Exodus 35

Lao Bible 2012 (ພຣະຄຳພີສັກສິ)

← Chapter 34 Jump to: Chapter 36 →

1ແລ້ວໂມເຊກໍເອີ້ນປະຊາຊົນອິດສະຣາເອນທັງໝົດມາປະຊຸມ. ເພິ່ນໄດ້ບອກພວກເຂົາວ່າ, “ຕໍ່ໄປນີ້ ແມ່ນຄຳສັ່ງຂອງພຣະເຈົ້າຢາເວທີ່ໃຫ້ພວກເຈົ້າປະຕິບັດ:

2ຈົ່ງເຮັດວຽກໃນຫົກວັນ ແຕ່ໃນວັນທີເຈັດໃຫ້ພວກເຈົ້າຢຶດຖືເປັນວັນສັກສິດ ເປັນວັນສຳຄັນຂອງການພັກຜ່ອນທີ່ອຸທິດຖວາຍແກ່ພຣະເຈົ້າຢາເວ. ຜູ້ໃດທີ່ເຮັດວຽກໃນວັນນີ້ ຜູ້ນັ້ນຈະຕ້ອງຖືກໂທດເຖິງຕາຍ.

3ແມ່ນແຕ່ໄຟກໍບໍ່ໃຫ້ດັງໃນເຮືອນຂອງພວກເຈົ້າໃນວັນຊະບາໂຕ.”

4ໂມເຊໄດ້ກ່າວຕໍ່ປະຊາຊົນອິດສະຣາເອນທັງໝົດວ່າ, “ຕໍ່ໄປນີ້ ແມ່ນສິ່ງທີ່ພຣະເຈົ້າຢາເວໄດ້ສັ່ງໄວ້:

5ຈົ່ງນຳສິ່ງຂອງມາຖວາຍແກ່ພຣະເຈົ້າຢາເວ. ຜູ້ໃດທີ່ເຕັມໃຈໃຫ້ ຈົ່ງນຳສິ່ງດັ່ງຕໍ່ໄປນີ້ມາຄື: ຄຳ, ເງິນ, ທອງສຳຣິດ;

6ຜ້າປ່ານເນື້ອລະອຽດດີ; ຜ້າຂົນແກະສີຟ້າ, ສີມ່ວງ ແລະສີແດງ; ຜ້າທີ່ເຮັດດ້ວຍຂົນແບ້;

7ໜັງແກະເຖິກຍ້ອມສີແດງ; ໜັງສັດລະອຽດດີ; ໄມ້ກະຖິນເທດ;

8ນໍ້າມັນໄຕ້ຕະກຽງ; ເຄື່ອງຫອມເພື່ອປຸງນໍ້າມັນເຈີມສັກສິດ ແລະເຄື່ອງຫອມສຳລັບເຜົາບູຊາ,

9ແກ້ວໂກເມນກັບເພັດພອຍອື່ນໆສຳລັບປະດັບເສື້ອຄຸມສັ້ນເອໂຟດ ແລະແຜ່ນປົກເອິກຂອງປະໂຣຫິດ.”

10“ຜູ້ໃດທີ່ມີສະຕິປັນຍາໃນທ່າມກາງພວກເຈົ້າ ໃຫ້ຜູ້ນັ້ນເຮັດສິ່ງທີ່ພຣະເຈົ້າຢາເວໄດ້ສັ່ງໄວ້ຄື:

11ຫໍເຕັນສັກສິດ, ຜ້າຄຸມເຕັນ ແລະຜ້າປົກເຕັນຊັ້ນນອກ, ຂໍເກາະ, ຮ່າງຂອບໄມ້, ຄານ, ເສົາ ແລະຕີນຮອງເສົາຂອງຫໍເຕັນ,

12ຫີບພັນທະສັນຍາ, ຄານຫາມ, ຝາອັດຫີບພັນທະສັນຍາ ແລະຜ້າກັ້ງບັງຫີບພັນທະສັນຍາ;

13ໂຕະ, ຄານຫາມຂອງໂຕະ ແລະເຄື່ອງໃຊ້ທັງໝົດປະຈຳໂຕະ ເຂົ້າຈີ່ເພື່ອການຖວາຍນັ້ນ;

14ຫລັກຕະກຽງທີ່ໃຫ້ແສງສະຫວ່າງ ພ້ອມທັງເຄື່ອງໃຊ້ປະຈຳ; ຕະກຽງແລະນໍ້າມັນ;

15ແທ່ນສຳລັບເຜົາເຄື່ອງຫອມແລະຄານຫາມ; ນໍ້າມັນເຈີມສັກສິດ; ເຄື່ອງຫອມເພື່ອເຜົາບູຊາ ຜ້າກັ້ງປະຕູເຂົ້າຫໍເຕັນສັກສິດ;

16ແທ່ນສຳລັບເຜົາເຄື່ອງຖວາຍບູຊາ ແລະຕະຂ່າຍທອງສຳຣິດ, ຄານຫາມ ແລະເຄື່ອງໃຊ້ປະຈຳແທ່ນບູຊາ ຂັນຊຳລະລ້າງແລະພານຮອງຂັນ;

17ຜ້າກັ້ງອ້ອມຮອບຫໍເຕັນ; ເສົາແລະຕີນຮອງເສົາ; ຜ້າກັ້ງບັງທາງເຂົ້າຜ້າອ້ອມຫໍເຕັນ.

18ຫລັກປັກ, ເຊືອກເນັ່ງຂອງຫໍເຕັນແລະເດີ່ນຂອງຫໍເຕັນສັກສິດ;

19ເຄື່ອງອັນງົດງາມຂອງປະໂຣຫິດ ຄືເຄື່ອງນຸ່ງອັນສັກສິດປະຈຳຕຳແໜ່ງຂອງອາໂຣນ ແລະພວກລູກຊາຍຂອງລາວ ເມື່ອພວກເຂົາເຂົ້າມາບົວລະບັດຮັບໃຊ້ໃນບ່ອນສັກສິດ.”

20ປະຊາຊົນອິດສະຣາເອນທັງໝົດໄດ້ພາກັນແຍກຍ້າຍຈາກໂມເຊໄປ

21ແລະທຸກຄົນທີ່ມີໃຈເຫລື້ອມໃສສັດທາ ກໍໄດ້ນຳຂອງມາຖວາຍແກ່ພຣະເຈົ້າຢາເວ ເພື່ອນຳໄປສ້າງຫໍເຕັນບ່ອນຊຸມນຸມ. ພວກເຂົາໄດ້ນຳທຸກສິ່ງທີ່ຈຳເປັນໃຊ້ໃນການນະມັດສະການ ແລະໃນການເຮັດເຄື່ອງນຸ່ງອັນສັກສິດປະຈຳຕຳແໜ່ງຂອງປະໂຣຫິດມາຖວາຍ.

22ທຸກຄົນທີ່ເຕັມໃຈໃຫ້ທັງຍິງແລະຊາຍກໍໄດ້ນຳເຄື່ອງເອ້ຄື: ເຂັມຄັດ, ຕຸ້ມຫູ, ແຫວນ, ສາຍຄໍ ແລະເຄື່ອງເອ້ຕ່າງໆເປັນຄຳຢ່າງອື່ນມາຖວາຍແກ່ພຣະເຈົ້າຢາເວ.

23ຜູ້ທີ່ມີຜ້າປ່ານເນື້ອລະອຽດດີ; ຜ້າຂົນແກະສີຟ້າ, ສີມ່ວງ ແລະສີແດງເຂັ້ມ; ຜ້າທີ່ເຮັດດ້ວຍຂົນແບ້, ໜັງແກະເຖິກຍ້ອມສີແດງຫລືໜັງສັດລະອຽດດີ ກໍໄດ້ນຳເອົາຂອງເຫຼົ່ານັ້ນມາຖວາຍ.

24ຜູ້ທີ່ສາມາດບໍລິຈາກເງິນ ຫລືທອງສຳຣິດກໍໄດ້ນຳມາຖວາຍແກ່ພຣະເຈົ້າຢາເວ ແລະຜູ້ທີ່ມີໄມ້ກະຖິນເທດ ຊຶ່ງສາມາດໃຊ້ຢ່າງໜຶ່ງຢ່າງໃດໃນວຽກງານນີ້ກໍໄດ້ນຳມາຖວາຍຄືກັນ.

25ສ່ວນແມ່ຍິງທີ່ຊຳນິຊຳນານໃນການປັ່ນຜ້າປ່ານ ກໍໄດ້ເອົາເສັ້ນປ່ານເນື້ອລະອຽດດີ ແລະຜ້າຂົນແກະສີຟ້າ, ສີມ່ວງ ແລະສີແດງເຂັ້ມມາຖວາຍ.

26ພວກເຂົາໄດ້ເຮັດເສັ້ນດ້າຍດ້ວຍຂົນແບ້ມາຖວາຍຄືກັນ.

27ພວກຜູ້ນຳໄດ້ເອົາແກ້ວໂກເມນ ແລະເພັດພອຍຢ່າງອື່ນມາ ເພື່ອໃຊ້ໃນການປະດັບເສື້ອຄຸມສັ້ນເອໂຟດ ແລະແຜ່ນປົກເອິກຂອງປະໂຣຫິດ

28ທັງໄດ້ນຳເອົາເຄື່ອງເທດຊະນິດຕ່າງໆ, ນໍ້າມັນໄຕ້ຕະກຽງ, ນໍ້າມັນເຈີມສັກສິດ ແລະສຳລັບເຄື່ອງຫອມໃຊ້ເຜົາບູຊາມາຖວາຍດ້ວຍ.

29ປະຊາຊົນອິດສະຣາເອນທັງຍິງແລະຊາຍຜູ້ທີ່ມີໃຈເຫລື້ອມໃສສັດທາ ກໍໄດ້ນຳເຄື່ອງຖວາຍຂອງພວກເຂົາມາປະກອບສ່ວນໃນວຽກງານ ຕາມທີ່ພຣະເຈົ້າຢາເວໄດ້ສັ່ງຜ່ານທາງໂມເຊ ໃຫ້ພວກເຂົາເຮັດນັ້ນທຸກປະການ.

30ໂມເຊໄດ້ກ່າວຕໍ່ຊາວອິດສະຣາເອນວ່າ, “ພຣະເຈົ້າຢາເວໄດ້ເລືອກເອົາເບຊາເລນ ລູກຊາຍຂອງອູຣິແລະຫລານຊາຍຂອງຮູເຣຈາກເຜົ່າຢູດາ.

31ພຣະເຈົ້າໃຫ້ລາວໄດ້ຮັບຣິດອຳນາດ ມີສະຕິປັນຍາ, ຄວາມເຂົ້າໃຈ ແລະຄວາມສາມາດໃນວິຊາການດ້ານສີລະປະກຳຊະນິດອື່ນໆອີກ

32ສຳລັບວາງແຜນແລະອອກແບບຢ່າງລະອຽດປານີດໃນການເຮັດເຄື່ອງຄຳ, ເຄື່ອງເງິນ ແລະເຄື່ອງທອງສຳຣິດ;

33ສຳລັບເຈຍລະໄນພອຍຕ່າງໆເພື່ອຝັງໃສ່ກະໂບກ ແລະສຳລັບແກະສະຫລັກໄມ້ໄດ້ດີ; ພ້ອມທັງວິຊາການໃນວຽກງານດ້ານສີລະປະກຳດ້ານອື່ນໆອີກ.

34ພຣະອົງຍັງໄດ້ບັນດານໃຫ້ລາວກັບໂອໂຮລີອາບ ລູກຊາຍຂອງອາຮີສາມັກຈາກເຜົ່າດານ ມີຄວາມສາມາດໃນການສິດສອນຖ່າຍທອດຄວາມຮູ້ດ້ານວິຊາສີລະປະກຳນີ້ ໃຫ້ແກ່ຄົນອື່ນອີກດ້ວຍ.

35ພຣະອົງຍັງໃຫ້ພວກເຂົາມີສະຕິປັນຍາ ແລະຄວາມສາມາດໃນວຽກງານຫລາຍຢ່າງຄື: ວຽກງານຂອງນັກແກະສະຫລັກ, ນັກອອກແບບ, ນັກຫຍິບປັກຖັກແສ່ວຜ້າປ່ານເນື້ອລະອຽດດີ; ຕໍ່າຜ້າຂົນແກະສີຟ້າ, ສີມ່ວງ ແລະສີແດງ ແລະການຕໍ່າຜ້າຊະນິດອື່ນໆອີກດ້ວຍ. ພວກເຂົາມີຄວາມສາມາດເຮັດວຽກຊ່າງສີມືໄດ້ທຸກຢ່າງ ແລະເປັນຊ່າງທີ່ຊຳນິຊຳນານໃນການອອກແບບເຊັ່ນກັນ.”

← Chapter 34 Jump to: Chapter 36 →