Deuteronomy 18

Kirundi (Bibliya Yera 1951, 1967 (Burundi))

← Chapter 17 Jump to: Chapter 19 →

1Abaherezi, ari bo Balewi, mber’ umuryango wa Lewi wose, ntibaze bagire umugabane cank’ ishamvu mu Bisirayeli: ariko baze batungwe n’ibimazi bizanirwa Uhoraho vyo gutōngōrwa n’umuriro, n’ibindi yagerewe.

2Ntibaze bagire ishamvu mu b’i wabo: Uhoraho ni we shamvu yabo, nk’uko yababariye.

3Uyu az’ abe ari wo uba umwanya w’abaherezi abantu bakwiye kuzohora babakūrira: ūtanze ikimazi, ar’ inka cank’ intama, az’ ahore akūrira umuherezi igikenye c’ukuboko, n’imisaya yompi, n’ umushīshīto.

4Kandi muze muhore mubaha ku vy’umushuzo, ku mpeke zanyu no kuri vino yanyu no ku mavuta yanyu ya elayo, n’ubgoya bg’ītanguye gukemurwa mu ntama zanyu.

5Kukw ari bo Uhoraho Imana yanyu yatoranije mu miryango yanyu yose, kugira ngo baze bahore bakora igikorwa c’ubuherezi mw izina ryiwe, bo n’uruvyaro rwabo, ibihe vyose.

6Kand’ Umulewi ni yava i wanyu ah’ aba, ah’ ari ho hose muri mwebge Abisirayeli, akaja ahantu Uhoraho azoba yātoranije, ashobora kuza ah’ agombeye hose,

7akore igikorwa c’ubuherezi mw izina ry’Uhoraho Imana yiwe, nk’ ukw ab’i wabo bose b’Abalewi basanzwe bakora, bahagarara ngaho nyene imbere y’Uhoraho.

8Az’ agire umugabane ungana n’uw’ abandi ku vyo kurya, ukūye ivyo yaguze itongo yarazwe na se.

9Ni mwamara gushika mu gihugu Uhoraho Imana yanyu abaha, ntimuze mwige gukora ivy’ ibizira ayo mahanga akora.

10Muri mwebge ntihaze haboneke umuntu atanga umwana wiwe kw ikimazi, ar’ uw’ umuhungu canke w’umukobga, ngo yoswe mu muriro, canke ngo haboneke ūragura, cank’ ūtera amabara, cank’ umupfumu, cank’ umurozi,

11cank’ umwābūzi, cank’ ūja guhamagara imizimu, cank’ umumenyi, cank’ ūraguza imizimu.

12Kuk’ ūkora ben’ ivyo wese aba abaye umuyobe k’Uhoraho; kand’ ubgo buyobe ari bgo butumye Uhoraho Imana yanyu agira yirukane ayo mahanga imbere yanyu.

13Ariko mweho muze mube abaroranye k’Uhoraho Imana yanyu.

14Kukw ayo mahanga mugiye gusohora ar’ abantu bemera abatera amabara n’ abapfumu; ariko mweho, Uhoraho Imana yanyu ntiyemera ko mugenza murtyo.

15Uhoraho Imana yanyu azobahagurukiriza ūvugishwa na we ameze nkanje, ava muri mwebge, mu b’i wanyu: az’ abe ari we mwumvira.

16Bizoba nk’uko mwabisavye Uhoraho Imana yanyu mur’ i Horebu, kuri wa musi mwari mukoranye, aho mwavuga, muti Ntidusubire kwumva ijwi ry’Uhoraho Imana yacu, no kubona urya muriro uhambaye, ntiduhave dupfa.

17Uhoraho akambarira, at’ Ivyo bavuze babivuze ko.

18Ati Nzobahagurukiriza ūvugishwa nanje ava mu b’i wabo, ameze nkawe; ati Nzoshira amajambo yanje mu kanwa kiwe, na we azobabarira ivyo ndamugeze vyose.

19Ati Kand’ ūtazokwumvira amajambo yanje uyo azovuga mw izina ryanje, nzobimuhōra.

20At’ Arik’ umuvugishwa azohāngāra kwigenera ijambo ntamugeze kuvuga, akarivuga mw izina ryanje, cank’ akagira ico avuga mw izina ry’izindi mana, uwo muvugishwa azobizira apfe.

21Ariko ni mwivuganya mu mitima yanyu, mut’ Ijambo Uhoraho atāvuze tuzorimenya dute?

22Umuvugishwa azogira ico avuga mw izina ry’Uhoraho, hanyuma ntikibe, ntigishike; ico kizoba kitāvuzwe n’Uhoraho: uwo muvugishwa azoba yahāngāye kucigenera: ntimuze mumutinye.

← Chapter 17 Jump to: Chapter 19 →