Deuteronomy 4 — Kirundi (Bibliya Yera 1951, 1967 (Burundi))

1None rero, yemwe Bisirayeli, ni mwumvirize amabgirizwa n’ amatēka ashinzwe mbigisha, muvyitondere; kugira ngo mubone kubaho, mwinjire igihugu Uhoraho Imana ya ba sogokuruza yabahaye, mucegukire.

2Ntimuze mwungurire ku vyagezwe mbagera, canke ngo mubigabanye, kugira ngo mubone kwitondera ivyagezwe vy’Uhoraho Imana yanyu mbagera.

3Amaso yanyu yiboneye ivyo Uhoraho yakoze kubga Bayali y’i Peyori; kuk’ Uhoraho Imana yanyu yaranduye abantu bose bākurikiye Bayali y’i Peyori, akabakūra hagati muri mwebge.

4Ariko mweho abīfatanije n’Uhoraho Imana yanyu muracariho mwese no kugeza uyu musi.

5Rāba ndabigishije amabgirizwa n’amatēka ashinzwe, nk’uk’ Uhoraho Imana yanje yangeze, kugira ngw abe ari ko muzogenza mu gihugu mugiye kwinjira ngo mucegukire.

6Nuko muze muvyitondere, mubishitse, kukw ivyo ari vyo bizogaragariza ayandi mahanga ubgenge bganyu n’ubunyarutsi bganyu, igihe azokwumva ayo mabgirizwa yose, akavuga, ati N’ukuri iri hanga rihambaye n’ abantu b’abanyabgenge bafise ubunyarutsi.

7Mbega har’ ihanga rihambaye rifise imana iri hafi yaryo nk’uk’ Uhoraho Imana yacu aba hafi yacu, iyo tumwambaje?

8Canke har’ ihanga rihambaye rifise amabgirizwa n’amatēka ashinzwe aroranye, nk’ukw ibi vyagezwe vyose biri, nshize imbere yanyu uyu musi?

9Ariko kimwe gusa, mwiyubare, mugire umwete wo kwirinda mu mitima, mwoye kwibagira ivyo amaso yanyu yiboneye, vyoye kuva mu mitima yanyu imisi yose muzoba mukiriho; ariko muze mubimenyeshe abana banyu n’abuzukuru banyu.

10Kandi ntimwibagire wa musi mwari muhagaze imbere y’Uhoraho Imana yanyu kuri Horebu, igihe Uhoraho yambarira, ati Nkoraniriza abantu, mbacūrire amajambo, kugira ngo bige kunyubaha imisi yose bazomara bakiriho mw isi, bavyigishe n’abana babo;

11namwe mukaza, mugahagarara musi ya wa musozi warik’ urāka umuriro w’imbeya zishika mw ijuru, wubikijek’ umwiza n’igicu c’igipfungu n’umuzimagiza.

12Uhoraho yavugiye mur’ uwo muriro ababarira, namwe mwumva ijwi rivuga, ariko ntimwagira ishusho yiwe mubona, mwumvise ijwi gusa.

13Abamenyesha isezerano ryiwe, ababarira ngo murishitse, ni vyo vya vyagezwe cumi; avyandika ku bisate vy’amabuye bibiri.

14Nanje ico gihe Uhoraho ambarira kubigisha amabgirizwa n’amatēka ashinzwe, kugira ngo muze muvyitondere mushitse mu gihugu mugiye kujabukiramwo ngo mucegukire.

15Nuko mwiyubare cane, kuko mutāgize ishusho mubona na mba, kuri wa musi Uhoraho yababarira ar’ i Horebu, ari hagati mu muriro,

16kugira ngo mwoye kwihumanya, mukībāzira igishushanyo, mugishushanije n’ ishusho iy’ ari yo yose, ar’ igishushanijwe mu kigabo canke mu kigore,

17canke mu gikōko canke mu gitunzwe kiri kw isi ic’ ari co cose, canke mu kiguruka mu kirere ic’ ari co cose,

18ar’ igishushanyo c’ikinyonyera kigendera hasi ic’ ari co cose, canke c’ifi iy’ ari yo yose yo mu mazi yo mu biyaga;

19kandi mwiyubare kugira ngo ni mwararama mukarāba mw ijuru, mukabona izuba n’ukwezi n’inyenyeri, ari zo ngabo zose zo kw ijuru, bize vyoye kubakwega ngo mubisenge, mubisabe, kand’ ari vyo Uhoraho Imana yanyu yashiriyeh’ amahanga yose yo musi y’ijuru.

20Ariko mweho, Uhoraho yarabashīngūye, abakūra muri rya tanure rivugutira ivyuma, ari ryo Egiputa, kugira ngo mumubere abantu yiharije, nk’uko biri n’ ubu.

21Kand’ Uhoraho yandakiye kubganyu, andahira yuko ntazojabuka Yorodani, ngo nshike mu gihugu ciza Uhoraho Imana yanyu yabahaye kw ishamvu;

22ariko ko nkwiye kuzopfira mur’ iki gihugu, sinjabuke Yorodani: ariko mweho muzorujabuka, mwinjire ico gihugu ciza.

23Nuko mwiyubare, mwoye kwibagira isezerano ry’Uhoraho Imana yanyu yasezeranye namwe, mukībāzira igishushanyo, mugishushanije n’ ishusho y’ikintu ic’ ari co cose, Uhoraho Imana yanyu yababujije.

24Kuk’ Uhoraho Imana yanyu ar’ umuriro utōngōra, ar’ Imana ifūha.

25Ni mwamara kuvyara abana, mukagira n’abuzukuru, mumaze igihe kirekire mur’ ico gihugu, hanyuma mukihumanya, mukībāzira igishushanyo, mugishushanije n’ikintu ic’ ari co cose, mugakora ico Uhoraho Imana yanyu ibona kw ari kibi, mukayiratsa;

26uyu musi ntanze ijuru n’isi kw ivyabona yuko mutazobura guhona bidatevye, mugaherengetera mu gihugu mujabuka Yorodani muja kwinjira; ntimuzokirambiramwo, ariko muzorandurwa rwose.

27Kand’ Uhoraho azobasābagiriza mu mahanga, kandi muzosigara mur’ inkehwa mur’ ayo mahanga, iyo Uhoraho azoba yarabajanye.

28Muzohasabira imana zābājwe n’intoke z’abantu mu biti no mu mabuye, zitaruha zibona canke ngo zumve canke ngo zirye canke ngo zimoterwe.

29Arikw iyo ni mwaharonderera Uhoraho Imana yanyu, mukamurondeza imitima yanyu yose n’ubugingo bganyu bgose, muzomubona.

30Ni mwaramuka mugiye mu vyago, ivyo vyose bikabashikako, amaherezo muzohindukirira Uhoraho Imana yanyu, mumwumvire;

31kuk’ Uhoraho Imana yanyu ar’ Imana y’inyembabazi, ntizobaheba, ntizobarandura, canke ngo yibagire isezerano yasezeranye na ba sogokuruza, ikabarahira.

32Enda bariritsa ivyo mu misi yahise, mutarabaho, muhēreye ku musi Imana yaremeyek’ umuntu mw isi, muhēreye no ku mpera y’ ijuru mukageza ku yindi, yuko higeze kubah’ igihwanye n’iki kintu gikomeye, canke ko humvikanye igihwanye na co.

33Mbega har’ aho abantu bīgeze kwumva ijwi ry’Imana iri hagati mu muriro, nk’uko mwebge mwaryumvise, bagaheza bakabaho?

34Canke hīgeze kuba imana yagerageje gushingūra ihanga, ikarikūra hagati mu rindi, irikūjeyo kurekura ibigerageza, n’ibimenyetso n’ibitangaza, n’intambara, irikūjeyo n’ ukuboko kw’inkomezi kandi kubanguye, n’ibiteye ubgoba bihambaye, nk’ivyo Uhoraho Imana yanyu yabakoreye muri Egiputa muvyibonera?

35Ni mwebge mweretswe ivyo kugira ngo mumenye yuk’ Uhoraho ari we Mana, ata yindi iriho atari we.

36Yabumvishije ijwi ryiwe ari mw ijuru, kugira ngw abigishe, kandi yaberekeye kw isi umuriro wiwe uhambaye: mwumva amajambo yiwe ava hagati mur’ uwo muriro.

37Kandi kuko yakunda ba sogokuruza banyu, ni co catumye atoranya uruvyaro rwabo, we ubgiwe akabakūra muri Egiputa, abakūjey’ ubushobozi bgiwe buhambaye,

38akirukana amahanga imbere yanyu abarusha ubginshi n’inkomezi, ngo mwebge abinjize mu gihugu cabo, akibahe kibe ishamvu yanyu, nk’uko biri n’uyu musi.

39Nuk’ uyu musi mubimenye, mubishirekw imitima, yuk’ Uhoraho ari we Mana mw ijuru no mw isi, ata yindi.

40Kandi muze mwitondere amabgirizwa yiwe n’ ivyagezwe vyiwe, ivyo mbagera uyu musi, kugira ngo mube mu vyiza, mwe n’abana banyu bazovuka hanyuma, kugira ngo mwame mu gihugu Uhoraho Imana yanyu abahaye kugeza ibihe bidashira.

41Maze Mose arobanura ibisagara bitatu hakuno ya Yorodani ahahera i burasirazuba,

42kugira ng’ uwishe umuntu ahungireyo, amwishe atabigize ibigirankana, adasanzwe amwanka; az’ ahungire muri kimwe mur’ ivyo bisagara, abone gukira.

43Kimwe n’i Beseri mu bugaragwa bgo mu kiyaya, c’ubuhungiro bg’Abareyubeni; n’i Ramoti i Gileyadi, c’ubuhungiro bg’Abagadi; n’i Golani i Bashani, c’ ubuhungiro bg’Abamanase.

44Ibi ni vyo vyagezwe Mose yashize imbere y’Abisirayeli,

45ari vyo vyashinzwe bo n’amabgirizwa n’amatēka Mose yabashikirije igihe bari bavuye muri Egiputa,

46bakiri hakuno ya Yorodani, ku mwonga aharābana n’i Beti‐Peyori, mu gihugu car’ ica Sihoni umwami w’Abamori, yaba i Heshiboni, uwo Mose n’Abisirayeli banesheje, igihe bari baravuye muri Egiputa;

47bakegukira igihugu ciwe n’ica Ogi, umwami w’i Bashani; abo bompi bar’ abami b’Abamori, baganza hakuno ya Yorodani ahahera i burasirazuba,

48uhēreye kuri Aroweri ho ku mucāmo hejuru y’umwonga wo kuri Arunoni, ugashitsa ku musozi Siriyoni, ari wo Herumoni,

49n’ikiyaya Araba cose co hakuno ya Yorodani ahahera i burasirazuba, ugashitsa no ku kiyaga co mur’ ico kiyaya Araba, kiri musi y’agahanamo ka Pisiga.