Deuteronomy 24

Kirundi (Bibliya Yera 1951, 1967 (Burundi))

← Chapter 23 Jump to: Chapter 25 →

1Umuntu ni yarongora umugeni, hanyuma ntamushime, kuko har’ igiteye isoni yamubonyeko, amwandikire icete co kuvāvānura, akimuhe, amwirukane mu rugo rwiwe.

2Ni yamara kuva mur’ urwo rugo, ashobora kwābīrwa n’uwundi.

3Kand’ uwo mugabo wa kabiri ni yamwanka, akamwandikira icete co kuvāvānura, akamwirukana mu rugo rwiwe, cank’ uwo mugabo wa kabiri yamwābiriye agapfa;

4umugabo wiwe wa mbere yamwirukanye ntaz’ amugarukane, kuko yamaze kwononekara; kukw ivyo ar’ ikizira k’Uhoraho; ntimuze mukwegere icaha igihugu Uhoraho Imana yanyu ibaha kw ishamvu.

5Umuntu arongoye vuba ntakwiye kuja mu ntambara, canke ngw akoreshwe igikorwa ic’ ari co cose; ariko bamureke umwaka wose, anezereze umugore wiwe yarongoye.

6Ntihaze hagire umuntu atwara urusyo rw’uwundi cank’ ingasire kw ingwati y’umwenda, kuko yoba atwaye amagara y’umuntu.

7Ni hagira uwiba umuntu w’i wabo w’Umwisirayeli, akamujana, akamugira umuja cank’ akamushōra, bakamumufatana; uwo musuma aze yicwe: ukw az’ abe ari ko mukūra ikibi hagati muri mwebge.

8Muze mwitwaririke ivy’ indwara y’imibembe, kugira ngo mugire umwete wo kwitondera no gushitsa ivyo abaherezi ari bo Balewi bazobigisha vyose; nk’ukw abo nabibageze, az’ abe ari ko namwe muvyitondera, mubishitse.

9Muze mwibuke ivyo Uhoraho Imana yanyu yagiriye Miriyamu, aho mwari mu rugendo muva muri Egiputa.

10Muri mwebge ni hagira ūgurāna mugenzi we ikintu ic’ ari co cose, ntashobora kwinjira mu nzu yiwe kwiha ingwati.

11Az’ ahagarare hanze, uwo yagurānye abe ari we amusohokanira ingwati.

12Kandi ni yaba ar’ umworo, ntaz’ arāre mu mpuzu yamugwatirije;

13ntaz’ abure kuyimusubiza izuba rikirenga, kugira ngw arāre mu mpuzu yiwe, amuhezagire; ivyo bizomubera ukugororoka imbere y’Uhoraho Imana yiwe.

14Muri mwebge ntihaze hagire ūgirira nabi umukozi w’umucangero, kand’ ar’ umworo w’umukene, ar’ uwo mu b’i wanyu, cank’ uwo mu banyamahanga baba mu bisagara vyanyu, mu gihugu canyu:

15az’ ahore amuha ingero yiwe ku musi ayikoreye; izuba ntirize rirenge atarayimuha; kukw ar’ umworo, ari ho ashize umutima; yoye kuzohava atakambira Uhoraho amurega, akagībgako n’icaha.

16Abavyeyi ntibaze bicwe bazize abana babo, kand’ abana ntibaze bicwe bazize abavyeyi: umuntu wese az’ azire iciwe caha.

17Ntihaze hagire ūgoreka urubanza rw’umunyamahanga, cank’ urw’ impfuvyi; canke ngo hagire uwaka umupfakazi impuzu yiwe kw ingwati:

18ariko muze mwibuke yuko mwari mu buja muri Egiputa, Uhoraho Imana yanyu akahabagobōtora: ni co gitumye mbabuza kuzogenza murtyo.

19Ni mwimbura imirima yanyu, hakagira uwibagiriray’ umuganda, ntaz’ asubireyo kuwuzana: uzoba uw’ umunyamahanga cank’ uw’ impfuvyi cank’ uw’ umupfakazi; kugira ng’ Uhoraho Imana yanyu abahezagire mu bikorwa vyanyu vyose.

20Muri mwebge iyo hagize ūja guhungurura ivyamye ku giti ciwe c’umwelayo, ntaz’ asubire gusesa mu mashami yawo ubugira kabiri: ibisigaye bizoba ivy’ umunyamahanga cank’ impfuvyi cank’ umupfakazi.

21Kand’ iyo hagize ūja kwāmūra inzabibu mu ruzabibu rwiwe, ntaz’ asubiremwo guhūmba: izisigaye zizoba iz’ umunyamahanga cank’ impfuvyi cank’ umupfakazi.

22Kandi muze mwibuke yuko mwari mu buja mu gihugu ca Egiputa: ni co gitumye mbagera kuzogenza murtyo.

← Chapter 23 Jump to: Chapter 25 →