Exodus 2

Malagasy (Baiboly Protestanta Malagasy 2011)

← Chapter 1 Jump to: Chapter 3 →

1Nisy lehilahy iray avy amin’ny ankohonan’i Levy lasa naka vady tamin’ny zanakavavin’i Levy.

2Dia nanana anaka Ravehivavy ka niteraka zazalahy. Ary rehefa hitany fa zaza tsara tarehy ilay izy dia nafeniny telo volana.

3Ary rehefa tsy azony nafenina intsony dia naka vata kely zozoro izy ka nopetahany godorao sy dity ilay vata kely, dia napetrany tao ny zaza; ary napetrany tao anaty zozoro teo amoron’ny Neily ny vata kely.

4Ary nijanona teny lavidavitra teny ny anabaviny mba hahitany izay hanjo azy.

5Dia nidina ny zanakavavin’i Farao mba handro tao amin’ny Neily fa ny mpanompovaviny dia nitsangantsangana teny amoron’ny Neily; koa raha nahita ilay vata kely teo anaty zozoro ny zanakavavin’i Farao dia naniraka ny mpanompovaviny iray izy mba haka izany.

6Nony nosokafany dia hitany ny zazakely; ary indro zazalahy mitomany. Dia onena azy izy ka niteny hoe: Isan’ny zanaky ny Hebreo ity!

7Fa hoy ilay anabavin’ny zazakely tamin’ny zanakavavin’i Farao: Handeha haka mpitaiza amin’ny vehivavy hebreo va aho hankaty aminao mba hataonao mpitaiza azy?

8Dia hoy ny zanakavavin’i Farao taminy: Andeha ary. Dia lasa Razazavavy niantso ny renin’ny zaza.

9Ary hoy ny zanakavavin’i Farao taminy: Ento ity zaza ity, fa ianao no ataoko mpitaiza azy, ary izaho no handoa ny karamanao. Dia noentin-dRavehivavy ny zaza ka nampinonoiny.

10Ary rehefa lehibe ny zaza dia noentiny tao amin’ny zanakavavin’i Farao ka tonga zanany. Ary ny anarany nataony hoe Mosesy, fa hoy izy: Satria tamin’ny rano no nakako azy.

11Tamin’izany andro izany, rehefa lehibe i Mosesy, dia nandeha nankany amin’ireo rahalahiny izy ka nijery ny fanompoany mafy ary nahita lehilahy ejiptiana nikapoka ny iray tamin’ny Hebreo rahalahiny.

12Dia niherikerika izy, ka nony hitany fa tsy nisy olona, dia novonoiny ilay Ejiptiana ary nasitriny tao anaty fasika ny fatiny.

13Ny ampitson’iny, nandeha indray izy, ary indreo, nisy Hebreo roa lahy niady. Dia hoy izy tamin’ilay diso: Nahoana no mamono ny namanao ianao?

14Fa hoy izy: Iza no nanendry an’Ialahy ho mpanapaka sy mpitsara anay? Moa mikasa hamono ahy koa va Ialahy, tahaka ny namonoan’Ialahy ilay Ejiptiana? Dia raiki-tahotra i Mosesy ka niteny hoe: Hay tena fantatr’olona izany ny raharaha!

15Rehefa ren’i Farao izany zavatra izany dia nitady hamono an’i Mosesy izy. Fa nandositra an’i Farao i Mosesy ka nonina tany amin’ny tany Midiana. Ary nipetraka teo anilan’ny lavaka fantsakana iray izy.

16Ary ny mpisorona tany Midiana dia nanana zanaka fito mirahavavy. Tonga teo amin’ny fantsakana izy ireo nanovo rano ka nameno ny fampisotroan-drano, hampisotroany ny ondry aman’osin-drainy.

17Nefa tonga teo kosa ny lehilahy mpiandry ondry sasany ka nandroaka azy ireo. Fa nitsangana i Mosesy namonjy azy dia nampisotro rano ny ondry aman’osiny.

18Rehefa tonga teo amin’i Regoela rainy izy fito mirahavavy ireo dia hoy ny rainy: Nahoana no dia nalaky tonga toy izao ianareo androany?

19Hoy izy ireo: Nisy lehilahy ejiptiana iray namonjy anay tamin’ny tanan’ny mpiandry ondry sady nanovo rano ho anay, no nampisotro ny ondry aman’osy.

20Ary hoy izy tamin’ireo zanany vavy: Koa aiza izy izany? Nahoana no nilaozanareo any izao lehilahy izao? Antsoy izy mba hihinan-kanina.

21Ary sitrak’i Mosesy ny hitoetra tao amin-dRalehilahy. Koa i Zipora zanany vavy dia nomeny ho vadin’i Mosesy.

22Dia niteraka zazalahy Ravehivavy, ary ny anarany nataon’i Mosesy hoe Gersoma; fa hoy izy: Vahiny atỳ amin’ny tany hafa aho.

23Taona maro taorianan’izany dia maty ny mpanjakan’i Ejipta; ary ny Zanak’Israely dia nisento noho ny fanompoany ka nitaraina; dia niakatra tany amin’Andriamanitra ny fitarainany noho ny fanompoany.

24Ary Andriamanitra nandre ny fitarainany. Ary Andriamanitra nahatsiaro ny fanekeny tamin’i Abrahama sy Isaka ary i Jakoba.

25Ary Andriamanitra nijery ny Zanak’Israely. Ary Andriamanitra nahafantatra azy.

← Chapter 1 Jump to: Chapter 3 →