Deuteronomy 33

Kirundi (Bibliya Yera 1951, 1967 (Burundi))

← Chapter 32 Jump to: Chapter 34 →

1Iyi ni yo mihezagiro Mose umuntu w’Imana yahezagiye Abisirayeli, atarapfa:

2at’ Uhoraho yaturutse kuri Sinayi, Yabarasiye aserutse kuri Seyiri, Yakayanganye aserutse ku musozi Parani, Avuye hagati mu masinzi y’ abera; I buryo bgiwe har’ umuriro waka.

3N’ivy’ ukuri arakunda amahanga, Abera biwe bose bari mu kuboko kwiwe, Bicaye hambavu y’ibirenge vyiwe, Umuntu wese yumva amajambo yiwe.

4Mose yadushingiye ivyagezwe, Ni vyo shamvu y’ikoraniro ry’ aba Yakobo.

5Kand’ Uhoraho yar’ Umwami mu ba Yeshuruni, Igihe abakuru bāgaba abantu bākorana, Imiryango yose y’Abisirayeli igakoranira hamwe.

6Aba Reyubeni baragahoraho, ntibagapfe, Abantu bo muri bo ntibabe bake.

7Ibi ni vyo yavuze ku ba Yuda: At’ Uhoraho, ni wumve ijwi rya Yuda, Umusubize mu bgoko bgabo. Amaboko yiwe yaramurwaniye, Nawe uz’ umubere umutabazi wo kumutabara abansi biwe.

8Aba Lewi abavugako, Ati Tumimu zawe na Urimu zawe zifiswe n’umukunzi wawe, Uwo wageragereje i Masa, Ugahārīrira na we ku mazi y’i Meriba.

9Lewi yavuze ku vya se na nyina, ati Sinkibamenya; N’abo bavukana ntabemera, Canke ngw anamenye n’ivy’ abana biwe ubgiwe; Kukw Abalewi bakomeje ijambo ryawe, Bakitondera isezerano ryawe.

10Bazokwigisha aba Yakobo amatēka washinze, Bigishe Abisirayeli ivyagezwe vyawe. Bazokumotereza imibavu, Bakwosereze ibimazi bidasonōye ku gicaniro cawe.

11Ewe Uhoraho, hezagira inkomezi za Lewi, Wemere igikorwa c’amaboko yiwe. Uze wame uvunagura urukenyerero rw’abamukūriye hasi, Bo n’abamwanka, kugira ngo ntibongere kuvyuka.

12Aba Benyamini abavugako, Ati N’umutoni w’Uhoraho, kand’ azobana na we amahoro; Yama amukingiriye bukarinda bgīra, Aba mu bitugu vyiwe.

13Aba Yosefu abavugako, At’ Igihugu ciwe kiragahezagirwa n’Uhoraho, Kironke umuhezagiro w’ibirenze ibindi biva mw ijuru, n’uw’ ikime, N’uw’ amazi aryamye hasi i kuzimu.

14Umuhezagiro w’ibirenze ibindi vyezwa n’izuba, N’uw’ ibirenze ibindi vyera uk’ ukwezi gutashe;

15N’uw’ ivy’ agahebuza vyera ku misozi yahozeho kera, N’uw’ ibirenze ibindi vyera ku mirambi yamaho;

16N’uw’ ibirenze ibindi vyo mw isi n’ibiyuzuye, N’uw’ ubuntu bg’Imwe yari muri ca gisaka c’amahwa: Umugisha ube ku mutwe wa Yosefu, Mu gitwariro c’uwagizwe mukuru muri bene se.

17Impfizi yiwe y’uburiza, icubahiro n’icayo, Amahembe yayo ni nk’ay’ imbogo: Izoyicisha amahanga yose, gushitsa ku mpera y’isi. Ni kw amasinzi y’aba Efurayimu ameze, Bo n’ibihumbi vy’aba Manase.

18Aba Zebuloni abavugako, At’ Ewe Zebuloni, nezererwa gutēra ururengo kwawe, Nawe Isakari, nezererwa kwigumira mu mahema yawe!

19Amahanga bazoyatumako ngw aze ku musozi wabo, Aho ni ho bazotangira ibimazi vy’ukugororcka. Kuko bazovotagira ibibōgabōga mu biyaga, N’ubutunzi buhishijwe mu musenyi.

20Aba Gadi abavugako, At’ Aragahezagirwa uwāgurira Gadi: Abunda nk’intambge y’ingore, Atabagura amaboko no mu gitwariro.

21Yikubitiye umugabane usumba iyindi mu gihugu, Kukw ari ho icibare c’umugabisha w’ingabo cari kibītswe; Yaje arōngōye abantu; Yashikije amatēka y’Uhoraho, N’ivyo yashinze ku Bisirayeli.

22Aba Dani abavugako, Ati Dani n’ikibuguru c’intambge, Asimba ava i Bashani.

23Aba Nafutali abavugako, At’ Ewe Nafutali, uhāze ivyo wahawe ku buntu, Wuzuye imigisha y’Uhoraho: Ni wegukire igihugu c’i burengerazuba n’ic’i bumanuko.

24Aba Asheri abavugako, Ati Asheri aragahezagirwa kuruta abandi bana, Ashirwe imbere na bene se; Ajobeke ikirenge mu mavuta ya elayo.

25Ibihindizo vyawe bizoba ivyuma n’imiringa, Kand’ ukw imisi yawe ingana, ni kw inkomezi zawe zizongana.

26Nta gihwanye n’Imana yawe, ewe Yeshuruni, Iza ireruwe n’ijuru, izanywe no kugutabara, Iza ireruwe n’ibicu, iri n’ igitinyiro.

27Imana ihoraho ni yo buhungiro bgawe, Kand’ amaboko y’ibihe vyose yama akuramira. Yirukanye abansi imbere yawe, Iravuga, iti Genda urandure!

28Uko ni kw Abisirayeli bahavuye baba amahoro, Iriba rya Yakobo rikībēra ukwaryo Mu gihugu kibamw’ ingano na vino, Ijuru ryaco rigatonyanga ikime.

29Yemwe Bisirayeli, murahiriwe! N’ihanga ki rihwanye namwe kuba ihanga ryarokowe n’Uhoraho, Ari we nkinzo ibakingira, ikabakiza, Ari we nkota ibubahiriza? Abansi banyu bazoza babakomere ibōbo, Namwe muzosiribanga ibitabo vyabo batavye ku mpinga z’imisozi.

← Chapter 32 Jump to: Chapter 34 →