Jeremiah 23

Lahu Bible Edited © Thailand Bible Society and Bible Society of Myanmar, 2010, 2020.

1Gʼuiˬsha ve chaw teˇ hpaˍ hta‸ te luˬ te sheˆ leh, hpaˆ da‸ kʼai piˇ ve chaw oˇ ve teˇ hpaˍ hta‸ Gʼuiˬsha ciˍ yanˍ piˇ tuˬ ve lehˬ, hkʼaˬ ma kawˆ tuˬ cawˬ ve le.

2Yawˇ ve chaw teˇ hpaˍ hta‸ ha‸ shaˉ piˇ tuˬ, Gʼuiˬsha teh taˍ ve awˬ hoˉ awˬ naˬ teˇ hpaˍ hta‸ Iˉsaˍreˍlaˆ ve Gʼuiˬsha chi hkʼe kʼoˆ ve yoˬ. Nawˬ hui lehˬ, ngaˬ ve chaw teˇ hpaˍ hta‸ hkʼa deh‸ maˇ ha‸ shaˉ piˇ. Yawˇ hui hta‸ hpaˆ da‸ piˇ leh, gʼa‸ kʼoˬ piˇ taˍ ve yoˬ. Nawˬ hui chi hkʼe te ve pa taw, ngaˬ nawˬ hui hta‸ ciˍ yanˍ laˇ tuˬ yoˬ.

3Hpaˆ da‸ kʼai peuˬ ve ngaˬ ve chaw oˇ ve teˇ hpaˍ hta‸ ngaˬ teˇ geh kʼaw‸ shaw hpoˆ leh, yawˇ hui ve mvuhˇmiˬ lo kʼaw‸ shiˍ hkʼaw‸ veu laˇ piˇ tuˬ yoˬ. Yawˇ hui chaw kʼaw‸ maˇ la tuˬ yoˬ.

4Yawˇ hui hta‸ ha‸ shaˉ piˇ tuˬ, awˬ hoˉ awˬ naˬ teˇ hpaˍ hta‸ ngaˬ kʼaw‸ leuˆ piˇ tuˬ yoˬ. Ngaˬ ve chaw teˇ hpaˍ lehˬ, teˇ pawˆ ka‸ gʼa kʼaw‸ kawˆ jehˇ chehˇ tuˬ ve maˇ heˆ. Ngaˬ yawˇ hui hta‸ kʼaw‸ ciˍ yanˍ piˇ tuˬ ve ka‸ maˇ heˆ, teh‸ Gʼuiˬsha kʼoˆ ve yoˬ.

5Gʼuiˬsha kʼoˆ ve, Daˍviˆ ve awˬ ceuˬ awˬ hkʼaˇ awˬ hkʼaw lo jawˇmawˇ te tuˬ ve chaw teˇ gʼaˇ hta‸ ngaˬ kʼaw‸ leuˆ yuˬ tuˬ ve awˬ yanˇ gaˬ la chehˇ ve yoˬ. Jawˇmawˇ oˇ ve lehˬ, cuˇ yiˍ cawˬ ve hkʼaw mvuhˇmiˬ hta‸ uˉ peunˍ leh, hteˇ ve cawˇ ve kanˉ hta‸ tiˉ te tuˬ yoˬ.

6Yawˇ jawˇmawˇ te chehˇ ve teˇ yanˇ, Yuˇda‸ chaw leh Iˉsaˍreˍlaˆ chaw teˇ hpaˍ gawˬ lehˍ gʼa chehˇ tuˬ yoˬ. Shu yawˇ hta‸, Gʼuiˬsha lehˬ ngaˬ hui ve htaiˍ hkʼaw‸ paˍ yoˬ, teh‸ kʼoˆ tuˬ yoˬ.

7Iˉsaˍreˍlaˆ chaw hui hta‸ Eˇjiˇtu‸ mvuhˇmiˬ hkʼaw shiˍ tawˆ la shehˍ hpaˇ Gʼuiˬsha ve awˬ meh hta‸ cuˇ leh hkanˍ ve yoˬ teh‸ chaw yaˇ maˇ gʼa kʼaw‸ kʼoˆ tuˬ ve awˬ yanˇ gaˬ la chehˇ ve yoˬ.

8Ya‸ hkʼaˇ, Iˉsaˍreˍlaˆ chaw hui hta‸ awˬ na ve mvuhˇmiˬ leh, awˬ kaˍ awˬ nu ve mvuhˇmiˬ teˇ hpaˍ hkʼaw lo shiˍ tawˆ la shehˍ hpaˇ Gʼuiˬsha, teh‸ kʼaw‸ kʼoˆ tuˬ yoˬ. Yawˇ hui lehˬ, a shu yawˇ ve mvuhˇmiˬ hkʼaw gʼa kʼaw‸ chehˇ tuˬ yoˬ, teh‸ Gʼuiˬsha kʼoˆ ve yoˬ.

9Ngaˬ dawˇ haˍ jaˇ leh, cheˇ cheˇ veˆ veˆ hpeh‸ chehˇ ve yoˬ. Gʼuiˬsha ve da‸ kehˬ jaˇ ve tawˇ teˇ hpaˍ hta‸ pa taw, ngaˬ lehˬ a pehˉ meuˇ gʼuiˬ dawˬ bvuhˆ jaˇ ve chaw hkʼe hpeh‸ ve yoˬ.

10Miˬguiˬ chi hkʼoˆ lo Gʼuiˬsha hta‸ ka ti‸ maˇ yeˬ ve chaw hkʼa biˇ chehˇ taˍ ve yoˬ. Yawˇ hui lehˬ haiˬ ve kanˉ hta‸ tiˉ te chehˇ ve yoˬ. Gʼuiˬsha hkeu ve pa taw, miˬguiˬ dawˇ haˍ leh kʼaˆ caˇ kuiˬ teˇ hpaˍ goˇ kʼai ve yoˬ.

11Gʼuiˬsha kʼoˆ ve, Tcuh kaˍ paˍ leh paw hkuˇ teˇ hpaˍ lehˬ, Gʼuiˬsha hta‸ maˇ shiˍ ve chaw hpeh‸ ve yoˬ. Bon yehˬ hkʼaw lo yawˇ hui haiˬ ve kanˉ te chehˇ ve hta‸ ngaˬ gʼa mawˬ ve yoˬ.

12Yawˇ hui te toˇ chehˇ ve ya‸ kʼaw lehˬ, leˆ jaˇ leh naˆ ho‸ jaˇ ve yoˬ. Ngaˬ yawˇ hui hta‸ hkui htiˇ poˬ paiˍ piˇ lawˬ tuˬ yoˬ. Yawˇ hui awˬ hkʼoˆ lo, kawˆ tuˬ dawˇ haˍ tuˬ awˬ ceuˬ hta‸ ngaˬ gaˬ la piˇ tuˬ yoˬ. Yawˇ hui hta‸ ciˍ yanˍ piˇ tuˬ ve awˬ yanˇ gaˬ la chehˇ ve yoˬ.

13Saˍmaˍriˆ mvuhˇmiˬ hkʼaw chehˇ ve tcuh kaˍ paˍ teˇ hpaˍ ve venˇbaˆ hta‸ htawˇ, ngaˬ gʼa mawˬ ve yoˬ. Yawˇ hui lehˬ, Baˍlaˆ gʼuiˬsha ve awˬ meh hkʼaw tawˇ yaw leh, ngaˬ ve chaw teˇ hpaˍ hta‸ ya‸ kʼaw sheh ya‸ chehˇ ve yoˬ.

14Ya‸ hkʼaˇ, Yeˍruˆsaˍlehnˍ venˇ hkʼaw chehˇ ve tcuh kaˍ paˍ teˇ hpaˍ lehˬ, yawˇ hui a‸ kehˉ leuˉ leh haiˬ jaˇ ve hta‸ ngaˬ gʼa mawˬ ve yoˬ. Yawˇ hui lehˬ, haˉ chawˇ haˉ paˆ te leh shu hta‸ heˍ caˇ chehˇ ve yoˬ. Shu ya‸ kʼai tuˬ yawˇ hui te piˇ ve pa taw, chaw yaˇ teˇ hpaˍ awˬ haiˬ hta‸ tiˉ te kʼai ve yoˬ. Ngaˬ mehˆ gʼuˇ suhˍ lo, yawˇ hui lehˬ Sawˉdonˍ leh Gawˇmawˇra‸ venˇ hkʼa shuˍ cha‸ chiˆ jaˇ peuˬ.

15Chi hta‸ pa taw, ngaˬ Gʼuiˬsha lehˬ Yeˍruˆsaˍlehnˍ venˇ hkʼaw chehˇ ve tcuh kaˍ paˍ teˇ hpaˍ awˬ lawn chi hkʼe kʼoˆ ve yoˬ. Ngaˬ yawˇ hui hta‸ hkʼaˇ jaˇ ve suhˆ hpa‸ caˍ piˇ leh, awˬ taw‸ ma taw piˇ tuˬ yoˬ. Awˬ lawn kʼo, yawˇ hui lehˬ maˇ hteˇmaˇ cawˇ ve awˬ ceuˬ mvuhˇmiˬ hkʼaw biˇ kʼai tuˬ te chehˇ ve yoˬ, teh‸ Gʼuiˬsha kʼoˆ ve yoˬ.

16Gʼuiˬsha lehˬ, Yeˍruˆsaˍlehnˍ venˇ yaˇ teˇ hpaˍ hta‸ htawˇ chi hkʼe kʼoˆ piˇ ve yoˬ. Tcuh kaˍ paˍ teˇ hpaˍ kʼoˆ laˇ ve tawˇ hta‸ taˇ na. Yawˇ hui dawˇ tawˆ ve hkʼe, nawˬ hui hta‸ kʼoˆ laˇ chehˇ ve yoˬ. Ngaˬ kʼoˆ ve tawˇ yawˇ hui kʼoˆ laˇ chehˇ ve maˇ heˆ.

17Ngaˬ ve tawˇ hta‸ maˇ na ve chaw hui hta‸, Maˇ keh. Teˇ ceuˬ le le da‸ la tuˬ yoˬ, teh‸ kʼoˆ piˇ chehˇ ve yoˬ. A shu yawˇ ve a loˍ hta‸ te chehˇ ve chaw hui hta‸ htawˇ, Kawˆ tuˬ dawˇ haˍ tuˬ gaˬ la tuˬ ve maˇ heˆ, teh‸ kʼoˆ piˇ chehˇ ve yoˬ, teh‸ Gʼuiˬsha kʼoˆ ve yoˬ.

18Tcuh kaˍ paˍ chi teˇ hpaˍ lehˬ, Gʼuiˬsha ve dawˇ hkʼaˇ hta‸ maˇ shiˍ ve chaw hpeh‸ ve yoˬ. Yawˇ hui Gʼuiˬsha ve tawˇ hta‸ gʼa kaˇ taˍ ve maˇ heˆ. Gʼuiˬsha yawˇ hui hta‸ tawˇ yaw piˇ taˍ ve ka‸ maˇ heˆ.

19Gʼuiˬsha lehˬ, mvuhˇ haw lonˉ meuˆ laˬ piˇ leh, haiˬ ve chaw chi teˇ hpaˍ hta‸ te luˬ piˇ tuˬ yoˬ.

20Gʼuiˬsha lehˬ, Yawˇ dawˇ taˍ ve hkʼe te peuˬ htaˇ hkʼa gaˬ, Yawˇ nyi ma zuhˆ ve hta‸ mehˉ kʼai piˇ tuˬ ve maˇ heˆ. Yawˇ ve chaw teˇ hpaˍ lehˬ, awˬ ceuˬ chi ve hta‸ awˬ hkʼaw‸ nawˉ hkʼa tawˍ lehˆ shiˍ la tuˬ yoˬ.

21Gʼuiˬsha kʼoˆ ve, Tcuh kaˍ paˍ chi teˇ hpaˍ hta‸ ngaˬ peu laˇ taˍ ve maˇ heˆ. Yawˇ hui hkʼaˇ yawˇ hui laˬ taˍ ve yoˬ. Ngaˬ yawˇ hui hta‸ tawˇ maˇ yaw piˇ. Ya‸ hkʼaˇ, yawˇ hui ngaˬ ve awˬ meh hkʼaw tawˇ yaw chehˇ ve yoˬ.

22Yawˇ hui ngaˬ ve dawˇ hkʼaˇ hta‸ shiˍ ve hkʼe kʼo, yawˇ hui ngaˬ ve tawˇ hta‸ yaw leh, haiˬ ve kanˉ te chehˇ ve chaw hui hta‸ tawˍ taˍ tuˬ yoˬ.

23Ngaˬ lehˬ, teˇ kaˬ lo tiˉ chehˇ ve Gʼuiˬsha hpeh‸ ve maˇ heˆ. Hkʼaˬ ti chi ti lo chehˇ taˍ ve yoˬ.

24Ngaˬ mehˆ gʼuˇ suhˍ lo, chaw teˇ gʼaˇ ka‸ ca va‸ taˍ maˇ gʼa. Miˬguiˬ mvuhˇ naw hkʼoˆ teˇ kaˬ le le lo, ngaˬ chehˇ taˍ ve hta‸ nawˬ hui maˇ shiˍ laˇ.

25Zuh‸ maˆ ve hkʼaw Gʼuiˬsha ngaˬ hta‸ tawˇ yaw laˇ ve yoˬ, teh‸ kʼoˆ leh ca heˍ toˇ chehˇ ve tcuh kaˍ paˍ oˇ ve teˇ hpaˍ hta‸ ngaˬ shiˍ taˍ ve yoˬ.

26Tcuh kaˍ paˍ oˇ ve teˇ hpaˍ lehˬ, heˍ ve tawˇ hta‸ yehˇ leh ngaˬ ve chaw teˇ hpaˍ hta‸ hkʼaˬ maw maw ya‸ kʼaw sheh ya‸ piˇ tuˬ sheˍ ve le.

27Yawˇ hui zuh‸ maˆ mawˬ ve awˬ ceuˬ shu hta‸ kʼoˆ piˇ ve kʼo, yawˇ hui ve awˬ puˍ awˬ pi teˇ hpaˍ ngaˬ hta‸ baˬ taˉ leh Baˍlaˆ guiˬ sha hta‸ oˉ kʼoˍ pui kʼai ve hkʼe, chaw yaˇ teˇ hpaˍ ngaˬ hta‸ baˬ taˉ tuˬ yoˬ, teh‸ yawˇ hui dawˇ chehˇ ve yoˬ.

28Zuh‸ maˆ mawˬ puiˉ ve tcuh kaˍ paˍ teˇ hpaˍ lehˬ, Ngaˬ zuh‸ maˆ mawˬ ve yoˬ, teh‸ kʼoˆ cawˇ ve yoˬ. Ngaˬ ve tawˇ hta‸ gʼa kaˇ ve tcuh kaˍ paˍ lehˬ, ka ti‸ yeˬ ve hkʼaw shu hta‸ kʼoˆ maˍ piˇ cawˇ ve yoˬ. Caˬ cuˉ leh caˬ shiˍ hkʼaˬ ma peun da‸ ve le.

29Ngaˬ ve tawˇ lehˬ, aˬ miˍ leh haˉ pui hta‸ dawˆ meu-e piˇ ve hta tu hkʼe hpeh‸ ve yoˬ.

30Shu ve tawˇ hta‸ ca gʼawˆ kʼaoˍ leh, Chi lehˬ ngaˬ geh gʼa ve tawˇ yoˬ, teh‸ ca kʼoˆ toˇ ve tcuh kaˍ paˍ hta‸ ngaˬ canˇ ve yoˬ.

31A shu yawˇ dawˇ tawˆ ve hkʼe kʼoˆ leh, Chi lehˬ ngaˬ geh gʼa ve tawˇ yoˬ, teh‸ ca kʼoˆ toˇ ve tcuh kaˍ paˍ hta‸ htawˇ ngaˬ canˇ ve yoˬ.

32Ngaˬ kʼoˆ chehˇ ve tawˇ hta‸ na sheˍ. Zuh‸ maˆ mawˬ ve yoˬ, teh‸ kʼoˆ leh shu hta‸ ca heˍ toˇ ve tcuh kaˍ paˍ teˇ hpaˍ hta‸ ngaˬ canˇ ve yoˬ. Yawˇ hui lehˬ, chi hkʼe ve zuh‸ maˆ teˇ hpaˍ ca kʼaoˍ maˍ leh, ngaˬ ve chaw teˇ hpaˍ hta‸ ya‸ kʼaw sheh ya‸ chehˇ ve yoˬ. Ngaˬ yawˇ hui hta‸ peu laˇ taˍ ve maˇ heˆ. Yawˇ hui lehˬ, chaw yaˇ teˇ hpaˍ hta‸ te‸ chiˉ ga piˇ gʼa ve maˇ heˆ, teh‸ Gʼuiˬsha kʼoˆ ve yoˬ.

33Gʼuiˬsha ngaˬ hta‸ chi hkʼe kʼoˆ laˇ ve yoˬ. Yeˍraˍmiˆ-oˬ, tcuh kaˍ paˍ leh paw hkuˇ teˇ gʼaˇ gʼaˇ nawˬ geh laˬ leh, Gʼuiˬsha ve tawˇ hkʼaˬ hkʼe cawˬ le, teh‸ ca na nyi la ve kʼo, chi hkʼe kʼoˆ piˇ-oˆ. Nawˬ hui Gʼuiˬsha hta‸ dawˇ haˍ piˇ lawˬ ve yoˬ. Chi hta‸ pa taw, yawˇ nawˬ hui ta‸ baˬ taˉ laˇ tuˬ yoˬ.

34Ngaˬ ve chaw, tcuh kaˍ paˍ leh paw hkuˇ teˇ gʼaˇ gʼaˇ, Gʼuiˬsha ve tawˇ, teh‸ kʼoˆ ve tawˇ chi hta‸ yehˇ ve kʼo, yawˇ leh yawˇ ve yehˬ yaˇ kʼa yaˇ hkʼa peu-eˬ hta‸ ngaˬ ciˍ yanˍ piˇ tuˬ yoˬ.

35Yawˇ hui teˇ gʼaˇ leh teˇ gʼaˇ chi hkʼe na da‸ cawˇ ve yoˬ. Gʼuiˬsha hkʼaˬ hkʼe kʼaw‸ yaw hkʼaw‸ laˇ ve le, teh‸ kʼoˆ cawˇ ve yoˬ.

36Gʼuiˬsha ve tawˇ, teh‸ kʼoˆ ve tawˇ chi hta‸ taˇ kʼaw‸ yehˇ. Oˇ hkʼe te ve chaw hta‸ ngaˬ ve tawˇ lehˬ, dawˇ haˍ piˇ lawˬ tuˬ yoˬ. Chaw yaˇ teˇ hpaˍ lehˬ, ngaˬ ve tawˇ hta‸ yuˬ hpfuhˆ chehˇ ve yoˬ.

37Yeˍraˍmiˆ-oˬ, tcuh kaˍ paˍ hui hta‸ Gʼuiˬsha nawˬ hui hta‸ hkʼaˬ hkʼe kʼaw‸ yaw hkʼaw‸ laˇ ve le, teh‸ na nyi-o.

38Yawˇ hui ngaˬ ve tawˇ hta‸ maˇ na leh, Gʼuiˬsha ve tawˇ, teh‸ kʼoˆ ve tawˇ chi hta‸ yehˇ ve kʼo, yawˇ hui hta‸ chi hkʼe kʼoˆ piˇ-oˆ.

39Ngaˬ lehˬ, nawˬ hui hta‸ maˇ kʼoˆ, nawˬ hui leh nawˬ hui ve awˬ puˍ awˬ pi hui hta‸ piˇ taˍ ve venˇ teˇ hpaˍ hta‸ maˇ kʼoˆ, ngaˬ yuˬ leh vuiˇ kuiˬ lo baˬ peu tuˬ yoˬ.

40Hkʼaˬ htaˆ ka‸ leunˇ kʼai maˇ gʼa law‸ law‸ ve ya‸ taw tuˬ awˬ ceuˬ, ngaˬ yawˇ hui awˬ hkʼoˆ gaˬ la piˇ tuˬ yoˬ, teh‸ Gʼuiˬsha kʼoˆ ve yoˬ.

← Chapter 22 Jump to: Chapter 24 →