bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Lahu
/
Lahu Bible Edited © Thailand Bible Society and Bible Society of Myanmar, 2010, 2020.
/
Jeremiah 31
Jeremiah 31
Lahu Bible Edited © Thailand Bible Society and Bible Society of Myanmar, 2010, 2020.
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 32 →
1
Gʼuiˬsha kʼoˆ ve, Ngaˬ lehˬ Iˉsaˍreˍlaˆ chaw hkʼa peu-eˬ ve Gʼuiˬsha hpeh‸ leh, yawˇ hui ngaˬ ve chaw hpeh‸ la tuˬ ve awˬ yanˇ gaˬ la chehˇ ve yoˬ.
2
Suh kuiˬ lo ponˬ tawˆ la taˍ ve chaw hui hta‸ heh puiˉ hkʼaw lo ngaˬ ha kʼaˉ piˇ taˍ ve yoˬ. Iˉsaˍreˍlaˆ chaw hui gʼaˇ jehˇ gaˇ ve teˇ yanˇ, ngaˬ lehˬ vuiˇ kuiˬ lo chehˇ taˍ leh yawˇ hui geh laˬ ve yoˬ.
3
Iˉsaˍreˍlaˆ chaw hui-oˬ, ngaˬ nawˬ hui hta‸ hkʼaˬ htaˆ ka‸ ha‸ chehˇ ve yoˬ. Laˬ tuˬ ve awˬ yanˇ awˬ hkʼaw lo htawˇ, ngaˬ nawˬ hui hta‸ kʼaw‸ caˉ leh ha‸ laˇ tuˬ sheˍ ve yoˬ.
4
Ngaˬ nawˬ hui hta‸ teˇ pawˆ kʼaw‸ uiˍ la mvuh la piˇ tuˬ yoˬ. Nawˬ hui lehˬ, a shu yawˇ ve tinˍ hteˆ leh ha lehˬ ha kʼa ve hkʼaw kʼaˍ gʼa kʼaw‸ hkʼeˆ tuˬ yoˬ.
5
Nawˬ hui lehˬ, Saˍmaˍriˆ hkʼaw hkʼoˆ lo a pehˉ meuˇ hko gʼa kaw‸ te caˇ tuˬ yoˬ.
6
Eˇhpaˍrenˍ hkʼaw hkʼoˆ shaw shehˍ hpaˇ teˇ hpaˍ lehˬ, Ngaˬ hui ve Gʼuiˬsha geh Ziˉonˍ hkʼaw hkʼoˆ lo kʼai-a veuˬ, teh‸ nawˬ hui hta‸ kʼoˆ laˇ tuˬ ve awˬ yanˇ gaˬ la chehˇ ve yoˬ, teh‸ Gʼuiˬsha kʼoˆ ve yoˬ.
7
Gʼuiˬsha kʼoˆ ve, Awˬ nu ve chaw ceuˬ teˇ hpaˍ a‸ kehˉ uiˍ jaˇ ve Iˉsaˍreˍlaˆ chaw awˬ pon kʼa muiˬ chehˇ-oˆ. Gʼuiˬsha lehˬ, cawˬ taˉ sheˍ ve yawˇ ve chaw teˇ hpaˍ hta‸ htaiˍ hkʼaw‸ piˇ peuˬ. Ha lehˬ kʼa muiˬ chehˇ-oˆ.
8
Awˬ na hpawˇ lo leh, hkʼaˬ ti chi ti lo chehˇ taˍ ve ngaˬ ve chaw teˇ hpaˍ hta‸ ngaˬ kʼaw‸ shiˍ hkʼaw‸ veu laˇ piˇ tuˬ yoˬ. Mehˆ cuˉ paˍ leh hkui luˬ paˍ teˇ hpaˍ maˇ kʼoˆ, yaˇ hu chehˇ ve yaˇ miˇ teˇ hpaˍ maˇ kʼoˆ, yawˇ hui geh kʼaw‸ la tuˬ yoˬ. Yawˇ hui lehˬ, chaw ceuˬ lonˉ teˇ ceuˬ hkʼa shuˍ kʼaw‸ la tuˬ yoˬ.
9
Yawˇ hui kʼaw‸ la chehˇ ve teˇ yanˇ, hawˬ leh ngaˬ geh bon lawˬ tuˬ yoˬ. Iˉ kaˆ lawˬ lo ngaˬ yawˇ hui hta‸ shiˍ kʼai piˇ leh, yawˇ hui hkui htiˇ maˇ gʼa poˬ tuˬ da‸ ve ya‸ kʼaw hkʼoˆ lo yawˇ hui hta‸ te toˇ tcuh tuˬ yoˬ. Ngaˬ lehˬ, Iˉsaˍreˍlaˆ chaw hui ve Awˬ pa hkʼe hpeh‸ leh, Eˇhpaˍrenˍ lehˬ ngaˬ ve yaˇ paˍ uiˍ hpeh‸ ve yoˬ, teh‸ Gʼuiˬsha kʼoˆ ve yoˬ.
10
Gʼuiˬsha kʼoˆ ve, Miˬguiˬ chaw ceuˬ teˇ hpaˍ-oˬ, ngaˬ ve tawˇ hta‸ na sheˍ. Ngaˬ ve tawˇ chi teˇ hpaˍ, mvuhˇ leh miˬ leh hkʼa gaˬ ca hto piˇ-oˆ. Ngaˬ ve chaw teˇ hpaˍ hta‸ ngaˬ hpaˆ da‸ guiˇ da‸ kʼai piˇ lawˬ ve yoˬ. Ya‸ hkʼaˇ, chi beu‸ ngaˬ yawˇ hui hta‸ ha‸ shaˉ piˇ tuˬ yoˬ.
11
Awˬ gʼaˇ uiˍ ve chaw ceuˬ teˇ ceuˬ ve la‸ sheh hkʼaw lo, ngaˬ yawˇ hui hta‸ ponˬ piˇ taˍ peuˬ ve yoˬ.
12
Yawˇ hui Ziˉonˍ hkʼaw hkʼoˆ lo laˬ leh, ha lehˬ ha kʼa chiˇ mvuh tuˬ yoˬ. Oˇ kaˬ lo yawˇ hui caˬ shiˍ, a pehˉ meuˇ gʼuiˬ, shaˍlonˍ chu, yawˬ teˇ hpaˍ ngaˬ hta‸ ha lehˬ ha kʼa tanˇ laˇ tuˬ yoˬ. Yawˇ hui lehˬ, iˉ kaˆ hkʼa deh‸ gʼa chehˇ ve hko hkʼe hpeh‸ leh, yawˇ hui hkʼa loˍ ve awˬ ceuˬ hkʼa peu-eˬ ve hta‸ gʼa tuˬ yoˬ.
13
Yaˇ miˇ haˉ teˇ hpaˍ ha lehˬ ha kʼa kʼaˍ hkʼeˆ tuˬ yoˬ. Chaw mawˇ yaˇ nehˬ hkʼa peu-eˬ gʼa ha lehˬ tuˬ yoˬ. Ngaˬ yawˇ hui hta‸ dawˇ sha piˇ leh, yawˇ hui ve dawˇ haˍ tuˬ hta‸ ha lehˬ tuˬ kʼaw‸ hpeh‸ la piˇ tuˬ yoˬ.
14
Paw hkuˇ teˇ hpaˍ hta‸ ngaˬ da‸ jaˇ ve caˇ tuˬ caˍ piˇ leh, ngaˬ ve chaw teˇ hpaˍ hkʼa loˍ ve awˬ ceuˬ hkʼa peu-eˬ hta‸ ngaˬ caˍ piˇ tuˬ yoˬ, teh‸ Gʼuiˬsha kʼoˆ ve yoˬ.
15
Gʼuiˬsha kʼoˆ ve, Raˍmaˆ venˇ hkʼaw lo kuˬ hawˬ chehˇ ve awˬ hkawˇ hta‸ gʼa kaˇ ve yoˬ. Raˍhkeˍ laˆ lehˬ mehˉ kʼai peuˬ ve yawˇ ve yaˇ teˇ hpaˍ awˬ pon kuˬ hawˬ chehˇ ve yoˬ. Shu dawˇ sha la tuˬ te piˇ ve hta‸ yawˇ maˇ ha‸ yuˬ.
16
Taˇ hawˬ chehˇ-oˆ. Nawˬ ve mehˆ gʼuiˬ hta‸ shiˆ baˬ loˬ. Nawˬ ve yaˇ teˇ hpaˍ awˬ pon, nawˬ te piˇ taˍ ve kanˉ teˇ hpaˍ lehˬ, hkʼe leˇ hpeh‸ ve maˇ heˆ. Yawˇ hui lehˬ, canˇ paˍ ve mvuhˇmiˬ hkʼaw lo gʼa tawˆ kʼaw‸ la tuˬ yoˬ.
17
Laˬ tuˬ ve awˬ yanˇ hkʼaw lo, nawˬ awˬ pon dawˇ law kuiˬ cawˬ sheˍ ve yoˬ. Nawˬ ve yaˇ teˇ hpaˍ, aˉ hkʼaw lo kʼaw‸ kʼaw‸ la tuˬ yoˬ.
18
Ngaˬ ve Iˉsaˍreˍlaˆ chaw teˇ hpaˍ, dawˇ haˍ ve awˬ hkʼaw lo chi hkʼe kʼoˆ chehˇ ve awˬ hkawˇ hta‸ ngaˬ gʼa kaˇ ve yoˬ. Gʼuiˬsha-oˬ, ngaˬ hui lehˬ suhˇ jaˇ ve to nuˇ to shaˆ hkʼe hpeh‸ ve yoˬ. Ya‸ hkʼaˇ, nawˬ ve tawˇ hta‸ na yuˬ tuˬ, nawˬ ngaˬ hui hta‸ hto laˇ chehˇ ve yoˬ. Ngaˬ hui hta‸ aˉ hkʼaw lo kʼaw‸ shiˍ kʼo‸-e laˇ-oˆ. Ngaˬ hui nawˬ geh kʼaw‸ hpfuhˆ kʼaw‸ la tuˬ gu taˍ peuˬ.
19
Ngaˬ hui nawˬ hta‸ baˬ taˉ peuˬ ve yoˬ. Ya‸ hkʼaˇ, maˇ maw maw ngaˬ hui nawˬ geh kʼaw‸ hpfuhˆ kʼaw‸ la gaˇ ve yoˬ. Nawˬ ngaˬ hui hta‸ ciˍ yanˍ laˇ peuˬ hkʼaw‸ nawˉ, ngaˬ hui dawˇ tui‸ gaˇ tui‸ jaˇ ve yoˬ. Ngaˬ hui yaˇ nehˬ hpeh‸ chehˇ htaˇ, venˇbaˆ te peuˬ ve pa taw awˬ me‸ awˬ hponˇ luˬ kʼai leh ya‸ taw kuiˬ lo gʼa gaˬ peuˬ, teh‸ yawˇ hui kʼoˆ chehˇ ve yoˬ.
20
Iˉsaˍreˍlaˆ-oˬ, nawˬ lehˬ ngaˬ ha‸ jaˇ ve yaˇ paˍ hpeh‸ ve yoˬ. Ngaˬ nawˬ hta‸ ciˍ yanˍ laˇ chehˇ ve htawˇ, ngaˬ nawˬ hta‸ ha‸ chehˇ leh, nawˬ hta‸ ha kʼaˉ laˇ tuˬ yoˬ.
21
Nawˬ hui shu mvuhˇmiˬ lo gʼa toˇ kʼai ve ya‸ kʼaw hta‸ tawnˇ taˍ-o‸. Iˉsaˍreˍ laˆ chaw hui-oˬ, kʼaw‸ la-o. Nawˬ hui ve venˇ hkʼaw lo ca kʼaw‸ chehˇ la-o.
22
Maˇ yonˍ puiˉ ve chaw hui-oˬ, nawˬ hui hkʼaˬ maw maw jo chehˇ tuˬ sheˍ ve le. Ngaˬ lehˬ kanˉ awˬ suhˉ teˇ ceuˬ kʼaw‸ te chehˇ ve yoˬ. Kanˉ oˇ ve lehˬ, yaˇ miˇ hawˉ hkʼaˆ hta‸ tu ca ve hkʼa shuˍ anˇ tuˬ uiˍ jaˇ ve yoˬ, teh‸ Gʼuiˬsha kʼoˆ ve yoˬ.
23
Iˉsaˍreˍlaˆ ve Gʼuiˬsha chi hkʼe kʼoˆ ve yoˬ. Iˉsaˍreˍlaˆ chaw hui hta‸ ngaˬ yawˇ hui ve mvuhˇmiˬ hkʼaw kʼaw‸ chehˇ tcuh ve teˇ yanˇ, yawˇ hui lehˬ a shu yawˇ ve venˇ hkʼaw chehˇ taˍ leh, Yeˍruˆsaˍlehnˍ venˇ hkʼaw cawˬ ve da‸ kehˬ ve hkʼaw pui hta‸ Gʼuiˬsha awˬ bon na‸ laˇ piˇ-oˆ, teh‸ yawˇ hui kʼoˆ tuˬ yoˬ.
24
Iˉsaˍreˍlaˆ chaw hui lehˬ, Yuˇda‸ mvuhˇmiˬ hkʼaw kʼaw‸ chehˇ tuˬ yoˬ. Oˇ kaˬ lo muiˬ caˇ paˍ leh ceˇ caˬ hu caˇ paˍ hkʼa biˇ kʼaw‸ cawˬ la tuˬ yoˬ.
25
Heuˬ ve chaw hui hta‸ ngaˬ awˬ gʼaˇ kʼaw‸ cawˬ la piˇ leh, awˍ meu‸ ve chaw hui hta‸ ngaˬ awˍ caˍ piˇ tuˬ yoˬ.
26
Oˇ htaˇ chaw yaˇ teˇ hpaˍ lehˬ, Ngaˬ zuh‸ muiˉ kʼa leh awˬ gʼaˇ kʼaw‸ cawˬ la peuˬ, teh‸ kʼoˆ tuˬ yoˬ.
27
Iˉsaˍreˍlaˆ leh Yuˇda‸ mvuhˇmiˬ hkʼaw, chaw yaˇ leh to nuˇ to shaˆ hkʼa biˇ ngaˬ kʼaw‸ cawˬ la piˇ tuˬ ve awˬ yanˇ gaˬ la chehˇ ve yoˬ.
28
Ngaˬ yawˇ hui hta‸ gʼawˬ baˬ leh te luˬ te sheˆ piˇ ve hkʼe, ngaˬ yawˇ hui hta‸ teˇ pawˆ kʼaw‸ uiˍ la da‸ la piˇ tuˬ yoˬ.
29
Awˬ yanˇ oˇ ve gaˬ la htaˇ, chaw yaˇ teˇ hpaˍ lehˬ, Awˬ pa awˬ e ci ve a pehˉ meuˇ shiˍ caˇ ve pa taw, yaˇ teˇ hpaˍ ciˬ hkehˇ ve, teh‸ kʼaw‸ kʼoˆ tuˬ ve maˇ heˆ.
30
Ya‸ hkʼaˇ, ci ve a pehˉ meuˇ shiˍ caˇ ve chaw ceh tiˉ ciˬ hkehˇ tuˬ yoˬ. Oˇ ve hkʼa shuˍ, te ya‸ leh venˇbaˆ cawˬ ve chaw ceh tiˉ gʼa suh-e tuˬ yoˬ, teh‸ Gʼuiˬsha kʼoˆ ve yoˬ.
31
Gʼuiˬsha kʼoˆ ve, Iˉsaˍreˍlaˆ leh Yuˇda‸ chaw hui hta‸ ngaˬ ka ti‸ shaˉ caˆ awˬ suhˉ teˇ pawˆ kʼaw‸ te piˇ tuˬ ve awˬ yanˇ gaˬ la chehˇ ve yoˬ.
32
Ka ti‸ shaˉ caˆ oˇ ve lehˬ, aˬ sho-eˬ htaˇ ngaˬ yawˇ hui ve awˬ puˍ awˬ pi hui hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ chehˇ htaˇ, yawˇ hui hta‸ te piˇ taˍ ve ka ti‸ shaˉ caˆ awˬ piˍ hkʼe maˇ heˆ. Ngaˬ lehˬ, yawˇ hui ve awˬ hpawˇ hkʼe hpeh‸ ve htawˇ, yawˇ hui lehˬ ka ti‸ shaˉ caˆ oˇ ve hta‸ hkʼa deh‸ maˇ ha‸ shaˉ.
33
Iˉsaˍreˍlaˆ chaw hui hta‸ ngaˬ awˬ suhˉ kʼaw‸ te piˇ tuˬ ve ka ti‸ shaˉ caˆ lehˬ chi hkʼe yoˬ. Ngaˬ ve awˬliˇtawˇhkawˇ teˇ hpaˍ hta‸ yawˇ hui ve nyi ma shiˍ hkʼoˆ lo ngaˬ bvuh‸ piˇ tuˬ yoˬ. Ngaˬ lehˬ yawˇ hui ve Gʼuiˬsha hpeh‸ leh, yawˇ hui lehˬ ngaˬ ve chaw hpeh‸ tuˬ yoˬ.
34
Gʼuiˬsha hta‸ shiˍ tuˬ, yawˇ hui hkʼaˇ yawˇ hui maˍ da‸ tuˬ maˇ loˍ. Awˬ lawn kʼo, chaw mawˇ hta‸ te leh yaˇ ehˉ htaˇ hkʼa gaˬ, ngaˬ hta‸ shiˍ tuˬ yoˬ. Ngaˬ yawˇ hui ve venˇbaˆ hta‸ hpehˇ piˇ tuˬ yoˬ. Yawˇ hui te ya‸ ve hta‸ ngaˬ tawnˇ taˍ tuˬ ve maˇ heˆ, teh‸ Gʼuiˬsha kʼoˆ ve yoˬ.
35
Mvuhˇ law‸ kʼaw htaˇ awˬ gʼeuˆ ba piˇ tuˬ, Gʼuiˬsha mvuhˇ nyi hta‸ teh taˍ ve yoˬ. Mvuhˇ hpeu‸ htaˇ awˬ gʼeuˆ ba piˇ tuˬ, ha pa leh meu‸ keu shiˍ teˇ hpaˍ hta‸ Yawˇ teh taˍ ve yoˬ. Laˇ tsuhˇ gʼuiˬ hta‸ Yawˇ nawˍ tu piˇ leh, awˬ hkawˇ bvuhˬ la tcuh ve yoˬ. Yawˇ ve awˬ meh lehˬ, Kanˇ paˆ uiˍ ve Gʼuiˬsha hpeh‸ ve yoˬ.
36
Yawˇ te hpanˍ taˍ ve awˬ ceuˬ teˇ hpaˍ yeˬ chehˇ sheˍ ve ceh ceh, Iˉsaˍreˍlaˆ chaw hui htawˇ yeˬ chehˇ tuˬ, Gʼuiˬsha ka ti‸ te taˍ ve yoˬ.
37
Mvuhˇ naw ma hta‸ tehˆ nyi gʼa leh, miˬguiˬ awˬ hkuiˉ puiˍ hta‸ ca mawˬ ve awˬ yanˇ gaˬ htaˇ heh‸, Iˉsaˍreˍlaˆ chaw hui hta‸ Gʼuiˬsha chiˇ baˬ tuˬ yoˬ. Gʼuiˬsha chi hkʼe kʼoˆ taˍ ve yoˬ.
38
Gʼuiˬsha kʼoˆ ve, Ngaˬ ve Yeˍruˆsaˍlehnˍ venˇ hta‸ kʼaw‸ gu te tuˬ ve awˬ yanˇ gaˬ la chehˇ ve yoˬ. Haˍnaˍneˍlaˆ ta‸ yehˬ hta‸ te leh, awˬ ceˍ kʼaweh‸ lo cawˬ ve taˍ meu‸ hpe‸ lo hkʼa gaˬ kʼaw‸ gu te tuˬ yoˬ.
39
Oˇ kaˬ lo kʼaw‸ te leh, mvuhˇ nyi kʼehˬ hpawˇ lo cawˬ ve Gaˍrehˆ hkʼaw, Gawˇtaˆ teh‸ kʼoˆ ve chehˇ kuiˬ lo hkʼa gaˬ gu kʼai tuˬ yoˬ.
40
Chaw tuˍ kuiˬ leh maˇ da‸ ve mawˇ gʼawˆ baˬ kuiˬ lawˬ hkʼo‸, Keˍdronˍ iˉ kaˆ lawˬ paˇ lo cawˬ ve ti mi hkʼa peu-eˬ, leh mvuhˇ nyi tawˆ hpawˇ lo cawˬ ve Iˉ mvuhˇ taˍ meu‸ hpe‸ lo hkʼa gaˬ, awˬ kaˍ lo cawˬ ve lawˬ hkʼo‸ chi lehˬ, ngaˬ ve da‸ kehˬ ve chehˇ kuiˬ hpeh‸ ve yoˬ. Venˇ chi lehˬ, teˇ pawˆ ka‸ kʼaw‸ luˬ kʼai tuˬ ve maˇ heˆ, teh‸ Gʼuiˬsha kʼoˆ ve yoˬ.
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 32 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50
51
52