Genesis 23

Lao Bible 2012 (ພຣະຄຳພີສັກສິ)

← Chapter 22 Jump to: Chapter 24 →

1ນາງຊາຣາໄດ້ຕາຍໄປເມື່ອນາງອາຍຸໄດ້ 127 ປີ

2ນາງໄດ້ເສຍຊີວິດທີ່ເຮັບໂຣນໃນແຜ່ນດິນການາອານ ແລະອັບຣາຮາມໄດ້ໄວ້ທຸກໃຫ້ນາງ.

3ອັບຣາຮາມປະຊາກສົບເມຍຂອງຕົນໄວ້ ແລະໄປເວົ້າກັບຊາວຮິດຕີວ່າ,

4“ຂ້ານ້ອຍເປັນຄົນຕ່າງດ້າວທີ່ອາໄສຢູ່ທ່າມກາງພວກທ່ານ; ສະນັ້ນ ຂໍຂາຍທີ່ດິນບາງຕອນໃຫ້ຂ້ານ້ອຍ ເພື່ອຈະໄດ້ຝັງສົບເມຍຂອງຂ້ານ້ອຍແດ່ທ້ອນ.”

5ຊາວຮິດຕີຕອບອັບຣາຮາມວ່າ,

6“ກະລຸນາຟັງພວກເຮົາກ່ອນ. ພວກເຮົານັບຖືທ່ານເປັນຜູ້ນຳທີ່ມີອຳນາດຍິ່ງໃຫຍ່ຄົນໜຶ່ງ; ຈົ່ງຝັງສົບເມຍຂອງທ່ານໃນຂຸມຝັງສົບທີ່ດີທີ່ສຸດຂອງພວກເຮົາເທີ້ນ. ໃຜໆໃນພວກເຮົາຕ່າງກໍຍິນດີ ທີ່ຈະໃຫ້ທ່ານຝັງສົບເມຍຂອງທ່ານໃສ່ໃນອຸບມຸງທີ່ພວກເຮົາມີຢູ່.”

7ແລ້ວອັບຣາຮາມກໍກົ້ມຄຳນັບພວກເຂົາ ແລະເວົ້າວ່າ,

8“ຖ້າພວກທ່ານຍິນດີໃຫ້ຂ້ານ້ອຍ ຝັງສົບເມຍຂອງຂ້ານ້ອຍໃນທີ່ນີ້; ຈົ່ງກະລຸນາໄປຂໍນຳເອຟະໂຣນ ລູກຊາຍຂອງໂຊຮາ

9ໃຫ້ຂາຍຖໍ້າມັກເປລາທີ່ແຄມນາຂອງລາວໃຫ້ຂ້ານ້ອຍ ຕາມລາຄາທີ່ກຳນົດໄວ້ຢູ່ຊ້ອງໜ້າພວກທ່ານໃນທີ່ນີ້ ເພື່ອວ່າຂ້ານ້ອຍຈະໄດ້ມີຖໍ້າຂອງຕົນເອງໄວ້ເປັນບ່ອນຝັງສົບ.”

10ສ່ວນເອຟະໂຣນເອງກໍນັ່ງຮ່ວມປະຊຸມກັບຊາວຮິດຕີຄົນອື່ນໆ ທີ່ທາງປະຕູເຂົ້າເມືອງ; ລາວຕອບໃຫ້ທຸກຄົນໃນທີ່ນັ້ນໄດ້ຍິນວ່າ,

11“ບໍ່ແມ່ນ, ທ່ານເອີຍ ຈົ່ງຟັງຂ້ານ້ອຍກ່ອນ; ຂ້ານ້ອຍຈະມອບທີ່ດິນຢູ່ໃນນາທັງໝົດ ພ້ອມທັງຖໍ້າໃຫ້ແກ່ທ່ານຊ້ອງໜ້າປະຊາຊົນຂອງຂ້ານ້ອຍນີ້ແຫຼະ; ຂ້ານ້ອຍຈະມອບຖໍ້ານັ້ນໃຫ້ແກ່ທ່ານ ເພື່ອວ່າທ່ານຈະໄດ້ຝັງສົບເມຍຂອງທ່ານໃສ່ທີ່ນັ້ນ.”

12ແຕ່ອັບຣາຮາມກົ້ມຂາບຊາວເມືອງນັ້ນ

13ແລະກ່າວຕໍ່ເອຟະໂຣນດ້ວຍສຽງອັນດັງ ເພື່ອຊາວເມືອງຈະໄດ້ຍິນນຳວ່າ, “ກະລຸນາຟັງກ່ອນ ຂ້ານ້ອຍຂໍເວົ້າອີກແດ່. ຂ້ານ້ອຍຈະຊື້ນານັ້ນທັງໝົດ. ຈົ່ງຮັບເງິນຄ່າຊື້ນາໄປ ແລະຂ້ານ້ອຍກໍຈະຝັງສົບເມຍຂອງຂ້ານ້ອຍໃສ່ໃນທີ່ນັ້ນ.”

14ເອຟະໂຣນໄດ້ຕອບອັບຣາຮາມວ່າ,

15“ທ່ານເອີຍ ນາທົ່ງນັ້ນມີລາຄາພຽງ 400 ຫລຽນເທົ່ານັ້ນ ມັນຈະມີຫຍັງລະຫວ່າງທ່ານກັບຂ້ານ້ອຍ? ຈົ່ງຝັງສົບເມຍຂອງທ່ານໃສ່ໃນນານັ້ນສາ.”

16ອັບຣາຮາມໄດ້ຕົກລົງຊື້ທີ່ດິນນັ້ນນຳເອຟະໂຣນ ໂດຍຈ່າຍເງິນຈຳນວນ 400 ຫລຽນ ຊ້ອງໜ້າຊາວຮິດຕີ ຕາມອັດຕາເງິນທີ່ໃຊ້ກັນໃນທ້ອງຕະຫລາດ.

17ທີ່ດິນຂອງເອຟະໂຣນ ທາງທິດຕາເວັນອອກຂອງມຳເຣທີ່ມັກເປລາ ຕົກເປັນຂອງອັບຣາຮາມດ້ວຍວິທີນີ້ແຫຼະ. ມີທົ່ງນາກັບຖໍ້າຊຶ່ງຢູ່ໃນນັ້ນ ຕົ້ນໄມ້ທັງສິ້ນທີ່ຢູ່ໃນທົ່ງນາຕະຫລອດທົ່ວບໍລິເວນນັ້ນ ເອຟະໂຣນກໍໂອນໃຫ້

18ຕົກເປັນສົມບັດຂອງອັບຣາຮາມໂດຍການຮັບຮອງຂອງຊາວຮິດຕີທັງໝົດ.

19ແລ້ວອັບຣາຮາມກໍຝັງສົບນາງຊາຣາເມຍຂອງຕົນ ໄວ້ໃນຖໍ້າທີ່ມັກເປລາຊຶ່ງກົງກັນຂ້າມກັບມຳເຣ(ທີ່ເຮັບໂຣນ)ໃນດິນແດນການາອານ.

20ສະນັ້ນ ນາແລະຖໍ້າຢູ່ໃນນັ້ນຊຶ່ງເຄີຍເປັນຂອງຊາວຮິດຕີ ຈຶ່ງຕົກເປັນຊັບສົມບັດຂອງອັບຣາຮາມ ເພື່ອໃຊ້ໃຫ້ເປັນບ່ອນຝັງສົບ.

← Chapter 22 Jump to: Chapter 24 →