Jeremiah 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Beˍyaˍmenˍ chaw hui-oˬ, nawˬ hui gʼa ponˬ tuˬ gʼuiˇ hpaw-e loˬ. Yeˍruˆsaˍlehnˍ venˇ hkʼaw tawˆ kʼai-o. Teˍkawˇ venˇ hkʼaw behˬ heh ma meuˆ leh, Beˍtaˍkaˍrenˍ hkʼaw hkʼoˆ lo mvuhˇ hkʼawˇ awˬ heˆ tawˆ la piˇ-oˆ. Awˬ lawn kʼo, awˬ na hpawˇ lo cawˬ ve luˬ ve sheˆ ve awˬ ceuˬ gaˬ la paˇ neˇ ve yoˬ.

2Ziˉonˍ venˇ lehˬ, nyi sha jaˇ ve yoˬ. Ya‸ hkʼaˇ, venˇ oˇ ve luˬ kʼai tuˬ yoˬ.

3Jawˇmawˇ teˇ hpaˍ lehˬ, a shu yawˇ ve ma‸ yaˇ hui hta‸ shiˍ laˬ leh nawˬ hui ve venˇ awˬ paˇ awˬ kui lo fa la ca te la tuˬ yoˬ.

4Yawˇ hui lehˬ, Yeˍruˆsaˍlehnˍ venˇ hta‸ bawˆ tuˬ gu taˍ-o‸. Sha gʼuˇ tcuhˆ la htaˇ, ngaˬ hui hoˆ bawˆ tuˬ yoˬ teh‸ kʼoˆ ve yoˬ. Oˇ ve hkʼaw‸ nawˉ yawˇ hui kʼaw‸ kʼoˆ ve, Ya‸ nyi hkʼaw‸ nawˉ leh peuˬ. Mvuhˇ hpeu‸ la yoˬ.

5Hkʼa deh‸ gu taˍ. Ya‸ puiˉ ngaˬ hui Yeˍruˆsaˍlehnˍ ta‸ yehˬ teˇ hpaˍ hta‸ te luˬ piˇ tuˬ yoˬ, teh‸ kʼoˆ ve yoˬ.

6Gʼuiˬsha yawˇ hui hta‸ tawˇpiˇ leh kʼoˆ ve, Yeˍruˆsaˍlehnˍ venˇ hta‸ bawˆ yuˬ gʼa tuˬ, suhˆ cehˬ teˇ hpaˍ hta‸ htu baˬ leh ta‸ kʼoˍ duˇ taˍ-o‸. Teˇ gʼaˇ hta‸ teˇ gʼaˇ fawˉ mehˍ da‸ ve teˇ ceuˬ venˇ chi hkʼaw hkʼa biˇ cawˬ ve pa taw, venˇ chi hta‸ ngaˬ ciˍ yanˍ piˇ tuˬ yoˬ.

7Iˉ kaˆ gʼuiˬ tuˇ tawˆ la chehˇ ve hkʼe, yawˇ ve haiˬ ve kanˉ teˇ hpaˍ tawˆ la tcuhˉ taˍ ve yoˬ. Venˇ hkʼaw lo hiˉ yuˬ lu yuˬ ve leh, te luˬ te sheˆ chehˇ ve awˬ hkawˇ hta‸ ngaˬ gʼa kaˇ ve yoˬ. Naˬ ve gawˬ ve leh, naˬ kuiˬ hkʼaw kuiˬ teˇ hpaˍ hta‸ ceh tiˉ ngaˬ gʼa mawˬ ve yoˬ.

8Yeˍruˆsaˍlehnˍ venˇ yaˇ teˇ hpaˍ-oˬ, awˬ leh teˇ pawˆ ngaˬ nawˬ hui hta‸ shaˍ ti‸ piˇ laˇ ve yoˬ. Nawˬ hui maˇ na yuˬ ve kʼo, ngaˬ nawˬ hui hta‸ chiˇ baˬ leh, nawˬ hui ve venˇ chi hta‸ chaw teˇgʼaˇ ka‸ maˇ chehˇ ve hteunˍ lonˉ hpeh‸ la piˇ tuˬ yoˬ, teh‸ Gʼuiˬsha kʼoˆ ve yoˬ.

9Gʼuiˬsha ngaˬ hta‸ chi hkʼe kʼoˆ laˇ ve yoˬ. A pehˉ meuˇ shiˍ hkʼa peu-eˬ ve hta‸ shaˉ yuˬ ve hkʼe, Iˉsaˍreˍlaˆ chaw hkʼa peu-eˬ ve hta‸ shaˉ yuˬ tuˬ yoˬ. Chi hta‸ pa taw, awˬ yanˇ cawˬ sheˍ htaˇ nawˬ hui te gʼa ve hkʼe chaw yaˇ teˇ hpaˍ hta‸ htaiˍ hkʼaw‸ piˇ-oˆ, teh‸ kʼoˆ ve yoˬ.

10Oˇ htaˇ ngaˬ kʼaw‸ yaw hkʼaw‸ leh kʼoˆ piˇ ve, Ngaˬ yawˇ hui hta‸ shaˍ ti‸ piˇ ve htawˇ, a shu na tuˬ le. Yawˇ hui kʼaˍ jaˇ leh nawˬ ve tawˇ hta‸ na yuˬ tuˬ ve maˇ heˆ. Nawˬ ve tawˇ yawˇ hui hta‸ kʼoˆ piˇ ve teˇ yanˇ, yawˇ hui gʼuiˬ yawˬ ve yoˬ.

11Gʼuiˬsha-oˬ, nawˬ yawˇ hui hta‸ nyi ma zuhˆ ve teˇ ceuˬ, ngaˬ awˬ hkʼaw lo hkʼa biˇ cawˬ ve yoˬ. Hkʼe te leh, ngaˬ hkanˍ maˇ gʼa-o, teh‸ Gʼuiˬsha hta‸ kʼoˆ piˇ ve yoˬ. Oˇ htaˇ Gʼuiˬsha kʼaw‸ kʼoˆ ve, Ngaˬ ve nyi ma zuhˆ ve teˇ ceuˬ, ya‸ kʼaw hkʼoˆ lo chehˇ taˍ ve yaˇ ehˉ leh chaw haˉ paˍ hui hpawnˬ da‸ chehˇ ve awˬ hkʼoˆ lo ngeuˍ pfuhˍ piˇ-oˆ. Awˬ hpawˇ awˬ miˇ teˇ hpaˍ hta‸ shu hpeh kʼai tuˬ yoˬ. Chaw mawˇ teˇ hpaˍ hta‸ htawˇ teh taˉ piˇ tuˬ ve maˇ heˆ.

12Yawˇ hui ve yehˬ, ti mi, leh awˬ miˇ ma teˇ hpaˍ, awˬ nu ve chaw hui hta‸ kʼaw‸ piˇ tuˬ yoˬ. Mvuhˇmiˬ chi ve hkʼaw chehˇ ve chaw hui hta‸ ngaˬ ciˍ yanˍ piˇ tuˬ yoˬ.

13Chaw mawˇ yaˇ nehˬ hkʼa peu-eˬ, maˇ hteˇ maˇ cawˇ ve hkʼaw hpu ca chehˇ ve yoˬ. Tcuh kaˍ paˍ leh paw hkuˇ teˇ hpaˍ ka‸, chaw yaˇ hui hta‸ heˍ caˇ chehˇ ve yoˬ.

14Yawˇ hui lehˬ, ngaˬ ve chaw teˇ hpaˍ ve hkʼaw kuiˬ naˬ kuiˬ hta‸ hkʼa deh‸ maˇ gu piˇ. Maˇ keh. Da‸ chehˇ-aw, teh‸ yawˇ hui kʼoˆ ve yoˬ. Ya‸ hkʼaˇ, da‸ la chehˇ ve maˇ heˆ.

15Ngaˬ canˇ ve kanˉ chi teˇ hpaˍ hta‸ yawˇ hui te ve pa taw, yawˇ hui ya‸ taw chehˇ ve laˇ. Maˇ heˆ. Yawˇ hui a ciˉ ka‸ maˇ ya‸ taw. Mehˆ hpfuhˇ ka‸ maˇ luˬ. Chi hta‸ pa taw, awˬ nu ve chaw hui paiˍ ve hkʼe, yawˇ hui htawˇ paiˍ tuˬ yoˬ. Ngaˬ ciˍ yanˍ piˇ ve teˇ yanˇ, yawˇ hui suh-e peuˬ tuˬ yoˬ, teh‸ Gʼuiˬsha kʼoˆ ve yoˬ.

16Gʼuiˬsha yawˇ ve chaw hui hta‸ chi hkʼe kʼoˆ piˇ ve yoˬ. Ya‸ kʼaw ceh da‸ kuiˬ lo huˉ taˍ leh chiˇ nyi-o. Aˬ sho-eˬ htaˇ ve ya‸ kʼaw awˬ piˍ leh, da‸ jaˇ ve ya‸ kʼaw hkʼaˬ lo le. Shu hta‸ na nyi leh toˇ kʼai-o. Oˇ hkʼe te ve kʼo, nawˬ hui gawˬ lehˍ gʼa chehˇ tuˬ yoˬ, teh‸ Gʼuiˬsha kʼoˆ ve yoˬ. Ya‸ hkʼaˇ, yawˇ hui lehˬ Ya‸ kʼaw oˇ ve hta‸ ngaˬ hui maˇ loˍ teh‸ kʼoˆ ve yoˬ.

17Behˬ heh ma meuˆ leh shaˍ ti‸ piˇ laˇ ve hkawˇ hta‸ na taˍ tuˬ, Gʼuiˬsha lehˬ chaw teˇ hpaˍ hta‸ leuˆ teh taˍ ve yoˬ. Ya‸ hkʼaˇ, Ngaˬ hui maˇ na, teh‸ yawˇ hui kʼoˆ ve yoˬ.

18Chi hta‸ pa taw Gʼuiˬsha kʼoˆ ve, Chaw yaˇ teˇ hpaˍ-oˬ, na sheˍ. Ngaˬ ve chaw teˇ hpaˍ hkʼaˬ hkʼe hpeh‸ la tuˬ ve hta‸ nyi taˍ-o‸.

19Miˬguiˬ-oˬ, na sheˍ. Yawˇ hui hta‸ keunˍ da‸ ve luˬ ve sheˆ ve teˇ ceuˬ ngaˬ yawˇ hui awˬ hkʼoˆ lo gaˬ la piˇ tuˬ yoˬ. Awˬ lawn kʼo, yawˇ hui ngaˬ ve tawˇ hta‸ ponˬ leuˉ leh, ngaˬ maˍ piˇ ve tawˇ hta‸ maˇ na yuˬ.

20Sheˍbaˆ mvuhˇmiˬ leh, vuiˇ jaˇ ve mvuh ˇmiˬ hkʼaw yuˬ veu laˇ taˍ ve sha hawnˉ teˇ hpaˍ hta‸ ngaˬ hkʼaˬ hkʼe te nyi hpeh‸ tuˬ le. Yawˇ hui tuˉ tanˇ laˇ ve hta‸ ngaˬ ha‸ yuˬ tuˬ ve maˇ heˆ.

21Chi hta‸ pa taw, ngaˬ lehˬ chaw chi teˇ hpaˍ hta‸ hkui htiˇ poˬ paiˍ piˇ lawˬ tuˬ yoˬ. Awˬ pa leh awˬ yaˇ, awˬ viˉ awˬ nyi leh awˬ chawˇ hkʼa peu-eˬ gʼa suh-e tuˬ yoˬ, teh‸ Gʼuiˬsha kʼoˆ ve yoˬ.

22Gʼuiˬsha kʼoˆ ve, Awˬ na hpawˇ lo chehˇ ve chaw hui ya‸ la chehˇ ve yoˬ. Vuiˇ kuiˬ lo chehˇ ve awˬ gʼaˇ uiˍ ve chaw teˇ ceuˬ ma‸ bawˆ tuˬ gu chehˇ taˍ ve yoˬ.

23Yawˇ hui lehˬ, a shu yawˇ ve la‸ caˉ pfuhˇ taˍ peuˬ. Yawˇ hui nyi ma uiˍ jaˇ leh, ha kʼaˉ puiˉ ve nyi ma maˇ cawˬ. Yawˇ hui iˉ mvuhˇ ciˇ toˇ ve awˬ hkawˇ lehˬ, gʼuiˬ baˇ lonˉ taˆ la ve awˬ hkawˇ hkʼa shuˍ hpeh‸ ve yoˬ. Yawˇ hui lehˬ, Yeˍruˆsaˍlehnˍ hta‸ ca bawˆ la tuˬ gu taˍ peuˬ, teh‸ Gʼuiˬsha kʼoˆ ve yoˬ.

24Yeˍruˆsaˍlehnˍ venˇ yaˇ teˇ hpaˍ kʼaw‸ kʼoˆ ve, Awˬ lawn chi hta‸ ngaˬ hui gʼa kaˇ peuˬ leh, ngaˬ hui ve la‸ sheh teˇ hpaˍ deu lehˍ hpeh‸ la peuˬ. Yaˇ paw tuˬ naˬ chehˇ ve yaˇ miˇ hkʼa shuˍ, ngaˬ hui hkanˍ haˍ jaˇ peuˬ.

25Hkʼaw hkʼoˆ lo ka‸ ngaˬ hui kʼai maˇ haˆ. Awˬ lawn kʼo, canˇ paˍ teˇ hpaˍ la‸ caˉ pfuhˇ taˍ leh, hkʼaˬ hpawˇ chi hpawˇ lo chehˇ taˍ peuˬ, teh‸ kʼoˆ ve yoˬ.

26Gʼuiˬsha kʼoˆ ve, Ngaˬ ve chaw teˇ hpaˍ-oˬ, hkʼe te kʼo meh htuˉ pui hpa veu‸ deh leh, hkʼaw‸ laˉ hkʼaw zuh‸ taˍ-o‸. Teˇ gʼaˇ tiˉ cawˬ ve yaˇ paˍ suh-e leh dawˇ haˍ chehˇ ve chaw hkʼe gʼaˇ hte‸ kuˬ hawˬ chehˇ-oˆ. Nawˬ hui hta‸ ca te luˬ la ve chaw teˇ gʼaˇ, nawˬ hui awˬ paˇ lo gaˬ la peuˬ.

27Yeˍraˍmiˆ-oˬ, ngaˬ ve chaw teˇ hpaˍ hkʼaˬ hkʼe te chehˇ ve naˍ, nawˬ ca chaˬ nyi-o.

28Yawˇ hui lehˬ, kʼaˍ jaˇ ve chaw hpfuhˆ teˇ hpaˍ hpeh‸ leh, sho hkʼa shuˍ heh jaˇ ve yoˬ. Yawˇ hui hkʼa peu-eˬ awˬ liˇ awˬ hkʼaˇ luˬ kʼai leh maˇ heˆ heˆ ve awˬ lawn ca kʼoˆ toˇ chehˇ ve yoˬ.

29Aˬ miˍ po hkʼaw aˬ miˍ to‸ da‸ jaˇ peuˬ. Ya‸ hkʼaˇ, chiˆ taˍ ve sho maˇ kuiˬ kʼai puiˉ. Aˬ miˍ hkʼaˬ ma chiˆ jaˇ ve htawˇ, ngaˬ ve chaw chi teˇ hpaˍ maˇ kʼaw‸ da‸ la puiˉ.

30Yawˇ hui lehˬ, haiˬ ve kanˉ hta‸ tiˉ te chehˇ ve yoˬ. Chi hta‸ pa taw, yawˇ hui hta‸ chiˇ baˬ taˍ ve hpu teh‸ gʼa kʼoˆ tuˬ yoˬ. Awˬ lawn kʼo, ngaˬ yawˇ hui hta‸ chiˇ baˬ peuˬ, teh‸ Gʼuiˬsha kʼoˆ ve yoˬ.

← Chapter 5 Jump to: Chapter 7 →