Deuteronomy 19

Kirundi (Bibliya Yera 1951, 1967 (Burundi))

← Chapter 18 Jump to: Chapter 20 →

1Uhoraho Imana yanyu ni yamara kurandura ben’ igihugu agira ngw abahe, ari bo ya mahanga, namwe mukegukira ico gihugu cabo, mukinjira ibisagara vyabo n’amazu yabo;

2muze mwirobanurire ibisagara bitatu hagati mu gihugu canyu, ico Uhoraho Imana yanyu abahaye ngo mucegukire.

3Muze muharure amabarabara ajayo, kand’ ico gihugu Uhoraho Imana yanyu abahaye kw ishamvu, muze mukigabanye mu bihimba bitatu, kugira ng’ umukoracumu abone guhungira mu gisagara kimwe mur’ ivyo.

4Uku ni ko bikwiye kugenda ku vy’umukoracumu azohungirayo, ngw abone gukira: ūzokwica umuntu atabigize ibigirankana, atar’ asanzwe amwanka;

5nk’iy’ umuntu ajanye na mugenzi we mu kibira kwicira ibiti, akihanukīra n’incabiti guca igiti, incabiti ikaroka, ikamījūkira kuri mugenzi we, ikamwica; ben’ uyo az’ ahungire mu gisagara kimwe mur’ ivyo, abone gukira;

6bibe birtyo kugira ng’ umuhōzi amukurikiye ntaz’ amuhamvye mu nzira akiratse, bitewe n’uko habaye kure, akamwica; kand’ atar’ akwiye gupfa, kukw atar’ asanzwe amwanka.

7Ni co gitumye mbagera, ngo mwirobanurire ibisagara bitatu.

8Uhoraho Imana yanyu ni yasunika hirya imbibe zanyu, nk’uko yasezeraniye ba sogokuruza banyu arahira, akabaha igihugu cose yabasezeraniye;

9ni mwitondera ibi vyagezwe vyose mbagera uyu musi, mukabishitsa, mugakunda Uhoraho Imana yanyu, mukāma mugendera mu nzira ziwe, azokibaha; maze muze muheze mwironderere ibindi bisagara bitatu, mubigereke kuri vya bindi bitatu vyari bisanzwe;

10kugira ngw amaraso y’abatācumuye ntaz’ avishirizwe mu gihugu canyu, ico Uhoraho Imana yanyu abahaye kw ishamvu, ayo maraso akazohava abakora.

11Arik’ umuntu ni yanka uwundi, akamuryamira, agaheza akamuvumbukira, akamwica, maz’ agahungira muri kimwe mur’ ivyo bisagara;

12abakuru bo mu gisagara c’i wabo baze batume kumukūrayo, bamushikirize umuhōzi, amwice.

13Ntimuze mumugirire akagongwe, arikw amaraso y’ūtācumuye muze muyīkūreko mwebge Abisirayeli, kugira ngo mubone kuba mu vyiza.

14Ni mwamara kwegukira amashamvu mu gihugu Uhoraho Imana yanyu abahaye ngo mucinjire, ntihaze hagire ūshingūra akarimbi k’urubibe rw’umubanyi wiwe, kāshinzwe n’aba mbere.

15Icabona kimwe gusa ntikirangije kwagiriza umuntu ico yagabitanije cank’ ikindi caha ic’ ari co cose; amajambo az’ aringanizwe, bivuye mu kanwa k’ ivyabona bibiri canke bitatu.

16Umuntu ni yaja kurega uwundi ibinyoma, akamurega ngo yakoze ikibi;

17abo bompi bāgiranya, baze bahagarare imbere y’ Uhoraho, imbere y’abaherezi n’ abacamanza bazoba bariho mur’ ico gihe;

18abo bacamanza baze babibariritse neza; maze ni basanga uwo muntu avuga ibinyoma, kw abeshera mugenzi we,

19muze mumushire aho yagira ashire mugenzi we. Ukw az’ abe ari ko mukūra ikibi hagati muri mwebge.

20Abasigaye bazovyumva batinye, boye kwongera gukorera muri mwebge ikibi kingana girtyo.

21Ntimuze mugirire akagongwe ūmeze artyo; ubugingo buze buhōrwe ubundi, ijisho rihōrwe irindi, iryinyo rihōrwe irindi, igikonjo gihōrwe ikindi, ikirenge gihōrwe ikindi.

← Chapter 18 Jump to: Chapter 20 →