Genesis 46

Lao Bible 2012 (ພຣະຄຳພີສັກສິ)

← Chapter 45 Jump to: Chapter 47 →

1ຢາໂຄບໄດ້ມ້ຽນມັດເອົາສິ່ງຂອງທັງໝົດທີ່ຕົນມີຢູ່ ແລະໄປເມືອງເບເອນເຊບາ ບ່ອນທີ່ເພິ່ນໄດ້ຖວາຍບູຊາແກ່ພຣະເຈົ້າຂອງອີຊາກພໍ່ຂອງຕົນ.

2ໃນຄືນນັ້ນ ພຣະເຈົ້າໄດ້ກ່າວກັບຢາໂຄບທາງຄວາມຝັນວ່າ, “ຢາໂຄບ ຢາໂຄບເອີຍ.” ເພິ່ນຂານຕອບວ່າ, “ໂດຍ ຂ້ານ້ອຍກຳລັງຟັງຢູ່.”

3ພຣະອົງກ່າວວ່າ, “ເຮົາຄືພຣະເຈົ້າ ພຣະເຈົ້າຂອງພໍ່ເຈົ້າ, ບໍ່ຕ້ອງຢ້ານທີ່ຈະໄປປະເທດເອຢິບ. ເຮົາຈະເຮັດໃຫ້ເຊື້ອສາຍຂອງເຈົ້າທະວີຂຶ້ນເປັນຊົນຊາດໃຫຍ່ຢູ່ໃນທີ່ນັ້ນ.

4ເຮົາຈະໄປປະເທດເອຢິບກັບເຈົ້າ ແລະເຮົາຈະນຳເອົາເຊື້ອສາຍຂອງເຈົ້າ ກັບຄືນມາສູ່ດິນແດນນີ້ອີກ. ໂຢເຊັບຈະຢູ່ນຳເຈົ້າເມື່ອເວລາເຈົ້າຕາຍ.”

5ແລ້ວຢາໂຄບກໍອອກໄປຈາກເມືອງເບເອນເຊບາ. ພວກລູກຊາຍໄດ້ເອົາພໍ່ຂອງພວກຕົນ, ພວກເດັກນ້ອຍ ແລະເມຍຂອງພວກເຂົາ ຂຶ້ນຂີ່ກວຽນທີ່ກະສັດເອຢິບໄດ້ສົ່ງມາຮັບ.

6ພວກເຂົາເອົາຝູງສັດກັບຊັບສົມບັດທັງໝົດທີ່ມີໃນການາອານ ອອກເດີນທາງໄປສູ່ປະເທດເອຢິບ.

7ຢາໂຄບໄດ້ນຳເອົາເຊື້ອສາຍທັງໝົດຂອງຕົນໄປນຳດັ່ງນີ້: ບັນດາລູກຊາຍຂອງເພິ່ນ, ບັນດາຫລານຊາຍຂອງເພິ່ນ, ບັນດາລູກສາວຂອງເພິ່ນ ແລະບັນດາຫລານສາວຂອງເພິ່ນ.

8ເຊື້ອສາຍຂອງຢາໂຄບທີ່ໄປປະເທດເອຢິບກັບເພິ່ນມີຣູເບັນລູກຊາຍກົກຂອງເພິ່ນ

9ແລະພວກລູກຊາຍຂອງຣູເບັນດັ່ງນີ້: ຮານົກ, ປານລູ, ເຮຊະໂຣນ ແລະການໝີ.

10ຊີເມໂອນແລະພວກລູກຊາຍຂອງຕົນ: ເຢມູເອນ, ຢາມິນ, ໂອຮາດ, ຢາກິນ, ໂຊຮາ ແລະລູກທີ່ເກີດຈາກຍິງຊາວການາອານຊື່ວ່າ ຊາອູນ.

11ເລວີແລະລູກຊາຍຂອງຕົນ: ເກໂຊນ, ໂກຮາດ ແລະເມຣາຣີ.

12ຢູດາແລະພວກລູກຊາຍຂອງຕົນ: ເອຣະ, ໂອນານ, ເຊລາ, ເປເຣັດ ແລະເຊຣາ. (ສ່ວນເອຣະກັບໂອນານ ລູກຊາຍສອງຄົນຂອງຢູດານັ້ນ ຕາຍທີ່ການາອານ) ພ້ອມດ້ວຍລູກຊາຍຂອງເປເຣັດຊື່ວ່າ ເຮຊະໂຣນ ແລະຮາມູນ.

13ອິດຊາຄາກັບພວກລູກຊາຍຂອງຕົນ: ໂຕລາ, ປູອາ, ຢາຊຸບ ແລະຊີມໂຣນ.

14ເຊບູໂລນກັບພວກລູກຊາຍຂອງຕົນ: ເສເຣັດ, ເອໂລນ ແລະຢາເລເອນ.

15ຄົນເຫຼົ່ານັ້ນແມ່ນລູກຊາຍຂອງນາງເລອາ ທີ່ໄດ້ເກີດໃຫ້ຢາໂຄບໃນເມໂຊໂປຕາເມຍ ລວມທັງນາງດີນາລູກສາວຂອງຕົນດ້ວຍ. ເມື່ອນັບລວມທັງໝົດແລ້ວ ເຊື້ອສາຍທີ່ສືບມາຈາກນາງເລອາ ມີຢູ່ 33 ຄົນ.

16ກາດແລະບັນດາລູກຊາຍຂອງຕົນ: ເຊໂຟນ, ຮັກກີ, ຊູນີ, ເອຊະໂບນ, ເອຣີ, ອາໂຣດ ແລະອາເຣລີ.

17ອາເຊແລະພວກລູກຊາຍຂອງຕົນ: ອີມນາ, ອີຊະວາ, ອີຊະວີ, ເບຣິຢາ, ແລະນາງເສຣາລູກສາວຂອງລາວ ພ້ອມທັງລູກຊາຍຂອງເບຣິຢາ: ເຮເບແລະມັນກີເອນ.

18ພວກ 16 ຄົນນີ້ແມ່ນເຊື້ອສາຍຂອງຢາໂຄບ ທີ່ສືບມາຈາກນາງຊີລະປາ ເອື້ອຍລ້ຽງທີ່ລາບານໄດ້ມອບໃຫ້ນາງເລອາ ລູກສາວຂອງຕົນ.

19ສ່ວນຣາເຊັນ ເມຍຂອງຢາໂຄບ ມີລູກຊາຍສອງຄົນ: ໂຢເຊັບແລະເບັນຢາມິນ.

20ຢູ່ໃນປະເທດເອຢິບ ໂຢເຊັບມີລູກຊາຍສອງຄົນຊື່ວ່າ ມານາເຊແລະເອຟຣາອິມ ທີ່ໄດ້ນຳນາງອາເສນາດລູກສາວຂອງໂປຕີເຟຣາປະໂຣຫິດແຫ່ງເມືອງເຮລີໂອໂປລີ.

21ລູກຊາຍຂອງເບັນຢາມິນ ມີດັ່ງນີ້: ເບລາ, ເບເຄ, ອັດຊະເບນ, ເກຣາ, ນາອາມານ, ເອຮີ, ໂຣເຊ, ມຸບປິມ, ຮຸບປິມ ແລະອາກເດ.

22ພວກສິບສີ່ຄົນນີ້ເປັນເຊື້ອສາຍຂອງຢາໂຄບ ທີ່ສືບມາຈາກນາງຣາເຊັນ.

23ດານແລະລູກຊາຍຂອງຕົນຊື່ວ່າ ຮູຊິມ.

24ເນັບທາລີແລະລູກຊາຍຂອງຕົນ ມີດັ່ງນີ້: ຢາເຊເອນ, ກູນີ, ເຢເຊ ແລະຊິນເລັມ.

25ພວກເຈັດຄົນນີ້ເປັນເຊື້ອສາຍຂອງຢາໂຄບທີ່ສືບມາຈາກນາງບິນຮາ ເອື້ອຍລ້ຽງທີ່ລາບານໄດ້ມອບໃຫ້ນາງຣາເຊັນລູກສາວຂອງຕົນ.

26ຈຳນວນເຊື້ອສາຍແທ້ໆທັງໝົດຂອງຢາໂຄບທີ່ໄປຢູ່ໃນປະເທດເອຢິບມີ 66 ຄົນ; ໂດຍບໍ່ນັບເມຍຂອງພວກລູກຊາຍຂອງເພິ່ນ.

27ໂຢເຊັບມີລູກຊາຍທີ່ເກີດຢູ່ໃນປະເທດເອຢິບສອງຄົນ. ເມື່ອຮວບຮວມຄອບຄົວຂອງຢາໂຄບທັງໝົດ ທີ່ໄປຢູ່ໃນປະເທດເອຢິບແລ້ວມີ 70 ຄົນ.

28ຢາໂຄບໄດ້ສົ່ງຢູດາໄປບອກໂຢເຊັບລ່ວງໜ້າ ເພື່ອໃຫ້ມາພົບພໍ່ຂອງຕົນທີ່ເຂດໂກເຊັນ. ເມື່ອພວກເຂົາມາຮອດ

29ໂຢເຊັບຈຶ່ງຂີ່ລົດມ້າອອກໄປພົບພໍ່ຂອງຕົນທີ່ເຂດໂກເຊັນທັນທີ. ເມື່ອທັງສອງພົບກັນ ໂຢເຊັບຈຶ່ງຟ້າວກອດຄໍພໍ່ຂອງຕົນໄຫ້ສະອື້ນເປັນເວລານານ.

30ຢາໂຄບເວົ້າກັບໂຢເຊັບວ່າ, “ບັດນີ້ ພໍ່ພ້ອມແລ້ວທີ່ຈະຕາຍ ເມື່ອໄດ້ເຫັນໜ້າລູກແລະຮູ້ວ່າລູກຍັງມີຊີວິດຢູ່.”

31ແລ້ວໂຢເຊັບກໍກ່າວຕໍ່ພວກອ້າຍ ຕະຫລອດທັງຄອບຄົວທັງໝົດຂອງພໍ່ຕົນວ່າ, “ຂ້ອຍຕ້ອງໄປບອກໃຫ້ກະສັດຮູ້ວ່າ ພວກອ້າຍນ້ອງກັບຄອບຄົວທັງໝົດຂອງພໍ່ຂ້ອຍ ທີ່ໄດ້ອາໄສຢູ່ໃນການາອານນັ້ນມາຮອດແລ້ວ.

32ຂ້ອຍຈະບອກເພິ່ນວ່າ ພວກເຈົ້າເປັນຄົນລ້ຽງແກະແລະລ້ຽງງົວ ແລະພວກເຈົ້າໄດ້ເອົາຝູງແກະກັບຝູງງົວພ້ອມທຸກສິ່ງທີ່ມີນັ້ນມານຳ.

33ເມື່ອກະສັດເອີ້ນພວກເຈົ້າໄປຖາມເຖິງວິຊາອາຊີບຂອງພວກເຈົ້າ

34ໃຫ້ພວກເຈົ້າຕອບວ່າ, ພວກເຈົ້າລ້ຽງສັດເປັນອາຊີບເໝືອນດັ່ງບັນພະບຸລຸດຂອງພວກເຮົາ. ໂດຍວິທີນີ້ກະສັດກໍຈະອະນຸຍາດໃຫ້ພວກເຈົ້າອາໄສຢູ່ໃນເຂດໂກເຊັນໄດ້.” ໂຢເຊັບແນະນຳເຊັ່ນນີ້ ເພາະຊາວເອຢິບບໍ່ມັກພວກລ້ຽງແກະ.

← Chapter 45 Jump to: Chapter 47 →