Jeremiah 51

Lahu Bible Edited © Thailand Bible Society and Bible Society of Myanmar, 2010, 2020.

1Gʼuiˬsha kʼoˆ ve, Ngaˬ lehˬ Baˍbuˍlonˍ mvuhˇmiˬ hta‸ te luˬ piˇ tuˬ, mvuhˇ haw lonˉ hta‸ shiˍ veu laˇ chehˇ ve yoˬ.

2Suhˆ hpa‸ hta‸ mvuhˇ haw meuˆ baˬ ve hkʼe, Baˍbuˍlonˍ mvuhˇmiˬ hta‸ te luˬ piˇ tuˬ, awˬ nu ve chaw teˇ moˍ hta‸ ngaˬ peu laˇ tuˬ yoˬ. Luˬ ve sheˆ ve awˬ nyi oˇ ve gaˬ la htaˇ, yawˇ hui lehˬ mvuhˇmiˬ oˇ ve hta‸ caw bawˆ leh, awˬ kʼawˇ lehˍ teh taˉ piˇ tuˬ yoˬ.

3Baˍbuˍlonˍ ma‸ yaˇ teˇ hpaˍ hta‸ hkaˆ bawˆ tuˬ, maˇ heˆ kʼo, ma‸ bawˆ tuˬ veu‸ kʼaˇ veu‸ deh tuˬ awˬ pon awˬ yanˇ taˇ piˇ. Yaˇ nehˬ teˇ hpaˍ hta‸ ka‸ taˇ ponˬ piˇ. Ma‸ moˍ hkʼa peu-eˬ ve hta‸ te luˬ piˇ-oˆ.

4Yawˇ hui lehˬ, venˇ hkʼaw lo ceh tiˉ suh-e peuˬ tuˬ yoˬ.

5Iˉsaˍreˍlaˆ leh Yuˇda‸ chaw teˇ hpaˍ ngaˬ hta‸ te ya‸ peuˬ ve htawˇ, ngaˬ yawˇ hui hta‸ chiˇ baˬ tuˬ ve maˇ heˆ.

6Baˍbuˍlonˍ venˇ hkʼaw lo hpaw tawˆ-e loˬ. A shu yawˇ ve a sha‸ gʼa ponˬ tuˬ gʼuiˇ hpaw-e loˬ. Baˍbuˍlonˍ chaw hui te ve venˇbaˆ hta‸ pa taw, nawˬ hui tiˇ pehˍ ve hta‸ taˇ gʼa hkanˍ piˇ. Chi beu‸ ngaˬ yawˇ hui hta‸ keunˍ da‸ ve hkʼe kʼaw‸ te hkʼaw‸ piˇ chehˇ ve yoˬ.

7Baˍbuˍlonˍ venˇ lehˬ, ngaˬ ve la‸ sheh hkʼaw cawˬ taˍ ve shi kawˆ hkʼe hpeh‸ leh, miˬguiˬ chaw ceuˬ hkʼa peu-eˬ hta‸ dawˬ bvuhˆ piˇ lawˬ chehˇ ve yoˬ. Chaw yaˇ teˇ hpaˍ kawˆ oˇ ve hta‸ dawˬ leh gʼuˇ kʼai ve yoˬ.

8Baˍbuˍlonˍ mvuhˇmiˬ lehˬ, teˇ hkui ceh tiˉ paiˍ leh luˬ kʼai sheˆ kʼai ve yoˬ. Dawˇ haˍ leh kuˬ hawˬ chehˇ-oˆ. Yawˇ ve naˬ kuiˬ hkʼaw kuiˬ teˇ hpaˍ awˬ pon naˆ tsuhˇ ca shehˍ piˇ-oˆ. Oˇ hkʼe te ve kʼo, kʼaw‸ na-e la tuˬ naˍ, maˇ shiˍ.

9Oˇ kaˬ lo chehˇ taˍ ve hkehˉ chaw teˇ hpaˍ chi hkʼe kʼoˆ ve yoˬ. Ngaˬ hui Baˍbuˍlonˍ mvuhˇmiˬ hta‸ coˇ caˇ leh ga piˇ chehˇ ve yoˬ. Ya‸ hkʼaˇ, awˬ hkʼaw‸ nawˉ leh peuˬ. Chi beu‸ mvuhˇmiˬ chi hta‸ baˬ taˉ leh, a shu yawˇ ve mvuhˇmiˬ lo kʼo‸-e veuˬ. Gʼuiˬsha lehˬ, Baˍbuˍlonˍ mvuhˇmiˬ hta‸ ciˍ yanˍ leh, awˬ tehˬ awˬ na te luˬ piˇ peuˬ, teh‸ kʼoˆ ve yoˬ.

10Gʼuiˬsha kʼoˆ ve, Ngaˬ ve chaw teˇ hpaˍ chi hkʼe kʼoˆ chehˇ ve yoˬ. Ngaˬ hui cawˇ ve hpawˇ lo chehˇ taˍ ve hta‸ Gʼuiˬsha hkʼa tawˍ lehˆ maˍ laˇ peuˬ. Ngaˬ hui Yeˍruˆsaˍlehnˍ venˇ lo kʼo‸-e leh, Gʼuiˬsha te taˍ peuˬ ve kanˉ chi teˇ hpaˍ, yawˇ hui hta‸ ca kʼaw‸ hto piˇ-a veuˬ, teh‸ kʼoˆ ve yoˬ.

11Gʼuiˬsha Baˍbuˍlonˍ mvuhˇmiˬ hta‸ te luˬ piˇ tuˬ, Meˍdiˆ jawˇmawˇ hta‸ nawˍ tu piˇ ve yoˬ. Chi ve lehˬ, yawˇ ve bon yehˬ hta‸ te luˬ ve awˬ tan, yawˇ hui hta‸ kʼaw‸ te hkʼaw‸ piˇ tuˬ ve gu taˍ ve kanˉ hkʼaˇ hpeh‸ ve yoˬ. Nawˬ hui ve hkaˆ ce teˇ hpaˍ hta‸ hkʼa deh‸ che leh, a shu yawˇ ve htanˬ tuˬ hta‸ pfuhˇ taˍ-o‸.

12Baˍbuˍlonˍ lanˇ venˇ hta‸ ca bawˆ tuˬ tawˇ piˇ-oˆ. Shaw shehˍ hpaˇ teˇ hpaˍ hta‸ hkʼa deh‸ shaw tcuh taˍ-o‸, teh‸ Baˍbuˍlonˍ mvuhˇmiˬ hta‸ ca bawˆ la ve ma‸ poˍ lonˉ tawˇ piˇ ve yoˬ. Gʼuiˬsha lehˬ, Yawˇ kʼoˆ taˍ ve hkʼe Baˍbuˍlonˍ venˇ hta‸ awˬ tehˬ awˬ na te luˬ piˇ ve yoˬ.

13Mvuhˇmiˬ oˇ ve awˬ hkʼaw lo iˉ kaˆ lawˬ maˇ maˇ cawˬ leh, hpu shi mawˇ jeˬ htawˇ maˇ maˇ cawˬ ve yoˬ. Ya‸ hkʼaˇ, awˬ leh meuˇ ve awˬ yanˇ gaˬ la peuˬ.

14Gʼuiˬsha lehˬ, Baˍbuˍlonˍ mvuhˇmiˬ hta‸ te luˬ piˇ tuˬ, paˉ ce‸ hkʼa shuˍ maˇ jaˇ ve chaw moˍ lonˉ hta‸ shiˍ laˬ tuˬ yoˬ, teh‸ ka ti‸ te taˍ peuˬ ve yoˬ. Chaw oˇ ve teˇ hpaˍ ma‸ bawˆ gʼaˇ leh, ha lehˬ ha kʼa kuˬ tuˬ yoˬ.

15Gʼuiˬsha lehˬ, Yawˇ ve cuˇ yiˍ leh kanˇ paˆ hta‸ yehˇ leh, miˬguiˬ leh mvuhˇ naw ma hta‸ te hpanˍ taˍ ve yoˬ.

16Yawˇ tawˇ yaw ve teˇ yanˇ, mvuhˇ naw ma hkʼoˆ cawˬ ve iˉ kaˆ teˇ hpaˍ awˬ hkawˇ bvuhˬ la leh, moˬ teˇ hpaˍ tawˆ la ve yoˬ. Moˬ awˬ hkʼaw lo mvuhˇ tiˉ po-e‸ ba tawˆ la leh, mvuhˇ haw lonˉ meuˆ laˬ ve yoˬ.

17Awˬ ceuˬ chi hkʼe ve hta‸ gʼa mawˬ ve chaw lehˬ, dawˇ maˇ tawˆ leh ka kehn chehˇ ve yoˬ. Shaˉ ho‸ hta‸ te shehˍ hpaˇ teˇ hpaˍ gʼa ya‸ taw ve yoˬ. Awˬ lawn kʼo, yawˇ hui te taˍ ve shaˉ ho‸ teˇ hpaˍ lehˬ, a sha‸ maˇ te‸ puiˉ.

18Yawˇ hui lehˬ te‸ chiˉ awˬ bon maˇ cawˬ. Yawˇ hui hta‸ gʼawˆ baˬ cawˇ ve yoˬ. Gʼuiˬsha suhˉ jehˬ ve awˬ yanˇ gaˬ htaˇ, yawˇ hui lehˬ te luˬ te sheˆ ve hta‸ gʼa hkanˍ tuˬ yoˬ.

19Yaˍkoˆ ve Gʼuiˬsha lehˬ, yawˇ hui hkʼe maˇ heˆ. Yawˇ lehˬ, awˬ ceuˬ hkʼa peu-eˬ ve hta‸ te hpanˍ shehˍ hpaˇ hpeh‸ leh, Iˉsaˍreˍlaˆ chaw hta‸ Yawˇ ve chaw hpeh‸ la tuˬ leuˆ yuˬ taˍ ve yoˬ. Yawˇ ve awˬ meh lehˬ, Kanˇ paˆ uiˍ ve Gʼuiˬsha, hpeh‸ ve yoˬ.

20Gʼuiˬsha kʼoˆ ve, Baˍbuˍlonˍ chaw hui-oˬ, nawˬ hui lehˬ ngaˬ ve hta tu hpeh‸ leh, ma‸ bawˆ kuiˬ lo ngaˬ yehˇ chehˇ ve la‸ caˉ hpeh‸ ve yoˬ. Nawˬ hui hta‸ ngaˬ yehˇ leh, mvuhˇmiˬ teˇ hpaˍ hta‸ te luˬ piˇ chehˇ ve yoˬ.

21Iˉ mvuhˇ leh iˉ mvuhˇ ciˇ paˍ teˇ hpaˍ hta‸ maˇ kʼoˆ, iˉ mvuhˇ lawˬ leh iˉ mvuhˇ lawˬ gʼa‸ paˍ teˇ hpaˍ hta‸ maˇ kʼoˆ, ngaˬ dawˆ hkoˇ piˇ ve yoˬ.

22Hawˉ hkʼaˆ, yaˇ miˇ, chaw mawˇ, yaˇ nehˬ, yaˇ paˍ, yaˇ miˇ teˇ hpaˍ hta‸ htawˇ, ngaˬ tiˇ pehˍ piˇ chehˇ ve yoˬ.

23Yawˬ hawˉ paˍ leh yawˬ teˇ hpaˍ hta‸ maˇ kʼoˆ, ti mi mehˇ paˍ leh yawˇ hui ve iˉ mvuhˇ teˇ hpaˍ hta‸ maˇ kʼoˆ, uˉ peunˍ shehˍ hpaˇ teˇ hpaˍ leh ma‸ poˍ lonˉ teˇ hpaˍ hta‸ maˇ kʼoˆ, ngaˬ tiˇ pehˍ piˇ chehˇ ve yoˬ, teh‸ Gʼuiˬsha kʼoˆ ve yoˬ.

24Gʼuiˬsha kʼoˆ ve, Baˍbuˍlonˍ chaw hui Yeˍruˆsaˍlehnˍ venˇ hta‸ te piˇ ve hkʼe, ngaˬ yawˇ hui hta‸ kʼaw‸ te hkʼaw‸ piˇ ve hta‸ nawˬ hui gʼa mawˬ tuˬ yoˬ.

25Baˍbuˍlonˍ chaw hui-oˬ, nawˬ hui lehˬ miˬguiˬ hkʼa peu-eˬ ve hta‸ te luˬ piˇ chehˇ ve hkʼaw pui lonˉ hkʼa shuˍ hpeh‸ ve yoˬ. Ya‸ hkʼaˇ, ngaˬ lehˬ nawˬ ve canˇ paˍ hpeh‸ ve yoˬ. Ngaˬ nawˬ hta‸ yuˬ tiˍ taˍ leh, nyiˉ ya‸ peuˬ hkʼaw‸ nawˉ, hkʼaw‸ laˉ hkʼaw baˬ taˉ laˇ tuˬ yoˬ.

26Chaw teˇ gʼaˇ ka‸ nawˬ hui yehˇ taˉ peuˬ ve haˉ pui shiˍ teˇ hpaˍ hta‸ yuˬ leh, yehˬ kʼaw‸ te chehˇ tuˬ ve maˇ heˆ. Nawˬ hui lehˬ, co co taiˍ taiˍ luˬ kʼai tuˬ yoˬ.

27Baˍbuˍlonˍ mvuhˇmiˬ hta‸ bawˆ tuˬ tawˇ piˇ-oˆ. Awˬ nu ve chaw ceuˬ teˇ hpaˍ gʼa kaˇ tuˬ, behˬ heh ma meuˆ loˬ. Baˍbuˍlonˍ mvuhˇmiˬ hta‸ bawˆ tuˬ hkʼa deh‸ gu taˍ-o‸. Aˍraˍraˆ mvuhˇmiˬ, Miˇniˆ mvuhˇmiˬ leh Aˍshaˆkeˍnaˆ mvuhˇmiˬ teˇ hpaˍ htawˇ, gʼa ga bawˆ laˇ tuˬ hto piˇ-oˆ. Paˉ ce‸ hkʼa shuˍ maˇ jaˇ ve iˉ mvuhˇ teˇ hpaˍ hta‸ sheh tawˆ la-o.

28Baˍbuˍlonˍ mvuhˇmiˬ hta‸ bawˆ tuˬ hkʼa deh‸ gu taˍ-o‸. Meˍdiˆ jawˇmawˇ, yawˇ ve ma‸ poˍ lonˉ teˇ hpaˍ, leh yawˇ uˉ peunˍ ve awˬ hawˉ lo chehˇ ve chaw teˇ hpaˍ hta‸ htawˇ ca kuˬ-o‸.

29Gʼuiˬsha lehˬ, Baˍbuˍlonˍ mvuhˇmiˬ hta‸ chaw teˇ gʼaˇ ka‸ maˇ chehˇ ve gawˬ cu gawˬ pehˆ ve chehˇ kuiˬ hpeh‸ la piˇ tuˬ, awˬ hkʼaˇ gu chehˇ ve pa taw, miˬguiˬ htawˇ hiˆ hiˆ naˇ naˇ hpeh‸ la ve yoˬ.

30Baˍbuˍlonˍ ma‸ yaˇ teˇ hpaˍ lehˬ, a shu yawˇ ve ta‸ yehˬ hkʼaw jehˇ taˍ ve yoˬ. Yawˇ hui kawˆ jaˇ leh, yaˇ miˇ hkʼa shuˍ hpeh‸ la ve yoˬ. Venˇ taˍ meu‸ hpe‸ teˇ hpaˍ luˬ kʼai leh, yehˬ teˇ hpaˍ hta‸ aˬ miˍ to‸ chehˇ ve yoˬ.

31Chaw teˇ gʼaˇ peuˬ teˇ gʼaˇ Baˍbuˍlonˍ jawˇmawˇ geh gʼuiˇ kʼai leh, yawˇ ve lanˇ venˇ teˇ hpaˍ luˬ kʼai peuˬ ve awˬ lawn yawˇ hta‸ ca gʼuiˇ hto piˇ chehˇ ve yoˬ.

32Canˇ paˍ teˇ hpaˍ lehˬ, iˉ kaˆ gʼuiˬ ta hta‸ bawˆ yuˬ gʼa peuˬ leh, ta‸ yehˬ teˇ hpaˍ hta‸ aˬ miˍ tuˉ baˬ ve yoˬ. Baˍbuˍlonˍ ma‸ yaˇ teˇ hpaˍ kawˆ jaˇ ve yoˬ.

33Maˇ maw maw canˇ paˍ teˇ hpaˍ lehˬ, caˬ jaw‸ ve hkʼe yawˇ hui hta‸ jaw‸ baˬ piˇ tuˬ ve yoˬ, teh‸ Iˉsaˍreˍlaˆ ve Gʼuiˬsha kʼoˆ ve yoˬ.

34Baˍbuˍlonˍ jawˇmawˇ lehˬ, Yeˍruˆsaˍlehnˍ venˇ hta‸ tawˆ cheˆ leh caˇ peuˬ ve yoˬ. Je‸ mu‸ hkʼu hta‸ awˬ kʼawˇ lehˍ hpeh‸ piˇ ve hkʼe, yawˇ lehˬ Yeˍruˆsaˍlehnˍ venˇ hta‸ awˬ kʼawˇ lehˍ hpeh‸ la piˇ ve yoˬ. To nuˇ to shaˆ hkʼa shuˍ, yawˇ lehˬ venˇ oˇ ve hta‸ hehˆ dawˬ ve yoˬ. Yawˇ heuˆ gaˇ ve awˬ ceuˬ teˇ hpaˍ hta‸ yuˬ peuˬ hkʼaw‸ nawˉ, awˬ nu ve mawˇ teˇ hpaˍ hta‸ gʼawˆ baˬ ve yoˬ.

35Ngaˬ hui hta‸ chi hkʼe te laˇ ve pa taw, venˇbaˆ chi Baˍbuˍlonˍ chaw hui awˬ hkʼoˆ gaˬ la piˇ-oˆ, teh‸ Ziˉonˍ chaw hui hta‸ kʼoˆ tcuh-o. Ngaˬ hui chi hkʼe gʼa hkanˍ ve pa taw, venˇbaˆ chi Baˍbuˍlonˍ chaw hui awˬ hkʼoˆ gaˬ la piˇ-oˆ, teh‸ Yeˍruˆsaˍlehnˍ venˇ yaˇ hui hta‸ kʼoˆ tcuh-o.

36Hkʼe te leh, Gʼuiˬsha Yeˍruˆsaˍlehnˍ venˇ yaˇ teˇ hpaˍ hta‸ chi hkʼe kʼoˆ piˇ ve yoˬ. Ngaˬ nawˬ hui hpawˇ lo chehˇ leh, nawˬ hui hta‸ te luˬ laˇ ve canˇ paˍ teˇ hpaˍ hta‸ ngaˬ kʼaw‸ te hkʼaw‸ piˇ tuˬ yoˬ. Baˍbuˍlonˍ mvuhˇmiˬ hkʼaw cawˬ ve iˉ kaˆ teˇ hpaˍ hta‸ ngaˬ fiˍ kʼai piˇ tuˬ yoˬ.

37Mvuhˇmiˬ oˇ ve luˬ kʼai leh, haiˬ ve to nuˇ to shaˆ teˇ hpaˍ ve chehˇ kuiˬ hpeh‸ la tuˬ yoˬ. Oˇ kaˬ lo chaw teˇ gʼaˇ ka‸ maˇ chehˇ. Mvuhˇmiˬ oˇ ve hta‸ hkʼa mawˬ ve chaw hkʼa peu-eˬ kawˆ jaˇ tuˬ yoˬ.

38Baˍbuˍlonˍ chaw hui lehˬ, laˇ caˬ shiˉ hkʼa shuˍ kuˬ tuˬ yoˬ.

39Yawˇ hui awˍ meu‸ jaˇ chehˇ ve laˇ. Ngaˬ yawˇ hui awˬ pon hti caˇ hti dawˬ ve pawehˇ lonˉ teˇ maˬ te piˇ tuˬ yoˬ. Yawˇ hui caˇ peuˬ hkʼaw‸ nawˉ zuh‸ muiˉ kʼa leh, teˇ pawˆ ka‸ kʼaw‸ nawˇ la tuˬ ve maˇ heˆ.

40Yawˇ hui hta‸ tiˇ pehˍ piˇ tuˬ yawˬ ehˉ, aˉ che‸, leh awˬ paˍ teˇ hpaˍ hkʼa shuˍ, ngaˬ shiˍ tawˆ-e piˇ tuˬ yoˬ, teh‸ Gʼuiˬsha kʼoˆ ve yoˬ.

41Baˍbuˍlonˍ venˇ awˬ lawn Gʼuiˬsha chi hkʼe kʼoˆ ve yoˬ. Miˬguiˬ chaw yaˇ teˇ hpaˍ chiˇ mvuh chehˇ ve Baˍbuˍlonˍ venˇ lehˬ, canˇ paˍ hui ve la‸ sheh hkʼaw lo gaˬ peuˬ. Venˇ chi luˬ kʼai ve lehˬ, awˬ nu ve chaw ceuˬ teˇ hpaˍ awˬ pon hkʼaˬ ma kawˆ tuˬ cawˬ ve le.

42Laˇ tsuhˇ gʼuiˬ uiˍ taˆ la leh, Baˍbuˍlonˍ venˇ hta‸ hoˆ beh taˍ ve yoˬ.

43Awˬ nu ve venˇ teˇ hpaˍ htawˇ kawˆ law‸ law‸ te luˬ te sheˆ ve hta‸ gʼa hkanˍ leh, iˉ kaˆ maˇ cawˬ ve shehˇ de hkʼe hpeh‸ la peuˬ. Oˇ kaˬ lo chaw teˇ gʼaˇ ka‸ maˇ chehˇ ve awˬ hkʼoˆ, chaw teˇ gʼaˇ ka‸ maˇ kʼaw‸ te toˇ ve yoˬ.

44Ngaˬ lehˬ, Baˍbuˍlonˍ mvuhˇmiˬ ve Baˍlaˆ gʼuiˬsha hta‸ ciˍ yanˍ piˇ leh, yawˇ hkʼawˇ yuˬ taˍ ve mawˇ teˇ hpaˍ hta‸ kʼaw‸ hkʼaw‸ laˇ tcuh tuˬ yoˬ. Shu yawˇ hta‸ oˉ kʼoˍ kʼaw‸ pui tuˬ ve maˇ heˆ. Baˍbuˍlonˍ lanˇ venˇ teˇ hpaˍ luˬ kʼai peuˬ.

45Iˉsaˍreˍlaˆ chaw teˇ hpaˍ-oˬ, oˇ kaˬ lo hpaw tawˆ-e loˬ. Ngaˬ ve nyi ma zuhˆ ve hta‸ gʼa ponˬ tuˬ gʼuiˇ hpaw-e loˬ.

46Nawˬ hui gʼa kaˇ chehˇ ve maˇ heˆ heˆ ve tawˇ teˇ hpaˍ hta‸ taˇ kawˆ. Mvuhˇmiˬ hkʼaw sho‸ sha‸ la tuˬ yoˬ. Jawˇmawˇ teˇ gʼaˇ leh teˇ gʼaˇ bawˆ da‸ tuˬ yoˬ, teh‸ teˇ hkʼaw‸ le le maˇ heˆ heˆ ve tawˇ teˇ hpaˍ tawˆ la chehˇ ve yoˬ.

47Baˍbuˍlonˍ mvuhˇmiˬ ve gʼuiˬsha teˇ hpaˍ hta‸ ngaˬ suhˉ jehˬ piˇ tuˬ ve awˬ yanˇ gaˬ la chehˇ ve yoˬ. Mvuhˇmiˬ chi hta‸ ngaˬ ya‸ taw kuiˬ lo gaˬ la piˇ leh, mvuhˇmiˬ yaˇ teˇ hpaˍ hta‸ ngaˬ tiˇ pehˍ piˇ tuˬ yoˬ.

48Baˍbuˍlonˍ mvuhˇmiˬ lehˬ, awˬ na hpawˇ lo chehˇ ve chaw hui ve la‸ sheh hkʼaw gaˬ ve teˇ yanˇ, miˬguiˬ hkʼoˆ leh mvuhˇ naw ma hkʼoˆ cawˬ ve awˬ ceuˬ teˇ hpaˍ ha lehˬ leh kuˬ tuˬ yoˬ.

49Baˍbuˍlonˍ chaw teˇ hpaˍ lehˬ, miˬguiˬ chaw yaˇ laiˉ gʼaˇ hta‸ suh-e piˇ lawˬ ve yoˬ. Yawˇ hui lehˬ Iˉsaˍreˍlaˆ chaw laiˉ gʼaˇ hta‸ ka‸ suh-e piˇ lawˬ ve pa taw, chi beu‸ Baˍbuˍlonˍ mvuhˇmiˬ luˬ kʼai tuˬ yoˬ, teh‸ Gʼuiˬsha kʼoˆ ve yoˬ.

50Baˍbuˍlonˍ mvuhˇmiˬ hkʼaw chehˇ taˍ ve Iˉsaˍreˍlaˆ chaw hui hta‸ Gʼuiˬsha chi hkʼe kʼoˆ piˇ ve yoˬ. Nawˬ hui lehˬ, suh ve hta‸ gʼa ponˬ peuˬ. Chi beu‸ tawˆ kʼai loˬ. Taˇ law chehˇ-oˆ. Nawˬ hui lehˬ, a shu yawˇ ve yehˬ hta‸ vuiˇ jaˇ kuiˬ lo gʼa chehˇ taˍ ve htawˇ, ngaˬ hta‸ leh Yeˍruˆsaˍlehnˍ venˇ hta‸ dawˇ nawˇ chehˇ-oˆ.

51Ngaˬ hui lehˬ, awˬ me‸ awˬ hponˇ luˬ kʼai leh, ya‸ taw kuiˬ lo gʼa gaˬ peuˬ. Awˬ nu ve chaw teˇ hpaˍ da‸ kehˬ ve bon yehˬ hta‸ hiˉ yuˬ kʼai peuˬ ve pa taw, ngaˬ hui hpeh‸ bawˬ jaˇ ve yoˬ, teh‸ nawˬ hui kʼoˆ ve yoˬ.

52Chi hta‸ pa taw, Baˍbuˍlonˍ gʼuiˬsha teˇ hpaˍ hta‸ ngaˬ ciˍ yanˍ piˇ tuˬ ve awˬ yanˇ gaˬ la chehˇ ve yoˬ, teh‸ ngaˬ kʼoˆ taˍ peuˬ ve yoˬ. Mvuhˇmiˬ hkʼaw lo naˬ leh hkʼanˇ chehˇ ve awˬ hkawˇ hkʼa biˇ bvuhˬ tawˆ la tuˬ yoˬ.

53Baˍbuˍlonˍ venˇ lehˬ, mvuhˇ naw ma hkʼoˆ lo taˆ-e leh, oˇ kaˬ lo yeˬ jaˇ ve ta‸ yehˬ ca te taˍ ve htawˇ, venˇ oˇ ve hta‸ ca te luˬ piˇ tuˬ, chaw yaˇ teˇ hpaˍ hta‸ ngaˬ kʼai tcuh tuˬ yoˬ, teh‸ Gʼuiˬsha kʼoˆ ve yoˬ.

54Gʼuiˬsha kʼoˆ ve, Baˍbuˍlonˍ venˇ leh Baˍbuˍlonˍ mvuhˇmiˬ hkʼaw, chaw yaˇ teˇ hpaˍ kuˬ hawˬ chehˇ ve awˬ hkawˇ hta‸ na sheˍ.

55Ngaˬ lehˬ, Baˍbuˍlonˍ venˇ hta‸ gawˬ kʼai tuˬ te luˬ piˇ chehˇ ve yoˬ. Canˇ paˍ teˇ hpaˍ lehˬ, iˉ kaˆ gʼuiˬ baˇ hkʼa shuˍ awˬ hkawˇ bvuhˬ chaweh te leh, venˇ oˇ ve lo gʼuiˇ kʼai chehˇ ve yoˬ.

56Yawˇ hui lehˬ, Baˍbuˍlonˍ venˇ hta‸ te luˬ piˇ tuˬ gaˬ la taˍ ve yoˬ. Baˍbuˍlonˍ ma‸ yaˇ teˇ hpaˍ lehˬ, canˇ paˍ hui hpeh yuˬ ve hta‸ gʼa hkanˍ leh, yawˇ hui ve hkaˆ teˇ hpaˍ hteh kʼai peuˬ. Ngaˬ lehˬ, awˬ haiˬ hta‸ ciˍ yanˍ shehˍ hpaˇ Gʼuiˬsha hpeh‸ leh, Baˍbuˍlonˍ venˇ hta‸ yawˇ te taˍ ve hta‸ keunˍ da‸ ve hkʼe ciˍ yanˍ piˇ tuˬ yoˬ.

57Venˇ oˇ ve hta‸ uˉ peunˍ chehˇ ve awˬ hoˉ awˬ naˬ teˇ hpaˍ, cuˇ yiˍ cawˬ paˍ teˇ hpaˍ, leh ma‸ yaˇ teˇ hpaˍ hta‸ ngaˬ a pehˉ meuˇ gʼuiˬ dawˬ bvuhˆ piˇ lawˬ tuˬ yoˬ. Yawˇ hui zuh‸ muiˉ kʼa leh, teˇ pawˆ ka‸ kʼaw‸ nawˇ la tuˬ ve maˇ heˆ. Ngaˬ lehˬ, Gʼuiˬsha hpeh‸ leh tawˇ chi teˇ hpaˍ hta‸ kʼoˆ taˍ peuˬ ve yoˬ.

58Baˍbuˍlonˍ venˇ teˇ hpaˍ lehˬ, miˬ chaˇ hkʼoˆ lo dawˆ baˬ ve hta‸ gʼa hkanˍ leh, venˇ taˍ meu‸ hpe‸ teˇ hpaˍ lehˬ, aˬ miˍ tuˉ baˬ ve hta‸ gʼa hkanˍ tuˬ yoˬ. Chaw yaˇ teˇ hpaˍ te taˍ ve kanˉ lehˬ, hkʼe leˇ hpeh‸ leh, aˬ miˍ ha hkʼaw lo mehˉ kʼai ve yoˬ, teh‸ Gʼuiˬsha kʼoˆ ve yoˬ.

59Jawˇmawˇ Zeˍdaˍkiˆ ve ceˇ leˇ lehˬ, Maˍsaˍyaˆ ve awˬ hawehˍ, Neˍriˆ ve yaˇ Seˍraˍyaˆ hpeh‸ ve yoˬ. Yuˇda‸ mvuhˇmiˬ hta‸ Zeˍdaˍkiˆ uˉ peunˍ chehˇ ve awˇ hkʼaw‸ teˇ hkʼaw‸ htaˇ, Seˍraˍyaˆ lehˬ, jawˇmawˇ geh teˇ geh Baˍbuˍlonˍ venˇ lo kʼai ve yoˬ. Hkʼe te leh, ngaˬ yawˇ hta‸ tawˇ shanˍ feu piˇ ve yoˬ.

60Baˍbuˍlonˍ venˇ hkʼaˬ hkʼe te luˬ kʼai sheˆ kʼai tuˬ ve awˬ lawn, ngaˬ li‸ teˇ kʼoˆ awˬ hkʼaw lo hkʼa deh‸ bvuh‸ keu leh Seˍraˍyaˆ hta‸ chi hkʼe kʼoˆ piˇ ve yoˬ.

61Nawˬ Baˍbuˍlonˍ mvuhˇmiˬ lo gaˬ ve teˇ yanˇ, choˬ kaˬ lo bvuh‸ keu taˍ ve awˬ lawn chi teˇ hpaˍ, oˇ kaˬ lo chehˇ taˍ ve chaw hui hta‸ hkʼa deh‸ gʼaw maˍ piˇ-oˆ.

62Oˇ hkʼe te peuˬ hkʼaw‸ nawˉ, bon chi hkʼe lawˬ-o‸. Gʼuiˬsha-oˬ, nawˬ lehˬ venˇ chi hta‸ te luˬ piˇ leh, te‸ chiˉ chehˇ maˇ hpeh‸ ve gawˬ cu gawˬ pehˆ ve chehˇ kuiˬ hpeh‸ la piˇ tuˬ nawˬ kʼoˆ taˍ peuˬ ve yoˬ, teh‸ bon lawˬ-o‸.

63Seˍraˍyaˆ-oˬ, chaw yaˇ teˇ hpaˍ hta‸ nawˬ li‸ chi gʼaw maˍ piˇ peuˬ ve teˇ yanˇ, li‸ chi hta‸ haˉ pui shiˍ teˇ maˬ hpeh tsuh‸ leh, Uˇhpaˍraˆ iˉ kaˆ lawˬ hkʼaw lo baˬ keu-o.

64Oˇ hkʼe te peuˬ hkʼaw‸ nawˉ, Baˍbuˍlonˍ mvuhˇmiˬ htawˇ chi hkʼe hpeh‸ la tuˬ yoˬ. Gʼuiˬsha te luˬ te sheˆ piˇ ve pa taw, mvuhˇmiˬ chi kʼaw‸ tu la gaˬ tuˬ ve maˇ heˆ teh‸ kʼoˆ loˬ, teh‸ yawˇ hta‸ kʼoˆ maˍ piˇ ve yoˬ. (Yeˍraˍmiˆ ve tawˇ teˇ hpaˍ choˬ kaˬ lo peuˬ ve yoˬ.)

← Chapter 50 Jump to: Chapter 52 →