Jeremiah 48 — Lahu Bible Edited © Thailand Bible Society and Bible Society of Myanmar, 2010, 2020.

1Mawˇbaˆ mvuhˇmiˬ awˬ lawn Gʼuiˬsha chi hkʼe kʼoˆ ve yoˬ. Neˍbawˇ venˇ yaˇ teˇ hpaˍ hta‸ ha kʼaˉ tuˬ cawˬ ve yoˬ. Awˬ lawn kʼo, yawˇ hui ve venˇ lehˬ luˬ kʼai peuˬ. Kiˇriˆyaˆtenˍ venˇ leh ta‸ yehˬ teˇ hpaˍ luˬ kʼai peuˬ leh, venˇ yaˇ teˇ hpaˍ gʼa ya‸ taw chehˇ ve yoˬ.

2Mawˇbaˆ mvuhˇmiˬ lehˬ, awˬ me‸ awˬ hponˇ luˬ kʼai peuˬ. Canˇ paˍ teˇ hpaˍ lehˬ, Heˍsaˍbonˍ venˇ hta‸ bawˆ yuˬ peuˬ leh, Mawˇbaˆ chaw hui hta‸ te luˬ piˇ tuˬ jehˬ da‸ chehˇ ve yoˬ. Canˇ paˍ teˇ hpaˍ Maˍdaˆmeˍnaˆ venˇ hkʼaw lo‸-e leh, venˇ oˇ ve gawˬ cu gawˬ pehˆ hpeh‸ kʼai tuˬ yoˬ.

3Hawˇraˍnenˍ venˇ yaˇ teˇ hpaˍ lehˬ, Luˬ ve sheˆ ve awˬ ceuˬ gaˬ la peuˬ, teh‸ kʼoˆ chehˇ ve yoˬ.

4Mawˇbaˆ mvuhˇmiˬ lehˬ luˬ kʼai sheˆ kʼai peuˬ. Yaˇ ehˉ teˇ hpaˍ hawˬ chehˇ ve awˬ hkawˇ hta‸ na sheˍ.

5Luˇhiˆ venˇ lo kʼai ve ya‸ kʼaw leh, Hawˇraˍnenˍ venˇ lo kʼai ve ya‸ kʼaw teˇ hpaˍ hkʼoˆ lo, yawˇ hui kuˬ chehˇ ve awˬ hkawˇ hta‸ na sheˍ.

6A shu yawˇ ve a sha‸ gʼa ponˬ tuˬ, piˉ laˬ awˬ hteunˍ hkʼa shuˍ gʼuiˇ hpaw-e loˬ, teh‸ yawˇ hui kʼoˆ ve yoˬ.

7Mawˇbaˆ chaw teˇ hpaˍ-oˬ, nawˬ hui lehˬ a shu yawˇ ve awˬ gʼaˇ awˬ shaˉ leh hpu shi mawˇ jeˬ hta‸ ceh tiˉ gʼaˇ va chehˇ ve yoˬ. Ya‸ hkʼaˇ, chi beu‸ nawˬ hui gʼa luˬ kʼai tuˬ yoˬ. Nawˬ hui ve Hkeˍmuˇshaˆ gʼuiˬsha htawˇ, jawˇmawˇ yaˇ leh paw hkuˇ teˇ hpaˍ geh teˇ geh shu mvuhˇmiˬ lo yuˬ kʼai ve hta‸ gʼa hkanˍ tuˬ yoˬ.

8Venˇ teˇ maˬ ka‸ luˬ ve sheˆ ve hta‸ gʼa ponˬ tuˬ ve maˇ heˆ. Hkʼaw pui leh miˬ tawˬ kuiˬ teˇ hpaˍ ka‸ luˬ kʼai tuˬ yoˬ.

9Mawˇbaˆ awˬ pon tuˍ hpfuh teˇ maˬ te taˍ-o‸. Maˇ maw maw yawˇ gʼa luˬ gʼa sheˆ tuˬ yoˬ. Yawˇ ve venˇ teˇ hpaˍ luˬ kʼai sheˆ kʼai leh, chaw teˇ gʼaˇ ka‸ oˇ kaˬ lo chehˇ tuˬ ve maˇ heˆ, teh‸ Gʼuiˬsha kʼoˆ ve yoˬ.

10(Nyi ma awˬ tawˬ hkʼa gaˬ Gʼuiˬsha ve kanˉ hta‸ maˇ te ve chaw lehˬ, hkeu ve hta‸ gʼa hkanˍ piˇ-oˆ. Aˉhtaw yuˬ leh nawˬ hui hta‸ maˇ chaw pehˍ ve chaw lehˬ, hkeu ve hta‸ gʼa hkanˍ piˇ-oˆ.)

11Gʼuiˬsha kʼoˆ ve, Mawˇbaˆ chaw hui lehˬ, hkʼaˬ htaˇ ka‸ gawˬ lehˍ gʼa chehˇ leh, shu mvuhˇmiˬ lo shiˍ kʼai ve hta‸ maˇ gʼa hkanˍ jaw sheˍ. Mawˇbaˆ chaw hui lehˬ, kaw teˇ maˬ leh teˇ maˬ hkʼaw maˇ gʼa pa keu jaw sheˍ ve a pehˉ meuˇ gʼuiˬ hkʼa shuˍ hpeh‸ ve yoˬ. Yawˇ ve awˬ hkui htawˇ maˇ pehˆ kʼai sheˍ leh, hkʼaˬ htaˆ ka‸ mehˬ jaˇ chehˇ ve yoˬ.

12Chi hta‸ pa taw, ngaˬ chaw hta‸ peu laˇ leh, Mawˇbaˆ chaw hui hta‸ a pehˉ meuˇ gʼuiˬ hkʼe ngeuˍ baˬ piˇ tuˬ ve awˬ yanˇ gaˬ la chehˇ ve yoˬ. Yawˇ hui lehˬ, a pehˉ meuˇ kaw oˇ ve teˇ hpaˍ hta‸ ngeuˍ baˬ leh dawˆ hkoˇ piˇ tuˬ yoˬ.

13Iˉsaˍreˍlaˆ chaw hui lehˬ, Beˍteˍlaˆ gʼuiˬsha hta‸ oˉ kʼoˍ pui ve pa taw gʼa ya‸ taw ve hkʼe, Mawˇbaˆ chaw hui htawˇ Hkeˍmuˇshaˆ gʼuiˬsha hta‸ oˉ kʼoˍ pui ve pa taw gʼa ya‸ taw tuˬ yoˬ.

14Mawˇbaˆ chaw hui-oˬ, nawˬ hui lehˬ ha‸ hanˉ jaˇ ve ma‸ yaˇ teˇ hpaˍ hpeh‸ ve yoˬ teh‸ hkʼaˬ hkʼe te kʼoˆ hpeh‸ le.

15Mawˇbaˆ venˇ teˇ hpaˍ luˬ kʼai peuˬ. Cheuˬ jaˇ ve yaˇ nehˬ teˇ hpaˍ htawˇ, tiˇ pehˍ ve hta‸ gʼa hkanˍ peuˬ. Ngaˬ lehˬ kanˇ paˆ uiˍ ve jawˇmawˇ Gʼuiˬsha hpeh‸ leh, tawˇ chi teˇ hpaˍ hta‸ kʼoˆ taˍ peuˬ ve yoˬ.

16Mawˇbaˆ mvuhˇmiˬ gʼa luˬ gʼa sheˆ kʼai tuˬ ve awˬ yanˇ gaˬ la chehˇ taˍ peuˬ.

17Mvuhˇmiˬ oˇ ve awˬ lawn hkʼa deh‸ shiˍ ve chaw teˇ hpaˍ-oˬ, mvuhˇmiˬ oˇ ve awˬ pon dawˇ haˍ leh, mvuhˇmiˬ oˇ ve awˬ me‸ awˬ hponˇ leh kanˇ paˆ mehˉ kʼai peuˬ teh‸ kʼoˆ chehˇ-oˆ.

18Diˇbonˍ venˇ hkʼaw chehˇ ve chaw hui-oˬ, awˬ me‸ awˬ hponˇ cawˬ ve chehˇ kuiˬ hta‸ baˬ taˉ leh, je‸ meu-e hkʼaw mui taˍ-o‸. Mawˇbaˆ mvuhˇmiˬ hta‸ te luˬ shehˍ hpaˇ choˬ kaˬ lo chehˇ taˍ peuˬ. Nawˬ hui ve ta‸ yehˬ teˇ hpaˍ hta‸ htawˇ te luˬ laˇ peuˬ.

19Aˍyawˍ venˇ hkʼaw chehˇ ve chaw hui-oˬ, ya‸ kʼaw paˇ lo huˉ taˍ leh law taˍ-o‸. Gʼuiˇ hpaw-e toˇ chehˇ ve chaw teˇ hpaˍ aˬ hto‸ ma pa taw, yawˇ hui gʼa gʼuiˇ hpaw-e toˇ ve na nyi-o.

20Yawˇ hui lehˬ, Mawˇbaˆ mvuhˇmiˬ luˬ kʼai peuˬ. Mvuhˇmiˬ oˇ ve awˬ pon dawˇ haˍ leh hawˬ chehˇ-oˆ. Mvuhˇmiˬ oˇ ve awˬ me‸ awˬ hponˇ luˬ kʼai peuˬ. Mawˇbaˆ mvuhˇmiˬ luˬ kʼai peuˬ, teh‸ Aˍnonˍ iˉ kaˆ lawˬ paˇ lo chehˇ ve chaw hui hta‸ ca kʼoˆ piˇ-oˆ, teh‸ nawˬ hui hta‸ kʼoˆ laˇ tuˬ yoˬ.

21Luˬ ve sheˆ ve teˇ ceuˬ lehˬ, Hawˇlonˍ, Yaˍhaˍzaˍ, Meˍhpaˆ,

22Diˇbonˍ, Neˍbawˇ, Behˆdiˆbaˍlaˆtenˍ,

23Kiˇriˆyaˆtenˍ, Behˆgaˍmuˇlaˆ, Behˆmeˍonˍ,

24Keˍroˆ, Bawˇzaˍraˆ, leh vuiˇ kuiˬ neˇ kuiˬ lo cawˬ ve Mawˇbaˆ venˇ teˇ hpaˍ awˬ hkʼoˆ lo htawˇ gaˬ la peuˬ.

25Mawˇbaˆ ve awˬ gʼaˇ awˬ shaˉ mehˉ kʼai peuˬ. Yawˇ ve kanˇ paˆ htawˇ luˬ kʼai peuˬ, teh‸ Gʼuiˬsha kʼoˆ ve yoˬ.

26Gʼuiˬsha kʼoˆ ve, Mawˇbaˆ hta‸ a pehˉ meuˇ gʼuiˬ dawˬ bvuhˆ htaˇ hkʼa gaˬ taw piˇ-oˆ. Awˬ lawn kʼo, yawˇ ngaˬ hta‸ kʼaw‸ hpfuhˆ peuˬ. Mawˇbaˆ lehˬ, yawˇ hpe‸ baˬ taˍ kuiˬ lo htawˇhpfuhˆnawˬhpfuhˆ te chehˇ leh, shu ga hpoˆ gʼuiˬ tuˬ yoˬ.

27Mawˇbaˆ-oˬ, nawˬ Iˉsaˍreˍlaˆ chaw hta‸ hkʼa mvuhˇ hkʼa na hkʼaˬ hkʼe kʼoˆ peuˬ ve hta‸ dawˇ nawˇ chehˇ sheˍ laˇ. Nawˬ yawˇ hui hta‸ chaw hkʼawˇ dawˆ ve hta‸ gʼa hkanˍ ve chaw hkʼe nawˬ shawˍ taˍ ve yoˬ.

28Mawˇbaˆ chaw hui-oˬ, venˇ hkʼaw tawˆ kʼai leh, haˉ hpawˇ hkʼoˆ lo ca chehˇ taˍ-o‸. Haˉ hpawˇ hkʼaw lo awˬ hpui ca te chehˇ taˍ ve aˉ pui kʼaˍ hkʼe hpeh‸ la piˇ-oˆ. Mawˇbaˆ lehˬ, caˆ muiˬ puiˉ jaˇ ve yoˬ.

29Nawˬ hui hkʼaˬ ma caˆ muiˍ puiˉ leh, a shu yawˇ awˬ to hta‸ hkʼaˬ ma dawˇ uiˍ gaˇ uiˍ chehˇ ve awˬ hkawˇ ngaˬ gʼa kaˇ peuˬ.

30Nawˬ hui nyi ma hkʼaˬ ma uiˍ chehˇ ve hta‸ ngaˬ shiˍ taˍ ve yoˬ. Nawˬ hui caˆ muiˬ ve lehˬ, te‸ chiˉ tcuhˉ kuiˬ maˇ cawˬ. Nawˬ hui te taˍ ve kanˉ htawˇ, maw maw yeˬ chehˇ tuˬ ve maˇ heˆ.

31Chi hta‸ pa taw, Mawˇbaˆ mvuhˇmiˬ hkʼaw chehˇ ve chaw leh Kiˇraˆhaˍrehˆ venˇ yaˇ teˇ hpaˍ awˬ pon, ngaˬ hawˬ tuˬ yoˬ.

32Siˆbaˍmaˍ venˇ yaˇ leh, Yaˍzaˍ venˇ yaˇ teˇ hpaˍ awˬ pon htawˇ ngaˬ hawˬ tuˬ yoˬ. Siˆbaˍmaˍ venˇ-oˬ, nawˬ lehˬ a pehˉ meuˇ te hkʼe hpeh‸ leh, nawˬ ve awˬ kʼaˉ teˇ hpaˍ lehˬ, Yaˍzaˍ venˇ leh Suh ve laˇ tsuhˇ gʼuiˬ lo hkʼa gaˬ, gaˬ taˍ ve yoˬ. Ya‸ hkʼaˇ, nawˬ ve awˬ shiˍ teˇ hpaˍ lehˬ, chi beu‸ te luˬ te sheˆ ve hta‸ gʼa hkanˍ ve yoˬ.

33Hkuiˇ jaˇ da‸ jaˇ ve Mawˇbaˆ mvuhˇmiˬ hkʼaw, ha lehˬ dawˇ sha ve awˬ ceuˬ hta‸ yuˬ baˬ peuˬ. A pehˉ meuˇ gʼuiˬ nyiˉ kuiˬ lo, ngaˬ a pehˉ meuˇ gʼuiˬ hta‸ maˇ kʼaw‸ ya‸ la piˇ ve yoˬ. Oˇ kaˬ lo, ha lehˬ ha kʼa a pehˉ meuˇ gʼuiˬ nyiˉ paˍ teˇ gʼaˇ ka‸ maˇ kʼaw‸ cawˬ ve yoˬ.

34Heˍsaˍbonˍ leh Eˇlaˍleˍ venˇ yaˇ teˇ hpaˍ kuˬ hawˬ chehˇ ve yoˬ. Yawˇ hui kuˬ hawˬ ve awˬ hkawˇ hta‸ Yaˍhaˍzaˍ venˇ, Zawˇraˆ venˇ, Hawˇraˍnenˍ venˇ, leh Eˇgaˍlaˆshaˍleˍ venˇ lo hkʼa gaˬ gʼa kaˇ ve yoˬ. Niˆmaˍrenˍ iˉ kaˆ lawˬ htawˇ fiˍ kʼai peuˬ.

35Mawˇbaˆ chaw hui a shu yawˇ ve gʼuiˬsha teˇ hpaˍ hta‸ tuˉ tanˇ piˇ chehˇ ve hta‸ ngaˬ tawˍ taˍ piˇ tuˬ yoˬ.

36Suh-e ve chaw awˬ pon dawˇ haˍ leh lehˉ lu meuˆ chehˇ ve chaw hkʼa shuˍ, ngaˬ lehˬ Mawˇbaˆ leh Kiˇraˆhaˍrehˆ venˇ yaˇ teˇ hpaˍ awˬ pon dawˇ haˍ jaˇ ve yoˬ. Awˬ lawn kʼo, yawˇ hui ve mawˇ jeˬ hkʼa peu-eˬ mehˉ kʼai peuˬ.

37Yawˇ hui hkʼa peu-eˬ, a shu yawˇ ve paˇ tcuhˆ leh uˉ hkeh mvuh chiˇ baˬ taˍ ve yoˬ. Yawˇ hui a shu yawˇ ve la‸ sheh hta‸ shawˆ hkʼaw leh, meh htuˉ pui hpa veu‸ deh taˍ ve yoˬ.

38Je‸ mu‸ hkʼu hta‸ dawˆ hkoˇ ve hkʼe, Mawˇbaˆ mvuhˇmiˬ hta‸ ngaˬ te luˬ piˇ peuˬ ve pa taw, chaw yaˇ teˇ hpaˍ yehˬ hkʼaw leh, ya‸ kʼaw hkʼoˆ lo dawˇ haˍ leh hawˬ chehˇ ve yoˬ.

39Mawˇbaˆ mvuhˇmiˬ luˬ kʼai peuˬ. Chi hta‸ pa taw, gʼaˇ hte‸ kuˬ hawˬ-o‸. Mawˇbaˆ mvuhˇmiˬ lehˬ, awˬ me‸ awˬ hponˇ luˬ kʼai peuˬ. Awˬ nu ve chaw ceuˬ teˇ hpaˍ, mvuhˇmiˬ oˇ ve hta‸ hkʼa mvuhˇ hkʼa na kʼoˆ chehˇ ve yoˬ, teh‸ Gʼuiˬsha kʼoˆ ve yoˬ.

40Chaw ceuˬ teˇ ceuˬ lehˬ, aˉ ceˬ hkʼa shuˍ Mawˇbaˆ mvuhˇmiˬ hta‸ kʼa yuˬ tuˬ yoˬ, teh‸ Gʼuiˬsha kʼoˆ taˍ peuˬ ve yoˬ.

41Venˇ teˇ hpaˍ leh ta‸ yehˬ teˇ hpaˍ hta‸ shu bawˆ yuˬ kʼai tuˬ yoˬ. Awˬ nyi oˇ ve gaˬ la htaˇ, Mawˇbaˆ ma‸ yaˇ teˇ hpaˍ lehˬ, yaˇ paw tuˬ naˬ chehˇ ve yaˇ miˇ hkʼa shuˍ kawˆ jaˇ tuˬ yoˬ.

42Mawˇbaˆ mvuhˇmiˬ lehˬ, te luˬ te sheˆ ve hta‸ gʼa hkanˍ tuˬ yoˬ. Awˬ lawn kʼo, yawˇ hui ngaˬ hta‸ kʼaw‸ hpfuhˆ peuˬ ve pa taw yoˬ.

43Kawˆ tuˬ dawˇ haˍ tuˬ, miˬ kʼoˍ leh va teˇ hpaˍ, yawˇ hui gʼuˇ suhˍ lo cawˬ taˍ ve yoˬ, teh‸ Gʼuiˬsha kʼoˆ taˍ peuˬ ve yoˬ.

44Kawˆ ve hta‸ pa taw gʼuiˇ hpaw-e ve chaw lehˬ, miˬ kʼoˍ naˆ kʼa tuˬ yoˬ. Miˬ kʼoˍ hkʼaw gaˆ tawˆ-e ve chaw teˇ hpaˍ lehˬ, va htaw taˍ ve hta‸ yaw tuˬ yoˬ. Awˬ lawn kʼo, Mawˇbaˆ hta‸ te luˬ piˇ tuˬ Gʼuiˬsha awˬ yanˇ teˇ yanˇ hta‸ hkʼa deh‸ fuiˍ teh taˍ peuˬ.

45Venˇ yaˇ teˇ hpaˍ lehˬ, teˇ pawˆ htaˇ jawˇmawˇ Siˉhonˍ uˉ peunˍ jaw ve Heˍsaˍbonˍ venˇ lo gʼuiˇ hpaw-e tuˬ yoˬ. Ya‸ hkʼaˇ, venˇ oˇ ve ka‸ aˬ miˍ to‸ chehˇ ve yoˬ. Ma‸ bawˆ gaˇ puiˉ ve Mawˇbaˆ chaw hui ve miˬ tcuhˉ leh hkʼaw teˇ hpaˍ hta‸ aˬ miˍ to‸ chehˇ ve yoˬ.

46Mawˇbaˆ chaw hui hta‸ ha kʼaˉ tuˬ cawˬ ve yoˬ. Hkeˍmuˇshaˆ gʼuiˬsha hta‸ oˉ kʼoˍ pui chehˇ ve chaw chi teˇ hpaˍ lehˬ, te luˬ te sheˆ ve hta‸ gʼa hkanˍ peuˬ. Yawˇ hui ve yaˇ paˍ yaˇ miˇ teˇ hpaˍ htawˇ, shu mvuhˇmiˬ lo shiˍ kʼai ve hta‸ gʼa hkanˍ ve yoˬ.

47Ya‸ hkʼaˇ, teˇ nyi gaˬ kʼo Gʼuiˬsha lehˬ, Mawˇbaˆ chaw hui hta‸ kʼaw‸ uiˍ la da‸ la piˇ tuˬ yoˬ. Awˬ ceuˬ chi teˇ hpaˍ lehˬ, Mawˇbaˆ mvuhˇmiˬ hkʼoˆ lo gaˬ la piˇ tuˬ Gʼuiˬsha kʼoˆ taˍ ve awˬ ceuˬ teˇ hpaˍ hpeh‸ ve yoˬ.