາຊີນາຍ. ໃນສາຍຕາຂອງຊາວອິດສະຣາເອນແລ້ວ ແສງນັ້ນເບິ່ງຄືໄຟທີ່ກຳລັງໄໝ້ເທິງພູເຂົາ. ເມກໄດ້ປົກຄຸມພູຢູ່ເປັນເວລາຫົກວັນ ແລະໃນວັນທີເຈັດ ພຣະເຈົ້າຢາເວໄດ້ເອີ້ນໂມເຊຈາກເມກທີ່ປົກຄຸມນັ້ນ.

18ໂມເຊໄດ້ຍ່າງຂຶ້ນໄປເທິງພູເຂົາ ແລະເຂົ້າໄປໃນເມກນັ້ນ. ເພິ່ນໄດ້ຢູ່ໃນທີ່ນັ້ນເປັນເວລາສີ່ສິບວັນ ແລະສີ່ສິບຄືນ.

← Chapter 23 Jump to: Chapter 25 →