Exodus 29 — Lao Bible 2012 (ພຣະຄຳພີສັກສິ)

1“ນີ້ແມ່ນສິ່ງທີ່ເຈົ້າຈະເຮັດໃນການອຸທິດຖວາຍອາໂຣນ ແລະພວກລູກຊາຍຂອງລາວ ເພື່ອບົວລະບັດຮັບໃຊ້ເຮົາໃນຖານະປະໂຣຫິດ. ຈົ່ງເອົາງົວເຖິກໜຸ່ມໂຕໜຶ່ງ ແລະແກະເຖິກສອງໂຕທີ່ມີສຸຂະພາບດີ ແລະບໍ່ມີຕຳໜິມາຖວາຍ.

2ຈົ່ງໃຊ້ແປ້ງຊະນິດດີທີ່ສຸດແຕ່ບໍ່ມີເຊື້ອແປ້ງ ແລະນໍ້າມັນໝາກກອກເທດມາເຮັດເຂົ້າຈີ່ ຊຶ່ງບາງຊະນິດນັ້ນບໍ່ຕ້ອງໃຊ້ນໍ້າມັນໝາກກອກເທດ ແລະເຂົ້າຈີ່ບາງຊະນິດຊຶ່ງເປັນແຜ່ນບາງໆ ຕ້ອງໃຊ້ນໍ້າມັນໝາກກອກເທດ.

3ເມື່ອເຮັດແລ້ວໆ ຈົ່ງໃຫ້ເອົາເຂົ້າຈີ່ທັງໝົດໃສ່ກະຕ່າໜ່ວຍໜຶ່ງແລະຖວາຍແກ່ເຮົາ ເມື່ອພວກເຈົ້ານຳງົວໜຸ່ມ ແລະແກະເຖິກມາເຜົາຖວາຍ.

4ຈົ່ງນຳອາໂຣນແລະພວກລູກຊາຍຂອງລາວ ມາທີ່ປະຕູເຂົ້າຫໍເຕັນບ່ອນຊຸມນຸມ ແລະໃຫ້ພວກເຂົາຮັບພິທີອາບນໍ້າຊຳລະ.

5ເມື່ອອາບແລ້ວໆ ເຈົ້າຈົ່ງໃສ່ເຄື່ອງປະຈຳຕຳແໜ່ງປະໂຣຫິດໃຫ້ອາໂຣນເຊັ່ນວ່າ: ເສື້ອຄຸມຍາວມີແຂນ, ເສື້ອຄຸມຍາວບໍ່ມີແຂນ, ເສື້ອຄຸມສັ້ນເອໂຟດ, ແຜ່ນປົກເອິກ ແລະສາຍຮັດແອວ.

6ຈົ່ງສຸບໝວກໃຫ້ລາວ ແລະມັດເຄື່ອງປະດັບທີ່ຈາລຶກວ່າ ‘ອຸທິດຖວາຍແດ່ອົງພຣະຜູ້ເປັນເຈົ້າ’ ໃສ່ທາງໜ້າໝວກ

7ແລ້ວເຈົ້າຈົ່ງເອົານໍ້າມັນສັກສິດຫົດສົງທີ່ເທິງຫົວຂອງລາວ ແລະສະຖາປະນາລາວ.

8ຈົ່ງນຳພວກລູກຊາຍຂອງອາໂຣນມາແລະນຸ່ງເຄື່ອງໃຫ້ ພ້ອມທັງຮັດສາຍແອວກັບສຸບໝວກໃຫ້ພວກເຂົາດ້ວຍ. ຈົ່ງສະຖາປະນາອາໂຣນກັບພວກລູກຊາຍຂອງລາວດ້ວຍວິທີນີ້. ພວກເຂົາແລະເຊື້ອສາຍຂອງພວກເຂົາຈະບົວລະບັດຮັບໃຊ້ເຮົາ ໃນຖານະປະໂຣຫິດຕະຫລອດໄປ.

10ຈົ່ງເອົາງົວເຖິກມາທາງໜ້າຫໍເຕັນບ່ອນຊຸມນຸມ ແລະບອກອາໂຣນພ້ອມພວກລູກຊາຍຂອງລາວ ວາງມືລົງເທິງຫົວງົວເຖິກນັ້ນ.

11ແລ້ວໃຫ້ເຈົ້າຂ້າປາດຄໍງົວເຖິກຊ້ອງໜ້າພຣະເຈົ້າຢາເວຢູ່ທາງປະຕູເຂົ້າຫໍເຕັນບ່ອນຊຸມນຸມ.

12ເຈົ້າຈົ່ງເອົາເລືອດງົວບາງສ່ວນແລະໃຊ້ມືຂອງເຈົ້າ ຈຸ່ມລົງໃນເລືອດທາໃສ່ຍອດແທ່ນ. ແລ້ວຈົ່ງຖອກສ່ວນທີ່ເຫຼືອໃສ່ພື້ນຂອງແທ່ນບູຊາ.

13ຕໍ່ໄປ ເຈົ້າຈົ່ງເອົາເຄື່ອງໃນໄຂມັນ, ໜັງບາງໆຫຸ້ມຫໍ່ຕັບ, ແລະໝາກໄຂ່ຫຼັງທັງສອງໜ່ວຍພ້ອມໄຂມັນທີ່ຕິດຢູ່ນັ້ນ ເຜົາເທິງແທ່ນບູຊາຖວາຍແກ່ເຮົາ.

14ສ່ວນຊີ້ນ, ໜັງ ແລະໄສ້ພຸງໃຫ້ເຜົາຢູ່ນອກຄ້າຍ. ອັນນີ້ແມ່ນການຖວາຍບູຊາ ເພື່ອລຶບລ້າງບາບຂອງພວກປະໂຣຫິດ.

15ຈົ່ງເອົາແກະເຖິກໂຕໜຶ່ງມາ ແລະບອກໃຫ້ອາໂຣນກັບພວກລູກຊາຍຂອງລາວ ວາງມືລົງເທິງຫົວຂອງມັນ.

16ຈົ່ງຂ້າແກະນັ້ນແລະເອົາເລືອດຂອງມັນ ໄປຖອກໃສ່ທັງສີ່ຂ້າງຂອງແທ່ນບູຊາ.

17ໃຫ້ຕັດແກະເປັນຕ່ອນໆ ແລະລ້າງເຄື່ອງໃນໄສ້ພຸງແລະຂາຫລັງ ແລ້ວເອົາມາວາງໄວ້ເທິງຫົວແລະເທິງຕ່ອນອື່ນໆ.

18ຈົ່ງເຜົາຕ່ອນແກະທັງໝົດນັ້ນທີ່ເທິງແທ່ນເປັນການຖວາຍບູຊາອາຫານແກ່ພຣະເຈົ້າຢາເວ. ກິ່ນຫອມຫວນຂອງເຄື່ອງບູຊານີ້ເຮັດໃຫ້ພຣະເຈົ້າຢາເວພໍໃຈ.

19ຈົ່ງນຳແກະເຖິກໂຕໜຶ່ງມາອີກ ຄືໂຕທີ່ຈະໃຊ້ໃນການອຸທິດຖວາຍຕົວນັ້ນ ແລ້ວຈົ່ງບອກອາໂຣນແລະພວກລູກຊາຍຂອງລາວ ວາງມືລົງເທິງຫົວຂອງມັນ.

20ຈົ່ງຂ້າແກະນັ້ນແລະເອົາເລືອດສ່ວນໜຶ່ງທາທີ່ປາຍໃບຫູຂ້າງຂວາຂອງອາໂຣນ ແລະພວກລູກຊາຍຂອງລາວ ແລະທາທີ່ຫົວໂປ້ມືແລະຫົວໂປ້ຕີນຂ້າງຂວາດ້ວຍ. ສ່ວນເລືອດທີ່ເຫຼືອນັ້ນໃຫ້ຖອກໃສ່ຂ້າງທັງສີ່ຂອງແທ່ນບູຊາ.

21ຈົ່ງເອົາເລືອດສ່ວນໜຶ່ງເທິງແທ່ນບູຊາ ແລະນໍ້າມັນສັກສິດ ຊິດໃສ່ອາໂຣນກັບເຄື່ອງນຸ່ງຂອງລາວ ແລະຊິດໃສ່ພວກລູກຊາຍຂອງລາວ ຕະຫລອດທັງເຄື່ອງນຸ່ງຫົ່ມຂອງພວກເຂົາດ້ວຍ ແລ້ວລາວເອງພ້ອມກັບພວກລູກຊາຍ ແລະເຄື່ອງນຸ່ງຫົ່ມຂອງພວກເຂົາກໍຈະໄດ້ຮັບການອຸທິດຖວາຍແກ່ເຮົາທັງໝົດ.

22ຈົ່ງຕັດເອົາໄຂມັນຂອງແກະເຖິກ, ໄຂມັນໃນຫາງ, ໄຂມັນທີ່ຫຸ້ມເຄື່ອງໃນ ແລະໜັງບາງໆຫຸ້ມຫໍ່ຕັບ ແລະໝາກໄຂ່ຫລັງທັງສອງໜ່ວຍພ້ອມທັງໄຂມັນທີ່ຕິດຫ້ອຍ ແລະຕົ້ນຂາໜ້າຂ້າງຂວາ.

23ແລ້ວຈົ່ງເອົາເຂົ້າຈີ່ກ້ອນໜຶ່ງຂອງແຕ່ລະຢ່າງໃນກະຕ່າເຂົ້າຈີ່ທີ່ບໍ່ມີເຊື້ອແປ້ງ ທີ່ຢູ່ຕໍ່ໜ້າພຣະເຈົ້າຢາເວນັ້ນຄື: ກ້ອນໜຶ່ງທີ່ເຮັດປະສົມກັບນໍ້າມັນໝາກກອກເທດ ອີກກ້ອນໜຶ່ງທີ່ບໍ່ປະສົມກັບນໍ້າມັນ ແລະກ້ອນນ້ອຍກ້ອນໜຶ່ງທີ່ເປັນແຜ່ນບາງໆ.

24ຈົ່ງວາງສິ່ງເຫຼົ່ານີ້ໃສ່ໃນອົ້ງມືຂອງອາໂຣນ ແລະພວກລູກຊາຍຂອງລາວ ແລ້ວບອກພວກເຂົາໃຫ້ຖວາຍແກວ່ງໄປແກວ່ງມາເພື່ອເປັນເຄື່ອງບູຊາແກວ່ງໄປແກວ່ງມາຖວາຍຕໍ່ໜ້າພຣະເຈົ້າຢາເວ.

25ແລ້ວຈົ່ງຮັບເອົາສິ່ງເຫຼົ່ານີ້ຈາກມືຂອງພວກເຂົານຳໄປເຜົາເທິງແທ່ນບູຊາ ຄືເຜົາເທິງເຄື່ອງຊຶ່ງໄດ້ເຜົາບູຊາແລ້ວ ທີ່ມີກິ່ນຫອມຫວນເປັນທີ່ພໍພຣະໄທຕໍ່ໜ້າພຣະເຈົ້າຢາເວ; ເປັນເຄື່ອງບູຊາດ້ວຍໄຟຖວາຍແກ່ພຣະເຈົ້າຢາເວ.

26ຈົ່ງເອົາຊີ້ນໜ້າເອິກຂອງແກະເຖິກຊຶ່ງເປັນແກະສະຖາປະນາອາໂຣນ ໃຫ້ຖວາຍແກວ່ງໄປແກວ່ງມາສຳລັບເປັນເຄື່ອງບູຊາແກວ່ງໄປແກວ່ງມາຕໍ່ໜ້າພຣະເຈົ້າຢາເວ ແລະຊີ້ນສ່ວນນີ້ຈະເປັນສ່ວນຂອງພວກເຈົ້າ.

27ເມື່ອມີການສະຖາປະນາປະໂຣຫິດ ຊີ້ນໜ້າເອິກແລະຂາໜ້າຂອງແກະເຖິກ ທີ່ຈັດເອົາໄວ້ສຳລັບການສະຖາປະນາ ຈົ່ງໃຫ້ຖວາຍແກວ່ງໄປແກວ່ງມາຊຶ່ງເປັນເຄື່ອງບູຊາແກວ່ງໄປແກວ່ງມາ ແລະໃຫ້ປະໄວ້ຕ່າງຫາກສຳລັບພວກປະໂຣຫິດ.

28ອັນນີ້ແມ່ນການຕັດສິນໃຈທີ່ບໍ່ປ່ຽນແປງຂອງເຮົາ. ເວລາທີ່ປະຊາຊົນຂອງເຮົາຖວາຍເພື່ອຄວາມສາມັກຄີທຳ ຊີ້ນໜ້າເອິກແລະຂາໜ້າຂອງແກະໃຫ້ເປັນສ່ວນຂອງປະໂຣຫິດ. ອັນນີ້ແມ່ນເຄື່ອງຖວາຍຂອງປະຊາຊົນທີ່ຖວາຍແກ່ພຣະເຈົ້າຢາເວ.

29ເມື່ອປະໂຣຫິດອາໂຣນຕາຍໄປ ເຄື່ອງປະຈຳຕຳແໜ່ງປະໂຣຫິດຂອງລາວນັ້ນ ຕ້ອງມອບໃຫ້ແກ່ພວກລູກຊາຍຂອງລາວ ເພື່ອພວກເຂົາຈະໄດ້ໃສ່ ເມື່ອໄດ້ຮັບສະຖາປະນາໃຫ້ເປັນປະໂຣຫິດ.

30ໃຫ້ລູກຜູ້ທີ່ຮັບການສະຖາປະນາເປັນປະໂຣຫິດແທນອາໂຣນ ຄືຜູ້ທີ່ຈະເຂົ້າໄປໃນຫໍເຕັນບ່ອນຊຸມນຸມ ເພື່ອບົວລະບັດຮັບໃຊ້ໃນບ່ອນສັກສິດນັ້ນ ໃສ່ເຄື່ອງປະຈຳຕຳແໜ່ງນີ້ເຈັດວັນ.

31ຈົ່ງເອົາຊີ້ນແກະເຖິກ ຊຶ່ງໃຊ້ໃນການສະຖາປະນາອາໂຣນກັບພວກລູກຊາຍຂອງລາວ ມາຕົ້ມໃນບ່ອນສັກສິດ.

32ຈົ່ງໃຫ້ພວກເຂົາກິນຊີ້ນແລະເຂົ້າຈີ່ທີ່ເຫຼືອຢູ່ໃນກະຕ່າທີ່ທາງເຂົ້າຫໍເຕັນບ່ອນຊຸມນຸມ.

33ພວກເຂົາຈະກິນຂອງທີ່ໄດ້ໃຊ້ແລ້ວໃນພິທີລຶບລ້າງບາບ ສຳລັບການສະຖາປະນານັ້ນກໍໄດ້. ມີແຕ່ປະໂຣຫິດເທົ່ານັ້ນທີ່ກິນໄດ້ເພາະແມ່ນອາຫານບໍຮິສຸດ.

34ຖ້າຊີ້ນຫລືເຂົ້າຈີ່ບາງສ່ວນເຫຼືອກິນ ຈົນຮອດຕອນເຊົ້າຂອງວັນໃໝ່ ໃຫ້ເຜົາໄຟສາ; ຢ່າກິນເພາະເປັນຂອງບໍຣິສຸດ.

35ຈົ່ງເຮັດພິທີສະຖາປະນາອາໂຣນແລະພວກລູກຊາຍຂອງລາວໃຫ້ຄົບເຈັດວັນ ຕາມທີ່ເຮົາໄດ້ສັ່ງເຈົ້າໄວ້ທຸກປະການ.

36ແຕ່ລະມື້ ເຈົ້າຕ້ອງຖວາຍງົວເຖິກເປັນເຄື່ອງບູຊາເພື່ອເປັນການລຶບລ້າງບາບ. ການຖວາຍບູຊານີ້ຈະເປັນການຊຳລະແທ່ນບູຊາ. ແລ້ວຈົ່ງຫົດສົງແທ່ນບູຊານີ້ດ້ວຍນໍ້າມັນໝາກກອກເທດ ເພື່ອໃຫ້ສັກສິດ.

37ຈົ່ງເຮັດດັ່ງນີ້ທຸກໆວັນ ຕະຫລອດເຈັດວັນ. ແລ້ວແທ່ນນັ້ນກໍຈະສັກສິດທີ່ສຸດ ແລະຖ້າຜູ້ໃດຫລືສິ່ງໃດແຕະຕ້ອງຖືກແທ່ນນັ້ນ ຄົນນັ້ນແລະສິ່ງນັ້ນກໍຈະຖືກສຳພັດ ກັບຣິດອຳນາດແຫ່ງຄວາມສັກສິດຂອງແທ່ນບູຊາ.”

38“ໃນທຸກໆວັນຕະຫລອດໄປ ຈົ່ງຖວາຍລູກແກະເຖິກສອງໂຕອາຍຸໜຶ່ງປີເທິງແທ່ນບູຊາ.

39ຈົ່ງນຳລູກແກະໂຕໜຶ່ງມາຖວາຍໃນຕອນເຊົ້າ ແລະນຳອີກໂຕໜຶ່ງມາຖວາຍໃນຕອນແລງ.

40ໃນເວລາທີ່ຖວາຍລູກແກະໂຕທີ່ໜຶ່ງນັ້ນ ຈົ່ງຖວາຍຍອດແປ້ງປະມານໜຶ່ງກິໂລກຼາມ ປົນກັບນໍ້າມັນໝາກກອກເທດໜຶ່ງລິດ. ຈົ່ງຖວາຍເຫຼົ້າອະງຸ່ນໜຶ່ງລິດຄືກັນ.

41ສ່ວນແກະໂຕທີສອງນັ້ນ ຈົ່ງຖວາຍໃນຕອນແລງພ້ອມກັບຍອດແປ້ງ ນໍ້າມັນໝາກກອກເທດສົດ ແລະເຫຼົ້າອະງຸ່ນໃນອັດຕາເທົ່າກັນກັບທີ່ຖວາຍໃນຕອນເຊົ້າ. ອັນນີ້ແມ່ນການຖວາຍອາຫານແກ່ພຣະເຈົ້າຢາເວ ແລະກິ່ນຫອມຫວນຂອງເຄື່ອງຖວາຍນັ້ນຈຶ່ງເຮັດໃຫ້ເປັນທີ່ພໍໃຈ.

42ການເຜົາຖວາຍບູຊາແກ່ເຮົາທີ່ປະຕູເຂົ້າຫໍເຕັນບ່ອນຊຸມນຸມຕໍ່ໜ້າພຣະເຈົ້າຢາເວ ຈົ່ງໃຫ້ປະຕິບັດກັນສືບໆໄປ. ແມ່ນໃນບ່ອນນີ້ ທີ່ເຮົາຈະພົບກັບພວກເຈົ້າ ແລະກ່າວແກ່ພວກເຈົ້າ.

43ໃນທີ່ນັ້ນ ເຮົາຈະພົບກັບປະຊາຊົນອິດສະຣາເອນ ແລະສະຫງ່າຣາສີອັນສຸກໃສຂອງເຮົາຈາກທີ່ນັ້ນກໍຈະເຮັດໃຫ້ບ່ອນນັ້ນສັກສິດ.

44ເຮົາຈະເຮັດໃຫ້ຫໍເຕັນບ່ອນຊຸມນຸມ ແລະແທ່ນບູຊາສັກສິດ ແລະເຮົາຈະຕັ້ງອາໂຣນກັບພວກລູກຊາຍຂອງລາວໃຫ້ໃຊ້ຊີວິດຢູ່ຕ່າງຫາກ ເພື່ອບົວລະບັດຮັບໃຊ້ເຮົາໃນຖານະປະໂຣຫິດ.

45ເຮົາຈະຢູ່ທ່າມກາງປະຊາຊົນອິດສະຣາເອນ ແລະເຮົາຈະເປັນພຣະເຈົ້າຂອງພວກເຂົາ.

46ພວກເຂົາຈະຮູ້ວ່າເຮົາແມ່ນພຣະເຈົ້າຢາເວ ພຣະເຈົ້າຂອງພວກເຂົາ ຜູ້ໄດ້ນຳພາພວກເຂົາອອກມາຈາກປະເທດເອຢິບ ກໍເພື່ອເຮົາຈະຢູ່ທ່າມກາງພວກເຂົາ. ເຮົາແມ່ນພຣະເຈົ້າຢາເວ ພຣະເຈົ້າຂອງພວກເຂົາ.”