Deuteronomy 28 — Kirundi (Bibliya Yera 1951, 1967 (Burundi))

1Ni mwagira umwete wo kwumvira Uhoraho Imana yanyu, mukitondera ivyagezwe vyiwe vyose mbagera uyu musi, mukabishitsa, Uhoraho Imana yanyu azobashira hejuru gusumba amahanga yose yo mw isi.

8Uhoraho azorungika umugisha ubane namwe, ube mu bigega vyanyu no mu vyo mukora vyose; kand’ Uhoraho Imana yanyu azobahēra umugisha mu gihugu abahaye.

9Uhoraho azobahagarikira ngo mumubere ihanga ryera, nk’uko yabarahiye, ni mwitondera ivyagezwe vyiwe, Uhoraho Imana yanyu, mukagendera mu nzira ziwe.

10Kand’ amahanga yose yo kw isi azobona yuko mwitiriwe izina ry’Uhoraho, abatinye.

11Uhoraho azobasesekariza ivyiza, agwize uruvyaro rwo mu nda zanyu, n’urwo mu masho yanyu, n’ imirima yo mu ndimiro zanyu, mu gihugu yarahiye ba sogokuruza banyu kw azokibaha.

12Uhoraho azobugururira ijuru, ari ryo bubīko bgiwe buninahaye, ngw ahe igihugu canyu imvura mu gihe cayo, ahezagire n’ibikorwa vyanyu vyose; amahanga menshi azoza kubagurāna, ariko mweho ntimuzoja kuyagurāna.

13Uhoraho azobagira umutwe, ntazobagira umurizo; muzokwama mur’ abo hejuru, ntimuzoba abo hasi, ni mwumvira ivyagezwe vy’Uhoraho Imana yanyu mbagera uyu musi, mukavyitondera mukabishitsa,

14ntimukikamire i buryo cank’ i bumoso, ngo muve ku kintu na kimwe mu vyo mbageze uyu musi, mukaja kugendanira izindi mana ngo muzisabe.

15Ariko ni mutumvira Uhoraho Imana yanyu, ngo mwitondere ivyagezwe vyiwe vyose n’amabgirizwa yiwe yose mbagera uyu musi, iyi mivumo yose izobazako, ibashikīre.

16Muzogira umuvumo mu gisagara, muzogira umuvumo mu ndimiro.

17Mu bisimbo vyanyu hazoba umuvumo, bo no mu twato twanyu mucumbamwo.

18Uruvyaro rwo mu nda zanyu ruzovumwa, bo n’imirima yo mu ndimiro zanyu, n’uruvyaro rw’inka zanyu n’urw’ imikuku yanyu.

19Muzogira umuvumo mu maja no mu maza.

20Uhoraho azobarungikira umuvumo, n’amananiza, n’ubgihebūre, mu vyo muzogerageza gukora vyose, gushitsa aho muzorandurirwa, mugaherengetera vuba, muhōwe ibibi muzoba mwakoze, vyatumye mumuheba.

21Uhoraho azobatērēra ikīza, kibūmireko, kugeza ah’ azobaherengetereza mu gihugu mugiye kwinjira.

22Uhoraho azobatērēra ibizotuma mugenda mukōnyēra bo no kurwara inyonko n’ibivyimba birurumba, n’indugumba n’ikigatwa n’ukurumvya n’ururyi rw’agahezambuto: bizobakurikirana gushitsa muhonnye.

23Ijuru ryo hejuru yanyu rizomera nk’umuringa, n’isi muhagazeko ibe nk’icuma.

24Mu gishingo c’imvura Uhoraho azorekurira umusenyi n’umukungugu mu gihugu canyu, gushitsa murandutse.

25Uhoraho azotuma muneshwa n’abansi banyu: muzojana inzira imwe mubateye, mu kubahunga muce mu nzira ndwi; muzoba akūmiza mu bihugu vyose vyo mw isi.

26Imivyimba yanyu izoba inyama z’ibisīga vyose vyo mu kirere, n’iz’ ibikōko vyo kw isi, ntihazogira ūvyāmurura.

27Uhoraho azobatērēra ibihute nk’ivyo yatērereye Abanyegiputa, no gusiduka amagara, n’urukemba n’ amahere, ivyo mutazoshobora kuvūrwa.

28Uhoraho azobatērēra ibisazi n’ubuhumyi n’ubuyingiyingi;

29muzogenda mukabakaba ku murango w’amashōka, nk’ukw impumyi ikabakaba mu mwiza, kandi ntimuzogira ukuboko kwiza mu vyo mukora; muzokwama muhahazwa munyagwa na ntaryo, ata kibatabara.

30Muzosaba abageni, barongorwe n’abandi; muzokwubaka amazu, ntimuyabemwo; muzotera imizabibu, ntimuzoyāmūra.

31Inka zanyu zizobāgwa mubona, ntimuzoziryako; indogoba zanyu zizonyagwa murorēra, ntimuzikomōrerwe; intama zanyu zizohabga abansi banyu, ntihagire ikibatabara.

32Abahungu banyu n’abakobga banyu bazonyagwa bahabge irindi hanga, amaso yanyu azokwama areretse, ahere mu nzira burinde bgira, kubgo kubakumbura, ata co mushobora gukora.

33Imirima yo mu ndimiro zanyu, n’ivyo mwakoze vyose, bizoribga n’ihanga mutazi; muzokwama muhahazwa mucuranguzwa na ntaryo,

34bitume musazwa n’ivyo amaso yanyu azobona biba.

35Uhoraho azobatērēra ibihute bibi mu mavi no ku maguru, mudashobora kuvūrwa; mber’ azobibatēza bihēre mu bgoro bg’ikirenge bigeze mu gitwariro.

36Uhoraho azobatangana n’umwami muzoba mwiyimikiye, abatange mu maboko y’ihanga mutigeze kumenya, mwe na ba sogokuruza; mushitseyo muzohasabira izindi mana z’ibiti n’iz’ amabuye.

37Kandi mur’ ayo mahanga yose ah’ Uhoraho azoba yarabajanye, muzohahindukira akajoreza n’iciro ry’imigani n’agashinyaguro.

38Muzosohora imbuto nyinshi, mwimbure bike, kukw inzige zizobirya.

39Muzotera imizabibu, muyikorere, ariko ntimuzonywa vino yayo, canke ngo muyāmūre, kukw ingungu zizoyirya.

40Mu gihugu canyu cose muzoba mufise imyclayo, ariko ntimuzokwisiga amavuta yayo, kukw iyo myelayo yanyu izorumba.

41Muzovyara abahungu n’abakobga, ariko ntibazoba abanyu, kuko bazoshorerwa ar’ inyagano.

42Ibiti vyanyu vyose n’ imirima yanyu inzige ni zo zizovyihariza.

43Abanyamahanga bari muri mwebge ni bo bazogenda barushiriza kuja hejuru, namwe muzogenda murushiriza gusubira hasi.

44Muzoja kubagurāna, ariko bo ntibazoza kubagurāna; bo bazoba umutwe namwe mube umurizo.

45Kand’ iyo mivumo yose izobashikako; izobakurikirana, ibahamvye, gushitsa aho muzorandukira, kuko muzoba mutumviye Uhoraho Imana yanyu, ngo mwitondere ivyagezwe vyiwe n’amabgirizwa yiwe, ivyo yabageze.

46Iyo mivumo izoba kuri mwebge ngw ibe ikimenyetso n’akūmiza, bo no ku ruvyaro rwanyu ibihe vyose.

47Ko muzoba mwaranse gukoreranira Uhoraho Imana yanyu umunezero n’umutima ukunze, mugifise umurengera wa vyose,

48ni co kizotuma mukorera abansi banyu, abo Uhoraho azobagomorera kubatēra, mufise inzara n’inyota, mwambaye ubusa, muburaniwe muri vyose; azobambika ingōgo y’icuma mw izosi, gushitsa ah’ azobaherengetereza.

49Uhoraho azobagomorera ihanga rya kure, ribatere, arikūye ku mpera y’isi, rize nk’ukw inkukuma yirasa, ihanga mutazomenya ururimi rwaryo,

50ihanga rigendana ijisho rikaze, ritazosonera abashaje, canke ngo rigirire abana akagongwe.

51Bazorya inyana z’ inka zanyu, n’ivyo imirima yanyu izoba yarēze, gushitsa aho muzorandukira; nta co bazobasigariza, ar’ icitwa uruheke, canke vino, cank’ amavuta ya elayo, cank’ uruvyaro rw’inka zanyu cank’ urw’ imikuku yanyu, gushitsa aho bazobahonereza.

52Bazota hagati ibisagara vyanyu vyose, bavyugarize, gushitsa ah’ inzitiro zanyu ndende zikomeye muzoba mwizigiye, zizohomvagurirwa mu gihugu canyu cose; mbere bazokwugariza ibisagara vyanyu vyose vyo mu gihugu canyu cose Uhoraho Imana yanyu yabahaye.

53Kandi kubgo kwugarizwa no gusūgerezwa, abansi banyu bazoba babasugereje, muzoruhira kurya uruvyaro mwivyariye, murye abana banyu b’ abahungu n’abakobga, abo Uhoraho Imana yanyu azoba yarabahaye.

54Umugabo wo muri mwebge yamenyereye kudibama, yamye ar’ igifyine, azorāba irarīrari mugenzi we, n’umugore wiwe bāpfumbatirana, n’abana biwe azoba yar’ agisigaranye,

55bitume ata n’umwe muri bo aha ku nyama z’abana biwe azohora arya, kukw azoba asigaye aburaniwe, kubgo kwugarizwa no gusūgerezwa, abansi banyu bazoba babasūgereje mu bisagara vyanyu vyose.

56Umugore wo muri mwebge yamenyereye kudibama, yahora yamikaye, atohīrahīra ngw akandagize ikirenge hasi kubgo kwamikara no kudibama, azorāba irarīrari umugabo wiwe bāpfumbatirana, n’umwana wiwe w’umuhungu n’ umukobga,

57bitume abacura ingovyi yamwiviriye mu nda, abacure n’utubondo twiwe ukw atuvyaye; kukw azobarīra mu mpisho, bitewe no kuburanirwa muri vyose, kubgo kwugarizwa no gusūgerezwa, abansi banyu bazoba babasūgereje mu bisagara vyanyu.

58Ni mutitondera amajambo yose yo mur’ ibi vyagezwe vyanditswe mur’ iki gitabo, ngo mubishitse; muteko mutinye iri zina ry’icubahiro riteye ubgoba, ni ry’iri: UHORAHO IMANA YANYU;

59Uhoraho azobatērēra ivyago vy’igitangaza, mwe n’ uruvyaro rwanyu; bizoba ivyago bikomeye, vy’igihe kirekire, n’ indwara zikomeye z’igihe kirekire.

60Kandi za ndwara zose mwahora mutinya muri Egiputa azozihindukiza, azibatēze namwe, zibamateko.

61Mbere n’indwara zose n’ivyago vyose bitarinze kwandikwa mu gitabo c’ibi vyagezwe, na vyo Uhoraho azobibatēza, kugeza aho muzohonera.

62Kandi muzosigara mur’ inkehwa, naho muzoba mwanganya ubginshi n’inyenyeri zo kw ijuru; kuko muzoba mutumviye Uhoraho Imana yanyu.

63Kandi nk’uk’ Uhoraho vyamuhimbara kubagirira neza no kubagwiza, ni ko bizomuhimbara kubahonnya no kubatikiza; muzorandurwa mu gihugu mugiye kwinjira ngo mucegukire.

64Kand’ Uhoraho azobashwiragiriza mu mahanga yose, uhereye ku mpera y’isi ugashitsa ku yindi; kandi muzosabiray’ izindi mana z’ibiti n’iz’amabuye, mutigeze kumenya, ari mwebge canke ba sogokuruza banyu.

65Kandi mur’ ayo mahanga nta mahoro muzohabonera; ntimuzogira uburagamo bg’aho mushinga ikirenge; Uhoraho azobaha kwamana imitima ihagaze, no guhwera mu kajisho, no kugenda muhondobēra mu mitima.

66Muzokwama mutegekanya ibigiye kubabako, mwamane ubgoba ku murango no mw ijoro, ata kizigizigi c’uko mugikira.

67Buzoca, mugire mut’ Iyo bgira! Buzokwira, mugire mut’ Iyo buca! mubitewe n’ubgoba buri mu mitima yanyu bgayiranduye, n’ivyo amaso yanyu azohora abona.

68Kand’ Uhoraho azobasubiza muri Egiputa muri mu māto, mujanye ya nzira nababarira, nti Ntimuzosubira kuyibona ukundi; mushitseyo muzokwishōra mu bansi banyu, ngo mube abagurano n’ abaguranokazi, ariko ntimuzobona uwo kubagura.