Exodus 27

Lao Bible 2012 (ພຣະຄຳພີສັກສິ)

← Chapter 26 Jump to: Chapter 28 →

1“ຈົ່ງເຮັດແທ່ນບູຊາດ້ວຍໄມ້ກະຖິນເທດ. ສ່ວນແທ່ນນັ້ນ ຈົ່ງໃຫ້ເປັນຮູບສີ່ຫລ່ຽມດັ່ງນີ້: ຍາວ 2,2 ແມັດ, ກວ້າງ 2,2 ແມັດ ແລະສູງ 1,3 ແມັດ.

2ຈົ່ງເຮັດຍອດແທ່ນເປັນຮູບເຂົາສັດໄວ້ທັງສີ່ແຈ ແລະໃຫ້ເປັນເນື້ອດຽວກັນກັບແທ່ນບູຊາ; ຈົ່ງໂອບແທ່ນນັ້ນດ້ວຍທອງສຳຣິດ.

3ຈົ່ງເຮັດໝໍ້ໃສ່ຂີ້ເຖົ່າຂອງໄຂມັນ, ເຮັດຊ້ວນ, ຖ້ວຍ, ຂໍເກາະ ແລະຖາດຮອງຖ່ານໄຟ. ເຄື່ອງໃຊ້ເຫຼົ່ານີ້ ຈົ່ງເຮັດດ້ວຍທອງສຳຣິດທັງໝົດ.

4ຈົ່ງເຮັດຕະຂ່າຍທອງສຳຣິດໃສ່ເຕົາໄຟ ແລະຫລໍ່ຫູຈັບດ້ວຍທອງສຳຣິດໃສ່ແຕ່ລະແຈ.

5ຕະຂ່າຍນີ້ໃຫ້ຢູ່ລຸ່ມຂອບຂອງແທ່ນ ແລະໃຫ້ຢ່ອນລົງມາຮອດແຕ່ກາງແທ່ນ.

6ສ່ວນຄານຫາມນັ້ນ ຈົ່ງເຮັດດ້ວຍໄມ້ກະຖິນເທດ ແລະໂອບດ້ວຍທອງສຳຣິດ.

7ແລ້ວໃຫ້ສອດໃສ່ຫູຂອງແທ່ນແຕ່ລະເບື້ອງໄວ້ ເພື່ອຫາມຍົກຍ້າຍໄປມາ.

8ສ່ວນແທ່ນນັ້ນ ຈົ່ງເຮັດດ້ວຍໄມ້ກະດານແລະຄວັດລົງເປັນໝົ້ງ ຕາມແຜນທີ່ເຮົາໄດ້ສຳແດງໃຫ້ເຈົ້າເບິ່ງທີ່ເທິງພູເຂົານັ້ນ.

9ສຳລັບຫໍເຕັນບ່ອນທີ່ເຮົາຢູ່ນັ້ນ ຈົ່ງອ້ອມດ້ວຍຜ້າກັ້ງທີ່ເຮັດຈາກຜ້າປ່ານເນື້ອລະອຽດດີ. ຜ້າກັ້ງທາງດ້ານໃຕ້ໃຫ້ຍາວ 44 ແມັດ

10ຈັ້ງດ້ວຍເສົາທອງສຳຣິດ 20 ເສົາ ແລະຕີນຮອງເສົາທອງສຳຣິດ 20 ຕີນ ໂດຍມີຂໍເກາະກັບຄັນສອດຜ້າກັ້ງທີ່ເຮັດດ້ວຍເງິນ.

11ສ່ວນທາງດ້ານເໜືອຂອງເດີ່ນນັ້ນ ຈົ່ງເຮັດຄືກັນກັບດ້ານໃຕ້ທຸກຢ່າງ.

12ຜ້າກັ້ງທາງດ້ານຕາເວັນຕົກໃຫ້ຍາວຊາວສອງແມັດ ກັບມີເສົາສິບເສົາ ແລະມີຕີນຮອງເສົາສິບຕີນດ້ວຍ.

13ທາງດ້ານຕາເວັນອອກຂອງປະຕູເຂົ້າ ຜ້າກັ້ງຊຶ່ງອ້ອມຮອບນັ້ນກໍໃຫ້ຍາວ 22 ແມັດ ເຊັ່ນກັນ.

14ແຕ່ລະຂ້າງທາງດ້ານປະຕູເຂົ້າໃຫ້ມີຜ້າກັ້ງ 6,6 ແມັດ ພ້ອມເສົາສາມເສົາແລະຕີນຮອງສາມຕີນ.

16ທີ່ທາງປະຕູເຂົ້ານັ້ນ ຈົ່ງໃຫ້ມີຜ້າກັ້ງເກົ້າແມັດ ຊຶ່ງເຮັດດ້ວຍຜ້າປ່ານເນື້ອລະອຽດດີ ຕໍ່າສັບກັນກັບຜ້າຂົນແກະເປັນສີຟ້າ, ສີມ່ວງ ແລະສີແດງ ພ້ອມທັງຕົບແຕ່ງດ້ວຍການຫຍິບແສ່ວ. ຜ້າກັ້ງຜືນນີ້ ຈົ່ງໃຫ້ມີເສົາສີ່ເສົາແລະມີຕີນຮອງເສົາສີ່ຕີນຈັ້ງໄວ້.

17ຄັນສອດຜ້າກັ້ງທີ່ເປັນເງິນນັ້ນ ຈົ່ງຕໍ່ເຂົ້າກັນກັບເສົາທັງໝົດຂອງຜ້າກັ້ງທີ່ອ້ອມຮອບຫໍເຕັນ ໂດຍມີຂໍເກາະເປັນເງິນ ແລະຕີນຮອງເສົາເປັນທອງສຳຣິດ.

18ຜ້າກັ້ງອ້ອມຮອບໃຫ້ຍາວ 44 ແມັດ, ກວ້າງ 22 ແມັດ ແລະສູງ 2,2 ແມັດ. ສ່ວນຜ້າກັ້ງນັ້ນ ຈົ່ງເຮັດດ້ວຍຜ້າປ່ານເນື້ອລະອຽດດີ ແລະຕີນຮອງເສົານັ້ນກໍໃຫ້ເຮັດດ້ວຍທອງສຳຣິດ.

19ເຄື່ອງໃຊ້ທັງໝົດປະຈຳຫໍເຕັນພ້ອມທັງຫລັກສຽບຂອງຫໍເຕັນ ແລະຂອງຜ້າກັ້ງທີ່ອ້ອມຮອບຫໍເຕັນນັ້ນ ຈົ່ງເຮັດດ້ວຍທອງສຳຣິດທັງສິ້ນ.

20ຈົ່ງສັ່ງປະຊາຊົນອິດສະຣາເອນໃຫ້ນຳນໍ້າມັນໝາກກອກເທດອັນດີທີ່ສຸດ ມາໃຫ້ເຈົ້າສຳລັບໄຕ້ຕະກຽງໃນເວລາກາງຄືນ ເພື່ອມັນຈະສ່ອງແສງສະຫວ່າງຢູ່ສະເໝີ.

21ໃຫ້ອາໂຣນ ແລະພວກລູກຊາຍຂອງລາວ ເປັນຜູ້ບົວລະບັດຮັກສາຕະກຽງ ຢູ່ຊ້ອງໜ້າເຮົາໃນຫໍເຕັນບ່ອນຊຸມນຸມເບື້ອງນອກ ຄືຢູ່ນອກຜ້າກັ້ງທາງໜ້າຂອງຫີບພັນທະສັນຍາ. ຈົ່ງໄຕ້ຕະກຽງແຕ່ຕອນຄໍ່າຈົນເຖິງຕອນຮຸ່ງເຊົ້າຢູ່ຊ້ອງໜ້າພຣະເຈົ້າຢາເວ. ຈົ່ງໃຫ້ຊາວອິດສະຣາເອນກັບເຊື້ອສາຍຂອງພວກເຂົາ ຕັ້ງໃຈໃສ່ປະຕິບັດຕາມຄຳສັ່ງນີ້ຕະຫລອດໄປ.”

← Chapter 26 Jump to: Chapter 28 →