Exodus 25

Lao Bible 2012 (ພຣະຄຳພີສັກສິ)

← Chapter 24 Jump to: Chapter 26 →

1ແລ້ວພຣະເຈົ້າຢາເວກໍໄດ້ສັ່ງໂມເຊໄວ້ວ່າ,

2“ຈົ່ງບອກຊາວອິດສະຣາເອນໃຫ້ນຳສິ່ງຂອງມາຖວາຍແກ່ເຮົາ. ຈົ່ງຮັບຂອງຖວາຍຈາກທຸກໆຄົນທີ່ເຕັມໃຈໃຫ້.

3ຂອງຖວາຍນັ້ນຈະຕ້ອງແມ່ນ: ຄຳ, ເງິນ, ທອງສຳຣິດ;

4ຜ້າປ່ານເນື້ອລະອຽດດີ, ຂົນແກະສີຟ້າ, ສີມ່ວງ ແລະສີແດງເຂັ້ມ; ຜ້າທີ່ເຮັດດ້ວຍຂົນແບ້;

5ໜັງແກະເຖິກຍ້ອມສີແດງ; ໜັງສັດທີ່ລະອຽດດີ; ໄມ້ກະຖິນເທດ;

6ນໍ້າມັນໄຕ້ຕະກຽງ; ເຄື່ອງເທດປຸງນໍ້າມັນເຈີມສັກສິດ ເພື່ອໃຊ້ຫົດສົງແລະໃຊ້ເຮັດເຄື່ອງຫອມເຜົາບູຊາ.

7ແກ້ວໂກເມນແລະເພັດພອຍຊະນິດຕ່າງໆ ສຳລັບຕົບແຕ່ງເສື້ອຄຸມສັ້ນເອໂຟດ ແລະແຜ່ນປົກເອິກຂອງປະໂຣຫິດ.

8ຊາວອິດສະຣາເອນຕ້ອງສ້າງຫໍເຕັນສັກສິດສຳລັບເຮົາ ເພື່ອວ່າເຮົາຈະຢູ່ທ່າມກາງພວກເຂົາ.

9ຈົ່ງເຮັດຫໍເຕັນສັກສິດແລະເຄື່ອງປະກອບນັ້ນ ຕາມແບບແຜນທີ່ເຮົາຈະສຳແດງໃຫ້ເຈົ້າເບິ່ງ.

10ຈົ່ງເຮັດຫີບໜ່ວຍໜຶ່ງດ້ວຍໄມ້ກະຖິນເທດຍາວ 110 ເຊັນ, ກວ້າງ 66 ເຊັນ ແລະສູງ 66 ເຊັນ.

11ຈົ່ງໂອບຫີບນັ້ນດ້ວຍຄຳສົດທັງຂ້າງໃນແລະຂ້າງນອກ ແລະໃຫ້ເຮັດຂອບຄຳອ້ອມຮອບຫີບ.

12ຈົ່ງເອົາຄຳຫລໍ່ຫູເພື່ອສອດຄານຫາມສີ່ຫູນັ້ນຕິດໃສ່ກັບແຈທັງສີ່ຄືຂ້າງລະສອງຫູ.

13ຈົ່ງເຮັດຄານຫາມດ້ວຍໄມ້ກະຖິນເທດແລະໂອບດ້ວຍຄຳ

14ແລະຈົ່ງສອດຄານຫາມເຂົ້າໃສ່ຫູຂອງຂ້າງຫີບແຕ່ລະຂ້າງ.

15ຈົ່ງສອດຄານຫາມນັ້ນຄາໄວ້ເລີຍ ຢ່າຖອດອອກ.

16ແລ້ວຈົ່ງເອົາຫີນສອງແຜ່ນທີ່ຈາລຶກຂໍ້ຄຳສັ່ງຂອງເຮົາ ທີ່ເຮົາຈະໃຫ້ເຈົ້ານັ້ນໃສ່ລົງໃນຫີບ.

17ຈົ່ງເອົາຄຳສົດເຮັດຝາອັດຫີບ ຊຶ່ງຍາວ 110 ເຊັນ ແລະກວ້າງ 66 ເຊັນ.

18ແລ້ວເຈົ້າຈົ່ງເອົາຄຳມາຫລໍ່ເຄຣຸບ ສອງຕົນຕິດໃສ່ກັບແຕ່ລະສົ້ນຂອງຝາອັດຫີບນັ້ນ. ຈົ່ງເຮັດໃຫ້ມັນເປັນເນື້ອດຽວກັບຝາອັດຫີບ.

20ໃຫ້ເຄຣຸບນັ້ນປິ່ນໜ້າເຂົ້າຫາກັນຈາກສົ້ນໜຶ່ງຫາອີກສົ້ນໜຶ່ງຂອງຝາອັດຫີບ ແລະໃຫ້ສົ້ນສຸດຂອງປີກທັງສອງຂ້າງທີ່ພືອອກນັ້ນ ຕິດກັບຝາອັດຫີບໃຫ້ເປັນເນື້ອດຽວກັນ.

21ຈົ່ງເອົາຫີນສອງແຜ່ນໃສ່ລົງໃນຫີບນັ້ນ ແລະເອົາຝາອັດຫີບຢອງໄວ້ຢູ່ທາງເທິງ.

22ເຮົາຈະພົບກັບເຈົ້າຢູ່ທີ່ເທິງຝາອັດຫີບນັ້ນ ຄືຢູ່ລະຫວ່າງເທິງປີກທັງສອງຂອງເຄຣຸບ; ໃນທີ່ນັ້ນ ເຮົາຈະໃຫ້ກົດບັນຍັດຕ່າງໆຂອງເຮົາແກ່ປະຊາຊົນອິດສະຣາເອນ.

23ຈົ່ງເຮັດໂຕະໜ່ວຍໜຶ່ງດ້ວຍໄມ້ກະຖິນເທດທີ່ຍາວ 88 ເຊັນ, ກວ້າງ 44 ເຊັນ ແລະສູງ 66 ເຊັນ.

24ຈົ່ງໂອບໂຕະນັ້ນດ້ວຍຄຳສົດ ແລະຈົ່ງແນບຂອບໂຕະດ້ວຍຄຳສົດຄືກັນ.

25ສ່ວນຂອບນອກຂອງໂຕະທີ່ເດ່ອອກມານັ້ນໃຫ້ກວ້າງເຈັດເຊັນເຄິ່ງພ້ອມແນບຂອບຄຳໃສ່ອ້ອມຮອບ.

26ຈົ່ງເຮັດຫູເປັນຄຳຕິດໃສ່ໄວ້ທີ່ແຈຂາທັງສີ່.

27ຫູຊຶ່ງໃຊ້ສອດຄານຫາມນັ້ນໃຫ້ຕິດກັບຂອບຂອງໂຕະ.

28ຈົ່ງເຮັດຄານຫາມດ້ວຍໄມ້ກະຖິນເທດແລະໂອບດ້ວຍຄຳ.

29ສ່ວນຈານ, ຈອກ, ໄຫ ແລະຖ້ວຍເພື່ອໃຊ້ໃນການຖວາຍບູຊາເຫຼົ້າອະງຸ່ນນັ້ນ ຂອງເຫຼົ່ານີ້ໃຫ້ເຮັດດ້ວຍຄຳສົດ.

30ຈົ່ງວາງໂຕະໄວ້ຢູ່ຕໍ່ໜ້າຫີບພັນທະສັນຍາ ແລະທີ່ເທິງໂຕະນັ້ນ ຈົ່ງວາງເຂົ້າຈີ່ທີ່ຖວາຍບູຊາແກ່ເຮົາຕະຫລອດໄປ.

31ຈົ່ງເຮັດຕີນຮອງຕະກຽງດ້ວຍຄຳສົດ; ຕີນແລະລຳໂຕຂອງຫລັກຕະກຽງນັ້ນ ໃຫ້ຕີເປັນຮູບດອກໄມ້ມີທັງດອກຈູມດອກບານ ແລະກີບດອກໄມ້ໃຫ້ຕິດເປັນເນື້ອດຽວກັນກັບຕີນຮອງຂອງຕະກຽງ.

32ໃຫ້ມີກິ່ງຫົກກິ່ງແຍກອອກຈາກລຳຂອງຕີນຕະກຽງນັ້ນຂ້າງລະສາມກິ່ງ.

33ແຕ່ລະກິ່ງໃນຫົກກິ່ງນັ້ນ ໃຫ້ປະດັບປະດາດ້ວຍຮູບດອກໄມ້ສາມດອກ ຊຶ່ງມີລວດລາຍເໝືອນດອກໝາກບົກບານ ຄືມີທັງກີບແລະກາບດ້ວຍ.

34ສ່ວນລຳຂອງຕີນຕະກຽງນັ້ນໃຫ້ປະດັບປະດາດ້ວຍຮູບດອກໄມ້ສີ່ດອກ ຊຶ່ງມີລວດລາຍເໝືອນດອກໝາກບົກບານມີກີບ ແລະມີກາບເຊັ່ນກັນ.

35ຢູ່ລຸ່ມຂອງກິ່ງທັງສາມຄູ່ ມີດອກໄມ້ຈູມດອກໜຶ່ງຕິດເປັນເນື້ອດຽວກັນກັບຕີນຂອງຕະກຽງ.

36ຈົ່ງເອົາຄຳສົດມາຕີເປັນດອກໄມ້ຈູມ, ກິ່ງແລະຕີນຕະກຽງເຮັດໃຫ້ເປັນເນື້ອດຽວກັນ.

37ຈົ່ງເຮັດຕະກຽງເຈັດໜ່ວຍໃສ່ຕີນຕະກຽງ ແລະໄຕ້ໃຫ້ມັນສ່ອງແສງອອກໄປເປັນໜ້າກະດານ.

38ຄີມຄີບໄສ້ຕະກຽງແລະຖາດໃສ່ຄີມນັ້ນ ຈົ່ງເຮັດດ້ວຍຄຳສົດ.

39ຕີນຕະກຽງກັບເຄື່ອງໃຊ້ທຸກຢ່າງ ຈົ່ງເຮັດດ້ວຍຄຳສົດປະມານ 35 ກິໂລກຼາມ.

40ຈົ່ງເອົາໃຈໃສ່ເຮັດສິ່ງເຫຼົ່ານີ້ ຕາມແບບແຜນທີ່ເຮົາໄດ້ສຳແດງຕໍ່ເຈົ້າທີ່ເທິງພູນັ້ນ.”

← Chapter 24 Jump to: Chapter 26 →