Deuteronomy 29

Kirundi (Bibliya Yera 1951, 1967 (Burundi))

← Chapter 28 Jump to: Chapter 30 →

1Aya ni yo majambo y’isezerano, Uhoraho yabariye Mose gusezeranira n’Abisirayeli mu gihugu c’i Mowabu, yongewe kw isezerano yasezeraniye na bo kuri Horebu.

2Mose ahamagara Abisirayeli bose, arababgira, ati Mwiboneye ivy’ Uhoraho yakoze vyose mu maso yanyu mu gihugu ca Egiputa, abigiriye Farawo n’abamenyekana biwe bose, n’igihugu ciwe cose;

3n’ibigerageza bikomeye, n’ibimenyetso, na vya bitangaza bihambaye, amaso yanyu yiboneye.

4Arik’ Uhoraho ntiyabaha umutima wo kubitahura, n’amaso yo kuvyitegereza, n’amatwi yo kuvyumva, gushitsa kur’ uyu musi.

5Kand’ Uhoraho ati Namaze imyaka mirongwine mbarōngōra mu bugaragwa; imyambaro yanyu ntiyabashiriyeko, n’ inkweto zo mu birenge vyanyu ntizabashiriyeko.

6Ntimwagenda murya umutsima, canke ngo munywe vino cank’ inzoga, kugira ngo mumenye yuko nd’ Uhoraho Imana yanyu.

7Dushitse aha hantu, Sihoni umwami w’i Heshiboni na Ogi umwami w’i Bashani baza kudutega ngo baturwanye, turabanesha;

8dushikīra ibihugu vyabo, tubiha Abareyubeni n’Abagadi n’igihimba c’umuryango w’Abamanase, kuba ishamvu yabo.

9None rero ni mwitondere amajambo y’iri sezerano, muyashitse, kugira ngo mugire ukuboko kwiza mu vyo mukora vyose.

10Rāba uyu musi muhagaze imbere y’Uhoraho Imana yanyu mwese: abakuru b’imiryango, n’ abashingantahe banyu, n’abagabisha banyu, n’abagabo mwese bo mu Bisirayeli,

11n’abana banyu, n’abagore banyu, n’abanyamahanga baba mu nsago zanyu, uhereye ku mushenyi wanyu ukageza ku muvomyi;

12muzanywe no kuja mw isezerano ry’Uhoraho Imana yanyu, isezerano rishingishijwe indahiro, iryo Uhoraho Imana yanyu asezerana namwe uyu musi,

13kugira ngw abahagarikire, mumubere ihanga, na we ababere Imana, nk’uko yababgiye, kandi nk’uko yarahiye ba sogokuruza banyu, Aburahamu na Isaka na Yakobo.

14Kandi si mwebge mwenyene nsezeranishiriza iri sezerano n’iyi ndahiro;

15ariko ndarisezeranishiriza abahagararanye natwe uyu musi imbere y’Uhoraho Imana yacu, bo n’abatari hano uyu musi.

16Murazi ko twaba mu gihugu ca Egiputa, n’ingene twaciye hagati mu mahanga;

17kandi mwabonye ibizira bākunda, n’ibigirwamana vyabo vy’ ibiti n’amabuye n’ifeza n’izahabu vyari muri bo.

18Muri mwebge ntihaze hagire ūkūra umutima k’Uhoraho Imana yacu, ngw aje gusaba imana z’ayo mahanga, ar’ umugabo cank’ umugore cank’ inzu cank’ umuryango; kugira ngo muri mwebge hoye kuba umuzi uzana ibamba n’umururazi.

19Ntihaze hagire uwumva amajambo y’uyu muvumo, ngo yihende mu mutima wiwe, ati Nzoba amahoro, naho mpfa uko ngenze; ivyo vyoba ar’ ukurandurana ibitotahaye n’ivyumye.

20Uhoraho ntazokwemera kumuharira, arik’ uburake bgiwe n’ifūhe ryiwe bizopfūndūka nk’umwotsi kur’ uyo muntu, imivumo yose yanditswe mur’ iki gitabo imurundaneko, kand’ Uhoraho azozimiriza izina ryiwe musi y’ijuru.

21Uhoraho azomutandukanya n’ imiryango yose y’Abisirayeli, ngw amutērēre ivyago bihwanye n’ imivumo yose yo mw isezerano ryanditswe mur’ iki gitabo c’ ivyagezwe.

22Kand’ urunganwe ruzoza hanyuma, ari bo bana banyu bazokura babakurikiye, bo n’ umunyamahanga azova mu gihugu ca kure, ni babona ivyago vyabaye mur’ ico gihugu n’indwara Uhoraho yagiteje,

23bakabona yukw ico gihugu cose cabaye amazuku n’umunyu, cahiye uburimbi, ko kitakirimwa, canke ngo kimere, canke ngo kibemwo n’akātsi, ko gisigaye kimeze nk’ukw i Sodomu hākomvomvowe, bo n’i Gomora n’i Adima n’i Seboyimu, ibisagara Uhoraho yakomvomvoje uburake bgiwe n’ubushangashirwe bgiwe;

24bazobaza, mbere n’amahanga yose azobaza, bati Mbega n’iki cateye Uhoraho kugirira ico gihugu artyo? ubgo burake bg’inkazi bururumba bgavuye ku ki?

25Abantu bazobishura, bati N’uko bāretse isezerano ry’Uhoraho, Imana ya ba sekuruza, iryo yari yasezeranye na bo, igihe yabakūra mu gihugu ca Egiputa;

26bakagenda bagasaba izindi mana, bakazisenga, ar’ imana batari bigeze kumenya, izo Uhoraho atābashingiye.

27Bati Ni co catumye uburake bgiwe buziriringira ico gihugu, bukakizanira imivumo yose yanditswe mur’ iki gitabo,

28Uhoraho akabarandura, akabakūra mu gihugu cabo, bivuye kw ishavu abafitiye, n’uburake n’ubushangashirwe bginshi, akabashiburira mu kindi gihugu, nk’uko biri uyu musi.

29Ibikir’ amabanga n’ivy’ Uhoraho Imana yacu, arikw ibimaze guhishurwa n’ivyacu n’uruvyaro rwacu ibihe vyose, kugira ngo twitondere amajambo yose y’ibi vyagezwe.

← Chapter 28 Jump to: Chapter 30 →