Deuteronomy 14

Kirundi (Bibliya Yera 1951, 1967 (Burundi))

← Chapter 13 Jump to: Chapter 15 →

1Mwebge mur’ abana b’ Uhoraho Imana yanyu: ntimukikebagure ku mibiri yanyu, canke ngo mwiharanguze ibimwerere mu bitwariro kubg’ ūpfuye.

2Kuko mur’ ihanga ryera ryarobanuriwe Uhoraho Imana yanyu, kand’ Uhoraho akaba yarabītoranirije mu mahanga yose yo mw isi kuba ihanga yiharije.

3Ntimuze murye ikintu na kimwe kizira.

4Ibi ni vyo mwemererwa kurya mu bigenda: inka n’intama n’impene,

5n’impongo n’ingeregere n’ifumberi n’impene y’inyeshamba n’inzobe n’imbogo n’intama y’inyeshamba.

6Mu bigenda, igifise inzāra cose ziri n’ umwanya hagati, kikagira inzāra kubiri, kigatako kikūza, ico ni co mwemererwa kurya mu bigenda.

7Ariko mu vyūza no mu bifise inzāra ziri n’umwanya hagati, ivyo mutemerewe kurya n’ibi: ingamiya n’urukwavu n’inkezi; ivyo n’ibihumanya kuri mwebge, kuko naho vyūza ariko ntibigira inzāra ziri n’umwanya hagati.

8N’ingurube, kuko nah’ ifise inzāra ziri n’umwanya hagati, ariko ntiyūza: na yo n’igihumanya kuri mwebge. Inyama zavyo ntimuze muzirye, n’imivyimba yavyo ntimuze muyikoreko.

9Ibi ni vyo mwemererwa kurya mu biba mu mazi vyose: ibifise amababa n’ibigaragamba, ivyo ni vyo mwemererwa kurya.

10Ibidafise amababa n’ibigaragamba ntimuze mubirye: n’umuziro kuri mwebge.

11Ibisīga n’inyoni vyose bidahumanya mwemererwa kubirya.

12Arikw ibi ntimuze mubirye: inkukuma n’itarangabo na oziniya;

13n’ikinyamwotsi n’inkōna n’ikinyamwanira, ukw amoko yavyo ari;

14n’icitwa igikōna cose, ukw amoko yavyo ari;

15n’imbuni na tamasi na shakafu n’agaca, ukw amoko yavyo ari;

16n’igihuna n’inyanana na tinishemeti;

17n’inkongori n’ikinyakabaka na shalaki;

18na sarumfune n’agasōza, ukw amoko yavyo ari, na samunsure n’agahungarema.

19Kand’ udukōko twose tw’amababa tunyonyera, na two n’umuziro kuri mwebge: ntimuze muturye.

20Ibisīga n’inyoni vyose bidahumanya ni vyo mwemererwa kurya.

21Ntihaze hagire ikintu na kimwe cīpfiriye murya; ariko mushobora kugiha uwo mu nyambukīra aba i wanyu, akaba ari we akirya; canke mushobora kukigura n’umunyamahanga; ariko mweho mur’ ihanga ryera ryarobanuriwe Uhoraho Imana yanyu. Ntimuze mutekeshe umwagazi w’ impene amata ya nyina.

22Ntimuze mubure gutanga ikigiracumi co mu vyo mwejeje ku mbuto mwateye, ukw imirima yanyu izokwera uk’ umwaka utashe.

23Ikigiracumi c’amasaka yanyu, n’ica vino yanyu, n’ic’ amavuta ya elayo yanyu, n’ivy’ uburiza bgo mu masho yanyu, n’ ivyo mu mikuku yanyu, muze mubirīre imbere y’Uhoraho Imana yanyu, ahantu azoba yaratoranije ngw ahashire izina ryiwe; kugira ngo mwige kwubaha Uhoraho Imana yanyu ibihe vyose.

24Arikw ah’ urugendo ruzoba rurerure, rukabananira, ntimushobore kubishikanayo, igihe Uhoraho Imana yanyu azoba abahaye umugisha, kukw aho hantu azoba yaratoranije ngw ahashire izina ryiwe hazoba hababereye kure;

25muze mubigure amahera, muyatekere, mugende aho hantu Uhoraho Imana yanyu azoba yaratoranije:

26mushike muyagure ico mwumva mugomba cose, ar’ inka, ar’ intama, ari vino, ar’ inzoga, ar’ ikindi kintu cose mwumva mugomba; muheze mubirīre ngaho nyene imbere y’ Uhoraho Imana yanyu, mubisangire n’abo mu ngo zanyu, munezeranwe.

27Kand’ Abalewi baba muri mwebge ntimuze mupfe uko mubafashe, kukw ata mugabane cank’ ishamvu bafise muri mwebge.

28Ku mpera y’umwaka wose ugira gatatu muze mwame mukūra ikigiracumi ku vyo mwejeje vyose mur’ uwo mwaka, mubikoranirize i wanyu,

29kugira ngw Abalewi, kuko badafise umugabane cank’ ishamvu muri mwebge, bo n’ inyambukīra, n’impfuvyi, n’abapfakazi, baba i wanyu, babone kuza, barye, bahāge; kugira ng’ Uhoraho Imana yanyu abahezagire mu bikorwa mukora vyose.

← Chapter 13 Jump to: Chapter 15 →