Deuteronomy 6

Kirundi (Bibliya Yera 1951, 1967 (Burundi))

← Chapter 5 Jump to: Chapter 7 →

1Ibi ni vyo vyagezwe n’amatēka ashinzwe, Uhoraho Imana yanyu yangeze kubigisha, kugira ngo muze muvyitondere mushitse mu gihugu mugiye kujabukiramwo ngo mucegukire;

2ngo mwubahe Uhoraho Imana yanyu, mwitondere amabgirizwa yiwe yose n’ ivyagezwe vyiwe vyose, ivyo mbagera, mwe n’abana banyu n’ abuzukuru banyu, imisi yose y’ ukubaho kwanyu, kugira ngo mubone kuramba.

3None rero, yemwe Bisirayeli, ni muvyumve, muvyitondere; kugira ngo mumererwe neza, mugwire cane, muri mu gihugu gitemba amata n’ ubūki, nk’uk’ Uhoraho Imana ya ba sogokuruza yabasezeraniye.

4Ni mwumve, yemwe Bisirayeli: Uhoraho Imana yacu ni we Uhoraho wenyene;

5kandi mukundishe Uhoraho Imana yanyu imitima yanyu yose, n’ ubugingo bganyu bgose, n’inkomezi zanyu zose.

6Ayo mabgirizwa mbageze uyu musi, az’ ahore ku mitima yanyu:

7muze mugire umwete wo kuyigisha abana banyu; muze muyahoze mu kanwa iyo mwicaye mu nzu, n’iyo muriko muragenda mu nzira, n’iyo muryamye, n’iyo muvyutse.

8Muze muyahambire ku maboko yanyu, ababere ikimenyetso, muyashire mu ruhanga nk’amambe, abe hagati y’amaso yanyu.

9Muze muyandike ku bishimaryango vy’ amazu yanyu no ku bikingi vy’ amarembo.

10Uhoraho Imana yanyu, ni yamara kubashikana mu gihugu yarahiye ba sogokuruza banyu kw azokibaha, Aburahamu na Isaka na Yakobo, kirimw’ ibisagara binini‐binini vyiza mutubatse,

11n’amazu yuzuye ivyiza vy’uburyo bgose mutāshizemwo, n’ivyobo vyimbiwe kubīka amazi mutimvye, n’imirima y’imizabibu n’imyelayo mutāteye, mukarya, mukāma mu gahimbo;

12muze muheze mwirinde, ntimwibagire Uhoraho, yabakūye mu gihugu ca Egiputa, mu nzu y’ubuja.

13Muze mwubahe Uhoraho Imana yanyu, abe ari we musaba, izina ryiwe abe ari ryo murahira.

14Ntimuze mugendanire izindi mana, zo mu mana z’amahanga abakikije:

15kuk’ Uhoraho Imana yanyu ari hagati muri mwebge ar’ Imana ifūha; kugira ng’ uburake bg’Uhoraho Imana yanyu bgoye kubaziriringira, akabarandura, akabakūra kw isi.

16Ntimukagerageze Uhoraho Imana yanyu, nk’uko mwamugeragereje i Masa.

17Muze mugire umwete wo kwitondera ivyagezwe vy’Uhoraho Imana yanyu, n’ivyo yababariye, n’amabgirizwa yiwe yabagezeko.

18Kandi muze mukore ivyo Uhoraho abona ko bitunganye kandi kw ari vyiza, kugira ngo mumererwe neza, mubone kwinjira ca gihugu ciza Uhoraho yarahiye ba sogokuruza kw azokibaha, mucegukire,

19ni yaheza kwirukana abansi banyu imbere yanyu, nk’uko yavuze.

20Mu gihe kizoza, ni hagira uwo mu bana banyu abaza se, at’ Ibi vyagezwe n’aya mabgirizwa n’aya matēka ashinzwe, Uhoraho Imana yacu yabageze, vyavuye ku ki?

21aze yishure uwo mwana, ati Twari muri Egiputa tur’ abaja ba Farawo, maz’ Uhoraho adukūzay’ ukuboko kw’ inkomezi kandi kubanguye,

22yerekanira imbere yacu ibimenyetso n’ibitangaza bikomeye vy’ivyago, abiteje Egiputa na Farawo n’urugo rwiwe rwose;

23adukūrayo kugira ngw atujane mu gihugu yarahiye ba sogokuruza kw azoduha.

24Kand’ Uhoraho atubarira kwitondera ayo mabgirizwa yose, no kumwubaha we ubgiwe, Uhoraho Imana yacu, kugira ngo twame mu mahirwe imisi yose, atuzigame atubesheho, nk’uko biri n’uyu musi.

25Kandi ni twitondera ivyo vyagezwe vyose imbere y’Uhoraho Imana yacu, nk’uko yabitugeze, bizoduharūrwako nk’ukugororoka.

← Chapter 5 Jump to: Chapter 7 →