Deuteronomy 26

Kirundi (Bibliya Yera 1951, 1967 (Burundi))

← Chapter 25 Jump to: Chapter 27 →

1Ni mwamara kwinjira igihugu Uhoraho Imana yanyu abahaye kw ishamvu, mukacegukira, mukakibamwo;

2muze mwābīre ku vy’umushuzo vyo mu mirima yanyu, ivyo muzokwimburira mu gihugu Uhoraho Imana yanyu abahaye, umuntu wese abishire mu gisimbo, abijane ha hantu Uhoraho Imana yanyu azoba yātoranije ngw ahashire izina ryiwe ngo rihabe.

3Az’ ashikīre umuherezi azoba ariho mur’ ico gihe, amubarire, at’ Uyu musi Uhoraho Imana yawe ndamwaturiye yuko nashitse mu gihugu yarahiye ba sogokuruza bacu kw azokiduha.

4Uwo muherezi amwākīrire ico gisimbo, akijane agitereke imbere y’igicaniro c’ Uhoraho Imana yanyu.

5Wa wundi akomeze kwaturira imbere y’Uhoraho Imana yiwe, ati Sogokuruza yar’ Umwaramu w’inyererezi; aramanuka, aja muri Egiputa, babayo ar’ imparūrwa; bahindukirayo ihanga rinini rihambaye, ry’isinzi.

6At’ Abanyegiputa batugirira nabi, badutwaza ituntu, badushira mu buja bukomeye.

7Maze dutakambira Uhoraho Imana ya ba sogokuruza, Uhoraho yumva ugutakamba kwacu, abona amarushwa yacu, n’ ubucumukure bgacu, n’agahahazo turimwo.

8Ati Maz’ Uhoraho adukūra muri Egiputa, adukūzayo ukuboko kw’inkomezi kandi kubanguye, n’ibiteye ubgoba bihambaye, n’ibimenyetso n’ibitangaza.

9Araheza atuzana ino, aduha iki gihugu, ar’ igihugu gitemba amata n’ubūki.

10Ati None nzanye ku vy’umushuzo vyo mu mirima wampaye, ewe Uhoraho. Ukw az’ abe ari kw abitereka imbere y’Uhoraho Imana yiwe, amusenge.

11Aheze anezererwe ivyiza vyose Uhoraho Imana yiwe yamuhaye, anezeranwe n’abo mu rugo rwiwe, n’Umulewi n’inyambukīra baba i wabo.

12Ni mwamara gukūra ikigiracumi ku vyo mwejeje vyose mu mwaka ugira gatatu, ari wo mwaka wo gutangamw’ ibigiracumi nyene, muze mubihe Abalewi n’inyambukīra n’impfuvyi n’abapfakazi, babirīre i wanyu, bahāge;

13umuntu wese aheze avugire imbere y’ Uhoraho Imana yanyu, ati Nkūye ivyarobanuwe mu nzu yanje, mbihaye Umulewi n’inyambukīra n’ impfuvyi n’umupfakazi, nk’ukw ivyagezwe vyawe vyose biri, ivyo wangeze; sinaciye mu cagezwe cawe na kimwe, canke ngo ngire ico nibagira muri vyo;

14sinatamiye kur’ ivyo vyarobanuwe ngandaye; sinabiteruye mpumanye, canke ngo ndabitange kw ibiterekerezwa imizimu; ariko numviye wewe Uhoraho Imana yanje, nitondeye ivyo wangeze vyose.

15Tuma inyonga zawe hasi, ur’ iyo mw ijuru ah’ uba hēra, uduhe umugisha twebge abantu bawe b’Abisirayeli, twe n’igihugu waduhaye, nk’uko warahiye ba sogokuruza kuzoduha igihugu gitemba amata n’ubūki.

16Uyu musi Uhoraho Imana yanyu ababariye kwumvira ayo mabgirizwa n’ayo matēka yashinze; nuko muze muvyitondere, mubishizekw imitima yanyu yose n’ ubugingo bganyu bgose, mubishitse.

17Uyu musi mwātuye yuk’ Uhoraho ari we Mana yanyu, kandi ko muzogendera mu nzira ziwe, mukitondera amabgirizwa yiwe n’ivyagezwe vyiwe n’amatēka yashinze, mukamwumvira.

18Kand’ Uhoraho na we uyu musi yātuye ko muzomubera ihanga yiharije, nk’uko yabasezeraniye; nuko mukwiye kwitondera ivyagezwe vyiwe vyose,

19kugira ngw abasumbishe ayandi mahanga yose yaremye, muyarushe gushemagizwa no kwāmāmara no kwubahwa, mubere Uhoraho Imana yanyu ihanga ryera, nk’uko yavuze.

← Chapter 25 Jump to: Chapter 27 →