2 Chronicles 4

Malagasy 2004 (DIEM PROTESTANTA)

← Chapter 3 Jump to: Chapter 5 →

1Dia nataon’i Horama koa ny alitara halimo efamira, izay folo metatra ny lafiny ary dimy metatra ny haavony.

2Dia nanao ilay fitobian-drano goavana boribory i Horama; halimo voaempo no nanefeny azy, ka nirefy dimy metatra ny savaivony, roa metatra sy sasany ny haavony, ary 15 metatra ny morony manodidina azy.

3Tambanin’ny molotr’ilay fitobian-drano goavana, tamin’ny manodidina azy manontolo, dia nisy sarin’ombalahy folo isaky ny antsasa-metatra; roa andalana ireo nifanongoa ireo ary niara-narendrika tamin’ilay fitobian-drano.

4Tambony sarin’ombilahy halimo 12 no nipetrahan’ilay fitobian-drano; ka ny telo nitodika nianavaratra, ny telo nitodika niankandrefana, ny telo nitodika nianatsimo, ary ny telo nitodika niantsinanana. Eny, ilay fitobian-drano goavana dia teo ambonin’ireo sarin’ombalahy izay nifampiamboho ireo.

5Ny hateviny dia valo santimetatra; ary ny molony dia natao tahaka ny molo-tsangambava ka miendrika felana lisy. Niaty 135 000 litatra eo ho eo izany fitobian-drano goavana izany.

6Dia nanao ny kovetabe halimo folo i Horama mba ho fanasàn-tsorona, ka ny dimy napetraka teo amin’ny ankavanana, fa ny dimy teo amin’ny ankavia; ny zavatra fanao sorona dorana manontolo no nakobaka teo. Ny fitobian-drano goavana kosa dia fidiovan’ny mpisorona.

7Dia nanao ny fitoeran-jiro volamena folo, araka ny toromarika, i Horama ka napetrany tao amin’ny Toeramasina, dimy teo amin’ny ankavanana ary dimy teo amin’ny ankavia.

8Dia nataony koa ny latabatra folo izay napetraka tao amin’ny Toeramasina, dimy teo amin’ny ankavanana ary dimy teo amin’ny ankavia. Dia nataony ny tsatokaty volamena miisa zato mba ho famafazana.

9Ary nataony ny kianjan’ny mpisorona sy ilay kianja hafa lehibe kokoa miaraka amin’ny lelavavahady izay nopetahana takelaka halimo.

10Ilay fitobian-drano goavana dia napetrany teo amin’ny lafiny havanana, teo amin’ny zorony atsimo atsinanana.

11Rehefa vitan’i Horama ny vilany fanangonan-davenona sy ny lapelina ary ny tsatokaty famafazana, dia efany avokoa ny asa izay nataony ho an’i Salômôna mpanjaka tao amin’ny tranon’Andriamanitra:

12ny andry anankiroa, ny koronosy boribory anankiroa teo an-tampon’ny andry, ny harato anankiroa nafono ny koronosy,

13ny sarin’ampongabendanitra efajato nahantona tamin’ny harato roa, ka ampongabendanitra roa andalana isaky ny harato.

14Nataon’i Horama ny kalesy mbamin’ireo kovetabe fametraka eo amboniny,

15sy ilay fitobian-drano goavana mbamin’ny sarin’ombalahy 12 teo ambaniny,

16ary ny vilany fanangonan-davenona mbamin’ny lapelina sy ny fitrebika. Ny kojakoja rehetra nataon’i Horama-Abỳ ho an’i Salômôna mpanjaka ho an’ny tranon’ny TOMPO, dia vita halimo mamiratra avokoa.

17Tao amin’ny lohasahan’i Jôrdàna no nasain’i Salômôna narendrika tao amin’ny tany be tanimanga ireo kojakoja ireo, dia teo anelanelan’i Sokôta sy i Tseredatà.

18Nampanao fitaovana maro dia maro i Salômôna, hany ka tsy hay notombanana intsony izay lanjan’ny halimo nampiasaina.

19Nampanaovin’i Salômôna natao koa ny kojakoja volamena rehetra izay nilaina tao amin’ny tranon’Andriamanitra, dia ireto avy: ny alitara volamena, ny latabatra fametrahana ny mofo aterina ho an’Andriamanitra,

20ny fitoeran-jiro mbamin’ny lelan-jiro hampirehetina eo anoloan’ny efitra masina indrindra, araka ny fomba, dia samy volamena madio avokoa,

21ny sary felam-boninkazo sy ny lelan-jiro ary ny hetin-jiro, izay momba ny fitoeran-jiro, dia samy volamena faran’izay tsara;

22ny antsy, ny tsatokaty famafazana, ny kaopy, ary ny fitoeran-davenon-jiro, dia samy volamena madio; ny lelavaravarana, na ny mankao amin’ny Toeramasina Indrindra, na ny mankao amin’ny efitrano malalaka, dia samy volamena avokoa.

← Chapter 3 Jump to: Chapter 5 →