Deuteronomy 3

Kirundi (Bibliya Yera 1951, 1967 (Burundi))

← Chapter 2 Jump to: Chapter 4 →

1Turaheza turakebanuka, tujana inzira idūga i Bashani; maze Ogi umwami waho aza kudutega bo n’ingabo ziwe zose, turumanira ahitwa Edireyi.

2Uhoraho arambarira, ati Ntimumutinye, kuko mmugabuye mu maboko yanyu, bo n’abantu biwe bose n’igihugu ciwe; namwe muze mumugirire nk’ivyo mwagiriye Sihoni umwami w’Abamori yaba i Heshiboni.

3Nuk’ Uhoraho Imana yacu arongera agabura na Ogi umwami w’i Bashani na we mu maboko yacu, bo n’ingabo ziwe zose; turamwica, ntitwasiga n’ uwa kirazira mu bantu biwe.

4Duca tunesha ibisagara vyiwe vyose, nta gisagara cabo na kimwe tutanesheje mu bisagara vyose ukw ari mirongwitandatu mu ntāra yose yo muri Arugobu i Bashani, mu gihugu ca Ogi.

5Ivyo bisagara vyose vyari bikīkūjwe n’inzitiro ndende z’amabuye zirikw inzugi zugarijwe ibihindizo; hāri n’ibindi bisagara vyinshi cane bitāgira inzitiro.

6Turabigeseza rwose, nk’uko twāgize kwa Sihoni umwami w’i Heshiboni, tugeseza igisagara cose, uhereye ku bagabo n’abagore n’ abana.

7Arikw amasho yose ni yo twānyaze, bo n’ivyo twasahuye mur’ ivyo bisagara.

8Mur’ ico gihe uko ni ko twegukiye ivyo bihugu vy’abo bami b’ Abamori bompi bāri hakuno ya Yorodani, uhereye ku mwonga wo kuri Arunoni ugashitsa ku musozi Herumoni.

9(Uwo musozi Herumoni, Abasidoni bawita Siriyoni, Abamori bawita Seniri);

10twegukira n’ibisagara vyo mu kiyaya cose, n’i Gileyadi hose, n’i Bashani hose, gushitsa i Saleka n’ahitwa Edireyi, ibisagara vy’i Bashani mu gihugu ca Ogi.

11(Kand’ uyo Ogi, umwami w’i Bashani, ni we wenyene yar’ agasigarira k’Abarefa. Uburiri bgiwe bgar’ ubg’ icuma: mbega ntibukir’ i Raba mu Bamoni no kugeza n’ubu? Uburebure bgabgo bgar’ amatambge cenda y’ukuboko uciriye mu nkokora, ubgaguke bgar’ amatambge ane, nk’ukw itambge ry’ ukuboko risanzwe rireha.)

12Ico gihe tumaze gushikīra ico gihugu, ngiha Abareyubeni n’ Abagadi, uhereye kuri Aroweri ho ku mwonga wo kuri Arunoni, n’ igice c’umugamba w’i Gileyadi, bo n’ibisagara vyaho;

13igihimba c’umuryango wa Manase ndagiha ikindi gice gisigaye c’i Gileyadi, n’i Bashani hose mu gihugu ca Ogi, ari yo ntāra yose yo muri Arugobu. Aho i Bashani hose bahita igihugu c’ Abarefa.

14(Yayiri umwuzukuruza wa Manase ni we yanesheje iyo ntāra yose yo muri Arugobu, ari ho i Bashani, gushitsa ku rubibe rw’Abageshuri n’ Abanyamayaka: ibisagara vyaho avyitiranya n’izina ryiwe, avyita Havoti‐yayiri, nk’uko bicitwa na bugingo n’ubu.)

15Nuko mpa Abamakiri i Gileyadi.

16Abareyubeni n’Abagadi mbaha igihugu uhereye i Gileyadi ugashitsa ku mwonga wo kuri Arunoni, urubibe rukajana uwo mwonga gushitsa ku ruzi Yaboki, ari rwo rubibe rugarukirakw Abamoni;

17kandi mbaha n’ikiyaya Araba, urubibe rugarukira kuri Yorodani, uhereye i Kinereti, ugashitsa ku kiyaga co mur’ ico kiyaya Araba, ari co Kiyaga c’Umunyu, kiri musi y’ agahanamo ka Pisiga ahahera i burasirazuba.

18Mur’ ico gihe ndababarira, nt’ Uhoraho Imana yanyu abahaye iki gihugu ngo mukiganze; nt’ Abahizi mwese ni mujabuke, mwitwaje ibirwanishwa, muje imbere y’Abisirayeli bagenzi banyu.

19Nt’ Arikw abagore banyu n’ abana banyu n’inka zanyu bisigare mu bisagara vyanyu mbahaye: nti Ndazi ko mufise inka nyinshi.

20Nti Muze mushitse aho Uhoraho azohēra bagenzi banyu gushika hasi nk’uko namwe yabibahaye, bakinjira igihugu Uhoraho Imana yanyu yabahaye hakurya ya Yorodani; nti Maze muze mubone kugaruka, umuntu wese mw ishamvu yiwe nabahaye.

21Mur’ ico gihe mbarira Yosuwa, nt’ Amaso yawe yiboneye ivyo vyose Uhoraho Imana yanyu yagiriye ba bami bompi: nt’ Uko ni kw azogirira abami bose b’ibihugu mugiye kujamwo hakurya.

22Nti Ntimuze mubatinye; nti Kuk’ Uhoraho Imana yanyu ari we azobarwanira.

23Ico gihe ninginga Uhoraho,

24nt’ Uhoraho Bgirukiro, jewe umusavyi wawe utanguye kunyereka ububasha bgawe n’ubushobozi bgawe buhambaye. Nti Mbega har’ iyindi mana, yaba iyo mw ijuru canke mw isi, yoshobora gukora ibikorwa n’ibihambaye bihwanye n’ivyo ukora?

25Nti Ndakwinginze, nyemerera njabuke ndābe ico gihugu ciza co hakurya ya Yorodani, n’uriya mugamba waho mwiza, n’i Lebanoni.

26Arik’ Uhoraho arandakira kubganyu, ntiyanyemerera; arambarira, at’ Ugeze ngaho: ntiwongere kumbarira iryo jambo.

27At’ Uradūga ku mpinga ya Pisiga, utereze amaso, urābe i burengerazuba n’i burārūko n’i bumanuko n’i burasirazuba, uharābishe amaso, kuk’ uru Yorodani utazorujabuka.

28Arik’ uhanūre Yosuwa, umuremēshe, umutēre gushikama, kukw ari we azorujabuka arōngōye abo bantu, akabinjiza igihugu uzoja kurāba.

29Nuko tuguma ku mwonga aharābana n’i Beti‐peyori.

← Chapter 2 Jump to: Chapter 4 →