Deuteronomy 23

Kirundi (Bibliya Yera 1951, 1967 (Burundi))

← Chapter 22 Jump to: Chapter 24 →

1Umenetse amavya, cank’ ūshāhūwe, ntaz’ agere mw ikoraniro ry’Uhoraho.

2Umuntu w’ikivyarwa ntaz’ agere mw ikoraniro ry’Uhoraho; haba n’uwo mu ruvyaro rwiwe azorigeramwo, eka mber’ uko bazogenda bavyarana gushitsa no ku bihe cumi.

3Ntihaze hagire Umwamoni cank’ Umunyamowabu agera mw ikoraniro ry’Uhoraho; haba n’ uwo mu runganwe rwabo azorigeramwo, eka mber’ uko ruzogenda rukurikirana gushitsa icumi;

4kuko batābashanganije ivyo kurya n’amazi, igihe mwava muri Egiputa; kandi kuko bāhēreye Balamu mwene Beyori w’i Petori ho muri Aramu‐Naharayimu ngw abavume.

5Yamar’ Uhoraho Imana yanyu yanka kwumvira Balamu, arik’ uwo muvumo Uhoraho Imana yanyu awubahindurira umugisha, kuko yabakunda.

6Muze murinde mupfa mutabendeje ivy’ amahoro cank’ ivyiza ukw ibihe bizoha ibindi.

7Ntimuze mugirire akazīka Abanyedomu, kuko mur’ akara kamwe, kandi ntimugirire akazīka Abanyegiputa, kuko mwar’ inyambukīra mu gihugu cabo.

8Abuzukuru babo bazovuka hanyuma bazoshobora kuja mw ikoraniro ry’Uhoraho.

9Ni mwagenda gutera abansi banyu, mukagira aho mushagaje, muze mwirinde ikintu kitabereye cose.

10Muri mwebge ni hagira umugabo yagize ivyamubayeko mw ijoro, bikamuhumanya, az’ agende ave aho mushagaje, ntaz’ ahagaruke uwo musi;

11maze bugira bugorobe, yiyuhagire; izuba rirenze, abone kugaruka aho mushagaje.

12Kandi muze mugire ahantu hirya y’aho mushagaje, h’ukwihagarika;

13kand’ umuntu wese muri mwebge az’ agire ikimīto agendana; maz’ iy’ agiye ku gahinga, akicara, az’ acimbishe ikinogo, aheze arenzekw ivu ibimuvuyemwo:

14kuk’ Uhoraho Imana yanyu agendagenda hagati y’aho mushagaje, kugira ngw abakize, agabure abansi banyu mu maboko yanyu; ni co gituma aho mushagaje hakwiye kuba ahantu hera, kugira ngo ntaz’ ababonemw’ ikintu na kimwe giteye ishishi, akarora irya, akabata.

15Ni hagira umugurano acika, ahunze shebuja, agahungira muri mwebge, ntimuze mumumuhe;

16az’ abane namwe, abe hagati muri mwebge, ah’ azokwihitiramwo kuba mu bisagara vyanyu, ah’ ashima: ntimuze mumugirire nabi.

17Ntihaze habemwo ba maraya mu Bisirayelikazi, canke ngo hagire abagabo bendana mu Bisirayeli.

18Ntihaze hagire ūjana mu ngoro y’Uhoraho Imana yanyu ibihērewe maraya, cank’ ibihērewe umugabo yendwa, ngw abishikishe isezerano iry’ ari ryo ryose: kukw ivyo vyompi ar’ ubuyobe k’Uhoraho Imana yanyu.

19Muri mwebge ntihaze hagire ūgurāna mugenzi we ngw amucire ivy’ inyungu, ar’ amahera, ar’ ivyo kurya, ar’ ikindi kintu cose cotanzwekw inyungu.

20Umunyamahanga we murashobora kumucira ivy’ inyungu iyo mumugurānye, arik’ uw’ i wanyu ntimuze mumucire inyungu: kugira ng’ Uhoraho Imana yanyu ibahe umugisha ku co muzoba mukoze cose muri mu gihugu mugiye kwinjira ngo mucegukire.

21Muri mwebge ni hagira ūsezeranira isezerano Uhoraho Imana yiwe, ntaz’ atebe kurishitsa; kuk’ Uhoraho Imana yiwe itazobura kubimubaza, agasanga vyamuhindukiye icaha.

22Ariko ni yareka kugira ico asezerana, ntibizomubera icaha.

23Ibimwiviriye mu kanwa az’ avyitondere, abishitse, kukw ari vyo yasezeraniye Uhoraho Imana yiwe bivuye mu mutima, akabivugisha akanwa.

24Muri mwebge ni hagira ūshika mu ruzabibu rw’uwundi, inzabibu ashobora kuzirīra aho nyene ukw agomba, agahāga; ariko ntagire izo atēkera mu co afise.

25Kandi ni hagira ūca mu mahonda y’uwundi, ashobora kumyoza utwo ahekenya, ariko ntashobora gushira umuhoro muri yo.

← Chapter 22 Jump to: Chapter 24 →