Genesis 1

Lao Bible 2012 (ພຣະຄຳພີສັກສິ)

Jump to: Chapter 2 →

1ເມື່ອພຣະເຈົ້າຕັ້ງຕົ້ນນິຣະມິດສ້າງຈັກກະວານ

2ໂລກບໍ່ທັນມີຮູບຮ່າງແລະຍັງວ່າງເປົ່າຢູ່. ຄວາມມືດໄດ້ຫຸ້ມຫໍ່ມະຫາສະໝຸດອັນກວ້າງໃຫຍ່ໄພສານ ແລະພຣະວິນຍານຂອງພຣະເຈົ້າ ໄດ້ປົກຄຸມຢູ່ເທິງໜ້ານໍ້າ.

3ພຣະເຈົ້າໄດ້ກ່າວວ່າ, “ໃຫ້ເກີດມີແສງແຈ້ງສ່ອງຂຶ້ນ.” ແລະກໍເປັນດັ່ງນັ້ນ.

4ພຣະເຈົ້າໄດ້ເຫັນແຈ້ງນັ້ນແລ້ວເຫັນວ່າດີ. ພຣະເຈົ້າແຍກແຈ້ງອອກຈາກມືດ

5ແລະພຣະເຈົ້າໄດ້ເອີ້ນແຈ້ງນັ້ນວ່າ, “ກາງເວັນ.” ແລະໄດ້ເອີ້ນມືດນັ້ນວ່າ, “ກາງຄືນ.” ມີເວລາຄໍ່າແລະເວລາເຊົ້າ ນັ້ນແມ່ນມື້ທີໜຶ່ງ.

6ແລ້ວພຣະເຈົ້າໄດ້ກ່າວວ່າ, “ໃຫ້ມີແຜ່ນຟ້າໃນລະຫວ່າງນໍ້າ ແຍກນໍ້າອອກຈາກກັນເປັນສອງສ່ວນ.”

7ພຣະເຈົ້າຈຶ່ງຊົງສ້າງແຜ່ນຟ້າ ແລະແຍກນໍ້າອອກຈາກກັນຄື: ນໍ້າທີ່ຢູ່ເທິງແຜ່ນຟ້າແລະນໍ້າທີ່ຢູ່ລຸ່ມແຜ່ນຟ້າ. ແລະກໍເປັນດັ່ງນັ້ນ.

8ພຣະເຈົ້າໄດ້ເອີ້ນແຜ່ນຟ້ານັ້ນວ່າ, “ຟ້າ.” ມີເວລາຄໍ່າ ແລະເວລາເຊົ້າ ນັ້ນແມ່ນມື້ທີສອງ.

9ແລະພຣະເຈົ້າໄດ້ກ່າວວ່າ, “ໃຫ້ນໍ້າທີ່ຢູ່ລຸ່ມທ້ອງຟ້າມາໂຮມກັນຢູ່ບ່ອນດຽວ ເພື່ອພື້ນດິນແຫ້ງຈະໄດ້ປາກົດຂຶ້ນ.” ແລະກໍເປັນດັ່ງນັ້ນ.

10ພຣະເຈົ້າໄດ້ເອີ້ນບ່ອນແຫ້ງນັ້ນວ່າ, “ແຜ່ນດິນໂລກ.” ແລະບ່ອນທີ່ນໍ້າມາໂຮມກັນນັ້ນວ່າ, “ທະເລ.” ພຣະເຈົ້າໄດ້ເຫັນວ່າສິ່ງນັ້ນດີ.

11ແລ້ວພຣະເຈົ້າໄດ້ກ່າວວ່າ, “ໃຫ້ແຜ່ນດິນເກີດພືດທຸກຊະນິດທັງແນວເປັນເມັດແລະແນວເປັນໝາກຕາມຊະນິດຂອງມັນ.” ແລະກໍເປັນດັ່ງນັ້ນ.

12ສະນັ້ນ ພືດທຸກຊະນິດຈຶ່ງເກີດຂຶ້ນຕາມຊະນິດຂອງມັນ. ພຣະເຈົ້າໄດ້ເຫັນວ່າສິ່ງນັ້ນດີ.

13ມີເວລາຄໍ່າ ແລະເວລາເຊົ້າ ນັ້ນແມ່ນມື້ທີສາມ.

14ແລະພຣະເຈົ້າໄດ້ກ່າວວ່າ, “ໃຫ້ມີດວງແຈ້ງໃນທ້ອງຟ້າ ແຍກກາງເວັນຈາກກາງຄືນ ແລະໃຫ້ເປັນເຄື່ອງໝາຍກຳນົດເວລາຂອງມື້, ປີ ແລະລະດູການ;

15ໃຫ້ດວງແຈ້ງແຫ່ງຈັກກະວານນັ້ນ ສ່ອງແສງລົງມາເທິງແຜ່ນດິນໂລກ.” ແລະກໍເປັນດັ່ງນັ້ນ.

16ສະນັ້ນ ພຣະເຈົ້າຈຶ່ງສ້າງດວງແຈ້ງໃຫຍ່ສອງດວງຄື: ດວງຕາເວັນເພື່ອຄອບຄອງກາງເວັນ ແລະດວງຈັນເພື່ອຄອບຄອງກາງຄືນ; ພຣະອົງຍັງສ້າງດວງດາວອື່ນໆອີກ.

17ພຣະເຈົ້າໄດ້ກຳນົດຕຳແໜ່ງດວງແຈ້ງທັງຫລາຍໄວ້ໃນຈັກກະວານໃຫ້ສ່ອງແສງລົງມາສູ່ໂລກ

18ເພື່ອຄອບຄອງກາງເວັນກັບກາງຄືນ ແລະໃຫ້ແຍກແຈ້ງຈາກມືດ. ແລະພຣະເຈົ້າໄດ້ເຫັນວ່າສິ່ງນັ້ນດີ.

19ມີເວລາຄໍ່າ ແລະເວລາເຊົ້າ ນັ້ນແມ່ນມື້ທີສີ່.

20ແລະພຣະເຈົ້າໄດ້ກ່າວວ່າ, “ໃຫ້ສັດຫລາຍຈຳພວກເກີດຂຶ້ນຢູ່ໃນນໍ້າ ແລະໃຫ້ມີນົກບິນໄປມາໃນທ້ອງຟ້າອາກາດ.”

21ດັ່ງນັ້ນ ພຣະເຈົ້າຈຶ່ງໄດ້ນິຣະມິດສ້າງສັດທະເລຂະໜາດໃຫຍ່ ພ້ອມກັບບັນດາສັດນໍ້າທີ່ມີຊີວິດເຄື່ອນໄຫວໄປມາຕາມຊະນິດຂອງມັນ ເກີດຂື້ນຢ່າງບໍຣິບູນໃນນໍ້ານັ້ນ; ນົກທຸກປະເພດຕາມຊະນິດຂອງມັນ. ແລະພຣະເຈົ້າໄດ້ເຫັນວ່າສິ່ງນັ້ນດີ.

22ພຣະເຈົ້າໄດ້ອວຍພອນສັດເຫຼົ່ານັ້ນ ໃຫ້ພາກັນແຜ່ຜາຍຂະຫຍາຍພັນທະວີຄູນຫລາຍຂຶ້ນຢູ່ເຕັມນໍ້າທະເລ ແລະທັງໃຫ້ມີຝູງນົກແຜ່ຜາຍຂະຫຍາຍພັນທະວີຄູນຫລາຍຂຶ້ນຢູ່ເຕັມແຜ່ນດິນໂລກ.

23ມີເວລາຄໍ່າ ແລະເວລາເຊົ້າ ນັ້ນແມ່ນມື້ທີຫ້າ.

24ແລະພຣະເຈົ້າໄດ້ກ່າວວ່າ, “ໃຫ້ມີສັດຈຳພວກຕ່າງໆຄື: ສັດບ້ານ, ສັດປ່າ ແລະສັດຍ່າງຍ້າຍເລືອຄານ ເກີດຂຶ້ນທົ່ວແຜ່ນດິນໂລກ.” ແລະກໍເປັນດັ່ງນັ້ນ.

25ສະນັ້ນ ພຣະເຈົ້າຈຶ່ງໄດ້ສ້າງສັດປ່າຕາມຊະນິດຂອງມັນ, ສັດບ້ານຕາມຊະນິດຂອງມັນ ແລະສັດຍ່າງຍ້າຍເລືອຄານຕາມຊະນິດຂອງມັນ. ແລະພຣະເຈົ້າໄດ້ເຫັນວ່າສິ່ງນັ້ນດີ.

26ແລ້ວພຣະເຈົ້າໄດ້ກ່າວວ່າ, “ບັດນີ້ ເຮົາຈະສ້າງມະນຸດໃຫ້ມີຮູບລັກສະນະຄືເຮົາ, ຕາມແບບຢ່າງຂອງເຮົາ; ເຂົາຈະມີອຳນາດເໜືອປາ, ນົກ, ສັດທັງໝົດ; ບໍ່ວ່າສັດລ້ຽງຫລືສັດປ່າ, ສັດໃຫຍ່ຫລືສັດນ້ອຍກໍດີ.”

27ດັ່ງນັ້ນ ພຣະເຈົ້າຈຶ່ງໄດ້ນິຣະມິດສ້າງມະນຸດໃຫ້ມີຮູບລັກສະນະຂອງພຣະອົງ ຕາມພຣະລັກສະນະຂອງພຣະເຈົ້າ. ພຣະອົງໄດ້ນິຣະມິດສ້າງພວກເຂົາໃຫ້ເປັນຊາຍແລະຍິງ

28ພຣະເຈົ້າໄດ້ອວຍພອນພວກເຂົາ ແລະພຣະເຈົ້າໄດ້ກ່າວແກ່ພວກເຂົາວ່າ, “ຈົ່ງມີລູກຫລານໃຫ້ແຜ່ຜາຍຂະຫຍາຍທະວີຄູນຫລາຍຂຶ້ນ ເພື່ອເຊື້ອສາຍຂອງເຈົ້າຈະມີຢູ່ທົ່ວທຸກແຫ່ງຫົນ ແລະປົກຄອງທຸກສິ່ງເທິງແຜ່ນດິນໂລກນີ້. ເຮົາໃຫ້ເຈົ້າມີອຳນາດເໜືອປາ, ນົກ ແລະສັດປ່າທຸກຊະນິດ.”

29ພຣະເຈົ້າໄດ້ກ່າວວ່າ, “ເຮົາໃຫ້ພືດເປັນເມັດ ແລະໝາກໄມ້ທຸກຊະນິດແກ່ເຈົ້າເປັນອາຫານ,

30ແຕ່ສຳລັບສັດປ່າ ແລະນົກທຸກຊະນິດນັ້ນ ເຮົາໃຫ້ຫຍ້າກັບພືດໃບຂຽວທັງໝົດເປັນອາຫານ.” ແລະກໍເປັນດັ່ງນັ້ນ.

31ພຣະເຈົ້າໄດ້ເຫັນວ່າທຸກໆສິ່ງທີ່ໄດ້ນິຣະມິດສ້າງຂຶ້ນມາ ແລ້ວກໍໄດ້ເຫັນວ່າດີຫລາຍ. ມີເວລາຄໍ່າ ແລະເວລາເຊົ້າ ນັ້ນແມ່ນມື້ທີຫົກ.

Jump to: Chapter 2 →